ན་ནིང་རྒྱལ་ཡོངས་སུ་ལས་གནས་བྱེ་བ་གཅིག་ལྷག་མཁོ་འདོན་བྱས་འདུག
སྤེལ་དུས 2026-01-29
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ་ཡིས་ཁྱབ་བསྒྲགས་བྱས་པར་གཞིགས་ན། 2025ལོར་རྒྱལ་ཡོངས་ཀྱི་གྲོང་ཁྱེར་དང་གྲོང་རྡལ་དུ་ལས་ཞུགས་གསར་པ་མི་གྲངས་ཁྲི་1267འཕར་བ་དང་། གྲོང་ཁྱེར་དང་གྲོང་རྡལ་གྱི་ལས་ཀ་ཤོར་ཚད་ལོ་ཧྲིལ་པོའི་ཆ་སྙོམས་5.2%ཟིན་ནས། ལས་ཞུགས་ཀྱི་དུས་བབ་སྤྱིའི་ཆ་ནས་བརྟན་པོ་རྒྱུན་འཁྱོངས་ཐུབ་ཡོད།
2025ལོ་ཚུན་དུ། རྒྱལ་ཁབ་ཀྱིས་བཏོན་པའི་ལས་ཞུགས་བརྟན་གཏོང་གི་སྲིད་ཇུས་རབ་དང་རིམ་པར་ཕན་འབྲས་ཐོན་ཡོད། ལས་ཤོར་འགན་བཅོལ་གྱི་གྲོན་དངུལ་བཅག་པ་བརྒྱུད་ཁེ་ལས་ཀྱི་ཁུར་པོ་སྒོར་དུང་ཕྱུར་1872ཡང་དུ་བཏང་བ་དང་། ལས་གནས་བརྟན་གཏོང་གི་ཕྱིར་སློག་མ་དངུལ་སྒོར་དུང་ཕྱུར་336སྤྲད་ཡོད། རྒྱལ་ཡོངས་ཀྱི་ས་གནས་ཁག་ཏུ་མཐོ་སློབ་སློབ་ཐོན་སློབ་མའི་སྟོན་དུས་ཀྱི་ཆེད་དོན་བྱེད་སྒོ་སྤེལ་ནས་གདན་ཞུའི་ཚོགས་འདུ་ཐེངས་ཁྲི་2.1འཚོགས་པ་དང་ལས་གནས་བྱེ་བ་གཅིག་ལྷག་མཁོ་འདོན་བྱས་ཡོད། “རྩལ་ནུས་ཀྱིས་མདུན་ལམ་གསལ་བའི”བྱ་སྤྱོད་ཀྱི་ཁ་གསབ་རང་བཞིན་གྱི་གསོ་སྦྱོང་མི་ཐེངས་ཁྲི་1100ལས་བརྒལ་བ་དང་། དབུལ་སྒྲོལ་མི་འབོར་གྱི་ལས་ཞུགས་གཞི་ཁྱོན་མི་གྲངས་ཁྲི་3000ཡན་རྒྱུན་འཁྱོངས་ཐུབ་ཡོད།
སྤྱི་ཚོགས་འགན་སྲུང་ཐད། རྒན་གསོ་འགན་བཅོལ་རྒྱལ་ཡོངས་སུ་གཅིག་གྱུར་འཆར་འགོད་དང་བརྟན་ལྷིང་ངང་ལག་བསྟར་བྱས་པ་དང་། མི་སྒེར་གྱི་རྒན་གསོའི་མ་དངུལ་ལམ་ལུགས་བརྟན་པོའི་ངང་འཁོར་སྐྱོད་བྱས་པ། ལས་རིགས་གནོད་འཚེའི་འགན་སྲུང་ཚོད་ལྟའི་ལས་དོན་ནང་ཞུགས་མཁན་རིམ་རྩིས་བྱས་ན་མི་གྲངས་ཁྲི་2510ཟིན་ཡོད། སྤྱི་ཚོགས་འགན་བཅོལ་གྱི་ཁྱབ་རྒྱ་རྒྱུན་མཐུད་ངང་ཆེ་རུ་ཕྱིན་ནས། 2025ལོའི་ལོ་མཇུག་བར་རྒྱལ་ཡོངས་ཀྱི་གཞི་རྩའི་རྒན་གསོ་དང་། ལས་ཤོར། ལས་རྨས་འགན་བཅོལ་བཅས་ནང་ཞུགས་མཁན་མི་གྲངས་དུང་ཕྱུར་10.76དང་། དུང་ཕྱུར་2.49 དུང་ཕྱུར་3.05བཅས་སོ་སོར་ཟིན་པ་དེ་ལོ་སྔོན་མའི་ལོ་མཇུག་དང་བསྡུར་ན་མི་ཁྲི་316དང་། མི་ཁྲི་329 མི་ཁྲི་102བཅས་སོ་སོར་འཕར་ཡོད་པ་རེད། རྒྱལ་ཡོངས་སུ་སྤྱི་ཚོགས་འགན་སྲུང་གཱ་འཛིན་མཁན་མི་གྲངས་དུང་ཕྱུར་13.9ཟིན་ནས་མི་འབོར་གྱི་98.9%ལ་ཁྱབ་པ་དང་། གློག་རྡུལ་སྤྱི་ཚོགས་འགན་སྲུང་གཱ་ལེན་སྤྱོད་བྱེད་མཁན་མི་གྲངས་དུང་ཕྱུར་11.04ཟིན་ནས་མི་འབོར་གྱི་78.4%ལ་ཁྱབ་ཡོད་པ་རེད། ལོ་ཧྲིལ་པོའི་སྤྱི་ཚོགས་འགན་བཅོལ་གྱི་ཐེབས་རྩ་གསུམ་པོ་ལོ་མཇུག་ཏུ་རིམ་རྩིས་བྱས་ན་ལྷག་གྲངས་སྒོར་དུང་ཕྱུར་ཁྲི་10.2ཟིན་ཡོད།
