《བདེན་འཚོལ》དུས་དེབ་སྟེང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྩོམ་ཡིག་གལ་ཆེན《འགན་འཁུར་འདོད་པ་དང་། འགན་འཁུར་ཕོད་པ། འགན་འཁུར་མཁས་པ་བཅས་སྲོལ་བཟང་ཞིག་ཏུ་འགྱུར་དུ་འཇུག་དགོས》ཞེས་པ་སྤེལ་བ།

            ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ3པའི་ཚེས1ཉིན་པར་སྐྲུན་བྱས་པའི《བདེན་འཚོལ》དུས་དེབ་འདོན་ཐེངས་ལྔ་པའི་སྟེང་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་གི་རྩོམ་ཡིག་གལ་ཆེན《འགན་འཁུར་འདོད་པ་དང་། འགན་འཁུར་ཕོད་པ། འགན་འཁུར་མཁས་པ་བཅས་སྲོལ་བཟང་ཞིག་ཏུ་འགྱུར་དུ་འཇུག་དགོས》ཞེས་པ་སྤེལ། དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས2012ལོའི་ཟླ12པ་ནས2025ལོའི་ཟླ12པའི་བར་གྱི་རྒྱས་བཤད་གལ་ཆེན་སྐོར་གྱི་གནད་བཏུས་རེད། 

            རྩོམ་ཡིག་ལས་ནན་གྱིས་བསྟན་དོན། སྟོང་བཤད་རྒྱལ་ཕུང་དང་དངོས་སྒྲུབ་རྒྱལ་དར་ཡིན། ཏང་གི་ཚོགས་ཆེན་ཉི་ཤུ་པའི་ཐོག་བྲིས་པའི་བརྗིད་ཉམས་ལྡན་པའི་འཆར་འགོད་དེ་མཛེས་སྡུག་ལྡན་པའི་དོན་དངོས་སུ་འགྱུར་བར་རིམ་པ་སོ་སོའི་འགོ་ཁྲིད་ལས་བྱེད་པས་འགན་འཁུར་དགོས། འཐབ་ལམ་གསར་པའི་སྟེང་། ཚང་མ་ཁོད་སྙོམས་ཀྱི་ལམ་ཆེན་ཡིན་མི་སྲིད་པས། ང་ཚོར་འགྲན་སློང་གལ་ཆེན་དང་ཉམས་སད་གལ་ཆེན། འགོག་རྐྱེན་གལ་ཆེན། འགལ་བ་གལ་ཆེན་བཅས་མང་པོར་འཕྲད་ངེས་པས། འགོ་ཁྲིད་ལས་བྱེད་པར་ངེས་པར་དུ་འགན་འཁུར་བའི་སྙིང་སྟོབས་དྲག་པོ་ལྡན་དགོས། རིམ་པ་སོ་སོའི་འགོ་ཁྲིད་ལས་བྱེད་པས་ཏང་ལ་ཁས་ལེན་བྱེད་པ་དང་ཉིན་ལས་མཚན་སྒྲུབ་བྱས་ཏེ། དུས་རྟག་ཏུ་བློ་བདེ་ལ་འབབ་མི་ཐུབ་པའི་འགན་འཁྲི་ཁུར་སེམས་དང་། ཧུར་ཐག་གིས་འགན་ཁུར་བའི་སྙིང་སྟོབས་ཀྱིས་ཏང་དང་མི་དམངས་ལ་འགན་འཁྲི་ལེགས་པོར་སྒྲུབ་པ་དང་འགན་འཁྲི་ཡག་པོ་བསྒྲུབ་དགོས།

            རྩོམ་ཡིག་ལས་བསྟན་དོན། ལས་བྱེད་པས་འགན་འཁྲི་ཁུར་ཕོད་པ་བྱེད་རྒྱུ་དེ་ནི་ཆབ་སྲིད་ཀྱི་གཤིས་སྤྱོད་ཡིན་ལ་སྲིད་སྐྱོང་གི་འགན་འཁྲི་ཞིག་ཀྱང་ཡིན། འགན་འཁྲི་ཇི་འདྲ་ཆེ་ན་ལས་དོན་དེ་འདྲ་ཆེན་པོ་སྒྲུབ་ཐུབ་ལ། འགན་ཁུར་བ་ཇི་འདྲ་བཟང་ན་གཞི་ནས་གྲུབ་འབྲས་དེ་འདྲ་ཆེན་པོ་ལེན་ཐུབ། དཔོན་གནས་ཁོ་ན་འདོད་པ་ལས་བྱ་བ་སྒྲུབ་མི་འདོད་པ་དང་། དབང་ཆ་འཛིན་འདོད་པ་ལས་འགན་འཁྲི་འཁུར་མི་འདོད་པ། སྙན་གྲགས་རྒྱས་འདོད་པ་ལས་དཀའ་ལས་རྒྱག་མི་འདོད་པ་བཅས་གཏན་ནས་བྱེད་མི་རུང་། ཏང་ལ་ལྷག་བསམ་རྣམ་དག་དང་ཏང་དང་དཀའ་སྡུག་མཉམ་ཁུར། ཏང་གི་ཆེད་དུ་རང་འགན་གཙང་སྒྲུབ་བྱེད་པ། དམངས་ལ་བདེ་སྐྱིད་སྐྲུན་པའི་ཆབ་སྲིད་འགན་འཁྲི་དང་། ས་ཁོངས་སྲུང་བའི་འགན་འཁྲི་ཡོད་པ་དང་ས་ཁོངས་སྲུང་བའི་འགན་འཁྲི་འཁུར་བ། ས་ཁོངས་སྲུང་བའི་འགན་འཁྲི་སྒྲུབ་པའི་འགན་འཁུར་ནས། བདེན་དོན་ཆེན་པོའི་མདུན་དུ་རལ་གྲི་སྟོན་ཕོད་པ་དང་། འགལ་བའི་མདུན་དུ་དཀའ་ངལ་ཁྱད་བསད་ཀྱིས་མདུན་དུ་བསྐྱོད་ཕོད་པ། ཉམས་ཉེན་གྱི་མདུན་དུ་ཡར་ལངས་ཕོད་པ། ནོར་འཁྲུལ་གྱི་མདུན་དུ་འགན་འཁྲི་འཁུར་ཕོད་པ། བྱ་ངན་སྤྱོད་ངན་གྱི་མདུན་དུ་མཐའ་གཅིག་ཏུ་འཐབ་རྩོད་བྱེད་ཕོད་པ་བཅས་བྱ་དགོས། འགོ་ཁྲིད་ལས་བྱེད་པས་རང་གི་གོ་གནས་ནས་སྲིད་དོན་ཇུས་འགོད་དང་། འགན་འཁྲི་བསྒྲུབ་པ་བཅས་བྱས་ཏེ། འགན་འཁྲིའི་ཁྱབ་ཁོངས་ནང་རང་འགུལ་ངང་འགན་འཁྲི་ལྕི་མོ་འཁུར་བ་དང་དཀའ་ངལ་ཁྱད་བསད་ཐུབ་པ་བྱེད་དགོས། ཏང་གཤིས་ཀྱི་རྩ་དོན་རྒྱུན་འཁྱོངས་བྱས་ཏེ་བདེན་རྫུན་གསལ་པོ་དང་འཐབ་རྩོད་བྱེད་ཕོད་པ། གནད་དོན་གལ་ཆེན་དང་རྩ་དོན་གྱི་གནད་དོན་ཐད་དར་ཆ་གསལ་པོ་ཡིན་དགོས།

            རྩོམ་ཡིག་ལས་བསྟན་དོན། འགོ་ཁྲིད་ལས་བྱེད་པར་འགན་འཁུར་བའི་བློ་རྒྱ་ཡངས་པོ་དགོས་པ་མ་ཟད། ད་དུང་བྱ་བ་སྒྲུབ་ཐུབ་པའི་ནུས་པ་ངོ་མ་ཡང་ལྡན་དགོས། བློ་ཁོག་ཆེན་པོས་ཆབ་སྲིད་བཤད་དགོས་ལ། ཆབ་སྲིད་བཤད་མཁས་པོ་བྱེད་དགོས། འཕེལ་རྒྱས་དམ་འཛིན་བྱེད་པའི་དམ་བཅའ་འཇོག་དགོས་ལ་འཕེལ་རྒྱས་དམ་འཛིན་བྱེད་མཁས་པོ་ཡང་བྱ་དགོས། བཅོས་སྒྱུར་དམ་འཛིན་བྱེད་ཕོད་དགོས་ལ། བཅོས་སྒྱུར་དམ་འཛིན་བྱེད་མཁས་དགོས། འགལ་བ་དང་གནད་དོན་ལ་ཐད་ཀར་གདོང་གཏོད་ཕོད་པ་བྱེད་དགོས་ལ། འགལ་བ་དང་གནད་དོན་ཐག་གཅོད་བྱེད་མཁས་པོ་ཡང་བྱ་དགོས། བྱ་བ་སྒྲུབ་འདོད་པ་དང་བྱ་བ་ངོ་མ་སྒྲུབ་པའི་རང་རྟོགས་ཡོད་དགོས་ལ། བྱ་བ་སྒྲུབ་ཤེས་པ་དང་བྱ་བ་སྒྲུབ་ཐུབ་པའི་ནུས་པ་ཡང་ཡོད་དགོས། ཏང་གི་སྒྲིག་ཁྲིམས་དང་ལས་སྒྲུབ་ལས་སྐྲུན་ནི་ནང་གནས་གཅིག་གྱུར་ཡིན། སྒྲིག་སྲོལ་དང་སྒྲིག་ཁྲིམས་ལ་བརྩི་སྲུང་བྱས་ན་ལས་སྒྲུབ་ལས་སྐྲུན་གྱི་རང་དབང་དང་བར་སྟོང་རྒྱ་སྐྱེད་གང་ལེགས་བྱེད་ཐུབ། འགན་འཁུར་གྱི་འབྲེལ་བ་ཐག་གཅོད་ཡང་དག་པ་བྱས་ཏེ། དག་གཙང་དང་འགན་འཁྲི། སྲིད་བརྩོན་དང་སྲིད་གཙང་གཅིག་གྱུར་བྱས་ནས། འགན་འཁྲི་ལྕི་མོ་ཁུར་ཕོད་པ་དང་དཀའ་ངལ་དང་དུ་ལེན་ཐུབ་པ། རྙོག་དྲར་མི་འཛེམས་པ་བཅས་བྱེད་ཕོད་དགོས།

            རྩོམ་ཡིག་ལས་བསྟན་དོན། ཕྱོགས་ཡོངས་ནས་ཏང་བཅོས་སྐྱོང་ནན་མོ་བྱེད་པ་དང་འགན་འཁུར་རྒྱུར་སྐུལ་མ་གཏོང་བ་ནི་ནང་གནས་གཅིག་གྱུར་ཡིན་པ་ལས་ཕན་ཚུན་འགལ་ཟླར་གྱུར་པ་མིན། གཟབ་ནན་ནི་ཚང་མ་དོ་དམ་ནན་མོ་བྱེད་རྒྱུ་ཁོ་ན་མིན་པར། མི་རྣམས་ཀྱིས་མདུན་དུ་སྔ་བལྟས་ཕྱི་བསམ་དང་རྐང་འཁུམས་ལག་འཁུམས། ཉབ་བེ་ཉོབ་བེ། བྱ་བ་ཅི་ཡང་མི་བྱེད་པའི་འཁྱིལ་ཆུ་ལྟ་བུར་འགྱུར་མི་རུང་ལ། ཁ་ཕྱོགས་གསལ་པོ་དང་སྒྲིག་སྲོལ་འཛུགས་པ། སྤྱོད་གཙང་དར་སྤེལ། རིམས་ཐར་སྟོབས་ཆེར་གཏོང་བ་བཅས་བྱས་ཏེ། སྤྱོད་བཟང་གཞུང་དྲང་གི་ཏང་ནང་ཁུལ་གྱི་ཆབ་སྲིད་ཀྱི་སྣང་ཚུལ་ཆགས་པ་དང་། ལས་སྒྲུབ་ལས་སྐྲུན་ལ་ཕན་པ་ཡོད་པའི་ཁོར་ཡུག་བཟང་པོ་བསྐྲུན་ནས་ཏང་ཡོངས་ཀྱི་ཧུར་བརྩོན་རང་བཞིན་དང་། རང་འགུལ་རང་བཞིན། གསར་གཏོད་རང་བཞིན་བཅས་སྔར་ལས་སྐུལ་སློང་བྱ་དགོས། འགན་ཁུར་ཕོད་པ་རྩ་འཛུགས་བྱས་ན་ལས་བྱེད་པར་གཞི་ནས་ཡིད་ཆེས་ཡོད་སྲིད། འགན་འཁྲི་འཁུར་ཕོད་མཁན་གྱིས་འགན་འཁུར་བ་དང་། འགན་འཁྲི་སྒྲུབ་མཁན་ལ་འགན་ཁུར་བ། ལས་ཀ་སྒྲུབ་མཁན་ལ་རྒྱབ་སྐྱོར་བཅས་བྱེད་ཕོད་པ་བྱེད་དགོས་པ་དང་། དོ་དམ་ནན་མོ་དང་གཅེས་སེམས་ཟུང་འབྲེལ་རྒྱུན་འཁྱོངས་བྱས་ཏེ། “དབྱེ་བ་གསུམ་དབྱེ་འབྱེད”དོན་འཁྱོལ་བྱས་ནས། ནུས་ཤུགས་ཡོད་རྒུས་ལས་བྱེད་པས་འགན་འཁུར་བའི་རྒྱུ་རྐྱེན་སྣ་ཚོགས་ཀྱི་འགོག་རྐྱེན་སེལ་དགོས། མི་འདེམས་པ་དང་མི་སྤྱོད་པའི་ཐད་འགན་འཁུར་བ་དང་། འགན་ལྕི་མོ་འཁུར་བའི་ཁ་ཕྱོགས་གསལ་པོ་བྱས་ཏེ། ལས་ཀའི་འགན་འཁུར་ཕོད་མིན་དང་ལས་ཀ་སྒྲུབ་འདོད་ཡོད་མེད། ལས་ཀ་སྒྲུབ་ཐུབ་མིན་བཅས་ལས་བྱེད་པ་དབྱེ་འབྱེད་དང་། བཟང་ངན་ཤན་འབྱེད། བྱ་དགའ་ཆད་གཅོད་བཅས་ཀྱི་ཚད་གཞི་གལ་ཆེན་ཞིག་ཏུ་བརྩི་དགོས་ལ། ལས་བྱེད་པས་བྱ་བ་ཅི་ཞིག་བསྒྲུབས་ཡོད་པ་དང་བྱ་བ་ག་ཚོད་བསྒྲུབས་པ། བསྒྲུབས་པའི་བྱ་བ་རྩ་འཛུགས་དང་མང་ཚོགས་ཀྱིས་ཁས་ལེན་མིན་བཅས་ལས་བྱེད་པ་གདམ་གསེས་ཀྱི་གཞི་འཛིན་ས་བྱས་ནས། འགན་འཁྲི་འཁུར་ཕོད་པ་དང་འགན་འཁུར་མཁས་པ། བྱས་རྗེས་མངོན་གསལ་ཡིན་པའི་ལས་བྱེད་པ་བདམས་ནས། འགན་འཁུར་འདོད་པ་དང་འགན་འཁུར་ཕོད་པ། འགན་འཁུར་མཁས་པ་བཅས་རྒྱུན་སྲོལ་ཞིག་ཏུ་འགྱུར་བར་བྱེད་དགོས།

རྩོམ་སྒྲིག་པ། རིག་གྲོལ།