“མང་ཚོགས་ཀྱི་སྨན་བཅོས་བྱེད་དཀའ་བའི་གནད་དོན་ཐག་གཅོད་བྱེད་པའི་འགག་རྩ་ནི། གཞི་རིམ་སྨན་བཅོས་འཛུགས་སྐྲུན་ལ་སྐུལ་འདེད་གཏོང་བ་དེ་ཡིན”ཞེས་རྒྱལ་ཡོངས་སྲིད་གྲོས་ཨུ་ཡོན་མངའ་རིས་ས་ཁུལ་སྨན་རྩིས་ཁང་གི་ཡོན་ཀྲང་བཀྲ་ཤིས་དོན་གྲུབ་ཀྱིས་གསར་འགོད་པར་བཤད།
2023ལོར་རྒྱལ་ཡོངས་སྲིད་གྲོས་ཀྱི་ཨུ་ཡོན་དུ་གྱུར་པ་ནས་བཟུང་བཀྲ་ཤིས་དོན་གྲུབ་ཀྱི་བློ་རྩེ་གཅིག་སྒྲིམ་གྱིས་ལས་ཀའི་ནང་ཞུགས་ཡོད། ཁོང་གིས་སྒར་རྫོང་དང་། སྒེར་རྩེ་རྫོང་། མཚོ་ཆེན་རྫོང་སོགས་སུ་བསྐྱོད་ནས་རིན་མེད་སྐོར་ཞིབ་བྱས་པ་མ་ཟད། ས་བབ་མཐོ་བའི་ས་ཁུལ་གྱི་སྨན་བཅོས་འཕྲོད་བསྟེན་གྱི་མིག་སྔའི་གནས་ཚུལ་ལ་བརྟག་དཔྱད་ཞིབ་འཇུག་བྱས་པ་རེད། “དུས་རྒྱུན་དུ་རྩྭ་ཐང་སྟེང་ཕྱུགས་འཚོ་བའི་ཞིང་འབྲོག་མང་ཚོགས་ཚོའི་ལུས་པོར་ནད་ངེས་ཅན་རེ་ཡོད”ཅེས་བཀྲ་ཤིས་དོན་གྲུབ་ཀྱིས་སྐབས་དེའི་འདས་དོན་ཕྱིར་དྲན་བྱེད་སྐབས་སུ་སེམས་ཁྲལ་ཆེན་པོ་བྱེད་བཞིན་དུ། “ས་མཐོའི་སྟེང་གསོ་རླུང་དཀོན་པ་དང་གྲང་ངར་ཆེ་བའི་དབང་གིས་མི་མང་པོ་ཞིག་ལ་ས་མཐོའི་རང་བཞིན་གྱི་ཕྲ་ཕུང་དམར་པོ་མང་དུ་འགྲོ་བའི་ནད་དང་གྲུམ་བུའི་རང་བཞིན་གྱི་ཚིགས་ནད་སོགས་ས་མཐོའི་ནད་ཀྱིས་མནར་བཞིན་ཡོད”ཅེས་བཤད།
བཀྲ་ཤིས་དོན་གྲུབ་ཀྱིས་སྨན་བཟོའི་སྒྲིག་ཆས་ལ་ཞིབ་བཤེར་བྱེད་བཞིན་པ། 2024ལོའི་རྒྱལ་ཡོངས་ཚོགས་འདུ་གཉིས་ལ་བཀྲ་ཤིས་དོན་གྲུབ་གྱིས《ས་བབ་མཐོ་བའི་ས་ཁུལ་གྱི་སྨན་བཅོས་འཕྲོད་བསྟེན་གྱི་ཆ་རྐྱེན་ལ་ཤུགས་སྣོན་དང་ལེགས་སུ་གཏོང་རྒྱུའི་སྐོར་གྱི》གྲོས་གཞི་ཕུལ། ཁོང་གིས་ས་བབ་མཐོ་བའི་རྫོང་དང་ཞང་། ཐ་ན་གྲོང་ཚོར་གསོ་རླུང་རྔུབ་སའི་ས་ཚིགས་བསྐྲུན་ནས་ལོ40ཡན་གྱི་མི་ཚོགས་ཀྱིས་རང་ཉིད་ཀྱི་གཟུགས་གཞིའི་གནས་ཚུལ་གཞིར་བཟུང་སྟེ། གསོ་རླུང་རྔུབ་རྒྱུར་སྐུལ་མ་གཏོང་དགོས་པའི་གྲོས་འགོ་བཏོན། དེ་དང་ཆབས་ཅིག་རྫོང་དང་ཞང་དུ་བོད་སྨན་གསོ་བཅོས་ཁང་བཙུགས་ནས་གྲུམ་བུའི་རང་བཞིན་གྱི་ཚིགས་ནད་སྔོན་འགོག་དང་སྨན་བཅོས་བྱེད་ཀྱི་ཡོད། གྲོས་གཞིར་རྒྱལ་ཁབ་ཀྱི་འབྲེལ་ཡོད་སྡེ་ཁག་གིས་མཐོན་ཆེན་བྱེད་ཀྱི་ཡོད། 2024ལོའི་ལོ་མཇུག་ཏུ་བཀྲ་ཤིས་དོན་གྲུབ་ལ་གྲོས་གཞིའི་བརྡ་ལན་དཔང་ཡིག་འབྱོར་བས། བློ་ཁ་ཡོངས་སུ་རྫོགས་ཏེ་དགའ་མགུ་ཡིད་ཚིམ་པར་གྱུར་ཡོད།
2024ལོར་བཀྲ་ཤིས་དོན་གྲུབ་ཀྱིས་རུ་ཁག་གི་སྣེ་ཁྲིད་ནས་བོད་སྨན་གྱི་རི་སྐྱེས་སྨན་རྫས་ཀྱི་བརྟག་དཔྱད་ལས་དོན་སྤེལ་བ་དང་། རྩ་མདའ་རྫོང་ཚོ་སྲིབ་གསུམ་དཀྱིལ་ཞང་དུ་བློ་ཡུལ་ལས་འགོངས་བའི་དོན་རྐྱེན་ཤིག་གིས་ཁོང་གི་སེམས་མི་བདེ་བ་བཟོས། ཕ་ཡུལ་གཅིག་པའི་ཡུལ་མི་ཞིག་གིས་ངའི་བུའི་ལག་པར་རྨས་སྐྱོན་ཕོག་སོང་བས་རོགས་པ་གནང་རོགས་ཞུས་ཡོད། ས་གནས་དེ་གའི་འཕྲོད་བསྟེན་ཁང་གི་ཆ་རྐྱེན་དེ་ཙམ་ཡག་པོ་མེད་པས། བརྟག་དཔྱད་དང་སྨན་བཅོས་ནུས་ལྡན་བྱེད་ཐབས་བྲལ་བ་དང་། མཐར་ལམ་ཐག་རིང་པོར་བསྐྱོད་ནས་རྫོང་སྨན་ཁང་དུ་སྨན་བཅོས་བྱེད་པར་སྐྱེལ་དགོས་བྱུང་བ་རེད་ཅེས་བཤད།
བཀྲ་ཤིས་དོན་གྲུབ་ཀྱིས་ན་གཞོན་སྨན་པར་མཛུབ་ཁྲིད་གནང་བཞིན་པ། མངའ་རིས་ས་ཁུལ་ནི་ས་རྒྱ་ཆེ་བ་དང་དགུན་ཁ་ཁ་བ་ཆེན་པོ་བབས་ནས་རི་མགོ་ཁ་བས་བཏུམས་ཀྱི་ཡོད། མཐའ་མཚམས་སུ་གནས་པའི་ཞང་དང་གྲོང་རྡལ་ཁག་གཅིག་གི་འགྲོ་ལམ་འགགས་ཀྱི་ཡོད་བར་བརྟེན། སྨན་བཅོས་དང་མྱུར་སྐྱོབ་དེ་བས་བྱེད་དཀའ་བར་གྱུར་གྱི་ཡོད། དཀའ་ངལ་དེ་དག་གི་དབང་གིས་བཀྲ་ཤིས་དོན་གྲུབ་ཀྱིས་མཐའ་མཚམས་གཞི་རིམ་གྱི་སྨན་བཅོས་ཆ་རྐྱེན་ལེགས་སུ་གཏོང་རྒྱུའི་ཆོད་སེམས་བརྟན་པོར་བཞག ཐེངས་འདིའི་རྒྱལ་ཡོངས་ཚོགས་འདུ་གཉིས་ལ་བཀྲ་ཤིས་དོན་གྲུབ་ཀྱིས་མཐའ་མཚམས་ཀྱི་གཞི་རིམ་ཞང་གྲོང་གི་སྨན་བཅོས་སྒྲིག་ཆས་དང་དེ་བཞིན་ཤེས་ལྡན་པའི་མ་དངུལ་གཏོང་ཤུགས་སྔར་བས་ཆེ་རུ་གཏོང་རྒྱུའི་སྐོར་གྱི་གྲོས་གཞི་འབུལ་རྩིས་ཡོད།
བཀྲ་ཤིས་དོན་གྲུབ་ཀྱིས“དམངས་འཚོར་དོ་ཁུར་བྱེད་པ་ནི་ངའི་བསྒྲུབ་དགོས་པའི་འགན་འཁྲི་ཞིག་ཡིན། རྗེས་ཕྱོགས་ད་དུང་མུ་མཐུད་དུ་འབད་བརྩོན་བྱས་ནས། གཞི་རིམ་གྱི་སྨན་བཅོས་བྱ་གཞག་དང་བོད་སྨན་དང་སྨན་རྫས་འཕེལ་རྒྱས་གཏོང་བར་སྟོབས་ཤུགས་མང་ཙམ་སྐྱེས་ཕུལ་ནས། ཡུལ་མི་ཚོའི་བདེ་ཐང་འགན་ལེན་བྱེད་དགོས”ཞེས་བཤད།
