དམངས་གཉེར་ཁེ་ལས་ཀྱི་བཞུགས་མོལ་ཚོགས་འདུ་དེ་སྤྱི་ཚེས་17ཉིན་པེ་ཅིང་དུ་འཚོགས་པ་དང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་བཞུགས་མོལ་ཚོགས་འདུར་ཞུགས་པ་མ་ཟད་གསུང་བཤད་གལ་ཆེན་གནང་བ་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དམངས་གཉེར་དཔལ་འབྱོར་གྱི་གོང་འཕེལ་ལ་ཐོབ་པའི་གྲུབ་འབྲས་གལ་ཆེན་དང་རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་གོང་འཕེལ་ཐད་ལེགས་སྐྱེས་གལ་ཆེན་ཕུལ་བར་ཁས་ལེན་གང་ལེགས་གནང་བ་དང་། དམངས་གཉེར་དཔལ་འབྱོར་གོང་འཕེལ་གཏོང་བར་འཕྲད་པའི་གོ་སྐབས་དང་འགྲན་སློང་ལ་ངོས་འཛིན་ཡང་དག་པ་བྱེད་དགོས་པའི་ནན་སྟོན་གནང་བ། མིག་སྔ་དང་སླད་ཕྱིན་དུས་སྐབས་ཤིག་གི་རིང་དམངས་གཉེར་དཔལ་འབྱོར་སྐྱོན་བྲལ་ངང་གོང་འཕེལ་དང་སྤུས་མཐོའི་གོང་འཕེལ་ལ་སྐུལ་འདེད་གཏོང་རྒྱུའི་ཐད་ཁྱོན་ཡོངས་ནས་བཀོད་སྒྲིག་གནང་ཡོད། ཚོགས་ཞུགས་དམངས་གཉེར་ཁེ་ལས་པ་དང་འབྲེལ་ཡོད་སྡེ་ཚན་གྱི་འགན་འཁུར་བས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དེས་མི་སེམས་ལ་དྲོ་སྐྱིད་སྦྱིན་པ་དང་། ཚང་མས་འབད་བརྩོན་བྱ་རྒྱུར་སྐུལ་ལྕག་གནང་བས། དམངས་གཉེར་དཔལ་འབྱོར་གོང་འཕེལ་འགྲོ་རྒྱུར་ཁ་ཕྱོགས་དང་ཐབས་ལམ་གསལ་སྟོན་མཛད་ཡོད། རྒྱ་ཆེའི་དམངས་གཉེར་ཁེ་ལས་པས་མུ་མཐུད་འབད་འཐབ་དང་། དཀའ་སྤྱད་མདུན་སྐྱོད་བྱེད་པར་སེམས་ཤུགས་ཀྱིས་ཁེངས་ཡོད་ཅེས་གསུངས་ཡོད།
དམངས་གཉེར་དཔལ་འབྱོར་གོང་འཕེལ་གཏོང་བར་རྒྱབ་སྐྱོར་བྱ་རྒྱུ་ནི་ཏང་ཀྲུང་དབྱང་གི་འགྱུར་མེད་མཛད་ཕྱོགས་ཤིག་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། དམངས་གཉེར་དཔལ་འབྱོར་གོང་འཕེལ་གཏོང་རྒྱུའི་སྐོར་གྱི་ཏང་དང་རྒྱལ་ཁབ་ཀྱི་གཞི་རྩའི་མཛད་ཕྱོགས་དང་སྲིད་ཇུས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་མ་ལག་ནང་བཅུག་ཡོད་པས། དེ་བློ་བརྟན་འགྱུར་མེད་ངང་རྒྱུན་འཁྱོངས་དང་དོན་འཁྱོལ་བྱ་རྒྱུ་ལས། འགྱུར་བ་གཏོང་མི་རུང་ལ། འགྱུར་བ་གཏོང་ཡང་མི་སྲིད་ཅེས་ནན་སྟོན་གནང་ཡོད། ཞའོ་སྨི་ཚན་རྩལ་ཚད་ཡོད་འགན་འཁྲི་ཀུང་སིའི་ལས་འཛིན་དཔོན་ལེ་ཅུན་གྱིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དམངས་གཉེར་ཁེ་ལས་པར་རྒྱུས་ལོན་དང་། ཐུགས་ཁུར། གཅེས་སྐྱོང་བཅས་གནང་བར་ང་རང་ལ་མྱོང་ཚོར་ཟབ་མོ་བྱུང་ཞེས་གསུངས་པ་རེད།
ལེ་ཅུན་གྱིས། དམངས་གཉེར་ཁེ་ལས་པའི་སེམས་ཤུགས་ལྡབ་ཀྱིས་ཆེ་རུ་ཕྱིན་པ་དང་། ཚང་མར་མྱོང་ཚོར་ཟབ་མོ་བྱུང་ཡོད། དེང་གི་དཀའ་ངལ་དང་གནད་དོན་མང་པོ་ཞིག་གི་མདུན་དུ། སྤྱི་ཁྱབ་ཧྲུའུ་ཅིས་ཀྱང་ང་ཚོར་གྲོས་འགོ་མང་པོ་བཏོན་གནང་བ་སྟེ། ང་ཚོ་དམངས་གཉེར་ཁེ་ལས་པས་ཁེ་ལས་ལ་གཞིས་ཚུགས་པ་དང་། ལས་དོན་གཙོ་བོར་དམིགས་ཏེ། ཁེ་ལས་སྟོབས་ཆེ་རུ་གཏོང་རྒྱུའི་ཐུགས་རེ་བཅངས་ཡོད། ངའི་བསམ་པར་དེས་ཀྱང་ང་ཚོའི་བློ་སྒོ་ཡངས་པོར་ཕྱེ་སོང་ཞེས་གསུངས་པ་རེད།
ཧང་ཀྲོའུ་ཡུས་ཧྲུའུ་ཚན་རྩལ་ཚད་ཡོད་ཀུང་སིའི་དབུ་བཞུགས་ལག་བསྟར་དཔོན་ཝང་ཤིང་ཤིང་གིས། ང་རང་ནས་ཚོགས་ཞུགས་ཁེ་ལས་པ་ཚོ་དང་མཉམ་དུ་སྤེལ་རེས་གཏིང་ཟབ་བྱས་པ་དང་། ཚང་མའི་འབད་འཐབ་ཡར་བརྩོན་གྱི་བསམ་པའི་ཉམས་འགྱུར་གྱིས་ང་ལ་ཡང་སྐུལ་མ་ཐེབས་བྱུང་ཞེས་གསུངས་པ་རེད།
ཝང་ཤིང་ཤིང་གིས། དེ་གར་ཁེ་ལས་པ་འདི་འདྲ་མང་པོ་ཞིག་མཉམ་འཛོམས་བྱུང་བ་དེས་ང་ལ་བག་ཆགས་ཟབ་མོ་བཞག་བྱུང་། དུས་རྒྱུན་མི་མང་པོ་དེ་འདྲ་མཉམ་དུ་འཛོམས་ཁག་པོ་རེད། དེ་མིན་ཚང་མས་མཉམ་དུ་གྲོས་བསྡུར་དང་སྤེལ་རེས་གནང་སོང་། མི་ཚང་མའི་བསམ་པའི་ཉམས་འགྱུར་ཤིན་ཏུ་བཟང་བ་དང་། འབད་འཐབ་ཀྱི་སེམས་ཤུགས་ཀྱང་ཆེན་པོ་འདུག དེ་གར་ཡོད་པའི་དམངས་གཉེར་ཁེ་ལས་པ་ཚང་མས་སྤྱི་ཁྱབ་ཧྲུའུ་ཅིའི་སྐུལ་ལྕག་ཚོར་ཐུབ་ཡོད་ཅེས་གསུངས་པ་རེད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དེས་མི་སེམས་ལ་དྲོ་སྐྱིད་སྦྱིན་ཞིང་། ཚང་མས་འབད་བརྩོན་བྱ་རྒྱུར་སྐུལ་ལྕག་གནང་བས། “གཡོ་འགུལ་སྤུ་ཙམ་ཡང་མི་གཏོང་བ་གཉིས”མཐའ་འཁྱོངས་བྱེད་པའི་བརྡ་རྟགས་དྲག་པོ་ཁ་གསལ་བཏང་བས། རྒྱ་ཆེའི་དམངས་གཉེར་ཁེ་ལས་པར་སླར་ཡང་“བློ་བདེའི་རིལ་བུ”སྦྱིན་ཡོད།
ཆི་ཨན་ཤིན་ཚན་རྩལ་ཚོགས་པ་མ་རྐང་ཚད་ཡོད་ཀུང་སིའི་ལས་འཛིན་དཔོན་ཆི་ཤང་ཏུང་གིས། འགག་རྩའི་དུས་སྐབས་དེ་འདྲ་ཞིག་གི་སྐབས་སུ་སྤྱི་ཁྱབ་ཧྲུའུ་ཅིས་དམངས་གཉེར་ཁེ་ལས་ཀྱི་བཞུགས་མོལ་ཚོགས་འདུ་སྐོང་འཚོགས་གནང་ཡོད། དེ་ནི་ང་ཚོར་ཡང་བསྐྱར་བློ་བདེའི་རིལ་བུ་གནང་བ་ཞིག་ཡིན་པས། ང་ཚོས་ངར་ཤུགས་ཆེན་པོས་ལས་ཀ་སྒྲུབ་ཐུབ་པ་བྱུང་ཡོད། སྤྱི་ཁྱབ་ཧྲུའུ་ཅིས་ང་ཚོ་དམངས་གཉེར་ཁེ་ལས་པ་དང་དམངས་གཉེར་ཁེ་ལས་ལ་བཅངས་གནང་བའི་བརྩེ་བ་ཟབ་མོ་ང་རང་གིས་དངོས་སུ་ཚོར་བྱུང་ཞེས་གསུངས་པ་རེད།
ཤིས་ཨན་ལན་ཞའོ་ཚན་རྩལ་རྒྱུ་ཆ་གསར་པའི་མ་རྐང་ཚད་ཡོད་ཀུང་སིའི་ལས་འཛིན་དཔོན་ཀའོ་ཡུའེ་ཅིང་གིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ནི་ལྷག་བསམ་ཟོལ་མེད་དང་དོན་དངོས་དང་མཐུན་པ་ཞིག་འདུག་ལ་རྣག་ཐོག་གཙག་འཁེལ་ཞིག་ཀྱང་རེད་འདུག ང་ཚོར་འཕྲད་པའི་གནད་དོན་དང་འབྱུང་འགྱུར་ཐོབ་སྲིད་པའི་གོ་སྐབས་ཀྱང་ང་ཚོར་བསྟན་གནང་བྱུང་། སྤྱི་ཁྱབ་ཧྲུའུ་ཅིས་ཏང་ཀྲུང་དབྱང་གིས་དམངས་གཉེར་ཁེ་ལས་ཀྱི་གོང་འཕེལ་ལ་ཐོག་མཐའ་བར་གསུམ་དུ་རྒྱབ་སྐྱོར་གནང་བ་མ་ཟད་དེར་གཡོ་འགུལ་སྤུ་ཙམ་ཡང་གཏོང་མི་སྲིད་ཅེས་ནན་སྟོན་ཡང་ཡང་གནང་བྱུང་། བཀའ་མོལ་དེས་ང་རང་ལ་སྐུལ་ལྕག་ཆེན་པོ་ཐེབས་བྱུང་། ད་ལྟ་དཔྱིད་ཀྱི་དཔལ་ཡོན་བཞད་པའི་དུས་ལ་སླེབས་བཞིན་ཡོད་པས་དཔྱིད་རླུང་དལ་གྱིས་ལྡང་བ་དང་འདྲ་བྱུང་ལ་ང་ཚོར་སེམས་ཤུགས་ཆེན་པོ་ཞིག་སྤྲད་གནང་བྱུང་ཞེས་གསུངས་ཡོད།
དམངས་གཉེར་དཔལ་འབྱོར་གོང་འཕེལ་གཏོང་རྒྱུ་དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྔ་བར་ཕྱི་གསུམ་དུ་ཐུགས་ནང་འཇོག་གནང་མཛད་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དམངས་གཉེར་དཔལ་འབྱོར་གོང་འཕེལ་ལ་ཐོབ་པའི་གྲུབ་འབྲས་གལ་ཆེན་དང་རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་གོང་འཕེལ་ཆེད་ལེགས་སྐྱེས་གལ་ཆེན་ཕུལ་བར་གདེང་འཇོག་གང་ལེགས་གནང་བ་དང་། དམངས་གཉེར་དཔལ་འབྱོར་གོང་འཕེལ་ལ་འཕྲད་པའི་གོ་སྐབས་དང་འགྲན་རྩོད་གཉིས་ཀར་ངོས་འཛིན་ཡང་དག་བྱ་དགོས་ཞེས་ནན་སྟོན་གནང་ཡོད།
ཧེ་ལུང་ཅང་ཧྥེ་ཧོ་འོ་བཟོའི་ལས་རིགས་ཚད་ཡོད་ཀུང་སིའི་ལས་འཛིན་དཔོན་ལེའང་ཡིའུ་པིན་གྱིས། སྤྱི་ཁྱབ་ཧྲུའུ་ཅིས་ཀྲུང་གོའི་དམངས་གཉེར་དཔལ་འབྱོར་གྱི་གོང་འཕེལ་ལ་གདེང་འཇོག་གནང་ལེགས་གནང་བ་དང་། དམངས་གཉེར་ཁེ་ལས་ལ་ལྷག་པའི་གནད་དོན་ཁག་གཅིག་ཀྱང་བཏོན་གནང་སོང་། དཔེར་ན་ཚན་རྩལ་གསར་གཏོད་དང་། རྒྱལ་སྤྱིའི་འགྲན་རྩོད། ཚོང་རྟགས་ཀྱི་ཤུགས་རྐྱེན་ནུས་པ་ཕྱི་ཕྱོགས་ལ་རྒྱ་སྐྱེད་གཏོང་བ་སོགས་ཀྱི་ཐད་ཐག་གཅོད་ཇུས་གཞི་ཆ་ཚང་བ་བཏོན་གནང་སོང་བས་དོན་དངོས་དང་ཡང་མཐུན་པ་ཞིག་འདུག་ཅེས་གསུངས་པ་རེད།
ཀྲེང་ཐའེ་ཚོགས་པ་མ་རྐང་ཚད་ཡོད་ཀུང་སིའི་ལས་འཛིན་དཔོན་ནན་ཚུན་ཧུའེ་ཡིས། སྤྱི་ཁྱབ་ཧྲུའུ་ཅིས་དམངས་གཉེར་ཁེ་ལས་གོང་འཕེལ་གཏོང་བའི་བརྒྱུད་རིམ་ནང་ལྷག་བསྡད་པའི་དཀའ་ངལ་དང་ཡང་ན་གནད་དོན་ལ་ཐུགས་རྒྱུས་ཧ་ཅང་ཟབ་མོ་འདུག་ལ་ཁ་གསལ་གཏིང་གསལ་མཁྱེན་གྱི་འདུག ང་ཚོས་ཁོང་གི་གསུང་བཤད་ཉན་པའི་རྗེས་སྐུལ་ལྕག་ཆེན་པོ་ཐེབས་བྱུང་ལ་སེམས་འགུལ་ཡང་ཆེན་པོ་ཐེབས་བྱུང་ཞེས་གསུངས་པ་རེད།
ཀྲུང་གོ་སྤྱི་ཁོག་དཔལ་འབྱོར་ཞིབ་འཇུག་ཁང་གི་འགོ་འཛིན་ཧོང་ཧན་ཆོན་གྱིས། རང་རྒྱལ་གྱི་དམངས་གཉེར་དཔལ་འབྱོར་གོང་འཕེལ་ཐད་རྨང་གཞི་ཧ་ཅང་ཡག་པོ་ཞིག་བཏིངས་ཡོད། ཐོན་ལས་མ་ལག་ནས་ཤེས་ལྡན་མི་སྣའི་དཔུང་ཁག་དང་དེ་བཞིན་གཞི་ཁྱོན་ཧ་ཅང་ཆེ་བའི་རྒྱལ་ཡོངས་ཀྱི་ཁྲོམ་ར་སོགས་ཚང་མས་དམངས་གཉེར་ཁེ་ལས་གོང་འཕེལ་ཆེད་གོ་སྐབས་བཟང་པོ་བསྐྲུན་ཡོད་ཅེས་གསལ་འགྲེལ་གནང་ཡོད།
ཧོང་ཧན་ཆོན་གྱིས། དེ་དང་ཆབས་ཅིག་ཏུ་ང་ཚོས་མཐོང་དགོས་པ་ཞིག་ནི་ང་ཚོར་སྤྱི་ཚོགས་རིང་ལུགས་ལམ་ལུགས་ཀྱི་ཁྱད་འཕགས་རང་བཞིན་ཡོད་པ་དེ་རེད། ང་ཚོའི་ཁྲོམ་རའི་དཔལ་འབྱོར་ལམ་ལུགས་འཐུས་ཚང་དུ་ཟམ་མི་ཆད་པར་འགྲོ་བཞིན་ཡོད་པ་དང་། ང་ཚོའི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་མ་ལག་དེ་ཡང་ཟམ་མི་ཆད་པར་འཐུས་ཚང་དུ་འགྲོ་བཞིན་ཡོད། དེ་དག་ཚང་མས་ང་ཚོའི་དམངས་གཉེར་དཔལ་འབྱོར་གྱི་གོང་འཕེལ་ཆེད་ལམ་ལུགས་དང་ཁྲིམས་སྐྱོང་གི་ཁོར་ཡུག་ཡག་པོ་ཞིག་མཁོ་འདོན་བྱས་ཡོད་ཅེས་གསུངས་པ་རེད།
རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཏང་ཙུའུ་ཡི་ཁོངས་མི། ཀྲུའུ་ཞི་གཞོན་པ་ཝང་ཧུང་ཡན་གྱིས། སྔར་ལས་ལྷག་པའི་སྒོ་ནས་བསྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་བ་དང་ཀྲུང་གོའི་རྣམ་པའི་དེང་རབས་ཅན་ལ་སྐུལ་འདེད་གཏོང་བའི་བརྒྱུད་རིམ་ནང་ད་རེས་ཀྱི་དམངས་གཉེར་ཁེ་ལས་ཀྱི་བཞུགས་མོལ་ཚོགས་འདུ་དེ་འདྲ་ཞིག་སྐོང་འཚོགས་བྱས་པ་དེར་ལོ་རྒྱུས་ཀྱི་ལམ་ཚད་རྡོ་རིང་ལྟ་བུའི་དོན་སྙིང་ལྡན་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱིས་དམངས་གཉེར་ཁེ་ལས་གོང་འཕེལ་གྱི་སེམས་ཤུགས་ཆེས་ཆེར་འཕེལ་ཡོད་ལ་ཁེ་ལས་མཁས་པའི་སྙིང་སྟོབས་ལའང་སྐུལ་ལྕག་ཐེབས་ཡོད་ཅེས་གསུངས་པ་རེད།
ཝང་ཧུང་ཡན་གྱིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དེ་ནི་ཁ་ཕྱོགས་བསྟན་གནང་བ་ཞིག་ཡིན་པས། དམངས་གཉེར་དཔལ་འབྱོར་གྱིས་ཀྲུང་གོའི་རྣམ་པའི་དེང་རབས་ཅན་ལ་སྐུལ་འདེད་གཏོང་བའི་བརྒྱུད་རིམ་ཁྲོད་ཀྱི་གནས་བབ་ནུས་པར་གདེང་འཇོག་གང་ལེགས་གནང་བ་དང་དམངས་གཉེར་དཔལ་འབྱོར་རྒྱ་སྟོབས་ཇེ་ཆེར་གཏོང་བའི་བྱེད་ཕྱོགས་སྲིད་ཇུས་སྐོར་སྔར་ལས་ལྷག་པའི་སྒོ་ནས་ནན་སྟོན་གནང་བ་མ་ཟད། གོང་འཕེལ་གྱི་གནས་བབ་ཆེན་པོ་དང་དམངས་གཉེར་ཁེ་ལས་གོང་འཕེལ་གཏོང་བའི་ད་ཡོད་གནས་ཚུལ་ལ་ཚན་རིག་དང་མཐུན་པའི་བརྡར་གཅོད་བྱེད་པའི་རྨང་གཞིའི་ཐོག དམངས་གཉེར་ཁེ་ལས་པར་དུས་རབས་གསར་པའི་རྒྱང་སྐྱོད་ལམ་བུ་གསར་པའི་ཐོག་གསར་འབྱེད་གསར་སྐྲུན་དང་སྤུས་མཐོའི་གོང་འཕེལ་མངོན་འགྱུར་ཡོང་བར་བྱེད་པའི་ཆེད་འབད་བརྩོན་ལྷོད་མེད་བྱེད་དགོས་པའི་ཁ་ཕྱོགས་གསལ་སྟོན་གནང་ཡོད་ཅེས་གསུངས་པ་རེད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། དུས་རབས་གསར་པའི་རྒྱང་སྐྱོད་ཀྱི་ལམ་བུ་གསར་པའི་ཐོག་དམངས་གཉེར་དཔལ་འབྱོར་གྱི་གོང་འཕེལ་མདུན་ལམ་ཡངས་ཤིང་རྒྱ་ཆེ་ལ་བྱ་བ་སྒྲུབ་རྒྱ་ཆེ་བས། དམངས་གཉེར་ཁེ་ལས་དང་དམངས་གཉེར་ཁེ་ལས་པ་ཚོས་རང་ཉིད་ཀྱི་འཇོན་ནུས་ངོམས་པ་སྐབས་སུ་བབས་ཡོད་ཅེས་ནན་སྟོན་གནང་ཡོད། རྒྱལ་ཁབ་གོང་འཕེལ་དང་བསྒྱུར་བཅོས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཀྲེང་པེ་ཡིས། ད་ཐེངས་ཀྱི་ཚོགས་འདུའི་ཐོག་བསམ་བློ་གཅིག་གྱུར་ཡོང་བའི་ཡིད་ཆེས་བརྟན་དུ་གཏོང་བ་དང་སྤུས་མཐོའི་གོང་འཕེལ་དང་དེ་བཞིན་ཀྲུང་གོའི་རྣམ་པའི་དེང་རབས་ཅན་ལ་སྐུལ་འདེད་གཏོང་བའི་ཐད་དོན་སྙིང་གལ་ཆེན་ལྡན་ཡོད་ཅེས་གསུངས་པ་རེད།
ཀྲེང་པེ་ཡིས། ཕྱོགས་ཁག་གིས་བསམ་བློ་དང་བྱ་སྤྱོད་ལ་སྐུལ་འདེད་ནུས་ལྡན་གཏོང་ངེས་ཡིན་ལ། ཏང་ཀྲུང་དབྱང་གིས་རྒྱལ་ཁབ་ཕྱི་ནང་གི་དུས་བབ་ལ་བརྡར་གཅོད་བྱེད་པའི་ཐད་གཅིག་གྱུར་དང་། ཏང་ཀྲུང་དབྱང་གིས་དཔལ་འབྱོར་ལས་དོན་ལ་ཇུས་ཐག་བཀོད་སྒྲིག་བྱེད་པའི་ཐོག་གཅིག་གྱུར། གོང་འཕེལ་གྱི་ངེས་ཤུགས་ཆེ་རུ་གཏོང་བ། གོང་འཕེལ་གྱི་ཡིད་ཆེས་བརྟན་དུ་གཏོང་བ་བཅས་བྱེད་དགོས་པ་དང་། ལྷག་པར་དུ་སྤྱི་ཁྱབ་ཧྲུའུ་ཅིས་ཁེ་ལས་པས་དཀའ་ངལ་དང་འགྲན་རྩོད་ཁྱད་གསོད་བྱ་རྒྱུར་བསྔགས་སྐུལ་གནང་བ་དང་། འབད་བརྩོན་བྱས་ན་རྒྱལ་བར་ངེས་པའི་བསམ་པའི་ཉམས་འགྱུར་རྒྱུན་འཁྱོངས་བྱེད་པར་དོན་སྙིང་གལ་ཆེན་ལྡན་ཡོད། རྒྱ་ཆེའི་ཁེ་ལས་པས་རྒྱལ་ཁབ་ལ་དྲིན་ལན་འཇལ་བའི་ཕུགས་འདུན་འཆང་བ་དང་། བློ་གཅིག་སེམས་གཅིག་གིས་འཕེལ་རྒྱས་དོན་གཉེར་བྱེད་པ། ཁྲིམས་སྲུང་ཞིང་ཚོང་གཉེར་ལ་བྱང་ཆུབ་པ། སྔོན་ལ་ཕྱུག་པོ་ཆགས་མཁན་གྱིས་ཐུན་མོང་ཕྱུག་འགྱུར་ལ་སྐུལ་འདེད་གཏོང་བ། མེས་རྒྱལ་དང་མཉམ་དུ་ཡར་རྒྱས་ཡོང་བ་དང་། མི་དམངས་དང་མཉམ་དུ་འབད་བརྩོན་བཅས་བྱས་ན། ཀྲུང་གོའི་རྣམ་པའི་དེང་རབས་ཅན་འཛུགས་སྐྲུན་ཆེད་ལེགས་སྐྱེས་དེ་བས་ཆེ་བ་འབུལ་ཐུབ་ངེས་ཡིན་ཞེས་གསུངས་པ་རེད།
