འདི་ག་ལས་ཁུངས་ནས་སྤེལ་བའི་གནས་ཚུལ། རྒྱལ་ཡོངས་སྲིད་གྲོས་ཀྱི་ཨུ་ཡོན། ཙུན་དབྱི་གསོ་རིག་ཚན་རྩལ་སློབ་ཆེན་ཞོར་གཏོགས་སྨན་ཁང་གི་འགོ་འཛིན་གཞོན་པ་ཧྥུའུ་ཞའོ་ཡུན་གྱིས་དུས་ཡུན་རིང་པོའི་ནང་སྨན་བཅོས་ཀྱི་ནད་ཐོག་འཐབ་ས་དང་པོར་ཕྱག་ལས་གནང་བ་དང་། གཞི་རིམ་ཀྱི་སྨན་བཅོས་དཔུང་ཁག་འཛུགས་སྐྱོང་དང་གྲོང་གསེབ་ཀྱི་མང་ཚོགས་སྨན་པ་བསྟེན་པའི་གནས་ཚུལ་སོགས་ཀྱི་གནད་དོན་ལ་སྔ་བར་ཕྱི་གསུམ་དུ་སེམས་ཁུར་ཚད་མེད་གནང་གི་ཡོད།
མི་རིང་བའི་གོང་། ཧྥུའུ་ཞའོ་ཡུན་གྱིས་ཙུན་དབྱི་གྲོང་ཁྱེར་གྱི་ཀ་པ་རིམ་པ་གསུམ་པའི་སྨན་ཁང་ཞིག་གི་ཆ་འཕྲིན་ཚན་ཁག་ཏུ་ཕེབས་ནས་སྨན་བཅོས་གྲངས་གཞིའི་སྐོར་ལ་བརྟག་ཞིབ་གནང་ཡོད། ཇི་ལྟར་བྱས་ནས་གྲངས་གཞི་མཉམ་སྤྱོད་མང་ཙམ་བྱེད་པ་དང་མང་ཚོགས་ཀྱི་འགྲོ་རྒྱུག་ཉུང་ཙམ་གཏོང་རྒྱུ་དེ་ནི་ཧྥུའུ་ཞའོ་ཡུན་གྱིས་བསམ་བློ་གཏོང་སའི་གནད་དོན་གལ་ཆེན་ཞིག་རེད།
ཁོང་གིས། ང་ཚོའི་རྒྱལ་ཁབ་ཆེན་པོ་འདི་འདྲ་ཞིག་ལ་ལོ་ལྟར་ཐོན་པའི་སྨན་བཅོས་ཀྱི་གྲངས་གཞི་ནི་ཧ་ཅང་འབོར་ཆེ་བ་ཞིག་རེད། གྲངས་གཞི་མཉམ་སྤྱོད་གང་འདྲ་བྱེད་མིན་ཐད་ང་ཚོར་དེ་མཚུངས་ཀྱི་ཁྲིམས་ལུགས་ཁྲིམས་སྲོལ་ཞིག་དགོས་མཁོ་ཆེན་པོ་ཡོད། དེ་ལྟར་བྱུང་ན་གྲངས་གཞི་དེ་དག་སྔོག་འདོན་ཡག་པོ་དང་བེད་སྤྱོད་ཡག་པོ་གཏོང་ཐུབ་ནས། གསར་པས་རྙིང་པའི་ཚབ་བྱེད་ཐུབ་པའི་དཔེ་དབྱིབས་ཆེན་པོ་ཞིག་ཆགས་ཐུབ་ཅེས་གསུངས་ཡོད།
གཞི་རིམ་གྱི་རིག་ནུས་སྨན་བཅོས་ལ་དོ་ཁུར་ནང་བ་ཕུད། ཧྥུའུ་ཞའོ་ཡུན་གྱིས་ད་དུང་གཞི་རིམ་གྱི་སྨན་བཅོས་ཤེས་ལྡན་མི་སྣའི་དཔུང་ཁག་འཛུགས་སྐྱོང་ལ་སྔ་བར་ཕྱི་གསུམ་དུ་དོ་ཁུར་གནང་གི་ཡོད། ན་ནིང་ཚོགས་ཆེན་གཉིས་རིང་། ཧྥུའུ་ཞའོ་ཡུན་གྱིས་གྲོས་གཞི་ཞིག་ཕུལ་ནས། སྔོན་འགོག་དང་། བརྙན་པར། བརྟག་དཔྱད། སྦྲིད་སྨན་སོགས་ཀྱི་ཆེད་ལས་ཤང་དང་གྲོང་རྡལ་གྱི་འཕྲོད་བསྟེན་ཁང་ལ་ཁ་ཕྱོགས་པའི་མངགས་ཐོའི་རྣམ་པའི་ཁ་ཕྱོགས་གཏན་འཁེལ་གྱི་གསོ་རིག་ཤེས་ལྡན་མི་སྣ་གསོ་སྐྱོང་གི་ལས་དོན་ལ་སྔར་ལས་ལྷག་པའི་སྒོ་ནས་སྐུལ་འདེད་གཏོང་བའི་གྲོས་འགོ་བཏོན་ཡོད། གྲོས་གཞི་དེ་ནི་ཧྥུའུ་ཞའོ་ཡུན་གྱིས་སྤྱི་ལོ་2022ནས་སྤྱི་ལོ་2024ལོའི་བར་ཀུའེ་ཀྲོའུ་ཡི་ཆན་ལྷོ་ཁུལ་སན་ཏུའུ་ཧྲུའེ་རིགས་རང་སྐྱོང་རྫོང་ལ་ཁ་གཏད་རོགས་སྐྱོར་གནང་བའི་བརྒྱུད་རིམ་ནང་བྱུང་བ་ཞིག་རེད། ཁོང་གི་སྐབས་དེ་དུས་ཀྱི་མྱོང་བརྒྱུད་དག་ལས་གཞི་རིམ་གྱི་སྨན་བཅོས་ཤེས་ལྡན་པའི་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་རན་ཐག་ཆོད་པའི་མྱོང་ཚོར་ཟབ་མོ་བྱུང་ཡོད།
ཧྥུའུ་ཞའོ་ཡུན་གྱིས། ཕྱི་དངོས་པོའི་ཆ་རྐྱེན་ཇི་ལྟར་ཡག་པོ་ཡོད་ནའང་། མཐའ་མར་ང་ཚོའི་གཞི་རིམ་གྱི་སྨན་པ་དང་སྨན་གཡོག་དག་གི་ནད་བཅོས་མི་སྐྱོབ་ཀྱི་ནུས་པར་བརྟེན་དགོས་པ་དང་། མཐར་གཏུག་ནས་བཤད་ན་རྫོང་ཁོངས་སྨན་བཅོས་ཤེས་ལྡན་པའི་གསོ་སྐྱོང་ལ་རག་ལུས་ཡོད་པས། དེ་ནི་འགག་རྩའི་ལྟེ་བའི་ལྷུ་ཚིགས་ཤིག་རེད་ཅེས་གསུངས་ཡོད།
ཧྥུའུ་ཞའོ་ཡུན་གྱི་གྲོས་འགོ་དེར་རྒྱལ་ཁབ་འཕྲོད་བསྟེན་དང་བདེ་ཐང་ཨུ་ལྷན་དང་སློབ་གསོ་པུའུ་སོགས་འབྲེལ་ཡོད་ཚན་པའི་དོ་ཁུར་དང་ལན་ཆ་ཐོབ་པ་དང་། འབྲེལ་ཡོད་ལས་དོན་ལ་སྐུལ་འདེད་ཚགས་ཚུད་པོ་གཏོང་བཞིན་ཡོད། ཧྥུའུ་ཞའོ་ཡུན་གྱིས། མིག་སྔའི་ཆར། ཙུན་དབྱི་གསོ་རིག་ཚན་རིག་སློབ་ཆེན་དུ་གྲོང་གསེབ་ཀྱི་མངགས་ཐོའི་རྣམ་པའི་ཁ་ཕྱོགས་གཏན་འཁེལ་གྱི་གསོ་རིག་སློབ་མ་བསྡུ་བའི་ཁ་གྲངས་ཀྱང་མང་དུ་ཕྱིན་ཡོད་ཅེས་ངོ་སྤྲོད་གནང་བ་དང་། ཁོང་གིས། འབྱུང་འགྱུར་ང་ཚོས་ད་དུང་མུ་མཐུད་ནས་བརྟག་ཞིབ་བྱེད་ཆོག་པ་དང་། དེ་བས་ལུགས་མཐུན་གྱི་སློབ་མ་བསྡུ་ཐབས་དང་ཞབས་ཞུའི་ལོ་ཚད་བཟོ་ཆོག་པ་དང་། ཁོང་ཚོར་སྲིད་ཇུས་ཐད་ཀྱི་རོགས་སྐྱོར་སྲིད་ཇུས་ཁག་གཅིག་འདོན་པ་བརྒྱུད། ང་ཚོས་གསོ་སྐྱོང་བྱས་པའི་སྨན་པ་ཚོས་གཞི་རིམ་ལ་ཞབས་ཞུ་དེ་བས་ལེགས་པ་བསྒྲུབ་ཐུབ་ཀྱི་རེད་སྙམ་གྱི་འདུག་ཅེས་གསུངས་ཡོད།
སྤྱི་ལོ་2024ལོའི་ལོ་སྨད་དུ། ཧྥུའུ་ཞའོ་ཡུན་གྱིས་གཞི་རིམ་གྱི་རིག་ནུས་སྨན་བཅོས་འཛུགས་སྐྱོང་ལ་དོ་ཁུར་ཤུགས་ཆེན་གནང་བ་མ་ཟད་འབྲེལ་ཡོད་བརྟག་ཞིབ་ལས་དོན་ཡང་སྤེལ་ཡོད། ཁོང་གིས། རྒྱལ་ཁབ་ནས་སྨན་བཅོས་གྲངས་གཞི་ཆེ་མོ་གཞི་གཅིག་ཅན་གྱི་འཛུགས་སྐྲུན་ལ་སྐུལ་འདེད་གཏོང་བ་དང་སྨན་བཅོས་གྲངས་གཞིའི་སྤུས་ཚད་འཐུས་ཚང་དུ་གཏོང་རྒྱུའི་རེ་བ་ཡོད་ཅེས་གསུངས་ཡོད། ལོ་མང་རིང་ཧྥུའུ་ཞའོ་ཡུན་གྱིས་བརྟག་ཞིབ་དང་། སྦྱོང་བརྡར། འོས་འགན་སྨན་བཅོས་སོགས་པའི་བྱ་བ་དུ་མ་བསྒྲུབས་གནང་བ་དང་། ཀུའེ་ཀྲོའུ་ས་ཕྱོགས་ཁག་གི་གཞི་རིམ་སྨན་བཅོས་ལས་ཁུངས་སུ་ཕེབས་ནས། གཞི་རིམ་གྱི་སྨན་བཅོས་འཕྲོད་བསྟེན་གྱི་ཞབས་ཞུ་སྒྲུབ་པར་ཐབས་འདོན་ཇུས་འབུལ་གནང་བ་དང་། གྲོང་གསེབ་ཀྱི་མངགས་ཐོའི་རྣམ་པའི་ཁ་ཕྱོགས་གཏན་འཁེལ་གྱི་གསོ་རིག་སློབ་མ་གསོ་སྐྱོང་བྱ་རྒྱུར་སྐུལ་འདེད་གཏོང་བ་ནས་གཞན་གྱིས་འཁྲིད་འགྲོ་མི་ཐུབ་པའི་སྨན་བཅོས་རུ་ཁག་འཛུགས་སྐྱོང་གནང་བའི་བར་དང་། དེ་ནས་གྲངས་གཞི་ཆེ་མོའི་གོང་འཕེལ་བེད་སྤྱད་ནས་གྲོང་གསེབ་མང་ཚོགས་ཀྱི་སྨན་བཅོས་གནས་ཚུལ་ལེགས་བཅོས་བྱ་རྒྱུར་རེ་འབོད་གནང་བའི་བར། ཁོང་གིས་གསུངས་པ་ལྟར་མང་ཚོགས་རྣམས་ན་ཚ་བལྟ་རྒྱུ་སྟབས་བདེ་རུ་དང་ན་ཚ་ཡག་པོ་བལྟ་ཐུབ་པའི་འགན་ལེན་ཞིག་ཡིན་པས། དེ་ནི་གསོ་རིག་སྨན་དོན་མི་སྣ་མི་རེ་ངོ་རེས་མནོ་བསམ་བཞེས་དགོས་པའི་གནད་དོན་ཞིག་རེད།
