གླ་ཆ་ཆད་འགྱངས་དང་ལས་ཞུཌ་སོཌ་སྲིད་ཇུས་མང་པོར་བཟོ་བཅོས་རྒྱག་རྒྱུ།
སྤེལ་དུས 2026-01-29
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུས་སྤྱི་ཟླ་1ཚེས་27ཉིན་གྱི་སྔ་དྲོ་གསར་འགྱུར་ཡོངས་བསྒྲགས་ཚོགས་འདུ་འཚོགས་པ་དང་། ཚོགས་འདུའི་ཐོག་རང་རྒྱལ་གྱིས་《ལས་ཞུགས་རྣམ་པ་གསར་པའི་ངལ་རྩོལ་པའི་གཞི་རྩའི་ཁེ་དབང་འགན་སྲུང་བྱ་ཐབས》ཞེས་པ་བཟོས་ནས་ལས་ཞུགས་རྣམ་པ་གསར་པའི་ངལ་རྩོལ་ཚད་གཞི་དང་ཁེ་ལས་ཀྱི་ངལ་རྩོལ་སྲུང་སྐྱོབ་འགན་འཁྲི་སྔར་བས་ཁ་གསལ་དུ་གཏོང་རྒྱུ་དང་།《ལོ་ཚད་བརྒལ་བའི་ངལ་རྩོལ་པའི་གཞི་རྩའི་ཁེ་དབང་སྲུང་སྐྱོབ་གནས་སྐབས་ལག་བསྟར་གཏན་འབེབས》ཞེས་པ་འདོན་རྒྱུ་དང་།《ལས་བཟོ་པའི་ཕོགས་ཡོད་ལོ་འཁོར་ངལ་གསོའི་སྲོལ་ཡིག》ཅེས་པར་བཟོ་བཅོས་བརྒྱབ་སྟེ་མི་སྣ་བཀོལ་སྤྱོད་ཚན་པས་ལས་བཟོ་པར་གླ་ཕོགས་ཡོད་པའི་ངལ་གསོ་རྒྱག་ཏུ་འཇུག་པའི་ལམ་ལུགས་ལག་བསྟར་བྱ་རྒྱུར་སྐུལ་འདེད་གཏོང་རྒྱུ་ཡིན་ཞེས་བསྟན་པ་རེད།
མ་མཐའི་གླ་ཕོགས་ཚད་གཞི་ལེགས་སྒྲིག་ལམ་སྲོལ་འཐུས་ཚང་དུ་བཏང་ནས་ཁེ་ལས་ཀྱིས་རྩལ་ནུས་གཞི་རྩར་འཛིན་པའི་གླ་ཕོགས་བགོ་བཤའི་ལམ་ལུགས་འཛུགས་རྒྱུར་ཁྲིད་སྟོན་བྱ་རྒྱུ་དང་། ལས་གནས་བརྟན་པོ་དང་རྒྱ་བསྐྱེད། སྤུས་ཚད་མཐོར་གཏོང་བཅས་ཀྱི་བྱ་སྤྱོད་ལག་བསྟར་བྱས་ནས་གཙོ་གནད་ལས་རིགས་སུ་ལས་ཞུགས་བྱེད་པའི་རྒྱབ་སྐྱོར་བྱ་ཐབས་དང་། མི་ཐབས་རིག་ནུས་ཀྱིས་ལས་ཞུགས་ལ་ཤུགས་རྐྱེན་བཟོ་བར་ཁ་གཏད་གཅོག་པའི་ཡིག་ཆ་འདོན་རྒྱུ། ལས་རིགས་གནོད་འཚེའི་འགན་སྲུང་ཚོད་ལྟའི་ས་ཚིགས་ལ་སྐུལ་འདེད་བཏང་ནས་ཚོད་ལྟའི་ས་ཚིགས་རྒྱལ་ཡོངས་སུ་ཁྱབ་གདལ་གཏོང་རྒྱུ་དང་། སྤྱི་ཚོགས་འགན་བཅོལ་གྱི་ཁྱབ་རྒྱ་ཆེ་རུ་བཏང་ནས་སྟབས་བསྟུན་ལས་ཞུགས་མི་སྣ་དང་ལས་ཞུགས་རྣམ་པ་གསར་པའི་མི་སྣས་ལས་བཟོའི་འགན་བཅོལ་ནང་ཞུགས་རྒྱུར་རྒྱབ་སྐྱོར་དང་སྐུལ་མ་གཏོང་རྒྱུ། གཙོ་གནད་མི་ཚོགས་ཀྱི་ལས་ཞུགས་ལ་རྒྱབ་སྐྱོར་བྱེད་ཤུགས་ཆེ་རུ་བཏང་ནས་མཐོ་སློབ་སློབ་ཐོན་སློབ་མ་སོགས་གཞོན་ནུའི་ལས་ཞུགས་ཡིག་ཆ་པར་འགྲེམས་བྱ་རྒྱུ་དང་། གྲོང་ཁྱེར་དང་གྲོང་རྡལ་གྱི་ལས་ཞུགས་མ་ལག་ལ་གཅིག་འགྱུར་འཆར་འགོད་བྱེད་པའི་བསམ་འཆར་འདོན་རྒྱུ། དབུལ་ལོག་དང་དབུལ་འགྱུར་སྔོན་འགོག་བྱེད་པའི་རྒྱུན་རྣམ་ཅན་གྱི་ལས་ཞུགས་ཟུར་སྐྱོར་ལམ་སྲོལ་འཛུགས་རྒྱུ།《ལས་ཀའི་གོ་མིང་གི་ཞིབ་དཔྱད་དོ་དམ་གནས་སྐབས་ལག་བསྟར་གཏན་འབེབས》ཞེས་པར་བཟོ་བཅོས་བརྒྱབ་ནས་ལས་ཀའི་གོ་མིང་ལ་ཞིབ་དཔྱད་དོ་དམ་བྱེད་པའི་བརྒྱུད་རིམ་ཧྲིལ་པོར་ལྟ་སྡོམ་བྱེད་ཤུགས་ཆེ་རུ་གཏོང་རྒྱུ་དང་། ལས་རིགས་ཐོབ་ཐང་དཀར་ཆག་ལ་སྟབས་བསྟུན་ལེགས་སྒྲིག་བྱ་རྒྱུ། རྒན་གསོའི་ཞབས་ཞུ་བའི་ལས་རིགས་ཐོབ་ཐང་ལམ་ལུགས་འཛུགས་རྒྱུ། ས་གནས་ཀྱི་ཚོད་ལྟའི་ས་ཚིགས་ཀྱི་ལས་རིགས་ཐོབ་ཐང་ལ་ཕྱོགས་རྐྱང་པའི་ཁས་ལེན་བྱེད་པར་རྒྱབ་སྐྱོར་བཅས་བྱ་རྒྱུ། འདུམ་འགྲིག་དང་འདུམ་གཅོད་ཀྱི་སྤུས་ཚད་དང་ཕན་འབྲས་ཆེ་རུ་བཏང་ནས་ལས་རིགས་མཐུན་ཚོགས་ཀྱི་འདུམ་འགྲིག་རྩ་འཛུགས་འཛུགས་སྐྱོང་ལ་ཤུགས་སྣོན་དང་། དམངས་གཉེར་ཁེ་ལས་ཀྱིས་ཡོངས་ཁྱབ་ཐོག་གྲོས་མོལ་སྤེལ་རེས་ལམ་སྲོལ་འཛུགས་རྒྱུར་མཛུབ་ཁྲིད་བྱས་ནས་སྐུལ་འདེད་གཏོང་རྒྱུ། ནུས་ཤུགས་ཡོད་རྒུས་གླ་ཕོགས་ཆད་འགྱངས་བྱས་པ་བཅོས་སྒྲིག་བྱེད་པའི་དགུན་དུས་བྱ་སྤྱོད་ཀྱི་ལས་དོན་ཁག་ཡག་པོ་བསྒྲུབས་ཏེ་འབད་བརྩོན་ཆེན་པོས་ཞིབ་དཔྱད་ཐུབ་པའི་གླ་ཕོགས་ཆད་འགྱངས་གྱོད་གཞི་ཐག་གཅོད་ཡག་པོ་བྱ་རྒྱུ། མི་ཤུགས་ཐོན་ཁུངས་ཁྲོམ་རར་ཆེད་དོན་བཅོས་སྒྲིག་བྱེད་ཤུགས་ཆེ་རུ་བཏང་ནས་གཞུང་དྲང་དང་གོ་རིམ་ལྡན་པའི་ལས་ཞུགས་ཁོར་ཡུག་གཏོད་རྒྱུ། ཁེ་ལས་དང་འབྲེལ་བ་ཡོད་པའི་ལྟ་ཞིབ་ཁྲིམས་བསྟར་ཚད་ལྡན་དུ་བཏང་ནས་གྲངས་འཛིན་རིག་ནུས་ཀྱིས་ནུས་པ་སྦྱིན་པའི་ཆུ་ཚད་མཐོ་རུ་གཏོང་རྒྱུ་བཅས་ཡིན།
