གསར་འགོད་པས་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་གྲོས་ཚོགས་ཐེངས་གསུམ་པའི་བོད་ལྗོངས་ཀྱི་འཐུས་མི་ཚོགས་པའི་གྲོས་གཞི་ཚོགས་ཆུང་ནས་རྒྱུས་ལོན་བྱུང་བ་ལྟར་ན། ཐེངས་འདིའི་གྲོས་ཚོགས་རིང་ལ། བོད་ལྗོངས་ཀྱི་འཐུས་མི་ཚོགས་པས་ཚོགས་ཆེན་ལ་ཁྱོན་གྲོས་གཞི་ཁག25ཕུལ་བ་དེའི་ནང་འཐུས་མི་ཚོགས་པའི་མཉམ་སྡེབ་ཀྱི་གྲོས་གཞི་ཁག10དང་འཐུས་མི་མི་སྒེར་རམ་ཡང་ན་མིང་འབྲེལ་གྱི་གྲོས་གཞི་ཁག15ཡོད།
བོད་ལྗོངས་ཀྱི་འཐུས་མི་ཚོགས་པའི་འཐུས་མི་ཡོངས་ཀྱིས་བོད་ལྗོངས་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་གཏིང་ཟབ་བྱས་ནས། “བརྟན་བརླིང་དང་། འཕེལ་རྒྱས། སྐྱེ་ཁམས། མཐའ་དར”བཅས་ཀྱི་དོན་ཆེན་བཞི་དོན་འཁྱོལ་བྱ་རྒྱུར་དམ་པོར་དམིགས་ཏེ། རང་འཁྲིའི་ལས་དོན་ལ་གཞིས་ཚུགས་པ་དང་། ཚོགས་འདུ་མ་འཚོགས་གོང་གི་བརྟག་ཞིབ་དང་། དམངས་ཀྱི་གནས་ཚུལ་བསྡུ་རུབ། བསམ་འཆར་ཉན་པའི་གནས་ཚུལ་བཅས་གཞིར་བཟུང་ནས། མི་དམངས་མང་ཚོགས་ཀྱིས་ཡོངས་ཁྱབ་ཏུ་དོ་ཁུར་བྱེད་པའི་གནད་དོན་ལ་དམིགས་ཏེ། སྤུས་ཚད་མཐོ་བ་དང་དམིགས་སའི་རང་བཞིན་ཆེ་བའི་གྲོས་གཞི་ཕུལ་ཡོད།
སྤྱིའི་ཆ་ནས་བལྟས་ན། གྲོས་གཞི་དེ་དག་ནི་རྒྱལ་ཁབ་འཕེལ་རྒྱས་ཀྱི་སྤྱི་ཡོངས་དང་བོད་ལྗོངས་ཀྱི་ཡུལ་བབ་དང་ཟུང་འབྲེལ་དམ་ཟབ་བྱས་ཏེ། གཙོ་བོར་འགྲིམ་འགྲུལ་གྱི་རྨང་གཞིའི་སྒྲིག་བཀོད་འཛུགས་སྐྲུན་དང་། ནུས་རྒྱུའི་རྣམ་གྲངས་གལ་ཆེན་འཛུགས་སྐྲུན། ས་མཐོའི་ཁྱད་ལྡན་ཐོན་ལས་འཕེལ་རྒྱས། སྐྱེ་ཁམས་ཁོར་ཡུག་སྲུང་སྐྱོང་། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་གཏོད་སོགས་ཀྱི་ནང་དོན་ལ་དམ་པོར་དམིགས་ཡོད།
མིག་སྔར། གྲོས་གཞི་དེ་དག་ཚང་མར་ཚོགས་ཆེན་གྱི་དྲུང་ཡིག་ཁྲུའུ་ཡི་གྲོས་གཞི་ཚོགས་ཆུང་ལ་ཕུལ་ཡོད། མི་འགྱངས་པར་བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་འཐུས་མིའི་ལས་དོན་ཨུ་ལྷན་དང་། དེ་བཞིན་དུ་རྒྱལ་ཁབ་ཀྱི་འབྲེལ་ཡོད་པུའུ་ཨུད་དང་ལས་དོན་འབྲེལ་མཐུད་བྱ་རྒྱུར་ཤུགས་བརྒྱབ་ནས། འཐུས་མིའི་གྲོས་གཞི་དང་གྲོས་གཞི་སྒྲུབ་པའི་གནས་ཚུལ་རྗེས་སྙེག་ཁོང་དུ་ཆུད་པ་དང་། སྒྲུབ་འགན་འཁུར་མཁན་སྡེ་ཚན་དང་འཐུས་མིའི་དབར་འབྲེལ་གཏུག་ཡག་པོ་བྱེད་པར་རང་འགུལ་ངང་གཞོགས་འདེགས་བྱས་ཏེ། འཐུས་མིས་བཏོན་པའི་གྲོས་གཞི་དག་དོན་ཐོག་ཏུ་དོན་འཁྱོལ་བར་སྐུལ་འདེད་གཏོང་རྒྱུ་རེད།
