མང་ཚོགས་ཀྱི་ནད་ལྟ་དཀའ་བའི་གནད་དོན་ཐག་གཅོད་བྱེད་པར་གཙོ་བོ་གཞི་རིམ་གྱི་སྨན་བཅོས་འཛུགས་སྐྱོང་ལ་སྐུལ་འདེད་གཏོང་དགོས་ཀྱི་ཡོད། རྒྱལ་ཡོངས་སྲིད་གྲོས་ཀྱི་ཨུ་ཡོན། བོད་ལྗོངས་མངའ་རིས་ས་ཁུལ་སྨན་རྩིས་ཁང་གི་འགོ་འཛིན་བཀྲ་ཤིས་དོན་གྲུབ་ཀྱིས་གསར་འགོད་པར་འདི་ལྟར་གླེང་མོལ་བྱེད་འགོ་ཚུགས།
སྤྱི་ལོ་2023ལོར། ཁོང་རྒྱལ་ཡོངས་སྲིད་གྲོས་ཀྱི་ཨུ་ཡོན་དུ་བདམས་རྗེས། བཀྲ་ཤིས་དོན་གྲུབ་ཀྱིས་སེམས་ནུས་ཡོད་རྒུ་ལས་ཀའི་ཐོག་འཇོག་གནང་སྟེ་སྒར་རྫོང་དང་། སྒེར་རྩེ་རྫོང་། མཚོ་ཆེན་རྫོང་སོགས་སུ་རིན་མེད་སྨན་བཅོས་བྱེད་པར་ཕེབས་པ་དང་ཆབས་ཅིག་ས་བབ་མཐོ་བའི་ཁུལ་གྱི་སྨན་བཅོས་འཕྲོད་བསྟེན་གྱི་ད་ལྟའི་གནས་ཚུལ་ལ་རྟོག་ཞིབ་གནང་ཡོད།
བཀྲ་ཤིས་དོན་གྲུབ་ཀྱིས་སྐབས་དེའི་གནས་ཚུལ་ཕྱིར་དྲན་གནང་སྐབས་དུས་ཡུན་རིང་པོ་ས་བབ་མཐོ་སར་ཕྱུགས་འཚོ་བའི་ཞིང་འབྲོག་མང་ཚོགས་ཀྱི་ངོས་ནས་བརྗོད་ན། མང་ཆེ་བ་གཟུགས་གཞི་ཐང་པོ་དེ་ཙམ་མེད། ས་མཐོའི་ཐོག་གསོ་རླུང་མི་འདང་བ་དང་། གྲང་ངར་ཆེ་བའི་ཁོར་ཡུག་ཁྲོད་འཚོལ་བར་རོལ་དགོས་པས་མི་མང་པོར་ས་མཐོའི་རང་བཞིན་གྱི་ཕྲ་ཕུང་དམར་པོ་མང་དྲགས་པའི་ནད་དང་། རུས་ཚིགས་ནད་སོགས་ས་མཐོའི་ནད་ཕོག་པ་མང་པོ་ཡོད་ཅེས་གསུངས།
སྤྱི་ལོ་2024ལོའི་རྒྱལ་ཡོངས་ཚོགས་ཆེན་གཉིས་ཀྱི་ཐོག་བཀྲ་ཤིས་དོན་གྲུབ་ཀྱིས་༼ས་བབ་མཐོ་བའི་ཁུལ་གྱི་སྨན་བཅོས་འཕྲོད་བསྟེན་ཆ་རྐྱེན་ལེགས་སུ་གཏོང་དགོས་པའི་སྐོར་གྱི་༽གྲོས་གཞི་གོང་འབུལ་ཞུས་ཡོད། ཁོང་གིས། ས་བབ་མཐོ་སའི་རྫོང་དང་ཤང་། ཐ་ན་གྲོང་ཚོ་བཅས་སུ་གསོ་རླུང་མཁོ་འདོན་ས་ཚིགས་བཙུགས་ནས་ལོ་40ཡན་གྱི་མང་ཚོགས་ཀྱིས་རང་གི་གཟུགས་གཞིར་བལྟས་ནས་གསོ་རླུང་རྔུབ་རྒྱུར་སྐུལ་སློང་བྱེད་དགོས་པ་དང་། དུས་མཚུངས་རྫོང་དང་ཤང་དུ་བོད་ལུགས་གསོ་རིག་གི་ལུམས་བཅོས་ཁང་བཙུགས་ནས་བརླན་བཤེར་ཅན་གྱི་རུས་ཚིགས་ནད་སྨན་བཅོས་འགོག་སྲུང་བྱེད་དགོས་པའི་གྲོས་གཞི་བཏོན་ཡོད། གྲོས་གཞི་དེར་རྒྱལ་ཁབ་ཀྱི་འབྲེལ་ཡོད་ཚན་པས་ཚད་མཐོའི་དོ་ཁུར་གནང་ནས་སྤྱི་ལོ་2024ལོའི་ལོ་མཇུག་ཏུ་བཀྲ་ཤིས་དོན་གྲུབ་ལ་གྲོས་གཞིའི་ལན་ཆ་འབྱོར་བར་དགའ་ཚོར་ཆེན་པོ་བྱུང་ཡོད།
སྤྱི་ལོ་2024ལོར། བཀྲ་ཤིས་དོན་གྲུབ་ཀྱིས་སྣེ་ཁྲིད་དེ་རི་སྐྱེས་བོད་སྨན་སྨན་རྩྭར་རྟོག་ཞིབ་བྱེད་པའི་ལས་དོན་སྤེལ་ཡོད། བོད་ལྗོངས་མངའ་རིས་རྩ་མདའ་རྫོང་ཁྲོ་རུ་གསུམ་རྒྱལ་ཤང་དུ་གློ་བུར་དུ་ཐོན་པའི་གནས་ཚུལ་ཞིག་གིས་ཁོང་ལ་དཀའ་ངལ་ཆེན་པོ་བཟོས། ཕ་ཡུལ་གཅིག་པའི་མི་ཞིག་གི་ཕྲུ་གུ་གཟབ་གཟབ་མ་བྱས་པའི་དབང་གིས་ཚིགས་འཆུས་པས་རོགས་རམ་གནང་རོགས་ཞུས། ས་གནས་དེ་གའི་འཕྲོད་བསྟེན་ཁང་གི་ཆ་རྐྱེན་ལ་ཚད་བཀག་ཡོད་སྟབས་སྨན་བཅོས་ནུས་ལྡན་བྱེད་ཐབས་བྲལ། འུ་ཐུག་ཐབས་ཟད་སྐབས་ཐག་རིང་རྫོང་གྲོང་དུ་སྨན་བཅོས་བྱེད་པར་མི་སྐྱོད་ཀ་མེད་ཐུག་གི་ཡོད། མངའ་རིས་ས་ཁུལ་ནི་མཐའ་མཚམས་ལམ་ཐིག་རིང་བ་དང་། དགུན་ཁ་ཤར་སྐབས་གངས་ཆེན་པོ་བབས་པས་གཞུང་ལམ་ཤར་གཏོང་ཐུབ་ཀྱི་མེད། མཐའ་མཚམས་ལམ་ཐིག་ཐོག་ཆགས་པའི་ཤང་དང་གྲོང་བརྡལ་གྱི་གཞུང་ལམ་ཤར་གཏོང་མི་ཐུབ་པས་ཛ་དྲག་སྨན་བཅོས་རོགས་སྐྱོབ་ཐོབ་དཀའ་བར་གྱུར་ཡོད། དཀའ་ངལ་དེ་དག་རྐྱེན་པས་བཀྲ་ཤིས་དོན་གྲུབ་ཀྱིས་མཐའ་མཚམས་ཀྱི་སྨན་བཅོས་ཆ་རྐྱེན་ལེགས་སུ་གཏོང་རྒྱུའི་སེམས་ཐག་བཅད་གནང་།
སྐབས་འདིའི་རྒྱལ་ཡོངས་ཚོགས་ཆེན་གཉིས་ཀྱི་ཐོག བཀྲ་ཤིས་དོན་གྲུབ་ཀྱིས་མཐའ་མཚམས་གཞི་རིམ་ཁུལ་གྱི་སྨན་བཅོས་སྒྲིག་ཆས་དང་ཤེས་ལྡན་མི་སྣར་མ་དངུལ་གཏོང་ཤུགས་ཆེ་རུ་གཏོང་རྒྱུའི་སྐོར་གྱི་གྲོས་གཞི་ཞིག་གྲ་སྒྲིག་གནང་ཡོད། བཀྲ་ཤིས་དོན་གྲུབ་ཀྱིས་དམངས་འཚོར་དོ་ཁུར་བྱ་རྒྱུ་ནི་ངས་འཁུར་དགོས་ངེས་ཀྱི་འགན་འཁྲི་ཞིག་ཡིན། སླད་ཕྱིན། མུ་མཐུད་འབད་བརྩོན་བྱས་ནས་གཞི་རིམ་གྱི་སྨན་བཅོས་བྱ་གཞག་དང་བོད་ལུགས་གསོ་རིག་འཕེལ་རྒྱས་གཏོང་རྒྱུའི་ཐད་སྟོབས་ཤུགས་དེ་བས་ཆེ་བ་ལེགས་སྐྱེས་སུ་ཕུལ་ཏེ་ཡུལ་མི་རྣམས་བདེ་ཐང་ཡོང་བར་འབད་བརྩོན་བྱ་རྒྱུ་ཡིན་ཞེས་གསུངས།
