ཉེ་ཆར། གསར་འགོད་པས་ཆབ་མདོ་གྲོང་ཁྱེར་གོ་འཇོ་རྫོང་རྩེ་པ་ཞང་ཤ་རུ་གྲོང་ཚོའི་ནགས་ཚལ་ཁུལ་དུ་ནགས་སྲུང་བ་འཆི་མེད་རྡོ་རྗེས་ལས་རོགས་དང་མཉམ་དུ་མངོན་མེད་རྐྱེན་ངན་ཐོན་སྲིད་པའི་ནགས་ཚལ་གྱི་ཁུག་ཀྱོག་ཚང་མར་ནན་ཏན་དང་ཞིབ་ཚགས་པའི་སྐོར་ཞིབ་བྱེད་བཞིན་ཡོད་པ་མཐོང་བྱུང་།
གོ་འཇོ་རྫོང་རྩེ་པ་ཞང་འོད་ཐང་གྲོང་ཚོའི་ནགས་སྲུང་བས་འབྲོག་པར་ནགས་ཚལ་མེ་ཟོན་ཤེས་བྱ་དྲིལ་བསྒྲགས་བྱེད་བཞིན་པ།
ཤེས་རྟོགས་བྱུང་བར་གཞིགས་ན། གོ་འཇོ་རྫོང་གི་ནགས་སྲུང་བས་ཁུལ་དབྱེ་ནས་དྲ་མིག་ཅན་གྱི་དོ་དམ་འགན་འཁྲི་དོན་འཁྱོལ་བྱེད་པར་བརྟེན་ནས། ནགས་སྲུང་བར་འགན་འཁུར་ས་ཁོངས་ཁ་གསལ་བགོས་ཏེ་ནགས་ཚལ་དང་རྩྭ་ཐང་ཚང་མར་ཆེད་མངགས་སྲུང་སྐྱོང་བྱེད་མཁན་ཡོད་པར་བྱས་ཡོད།
གོ་འཇོ་རྫོང་རྩེ་པ་ཞང་ཤ་རུ་གྲོང་ཚོའི་ནགས་སྲུང་བས་རྒྱང་ཤེལ་གྱིས་ནགས་ཁུལ་ལ་ལྟ་ཞིབ་བྱེད་བཞིན་པ།
གོ་འཇོ་རྫོང་ནགས་ལས་དང་རྩྭ་ཐང་ལག་རྩལ་ཁྱབ་སྤེལ་ལྟེ་གནས་ཀྱི་ལས་རོགས་ལག་རྩལ་ཆེན་མོ་བ་བསོད་ནམས་ཡེ་ཤེས་ཀྱིས“མིག་སྔར་གོ་འཇོ་རྫོང་དུ་ནགས་སྲུང་བ་ཁྱོན4608ཡོད་པ་དེ་དག་རྫོང་ཡོངས་ཀྱི་ས་ཕྱོགས་གང་སར་ཁྱབ་ཅིང་། ཁོང་ཚོས་ལས་གནས་བརྟན་སྲུང་དང་འབད་བརྩོན་བྱས་པ་བརྒྱུད། ཉེ་བའི་ལོ་ཤས་རིང་། གོ་འཇོ་རྫོང་གི་ནགས་ཚལ་དང་རྩྭ་ཐང་དུ་མེ་སྐྱོན་ཐོན་ཚད་ལོ་རེ་བཞིན་ཇེ་ཉུང་དུ་ཕྱིན་པ་དང་སྐྱེ་ཁམས་ཁོར་ཡུག་ཀྱང་རྒྱུན་མཐུད་ལེགས་སུ་ཕྱིན་ཡོད”ཅེས་བཤད།
གོ་འཇོ་རྫོང་རྩེ་པ་ཞང་གི་ནགས་ཁུལ།
