ད་ལོའི་ཟླ2པའི་ཟླ་མཇུག་ཏུ། གསར་འགོད་པ་བོད་རང་སྐྱོང་ལྗོངས་ས་མཐོའི་སྐྱེ་དངོས་ཞིབ་འཇུག་སུའོ་རུ་བསྐྱོད་དེ། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་བོད་རང་སྐྱོང་ལྗོངས་ས་མཐོའི་སྐྱེ་དངོས་ཞིབ་འཇུག་སུའོ་རྩི་ཤིང་ཕུང་གྲུབ་གསོ་སྐྱོང་ཞིབ་འཇུག་ཁང་གི་ཀྲུའུ་རེན་ཉི་སྒྲོན་ལ་བཅར་འདྲི་ཞུས་པ་ཡིན།
1994ལོར་སློབ་མཐར་ཕྱིན་རྗེས། ཉི་སྒྲོན་གྱིས་བོད་རང་སྐྱོང་ལྗོངས་ས་མཐོའི་སྐྱེ་དངོས་ཞིབ་འཇུག་སུའོ་རྩི་ཤིང་ཕུང་གྲུབ་གསོ་སྐྱོང་ཞིབ་འཇུག་ཁང་དུ་ཕྱག་ལས་གནང་ཞིང་། ལོ་མང་རིང་ལ། ཁོང་གིས་ཕྱི་རོལ་དུ་བརྟག་དཔྱད་དང་། རྩི་ཤིང་འདེབས་གསོ། ལྗང་སྨྱུག་གསོ་སྤེལ། སྐྱེ་གནས་ཕྱིར་འདེབས་སོགས་ཀྱི་ལས་དོན་འབོར་ཆེན་གྱི་འགན་འཁུར་བཞིན་ཡོད།
ཉི་སྒྲོན་གྱིས་ཚོད་ལྟ་ཁང་དུ་རྩི་ཤིང་གི་མ་དཔེར་ལྟ་ཞིབ་གནང་བཞིན་པ།
རྩི་ཤིང་འདེམས་གསོ་ཁང་དུ་སྐྱོད་སྐབས། འབུ་ཕྲ་མེད་པའི་གསོ་སྐྱོང་དམ་བི་རེ་རེའི་ནང་གི་མྱུ་གུ་ནི་ཉི་སྒྲོན་གྱི“ཕྲུ་གུ”དང་འདྲ་ཞིང་། མྱུ་གུ་དེ་དག་གི་སྐོར་གླེང་སྐབས་ཁོང་གི་མིག་ནང་དུ་ཚན་ཞིབ་བྱ་གཞག་ལ་བཅངས་པའི་སྤྲོ་སེམས་ཀྱིས་ཁེངས་བཞིན“མྱུ་གུ་དེ་དག་ཚང་མ་ཕྱི་རོལ་བརྟག་དཔྱད་བྱེད་སྐབས་བསྡུ་ལེན་བྱས་པ་དང་འབྲེལ་འདེབས་གསོ་བྱས་པ་ཤ་སྟག་ཡིན། དཔེར་ན་གསེར་ཐིག་པད་མ་ལྟ་བུར་མཚོན་ན་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོང་རྩི་ཤིང་རེད”ཅེས་གསུངས་པ་དང་། ཉམས་ལ་ཉེ་བའི་གསེར་ཐིག་པད་མའི་སྐོར་གླེང་སྐབས། ཉི་སྒྲོན་གྱིས་བརྗེད་ཐབས་བྲལ་བའི་འདས་དོན་ཞིག་དྲན་བྱུང་། “ཐེངས་ཤིག་ལ་ང་རང་ཉིང་ཁྲི་གྲོང་ཁྱེར་མེ་ཏོག་གི་ཞིབ་བཤེར་ས་ཚིགས་བརྒྱུད་སྐབས། ལས་དོན་པས་ང་ཚོས་འཁྱེར་བའི་གསེར་ཐིག་པད་མ་ལམ་སེང་ངོ་ཤེས་པར་མ་ཟད། འཕྲལ་དུ་ས་གནས་དེ་གའི་ནགས་ལས་སྡེ་ཚན་དང་འབྲེལ་གཏུག་སྙན་སེང་ཞུ་ཚུལ་ཞིབ་དཔྱད་བྱས་སོང་། སྐབས་དེར་ང་ཧ་ཅང་དགའ་པོ་བྱུང་། རྒྱུ་མཚན་ཞིབ་བཤེར་ས་ཚིགས་ཀྱི་ལས་དོན་པས་གསེར་ཐིག་པད་མ་ངོས་འཛིན་ཐུབ་པར་མ་ཟད། ད་དུང་འགན་འཁྲི་གཙང་སྒྲུབ་བྱས་པས། འདི་ལས་ཚང་མའི་སྲུང་སྐྱོང་གི་འདུ་ཤེས་ཆེ་རུ་ཕྱིན་པ་མཚོན་ཡོད”ཅེས་གསུངས། ཚན་ཞིབ་ཚོགས་པས་ཐོག་མཐའ་བར་གསུམ་དུ་ཚད་ལྡན་ཅན་གྱི་རྩ་དོན་ལ་བརྩི་སྲུང་ཞུས་ཏེ་སྔོན་ལ་གསོན་ཕུང་འཚོལ་བསྡུ་མི་བྱེད་པར་ས་བོན་འཚོལ་བསྡུ་བྱས་ནས་རྩ་ཆེའི་དངོས་རིགས་དེ་དག་ལ་ནུས་ཤུགས་ཡོད་རྒུས་སྲུང་སྐྱོང་བྱེད་བཞིན་ཡོད།
བོད་རང་སྐྱོང་ལྗོངས་ས་མཐོའི་སྐྱེ་དངོས་ཞིབ་འཇུག་སུའོ་ཡི་སོན་རྒྱུའི་མཛོད་ཀྱིས་ཕྱི་རོལ་ནས་འཚོལ་བསྡུ་བྱས་པའི་རྩ་ཆེའི་ཐོན་ཁུངས་ལ་གྱེས་གཟུགས་ཉར་ཚགས་དང་མི་ཐབས་ལ་བརྟེན་ནས་གསོ་སྤེལ་བྱེད་པའི་ལས་འགན་གལ་ཆེན་འཁུར་གྱི་ཡོད། ཉི་སྒྲོན་གྱིས“ང་ཚོ་ཚན་ཞིབ་པའི་བསམ་འདུན་ཆེ་ཤོས་ནི་ཉམས་ལ་ཉེ་བའི་རྩི་ཤིང་ཁག་གཅིག་གསོ་སྤེལ་ལེགས་གྲུབ་ཐུབ་པ་དང་འབྲེལ། ཕྱི་རོལ་ཡུལ་དུ་འདེབས་གསོ་ཐུབ་པ་བྱ་རྒྱུ་དེ་ཡིན”ཞེས་གསུངས། གསེར་ཐིག་པད་མར་ཆ་བཞག་ན། གསོ་སྤེལ་ལམ་ལྷོངས་བྱུང་རྗེས། མེ་ཏོག་རྫོང་དགྱེ་གླིང་གྲོང་ཚོའི་ཚན་རྩལ་ཆེད་མངགས་པའི་གསོ་སྐྱོང་འོག ད་ཆ་སྐྱེ་འཚར་ལེགས་པོ་དང་། གསོན་ཚད་མཐོ་པོ་བྱུང་ཡོད།
རྩི་ཤིང་མང་པོ་ཞིག་ལ་སྨན་སྤྱོད་ཀྱི་རིན་ཐང་ལྡན་པས། རི་སྐྱེས་རྩི་ཤིང་ལ་བརྟེན་ཚད་ཆུང་དུ་གཏོང་བ་དང་སྐྱེ་ཁམས་ལ་གཏོར་སྐྱོན་མི་ཕོག་པའི་ཆེད་དུ། 2014ལོར། ཉི་སྒྲོན་གྱི་ཚོགས་པས་ཕུར་མོང་ནག་པོ་གསོ་སྤེལ་ལམ་ལྷོངས་བྱུང་བར་མ་ཟད། འབྲེལ་ཡོད་ཁེ་ལས་ལ་གསོ་སྤེལ་ལག་རྩལ་བརྒྱུད་བཤུག་བཏང་བ་དང་། ད་དུང་ཁེ་ལས་ལ་ལག་བརྒྱུད་པ་གསོ་སྦྱོང་བྱས་པས། རྩི་ཤིང་གི་ཐོན་ཁུངས་སྲུང་སྐྱོང་ཐུབ་པར་མ་ཟད། ཁེ་ལས་ཀྱི་ཐོན་འཕར་ནུས་པའང་ཆེ་རུ་ཕྱིན་ཡོད།
ཉི་སྒྲོན་གྱིས“སྐྱེ་དངོས་སྣ་མང་རང་བཞིན་ལ་སྲུང་སྐྱོང་བྱེད་པ་ནི་ལས་འགན་ལྕི་ལ་དུས་ཡུན་རིང་བས། མི་རབས་ཁ་ཤས་ཀྱིས་མུ་མཐུད་དུ་འབད་འཐབ་བྱེད་དགོས་ཀྱི་ཡོད” ང་ནི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཞིག་ཡིན་ལ་ཚན་ཞིབ་ལས་དོན་པའང་ཡིན་པས། ང་དང་ཚོགས་པས་ཐོག་མའི་བསམ་འདུན་མ་བརྗེད་པར་ནུས་ཤུགས་གང་ཡོད་ཀྱིས་སྐྱེ་དངོས་རིགས་དེ་བས་མང་བ་ཉར་ཚགས་དང་། ཚན་ཞིབ་ཀྱི་གྲུབ་འབྲས་སྤྱད་དེ་ས་གནས་དེ་གའི་ཁེ་ལས་དང་ཐོན་སྐྱེད་སྡེ་ཚན་ལ་རིན་ཐང་ལྡན་པའི་ས་བོན་མཁོ་འདོན་བྱས་ནས། སྐྱེ་དངོས་སྣ་མང་རང་བཞིན་ལ་སྲུང་སྐྱོང་དང་ས་གནས་འདི་གའི་འཕེལ་རྒྱས་དབར་མཉམ་འགུལ་བཟང་པོ་ཡོང་བར་བྱེད་ཀྱི་ཡིན་ཞེས་གསུངས།
