ཀྲུང་གོའི་བོད་ལྗོངས་དྲ་བའི་འཕྲིན། ཟླ8པའི་ཚེས14ཉིན་གྱི་སྔ་དྲོའི་ཆུ་ཚོད7པར། པེ་ཅིང་ཆིང་ཧྭ་ཁྲང་ཀེང་སྨན་ཁང་དུ་ཕ་ཚེ་རྡོ་ཡིས་སྨན་ཁང་ནས་ཕྱིར་དོན་པའི་འགྲོ་ལུགས་གཉེར་རྩིས་བྱེད་པ་དང་། ཞོར་དུ་བོད་སྐད་ལམ་ནས་རང་ཉིད་ཀྱི་བུ་མོར་བདེ་འཇགས་ལ་གཟབ་གཟབ་བྱེད་དགོས་པའི་དྲན་སྐུལ་བྱེད་བཞིན་ཡོད།
སྟོན་ཁ། ལོ་ཏོག་ལ་ལོ་ལེགས་ཀྱི་འབྲས་བུ་སྨིན་པའི་སྟོན་དུས་འདིར། བུ་མོ་ཚེ་བརྟན་གྱི་ངོས་ནས་བརྗོད་ན་དོན་སྙིང་ལྡན་ཤོས་དང་གྲུབ་འབྲས་ཆེ་ཤོས་ནི་གཟུགས་པོ་བདེ་ཐང་སླར་གསོ་བྱུང་བ་དེ་ལས་མ་འདས།
ཕ་ཚེ་རྡོ་དང་བུ་མོ་ཚེ་བརྟན་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་སྡེ་དགེ་རྫོང་ཨ་ཕྱུག་གྲོང་རྡལ་ནས་ཡིན་པ་དང་། ད་ཐེངས་པེ་ཅིང་དུ་ལོ7ལྷག་ཙམ་ལ་སླེབས་པའི་བུ་མོ་ཚེ་བརྟན་ལ་མཆིན་པའི་ཐུམ་འབུའི་ནད་ཀྱི་གཤགས་བཅོས་བྱེད་པར་ཕྱིན་པ་རེད།
ཕ་ཚེ་རྡོ་དང་བུ་མོ་ཚེ་བརྟན་གཉིས་གནམ་བདེ་སྒོ་མོའི་མདུན་དུ་མཉམ་པར་རྒྱག་བཞིན་པ། ཁོང་ཕ་བུ་གཉིས་པེ་ཅིང་དུ་ཇི་ལྟར་ཡོང་བ་དང་ཡང་ཉིང་གནས་ཚུལ་གང་ཞིག་འཕྲད་ཡོད་མེད་དེ་ཡང་ལོ་གཉིས་ཀྱི་གོང་ནས་བརྗོད་དགོས་པ་སྟེ། 2022ལོར་བདེ་ཐང་ཡོངས་ཁྱབ་ཞིབ་བཤེར་བྱེད་སྐབས། ལོ5ལ་སླེབས་པའི་བུ་མོ་ཚེ་བརྟན་ལ་མཆིན་པར་ནད་རྟགས་ཕྲན་དུ་ཡོད་པ་ཤེས་རྟོགས་བྱུང་མོད། འོན་ཀྱང་གཟུགས་པོར་མི་བདེ་བ་མངོན་གསལ་དོད་པོ་མེད་པ་དང་ལྷག་པར་དུ་ཁྱིམ་ཚང་གི་དཔལ་འབྱོར་ཆ་རྐྱེན་དེ་ཙམ་ཡག་པོ་མེད། སྐབས་དེ་དུས་ལོ་ཆུང་ཆུང་ཡིན་པས་སྔར་བས་སྨན་བཅོས་བྱས་མེད་པ་རེད། དེ་རྗེས་བུ་མོ་ཚེ་བསྟན་གཟུགས་པོ་དེ་ཙམ་ཐང་པ་མེད་ཀྱང་ས་གནས་དེ་གའི་བུ་བཅོལ་ཁང་དུ་བསྐྱོད་དེ་སློབ་ཞུགས་གོང་གི་སློབ་གསོ་དང་ལེན་བྱས་པ་རེད།
སྡེ་དགེ་རྫོང་རིམས་ནད་སྔོན་འགོག་ཚོད་འཛིན་ལྟེ་གནས་ཀྱི་ལས་དོན་མི་སྣས་བུ་མོ་ཚེ་བརྟན་ལ་བརྟག་དཔྱད་བྱེད་བཞིན་པ། སྡེ་དགེ་རྫོང་རིམས་ནད་སྔོན་འགོག་ཚོད་འཛིན་ལྟེ་གནས་ཀྱི་ལས་དོན་མི་སྣ་ངག་དབང་ཕུན་ཚོགས་ཀྱིས“2022ལོར་ང་ཚོ་སྡེ་དགེ་རྫོང་རིམས་ནད་སྔོན་འགོག་ཚོད་འཛིན་ལྟེ་གནས་ཀྱིས་ཐུམ་འབུའི་ནད་བརྟག་དཔྱད་བྱེད་པའི་ལས་དོན་སྤེལ་བ་དང་། སྐབས་དེ་དུས་བུ་མོར་སྨན་སྤྲད་ནས་བཟའ་དགོས་པའི་མངགས་བྱ་བྱས་མོད་ཕྱིས་སུ་སྨན་ནུས་མངོན་གསལ་དོད་པོ་ཐོན་མེད་པ་ཤེས་རྟོགས་བྱུང་བ་རེད”ཅེས་བཤད།
“ད་ལོའི་ཟླ4པར་བསྐྱར་བཤེར་བྱེད་སྐབས་བུ་མོ་ཚེ་བརྟན་གྱི་མཆིན་པའི་ནད་ཚབས་ཆེ་རུ་ཕྱིན་པ་ཤེས་རྟོགས་བྱུང་། སྔར་བས་བརྟག་དཔྱད་བྱས་པ་བརྒྱུད་གཞི་ནས་མཆིན་པའི་ཐུམ་འབུའི་ནད་ཡིན་པ་གཏན་འཁེལ་ཐུབ་པ་རེད། དེ་རྗེས་ཟླ་བ་གསུམ་ལྷག་ཙམ་རིང་ང་ཚོས་བུ་མོ་ཚེ་བརྟན་ཁྲིད་དེ་རྫོང་སྨན་ཁང་དང་། ཁུལ་སྨན་ཁང་། ཞིང་ཆེན་རིམ་པའི་སྨན་ཁང་སོགས་སྨན་ཁང་ཁ་ཤས་སུ་བསྐྱོད་དེ་སྔར་བས་བརྟག་དཔྱད་བྱས་ནས་སྨན་བཅོས་བྱས་པ་ཡིན། འོན་ཀྱང་ནད་གཞི་རྙོག་འཛིང་ཆེ་བའི་དབང་གིས་མཐར་སྨན་བཅོས་བྱེད་མཚམས་བཞག་ནས་ཕ་ཡུལ་སྡེ་དགེར་ལོག་པ་ཡིན”ཞེས་ཚེ་རྡོ་ཡིས་གསར་འགོད་པར་བཤད།
ཕ་ཡུལ་དུ་ལོག་རྗེས་ཚེ་རྡོ་ཡིས་ནད་གཞི་དེ་གང་དུ་སྨན་བཅོས་བྱེད་ཐུབ་མིན་གང་སར་སྐད་ཆ་དྲིས་པ་རེད། བོད་སྨན་དང་ཀྲུང་ལུགས་གསོ་རིག་གམ་ཕྱི་ལུགས་གསོ་རིག་གང་ཡིན་རུང་བུ་མོ་ཚེ་བརྟན་གྱི་ནད་གཞི་ཇེ་སྡུག་ཏུ་མ་སོང་གོང་གང་མགྱོགས་སྨན་བཅོས་ཐུབ་རྒྱུའི་རེ་བ་བྱེད་ཀྱི་ཡོད། ནང་མི་ཚང་མས་བུ་མོའི་ནད་གཞིར་སེམས་ཁྲལ་ཆེན་པོ་བྱས་ཏེ་ཅི་བྱ་གཏོལ་མེད་གྱུར་པའི་སྐབས“སེམས་མཐུན།ཀྲུང་གོའི་སེམས་པ་མཉམ་གཏོད”ཀྱི2024ལོའི་དཀར་མཛེས་སུ་སྐྱོད་པའི་བྱེད་སྒོ་སྤེལ་བ་དེས་བུ་མོ་ཚེ་བསྟན་དང་བུ་མོའི་ནང་མིར་རེ་བའི་འོད་སྣང་སྦྱིན།
ཚེ་བརྟན་པེ་ཅིང་དུ་བརྒྱབ་པའི་དྲན་རྟེན་པར། ད་ལོའི་ཟླ7པའི་ཟླ་འགོར། བུ་མོ་ཚེ་བརྟན་གྱི་ནང་མིར་ཁ་པར་འབྱོར་ཏེ“སེམས་མཐུན། ཀྲུང་གོའི་སེམས་པ་མཉམ་གཏོད”ཀྱི་སྨན་བཅོས་ཆེད་མཁས་པའི་ཚོགས་པ་དར་མདོ་གྲོང་ཁྱེར་དུ་ཡོང་བའི་གནས་ཚུལ་ཤེས་པ་རེད། སྨན་པས་གྲོས་འགོ་བཏོན་རྗེས་ཚེ་རྡོ་ཡིས་བུ་མོ་ཁྲིད་དེ་དར་མདོ་གྲོང་ཁྱེར་མི་དམངས་སྨན་ཁང་དུ་ཡོང་ནས་པེ་ཅིང་གི་སྨན་བཅོས་ཆེད་མཁས་པའི་ཚོགས་པ་དང་འཕྲད་པ་རེད།
“ངས་ཆེད་མཁས་པ་དེ་དག་གི་མིང་ཤེས་ཀྱི་མེད། ཡིན་ན་ཡང་ཁོང་ཚོའི་ངོ་རིས་ངའི་སེམས་སུ་གསལ་པོ་ངེས་ཡོད། ངའི་ངེས་གསལ་ལ་སྐབས་དེ་དུས་སྨན་བཅོས་ཆེད་མཁས་པ་ཚོགས་པའི་ནང་སྨན་པ་ཁོང་རང་ཡོད་པ་དྲན་གྱི་འདུག”ཅེས་ཚེ་རྡོ་ཡིས་ཀྲུང་གོ་བཟོ་སྐྲུན་ཁང་གི་ཡོའན་ཧྲི་དང་། པེ་ཅིང་ཆིང་ཧྭ་ཁྲང་ཀེང་སྨན་ཁང་གི་ཡོན་ཀྲང་། “སེམས་མཐུན། ཀྲུང་གོའི་སེམས་པ་མཉམ་གཏོད”ཀྱི་གསོ་རིག་ཆེད་མཁས་པའི་ཀྲུའུ་ཞི་ཚོགས་པའི་ཀྲུའུ་ཞི་བཅས་ཡིན་པའི་དགེ་རྒན་ཆེན་མོ་བ་ཏུང་ཅ་ཧུང་ལ་བལྟས་ནས་བརྗོད། “སྐབས་དེ་དུས་སྨན་པ་རྣམས་ཀྱིས་ང་རང་ཁྱིམ་དུ་ལོག་ནས་ལན་སྒུག་སྡོད་དགོས་ཞེས་བཤད་བྱུང་། དེ་རྗེས་ཉིན་ཤས་མ་སོང་བར་བུ་མོ་ཁྲིད་ནས་པེ་ཅིང་དུ་སྨན་བཅོས་བྱེད་དུ་ཡོང་དགོས་པ་དང་། ད་དུང་འགྲོ་གྲོན་ཁ་གསབ་ཀྱང་སྤྲོད་ཀྱི་ཡོད་པའི་ལན་འབྱོར་བྱུང་། ལན་དེ་འབྱོར་རྗེས་མི་རིང་བར་ངའི་བུ་མོ་ཚེ་བརྟན་བདེ་བདེ་ཐང་ཐང་ཆགས་ཐུབ་པ་མཚོན་པས་ནང་མི་ཚང་མ་དགའ་ཚོར་ཆེན་པོ་བྱུང”ཞེས་ཚེ་རྡོ་ཡིས་ནད་སྡོད་ཁང་གི་བར་ཁྱམས་ཀྱི་གྱང་སྟེང་དུ་སྦྱར་བའི་སྨན་བཅོས་ཚོགས་པའི་འདྲ་པར་ལ་བལྟས་ནས་སེམས་འགུལ་ཆེན་པོས་གསར་འགོད་པར་བརྗོད་བྱུང་།
བུ་མོའི་ཨ་ཕས་སྨན་བཅོས་མི་སྣ་དེ་དག་ལ་ཐུགས་རྗེ་ཆེ་ཡང་ཡང་ཞུ་པས་བསམ་པ་མཚོན་པར་བྱེད་པ་དང་། ནད་ཁང་ནང་གི་བུ་མོ་ཚེ་བརྟན་གྱིས་རང་འགུལ་ངང་སྨན་པ་དང་ནད་པར་འཚམས་འདྲི་བྱེད་པ་དང་། གླེང་མོལ་བྱེད་པ་མཐོང་སྐབས་ང་ཚོར་སེམས་འགུལ་ཚད་མེད་ཐེབས་བྱུང་།
གནམ་བདེ་སྒོ་མོའི་མདུན་དུ་བརྒྱབ་པའི་ཚེ་བརྟན་གྱི་པར། གསར་འགོད་པས་རྒྱུས་ལོན་བྱུང་བ་ལྟར་ན། ཚེ་བརྟན་གྱི་ཁྱིམ་ལ་ཁྱོན་ཕྲུ་གུ4ཡོད་པ་དང་། བུ་མོ་ཚེ་བརྟན་ནི་ཁོང་ཚོ་ཕྲུ་གུ་བཞིའི་ནང་གི་གསུམ་པ་ཡིན་པ་མ་ཟད་སློབ་སྦྱོང་ཡག་ཤོས་དེ་ཡང་ཡིན་པ་རེད། ནད་ཁང་དུ་སྡོད་རིང་བུ་མོ་ཚེ་བརྟན་གྱི་ཟིན་བྲིས་དེབ་ཅིག་འཁྱེར་ནས་དེའི་ཐོག་རྒྱ་ཡིག་དང་བོད་ཡིག་གི་ཐོག་ནས་རང་ཉིད་ཀྱི་མིང“ཚེ་བརྟན”ཞེས་ཡང་ཡང་འབྲི་བཞིན་ཡོད། སྐབས་འགར་ཁོ་མོས་ལག་ཐོགས་ཁ་པར་ནང་གི་པར་རིས་ལ་བལྟས་ནས་རི་མོ་སྣ་ཚོགས་འབྲི་གི་ཡོད།
ཚེ་བརྟན་གྱིས་རི་མོ་འབྲི་བཞིན་པ། ཤེས་རྟོགས་བྱུང་བར་གཞིགས་ན། ད་ལོའི་ཟླ7པའི་ཟླ་འགོར“སེམས་མཐུན། ཀྲུང་གོའི་སེམས་པ་མཉམ་གཏོད”ཀྱི་2024ལོའི་དཀར་མཛེས་ལ་བསྐྱོད་པའི་བྱེད་སྒོའི་ཁྲོད་ཁྱོན་མཆིན་པའི་ཐུམ་འབུའི་ནད་ཕོག་པའི་ནད་པ30ལྷག་ཙམ་རྩད་ཆོད་པ་དང་། དེའི་ནང་ནད་པ28དཀར་མཛེས་ཁུལ་སྨན་ཁང་དུ་གཤགས་བཅོས་བྱས་པ་རེད། འོན་ཀྱང་ཚེ་བརྟན་གྱི་ནད་གཞི་ཧ་ཅང་རྙོག་འཛིང་ཆེ་ལ་ཚབས་ཆེ་བས་ས་གནས་དེ་གའི་སྨན་ཁང་དུ་རྙོག་འཛིང་ཆེ་བའི་གཤགས་བཅོས་དེ་འདྲ་བྱེད་ཐབས་བྲལ་རྐྱེན། སྨན་བཅོས་ཆེད་མཁས་པའི་ཚོགས་པས་ཁོ་མོ་པེ་ཅིང་ཆིང་ཧྭ་ཁྲང་ཀེང་སྨན་ཁང་དུ་གཤགས་བཅོས་བྱེད་པར་བསྐྱོད་རྒྱུའི་གྲོས་འགོ་བཏོན་པ་རེད།
དགེ་རྒན་ཆེན་མོ་ཏུང་ཅ་ཧུང་གིས“ལྦུ་དབྱིབས་ཐུམ་འབུའི་ནད་ཀྱིས་མཆིན་པ་མང་ཆེ་བར་བསླད་སྐྱོན་ཐེབས་པ་དང་། གལ་ཏེ་ལུས་ཕུང་དུ་གཤགས་བཅོས་བྱས་ཚེ་གཅིག་ནས་མཆིན་པའི་ཐུམ་འབུའི་ནད་ཀྱི་ནད་ཚང་གཙང་སེལ་བྱེད་མི་ཐུབ་པ་དང་། གཉིས་ནས་ནད་འགྱུར་ཁྲག་རྩ་ནས་ཁྲག་ཤོར་ཉེན་ཆེ་བས། ངེས་པར་དུ་མཆིན་པ་ཁོག་པའི་ནང་ནས་བཏོན་ཏེ་ནད་འགྱུར་ཁྲག་རྩ་གཅོད་འབྱིན་དང་ཉམས་གསོ་བྱས་རྗེས་སླར་ཡང་འཛུགས་དགོས”ཞེས་གསར་འགོད་པར་བརྗོད་བྱུང་།
དགེ་རྒན་ཆེན་མོ་ཏུང་ཅ་ཧུང་གིས་གསར་འགོད་པའི་བཅར་འདྲི་དང་ལེན་བྱེད་བཞིན་པ། བུ་མོ་ཚེ་བརྟན་གྱི་གཙོ་བཅོས་སྨན་པ་ཡུས་ལི་ཧན་གྱིས“ནད་པའི་མཆིན་པའི་ཐུམ་འབུའི་ནད་ཚང་གི་ཚངས་ཐིག་ཆེ་ཤོས་ནི9.8cmཡིན་པ་དེས་མཆིན་པ་གཡས་པ་དང་གཡོན་པའི་ཆ་ཤས་ཤིག་ཟིན་གྱི་ཡོད། སྤྱིར་བཏང་དུ་ལོ་ཚོད་དེར་གཞིགས་ན་བུ་མོའི་གཟུགས་པོའི་རིང་ཚད་དང་ལུས་པོའི་ལྗིད་ཚད་དང་ཟུང་འབྲེལ་བྱས་ན་མཆིན་པའི་བོངས་ཚད660mlཡས་མས་དགོས་མོད། འོན་ཀྱང་ད་ལྟ་ང་ཚོས་ཚད་འཇལ་བྱས་པ་ལྟར་ན། མཆིན་པའི་ནང་གི་ཐུམ་འབུའི་ནད་ཚང་བསྣན་ན་མཆིན་པའི་ཆེ་ཆུང880mlལ་སླེབས་ཡོད། འོན་ཀྱང་དེའི་ནང་གི་མཆིན་པ་ངོ་མ450mlལས་ཟིན་གྱི་མེད་པས་མང་ཆེ་བ་ནད་ཚང་རེད། དེ་མིན་ཐུམ་འབུའི་ནད་ཚང་གིས་མཆིན་པའི་ཁྲག་རྩ་ཆེན་པོ་མང་པོ་ཞིག་ལ་བསླད་སྐྱོན་བཏང་ན། མཆིན་པའི་ཁྲག་རྩ་ཆེན་པོ་མང་པོ་ཞིག་ལ་བསླད་སྐྱོན་ཕོག་ཡོད་པས་བཤགས་བཅོས་བྱེད་པར་དུས་ཡུན་རིང་ཙམ་འགོར་གྱི་ཡོད་ཅེས་ངོ་སྤྲོད་བྱས་པ་རེད།
ཡུས་ལི་ཧན་གྱིས་གསར་འགོད་པའི་བཅར་འདྲི་དང་ལེན་བྱེད་པ། བུ་མོའི་ནད་གཞི་རྙོག་འཛིང་ཆེ་ལ་ཚབས་ཆེན་པོ་ཡོད་ཀྱང་། གཤགས་བཅོས་བྱས་པའི་ཉིན་དེར་ཏུང་ཅ་ཧུང་དང་ལུའུ་ཆན་གྱི་གཤགས་བཅོས་ཚོགས་པ་དང་། དེ་བཞིན་ཀྲང་ཧོན་དང་ཡན་སི་དབྱི་སྦྲིད་སྨན་ཚོགས་པ་སོགས་སྨན་དོན་མི་སྣས་འབད་བརྩོན་ལྷོད་མེད་བྱས་པར་བརྟེན་སྔ་དྲོའི་ཆུ་ཚོད09:13ནས་དགོང་མོའི་ཆུ་ཚོད20:13བར་དུས་ཡུན་ཆུ་ཚོད11རིང་འབད་བརྩོན་བྱས་པ་བརྒྱུད། མཐར་གཤགས་བཅོས་ལེགས་གྲུབ་བྱུང་བ་དང་གཤགས་བཅོས་བྱས་རྗེས་བུ་མོའི་གནས་ཚུལ་ཡག་པོ་བྱུང་ཡོད་པ་རེད།
སྨན་བཅོས་ཆེད་མཁས་པའི་ཚོགས་པས་བུ་མོར་གཤགས་བཅོས་བྱེད་བཞིན་པ།
གཙོ་བཅོས་སྨན་པའི་གྲས་ཤིག་ཡིན་པའི་ལུའུ་ཆན་དང་བུ་མོ་ཚེ་བརྟན། ལས་དོན་མི་སྣས་གསར་འགོད་པར་བུ་མོ་ཚེ་བརྟན་ད་ཐེངས་པེ་ཅིང་དུ་སྨན་བཅོས་བྱས་པའི་འགྲོ་གྲོན་ཚང་མར་ཁ་གསབ་སྤྲད་ཡོད་པ་དང་། པེ་ཅིང་དུ་སྨན་བཅོས་བྱེད་པར་ཡོང་བའི་འགྲིམ་འགྲུལ་འགྲོ་གྲོན་སོགས་ཀྱང་འབྲེལ་ཡོད་གཏན་འབེབས་གཞིར་བཟུང་ནས་རྩིས་ཞུ་བྱ་རྒྱུ་ཡིན་པས་ཁྱིམ་ཚང་ལ་དཔལ་འབྱོར་གྱི་ཁུར་པོ་གང་ཡང་བྱུང་མེད་ཅེས་བརྗོད་བྱུང་།
མ་འོངས་པའི་ལོ་ཟླའི་ནང་བུ་མོ་ཚེ་བརྟན་བདེ་ཐང་ངང་འཚར་ལོངས་བྱུང་བའི་སྨོན་འདུན་ཞུ།
རྩོམ་སྒྲིག་པ། སྣང་རྡོར།
