《བདེན་འཚོལ》དུས་དེབ་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྩོམ་ཡིག་གལ་ཆེན་བཀོད་པ།

དམངས་ཡོངས་ཀྱི་ལྟ་ཀློག་ལ་སྐུལ་འདེད་བཏང་སྟེ་རིག་དཔལ་དར་བའི་སྤྱི་ཚོགས་སྐྲུན་དགོས།

             ཤིན་ཧྭ་གསར་འགྱུར་ཁང་པེ་ཅིང་ནས་ཟླ་4ཚེས་15ཉིན་གློག་འཕྲིན་འབྱོར་གསལ། ཟླ་4ཚེས་16ཉིན་དཔེ་སྐྲུན་བྱས་པའི་བདེན་འཚོལ་དུས་དེབ་འདོན་ཐེངས་བརྒྱད་པའི་ཐོག ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གི་རྩོམ་ཡིག་གལ་ཆེན《དམངས་ཡོངས་ཀྱི་ལྟ་ཀློག་ལ་སྐུལ་འདེད་བཏང་སྟེ་རིག་དཔལ་དར་བའི་སྤྱི་ཚོགས་སྐྲུན་དགོས》ཞེས་པ་འགོད་རྒྱུ་རེད། དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་2013ལོའི་ཟླ་3པ་ནས་2025ལོའི་ཟླ་3པའི་བར་གྱི་འབྲེལ་ཡོད་རྣམ་བཤད་གལ་ཆེན་གྱི་གནད་བསྡུས་ཤིག་རེད།

             རྩོམ་ཡིག་ནང་བསྟན་དོན། ལྟ་ཀློག་ནི་མིའི་རིགས་ཀྱིས་རིག་གནས་སྦྱོང་བ་དང་། བློ་རིག་འཕེལ་བ། ཀུན་སྤྱོད་སྐྱོང་བ་བཅས་ཀྱི་ཐབས་ལམ་གལ་ཆེན་ཞིག་ཡིན་པས། མི་རྣམས་ལ་བློ་སྐྱེད་བྱུང་ནས་བླ་ན་མེད་པའི་ཕུགས་བསམ་སྐྱེད་སྲིང་དང་གཞུང་སེམས་དྲང་པོ་དང་བློ་སྟོབས་ཆེན་པོ་འཕེལ་ཐུབ། ལོ་རྒྱུས་སྦྱངས་ན་རྒྱལ་ཕམ་ཤེས་པ་དང་། ཐོབ་ཤོར་དཔྱད་ཆོག་ལ། དར་རྒུད་ཀྱང་ཤེས་ཐུབ། སྙན་ངག་སྦྱངས་ན་བརྩེ་བ་ཟབ་ཏུ་འགྲོ་བ་དང་། བློ་སྟོབས་འཕེལ་ཐུབ་ལ། བློ་རིག་ཀྱང་རྒྱས་ཐུབ། མི་ཆོས་སྦྱངས་ན་ཁྲེལ་གཞུང་ཤེས་ཐུབ་པ་དང་། གཟི་ཁྲེལ་རྟོགས་ཐུབ་ལ། ཡིན་མིན་གསལ་རྟོགས་ཀྱང་བྱེད་ཐུབ། དེས་ན་དཔེ་དེབ་མང་ཙམ་ལྟ་ཀློག་བྱེད་པའི་འབོད་སྐུལ་བྱས་ཏེ་རིག་དཔལ་དར་བའི་སྤྱི་ཚོགས་བསྐྲུན་ནས་མི་དམངས་ཀྱི་བསམ་བློའི་གནས་ཚད་ཟམ་མི་ཆད་པར་མཐོ་རུ་དང་མི་དམངས་ཀྱི་བསམ་པའི་སྟོབས་ཤུགས་ཆེ་རུ་བཏང་ན། ཀྲུང་ཧྭ་མི་རིགས་ཀྱི་བསམ་པའི་འཇིག་རྟེན་གྱི་ནང་དོན་དེ་བས་གཏིང་ཟབ་ཏུ་འགྲོ་ཐུབ།

             རྩོམ་ཡིག་ནང་བསྟན་དོན། གུང་ཁྲན་ཏང་མིས་མར་ཁེ་སི་རིང་ལུགས་ཀྱི་གསུང་རབ་བཀླགས་ནས་མར་ཁེ་སི་རིང་ལུགས་ཀྱི་རྩ་བའི་རིགས་པ་རྟོགས་པར་བྱེད་པ་དེ་ཉིད་འཚོ་བའི་གོམས་གཤིས་དང་། བསམ་པའི་དོན་གཉེར་ཞིག་ཏུ་བརྩིས་ཏེ་གསུང་རབ་ལ་བརྟེན་ནས་སྤྱོད་བཟང་སྐྱོང་སྤེལ་བྱེད་པ་དང་། བསམ་བློར་ཞུན་བརྡར་གཏོང་བ། གནས་ཚད་མཐོ་རུ་གཏོང་བ། ལག་ལེན་ལ་མཛུབ་ཁྲིད་བཅས་བྱེད་དགོས། ལས་བྱེད་པས་ལས་ཀ་དང་ཟུང་འབྲེལ་བྱས་ནས་སློབ་སྦྱོང་བྱེད་དགོས་ཤིང་། ལས་ཀ་ཅི་ཞིག་བྱས་ཀྱང་དེའི་སྐོར་སྦྱོང་བ་དང་མི་འདང་ས་དེ་སྦྱོང་དགོས། མར་ཁེ་སི་རིང་ལུགས་ཀྱི་རིགས་པའི་གཞུང་ལུགས་དང་ལྷག་པར་དུ་དུས་རབས་གསར་པའི་ཏང་གི་གསར་གཏོད་ཀྱི་རིགས་པའི་གཞུང་ལུགས་སྦྱངས་ཏེ། ཏང་གི་ལོ་རྒྱུས་དང་། ཀྲུང་གོ་གསར་པའི་ལོ་རྒྱུས། སྒྱུར་བཅོས་སྒོ་དབྱེའི་ལོ་རྒྱུས། སྤྱི་ཚོགས་རིང་ལུགས་འཕེལ་རྒྱས་ཀྱི་ལོ་རྒྱུས་བཅས་སློབ་སྦྱོང་དང་། དཔལ་འབྱོར་དང་། ཆབ་སྲིད། བཅའ་ཁྲིམས། རིག་གནས། སྤྱི་ཚོགས། དོ་དམ། སྐྱེ་ཁམས། རྒྱལ་སྤྱི་སོགས་ཕྱོགས་ཁག་གི་རྨང་གཞིའི་རང་བཞིན་གྱི་ཤེས་བྱ་སློབ་སྦྱོང་། རང་འཁྲིའི་ལས་ཀ་ཡག་པོ་སྒྲུབ་པ་དང་འབྲེལ་ཡོད་ཀྱི་ཤེས་བྱ་གསར་པ་དང་རྩལ་ནུས་གསར་པ་སློབ་སྦྱོང་བཅས་བྱས་ཏེ། རང་འགན་གཙང་སྒྲུབ་བྱེད་པར་དགོས་ངེས་ཀྱི་ཤེས་བྱའི་མ་ལག་ཟམ་མི་ཆད་པར་འཐུས་སྒོ་ཚང་དུ་གཏོང་དགོས། རྒྱ་ཆེའི་གཞོན་ནུས་སློབ་སྦྱོང་ཡག་པོ་བྱས་ཏེ། གསེར་ལས་ལྷག་པའི་རྩ་ཆེའི་དུས་ཚོད་ལ་གཅེས་སྤྲས་ཀྱིས་བརྩོན་པ་ཆུ་བོའི་རྒྱུན་བཞིན་བསྟེན་ཏེ། ལྷོད་གཡེང་གཏན་ནས་མི་གཏོང་བར་བློ་རྩེ་གཅིག་སྒྲིམ་བྱེད་དགོས་ལ། གཙོ་གནད་འབུར་དུ་ཐོན་པ་དང་གལ་འགངས་ཆེ་བ་བདམས་ནས་ཐོས་རྒྱ་ཆེ་ལ་ཆེད་ལས་མཁས་པ་དང་། ཐོས་པ་ཇི་ཙམ་ཆེ་ན་ཆེད་ལས་དེ་ཙམ་གྱིས་མཁས་པར་གྱུར་ཐུབ་པའི་འབད་བརྩོན་ཡང་བྱེད་དགོས།

             རྩོམ་ཡིག་ནང་བསྟན་དོན། “ཁོམ་པ་ཡོད་ཚད་འཚོལ་གང་ཐུབ”དང“སྙིང་རུས་ཅན་གྱིས་རྡོ་ལ་ཨི་ཁུང་འབིགས་པའི”སྙིང་སྟོབས་དར་སྤེལ་བཏང་སྟེ། དཔེ་དེབ་མང་ཙམ་ལྟ་བ་དང་དཔེ་དེབ་ཡག་པོ་རྣམས་བལྟས་ནས། དཔེ་དེབ་ནང་གི་བློ་གྲོས་དང་ཤེས་རབ་བསྡུ་ལེན་བྱེད་དགོས་པ་ལས། ང་མཐོ་ང་ཆེ་དང་སློབ་སྦྱོང་བྱེད་རིན་མི་འདུག་སྙམ་པའི་བསམ་བློ་ཁྱེར་མི་རུང་། ལས་བྲེལ་ཆེ་བར་ཁ་གཡར་ཏེ་སློབ་སྦྱོང་ལ་ལྷོད་གཡེང་གཏོང་མི་རུང་ལ། འདྲ་ཆགས་པོ་ཡོང་ཕྱིར་ཁྲལ་སེལ་སླ་བཅོས་ཡང་དེ་བས་བྱེད་མི་རུང་། སེམས་རྣལ་ལ་ཕབ་ནས་རྒྱུན་འཁྱོངས་ལྷོད་མེད་གཙིགས་ཆེར་བཟུང་བ་དང་ནང་དོན་རྟོགས་ཐུབ་པ་དང་ཁོང་དུ་ཆུད་རྒྱུ་གལ་ཆེ་བས། བག་གཡེང་འཚབ་འཚུབ་དང་། བརྟག་དཔྱད་གཏིང་ཟབ་མི་བྱེད་པ། གོ་བ་ཟབ་མོ་མི་ལེན་པ་བཅས་བྱེད་མི་རུང་།

             ཉིན་གཅིག་ནས་ཆུ་ཚོད་ཕྱེད་ཀ་བེད་སྤྱད་དེ་དཔེ་དེབ་ཤོག་གྲངས་ཁ་ཤས་ལས་ཀློག་མེད་ནའང་། གལ་སྲིད་རྒྱུན་འཁྱོངས་ཐུབ་ཚེ། ཆུ་ཐིགས་བསགས་ནས་རྒྱ་མཚོ་དང་སྣོད་སྟོང་འོ་མས་བཀངས་པའི་དཔེ་ལྟར་ཡོང་ངེས་རེད། གྲངས་འཛིན་ལྟ་ཀློག་དང་སྲོལ་རྒྱུན་ལྟ་ཀློག་ཟུང་འབྲེལ་བྱས་ཏེ། ང་ཚོའི་བསམ་པའི་འཇིག་རྟེན་དང་བྱང་ཚད་ལེགས་པར་སྲུང་དགོས།

             རྩོམ་ཡིག་ནང་བསྟན་དོན། དམངས་ཡོངས་ཀྱིས་ཚེ་གང་སློབ་སྦྱོང་བྱེད་པའི་སློབ་སྦྱོང་རྣམ་པའི་སྤྱི་ཚོགས་དང་། སློབ་སྦྱོང་རྣམ་པའི་རྒྱལ་ཁབ་ཆེན་པོ་སྐྲུན་ཏེ། མི་ཚང་མས་སློབ་སྦྱོང་བྱེད་པ་དང་། གང་སར་སློབ་སྦྱོང་བྱེད་ཆོག་པ། དུས་དང་རྣམ་པ་ཀུན་ཏུ་སློབ་སྦྱོང་བྱེད་ཐུབ་པ་བཅས་ལ་སྐུལ་འདེད་དང་མིའི་ཕྱོགས་ཡོངས་ཀྱི་འཕེལ་རྒྱས་ལ་སྐུལ་འདེད་གཏོང་དགོས། རེ་བར་རྒྱ་ཆེའི་ཏང་ཡོན་དང་ལས་བྱེད་པས་སྣེ་ཁྲིད་དེ་དཔེ་ཀློག་སློབ་སྦྱོང་དང་། རང་གཅུན་བློ་སྦྱོང་། འཇོན་ཐང་འཕེལ་བ་བཅས་བྱེད་དགོས། ཕྲུ་གུ་ཚོར་ལྟ་ཀློག་གི་གོམས་གཤིས་འཇགས་པ་དང་། ལྟ་ཀློག་གི་སྤྲོ་སྣང་འཕེལ་བ། བདེ་ཐང་ངང་འཚར་ལོངས་ཡོང་བ་བཅས་ཀྱི་རེ་བ་ཡོད་ལ། སྤྱི་ཚོགས་ཡོངས་ལྟ་ཀློག་ནང་ཞུགས་ནས་དཔེ་ཀློག་ལ་དགའ་བ་དང་། དཔེ་དེབ་ཡག་པོ་རྣམས་ཀློག་པ། དཔེ་ཀློག་ལ་མཁས་པ་བཅས་ཀྱི་རྣམ་པ་ཟབ་མོ་ཞིག་ཆགས་རྒྱུའི་རེ་བ་ཡོད།

རྩོམ་སྒྲིག་པ། རིག་གྲོལ།