ཞིབ་འཇུག་རུ་ཁག་གིས་མཚོ་བོད་མཐོ་སྒང་གི་དཀྱིལ་ཁུལ་དུ་ཆེས་སྔ་བའི་རྡོ་ལེབ་འཇམ་རིགས་ཀྱི་ལག་རྩལ་གནའ་ཤུལ་རྙེད་པ།
ཉེ་ལམ། གསར་འགོད་པས་བོད་རང་སྐྱོང་ལྗོངས་ཚན་རྩལ་ཐིང་ནས་རྒྱུས་ལོན་བྱུང་བ་ལྟར་ན། ཀྲུང་གོ་ཚན་རིག་གླིང་གནའ་བོའི་སྒལ་ཚིགས་སྲོག་ཆགས་དང་གནའ་བོའི་མིའི་རིགས་ཞིབ་འཇུག་སུའོ་ཞུགས་པའི་མཚོ་བོད་མཐོ་སྒང་གི་ཚན་རིག་ཞིབ་འཇུག་རུ་ཁག་ཐེངས་གཉིས་པ་ལ་མཚོ་བོད་མཐོ་སྒང་དུ་གནའ་དཔྱད་གསར་རྙེད་གལ་ཆེན་ཞིག་བྱུང་ཡོད་པ་སྟེ། རུ་ཁག་འདིས་བོད་རང་སྐྱོང་ལྗོངས་སེར་གླིང་མཚོའི་ལྷོ་འགྲམ་ཉ་དེའུ་གནའ་ཤུལ་གྱི་ས་གནས3པ་ནས་མིག་སྔའི་བར་ཆེས་སྔ་བའི་རྡོ་ལེབ་འཇམ་རིགས་ལག་རྩལ་གནའ་ཤུལ་ཞིག་རྙེད་པ་དང་། གསར་རྙེད་འདིས་མཚོ་བོད་མཐོ་སྒང་གི་ཡི་གེ་མ་བྱུང་སྔོན་གྱི་མིའི་རིགས་རིག་གནས་ལ་ཞིབ་འཇུག་བྱེད་པའི་སྟོང་ཆ་བསྐངས་པར་མ་ཟད། མིའི་རིགས་ཀྱི་གནའ་སྔ་མོའི་མཐོ་སྒང་གི་གནས་སྤོ་དང་རིམ་འགྱུར་ལ་རྒྱུས་ལོན་བྱེད་པར་ཡང་ཁུངས་སྣེ་གལ་ཆེན་འདོན་སྤྲོད་བྱས་ཡོད།
ཉ་དེའུ་གནའ་ཤུལ་ནས་གསར་རྙེད་བྱུང་བའི་རྡོ་ལེབ་འཇམ་རིགས་ཀྱི་ཐོན་རྫས།
ངོ་སྤྲོད་བྱས་པ་ལྟར་ན། རྡོ་ལེབ་འཇམ་རིགས་ལག་རྩལ་གནའ་ཤུལ་ནི་མཚོ་བོད་མཐོ་སྒང་ནས་གསར་རྙེད་བྱུང་བའི་ཆེས་ཕུན་སུམ་ཚོགས་པའི་ཡི་གེ་མ་བྱུང་སྔོན་གྱི་མིའི་རིགས་རིག་གནས་ཀྱི་གནའ་ཤུལ་ཞིག་ཡིན་ལ། གནའ་དཔྱད་རིག་པའི་སྡེ་ཡིས་འདི་ལ་དུས་ཡུན་རིང་བོར་དོ་ཁུར་བྱེད་བཞིན་ཡོད། གནའ་ཤུལ་འདི་དག་གིས་མཚོ་བོད་མཐོ་སྒང་གི་གནའ་སྔ་མོའི་མིའི་རིགས་ཀྱིས་ མཐོ་སྒང་ནས་གཞི་རྒྱ་ཆེ་བའི་གནས་སྤོ་དང་འགུལ་སྐྱོད་བྱས་མྱོང་བ་མཚོན་ཐུབ། ལོ་མང་པོར་མ་ལག་དང་ལྡན་པའི་སྔོག་འདོན་བྱས་ཀྱང་། མཚོ་བོད་མཐོ་སྒང་དུ་ལོ་རབས་ཀྱི་གཞི་གྲངས་ལ་ཡིད་རྟོན་རུང་བའི་རྡོ་ལེབ་འཇམ་རིགས་ལག་རྩལ་གནའ་ཤུལ་རྙེད་པ་ཅུང་དཀོན་ལ། ཁྱད་པར་དུ་མཚོ་བོད་མཐོ་སྒང་གི་དཀྱིལ་ཁུལ་དུ་དེ་བས་དཀོན།
ཞིབ་འཇུག་རུ་ཁག་གིས་རིགས་དབྱེ་རིག་པ་དང་འོད་ལ་བརྟེན་ནས་ལོ་འཇལ་ཐབས། ཐཱན་བཅུ་བཞི་པའི་ལོ་འཇལ་ཐབས་སོགས་ཚན་རིག་གི་བྱེད་ཐབས་སྣ་མང་སྤྱད་དེ། གནའ་ཤུལ་ཁྲོད་ཀྱི་རྡོ་ལེབ་འཇམ་རིགས་ལག་རྩལ་ལ་དབྱེ་ཞིབ་གཏིང་ཟབ་བྱས་ཤིང་། དཔྱད་འབྲས་ལས་མངོན་པ་ལྟར་ན། གནའ་ཤུལ་གྱི་ས་གནས3པའི་རྡོ་ལེབ་འཇམ་རིགས་ལ་གཙོ་བོ་ཁྱེའུ་དབྱིབས་རྡོ་སྙིང་དང་སྙུང་དབྱིབས་ཕྱེད་མའི་རྡོ་སྙིང་ལག་རྩལ་རིགས་གཉིས་ཡོད་དེ། ཁྱད་ཆོས་འདི་དག་དང་རྡོ་ཆས་རྙིང་མའི་དུས་མཇུག་གི་ཀྲུང་གོའི་ཧྭ་བྱང་ས་ཁུལ་གྱི་རྡོ་ལེབ་འཇམ་རིགས་གཉིས་ཆེས་ཆེར་འདྲ་བ་རེད།
གླེང་རིན་ཡོད་པ་ཞིག་ལ། གནའ་ཤུལ་འདིའི་ས་གནས3པའི་ལོ་རབས་ནི་ད་ནས་བརྩིས་པའི་ལོ་ངོ11000ནས10000གི་བར་ལ་གཏན་ཁེལ་བྱས་ཤིང་། དུས་ཡུན་འདིས་རྡོ་ལེབ་འཇམ་རིགས་བཟོ་ཤེས་པའི་མི་ཚོགས་ཤིག་གནའ་སྔ་མོར་མཚོ་བོད་མཐོ་སྒང་གི་དཀྱིལ་ཁུལ་དུ་འཚོ་སྡོད་བྱས་མྱོང་བ་གསལ་སྟོན་བྱས་པར་མ་ཟད། མཚོ་བོད་མཐོ་སྒང་གི་ཡི་གེ་མ་བྱུང་སྔོན་གྱི་མིའི་རིགས་རིག་གནས་ཀྱི་རིམ་འགྱུར་ལ་ཞིབ་འཇུག་བྱེད་པར་དུས་ཚོད་ཀྱི་ཚད་གཞི་གལ་ཆེན་འདོན་སྤྲོད་བྱས་ཡོད།
དེ་ལས་གཞན། ཞིབ་འཇུག་རུ་ཁག་གིས་ཆ་རྡུལ་སྐྱེ་དངོས་རིག་པའི་གྲུབ་འབྲས་དང་ཟུང་འབྲེལ་སྒོས་མཐོ་སྒང་གི་རྡོ་ལེབ་འཇམ་རིགས་ལག་རྩལ་གྱི་འཕེལ་རྒྱས་ལ་ཞིབ་འཇུག་གཏིང་ཟབ་བྱས་པ་བརྒྱུད་དེ། རྡོ་ལེབ་འཇམ་རིགས་བཟོ་ཤེས་པའི་མི་ཚོགས་མཚོ་བོད་མཐོ་སྒང་དུ་སླེབས་པ་ནི་མིའི་རིགས་ཀྱིས་དུས་ཡུན་རིང་བོར་མཐོ་སྒང་ལ་དབང་སྒྱུར་བྱེད་པ་དང་དེང་གི་བོད་མིའི་བྱུང་འཕེལ་སོགས་ལའང་འབྲེལ་བ་དམ་ཟབ་ཡོད་པ་ཤེས་རྟོགས་བྱུང་བ་རེད།
རྩོམ་སྒྲིག་པ། ལྷ་འབྲུག
