ཀྲུང་གོའི་བོད་ལྗོངས་དྲ་བའི་འཕྲིན། “ད་ལོའི་རྒྱལ་ཡོངས་ཀྱི་ཚོགས་འདུ་གཉིས་ནང་ཞུགས་པར་ང་རང་སེམས་འགུལ་ཆེན་པོ་ཐེབས་བྱུང་ལ་རེ་སྒུག་ཀྱང་ཆེན་པོ་བྱེད་ཀྱི་ཡོད” རྒྱལ་ཡོངས་སྲིད་གྲོས་ཀྱི་ཨུ་ཡོན་བོད་ལྗོངས་མངའ་རིས་ས་ཁུལ་སྨན་རྩིས་ཁང་གི་ཡོན་ཀྲང་བཀྲ་ཤིས་དོན་གྲུབ་དགའ་ཚོར་ཆེན་པོ་བྱུང་ཡོད། “ད་ཐེངས་ངས་འཕྲོད་བསྟེན་བདེ་ཐང་སྐོར་གྱི་ལས་ཀའི་གཙོ་གནད་ལ་དམིགས་བསལ་དོ་ཁུར་བྱེད་བཞིན་ཡོད། མི་རིགས་སྨན་ཁང་གི་ཡོན་ཀྲང་ཞིག་ཡིན་པའི་ཆ་ནས་བསམ་ཕྱོགས་སྔར་ལས་གསལ་ལ། ཁ་ཕྱོགས་སྔར་ལས་གསལ་ཞིང་། ཡིད་ཆེས་ཀྱང་སྔར་ལས་ཆེ་རུ་ཕྱིན་ཡོད”
ཚོགས་འདུ་གཉིས་ཀྱི་རིང་བཀྲ་ཤིས་དོན་གྲུབ་ཀྱིས་ཀྲུང་གོའི་བོད་ལྗོངས་དྲ་བའི་གསར་འགོད་པའི་བཅར་འདྲི་དང་ལེན་བྱེད་བཞིན་པ།
ད་ལོའི་ཚོགས་འདུ་གཉིས་སུ་བཀྲ་ཤིས་དོན་གྲུབ་གྱིས《ཐག་རིང་ས་ཁུལ་གྱི་གཞི་རིམ་སྨན་བཅོས་འཕྲོད་བསྟེན་ཆ་རྐྱེན་སྔར་བས་ལེགས་སུ་གཏོང་རྒྱུའི་སྐོར་གྱི》གྲོས་གཞི་བཏོན། གྲོས་གཞི་དེའི་ཐོག་ནས་ཁོང་གིས་བོད་ལྗོངས་མངའ་རིས་ས་ཁུལ་གྱི་མང་ཚོགས་ཀྱི་བདེ་ཐང་ལ་སེམས་ཁུར་ཆེན་པོ་བྱེད་ཀྱི་ཡོད།
མངའ་རིས་ས་ཁུལ་ལ་སྔར་ནས་བཟུང“འཛམ་གླིང་གི་ཡང་རྩེའི་ཡང་རྩེ”ཞེས་འབོད་ཀྱི་ཡོད། གྲང་ངར་ཆེ་བ་དང་གསོ་རླུང་དཀོན་པའི་དབང་གིས། འདིར་འཚོ་བ་སྐྱེལ་བའི་ཞིང་འབྲོག་མང་ཚོགས་ལ་ཡོངས་ཁྱབ་ཏུ་ས་མཐོའི་རང་བཞིན་གྱི་ནད་གཞི་ཕོག་ཡོད། དགུན་ཁ་སླེབས་སྐབས་ཁ་བ་ཆེན་པོ་བབས་ནས་རི་ལམ་འགག་ཏེ་མཐའ་མཚམས་སུ་གནས་པའི་ཞང་དང་གྲོང་རྡལ་ཁག་གཅིག་གི་འགྲོ་ལམ་འགག་ནས་སྨན་བཅོས་རོགས་སྐྱོབ་བྱེད་རྒྱུ་དེ་བས་ཀྱང་ཧ་ཅང་ཁག་པོ་ཡོད། རང་བྱུང་ཁོར་ཡུག་ཞན་པ་དང་། སྨན་བཅོས་ཐོན་ཁུངས་དཀོན་པ། ལག་རྩལ་ཤེས་ལྡན་མི་སྣ་ཞན་པ་སོགས་ཀྱི་གནད་དོན་གྱི་དབང་གིས་མངའ་རིས་ས་ཁུལ་གྱི་སྨན་བཅོས་ཆ་རྐྱེན་འཕེལ་རྒྱས་ནུས་ལྡན་ཡོང་དཀའ་བས། བཀྲ་ཤིས་དོན་གྲུབ་ཀྱིས་དེ་དག་ཚང་མ་མིག་མཐོང་བྱུང་བས་སེམས་ཁྲལ་བྱེད་བཞིན་ཡོད། གྲོས་གཞི་དེའི་ནང་བཀྲ་ཤིས་དོན་གྲུབ་གྱིས“ཆ་རྐྱེན་འཛོམས་པའི་གནས་ཚུལ་འོག་ཐག་རིང་ས་ཁུལ་དུ་མཁའ་འགྲུལ་སྨན་བཅོས་རོགས་སྐྱོབ་འཕེལ་རྒྱས་ཤུགས་ཆེན་གཏོང་རྒྱུར་རོགས་རམ་བྱས་ཏེ། ཐག་རིང་ས་ཁུལ་གྱི་སྨན་བཅོས་རོགས་སྐྱོབ་ནུས་པ་ཆེ་རུ་བཏང་ནས། མང་ཚོགས་ཀྱི་ཚེ་སྲོག་བདེ་ཐང་འགན་ལེན་ཏན་ཏིག་བྱེད་དགོས”ཞེས་གྲོས་འགོ་ཁ་གསལ་བཏོན་ཡོད།
བཀྲ་ཤིས་དོན་གྲུབ་ཀྱིས་སྔ་ཕྱི་བར་གསུམ་དུ་མང་ཚོགས་ཀྱི་བདེ་ཐང་དེ་སེམས་ཀྱི་དོན་ཆེན་ཨང་དང་པོར་བརྩི་བཞིན་ཡོད། 2023ལོར་བཀྲ་ཤིས་དོན་གྲུབ་རྒྱལ་ཡོངས་སྲིད་གྲོས་ཀྱི་ཨུ་ཡོན་ལ་བདམས་ཐོན་བྱུང་རྗེས། མངའ་རིས་ས་ཁུལ་ནས་ཞང་གྲོང་དུ་འཚམས་འདྲིར་བསྐྱོད་ནས་བརྟག་དཔྱད་བྱས་པའི་འབྲས་བུ་པེ་ཅིང་ལ་ཁྱེར་ཞིང་། 2024ལོའི་རྒྱལ་ཡོངས་ཀྱི་ཚོགས་འདུ་གཉིས་སུ《ས་བབ་མཐོ་བའི་ས་ཁུལ་གྱི་སྨན་བཅོས་འཕྲོད་བསྟེན་ཆ་རྐྱེན་ལ་ཤུགས་སྣོན་དང་ལེགས་བཅོས་བྱ་རྒྱུའི་སྐོར》ཞེས་པའི་གྲོས་གཞི་ཕུལ་ཡོད།
གྲོས་གཞི་ཞིག་གིས་མངའ་རིས་ས་ཁུལ་སྨན་རྩིས་ཁང་འཕེལ་རྒྱས་ཏན་ཏིག་བྱུང་ཡོད། 2024ལོའི་ཟླ8པར་བཀྲ་ཤིས་དོན་གྲུབ་ལ་རྒྱལ་ཡོངས་སྲིད་གྲོས་གྲོས་གཞི་ཨུ་ཡོན་ལྷན་ཁང་གིས་སྤྲད་པའི་གྲོས་གཞི་སྒྲུབ་པའི་ལན་འབྱོར་ཡོད། ལོ་དེར་ཀྲུང་དབྱང་གིས་མ་དངུལ་ཁྲི3030བཏང་ནས། འཛུགས་སྐྲུན་བྱ་རྒྱུའི་བཀོད་སྒྲིག་བྱས་པའི་སྨན་ཁང་གི་སྨན་རྫས་ཁང་ལེགས་གྲུབ་ཟིན་པ་དང་། ད་ལོའི་ཟླ5པར་དངོས་སུ་སྤྱོད་རྩིས་ཡོད་པ་དང་སྐབས་དེར་བོད་ལྗོངས་ཀྱི་སྨན་རྫས་ཐོན་རྫས་ཐོན་སྐྱེད་བྱེད་ནུས་ཆེས་ཆེར་འཕར་རྒྱུ་རེད། “དམངས་འཚོ་ལ་དོ་ཁུར་བྱ་རྒྱུ་དེ་ནི་བདག་གིས་བསྒྲུབ་དགོས་པའི་འགན་འཁྲི་ཡིན”ཞེས་བརྗོད་གྱིན་བཀྲ་ཤིས་དོན་གྲུབ་ཀྱིས་བློ་རྩེ་གཅིག་སྒྲིམ་གྱིས་འགན་འཁྲི་བསྒྲུབས་པས། ཡུལ་མི་ཚོས་བདེ་ཐང་ལ་རེ་བ་གསར་པ་སྔར་ལས་མང་བ་བྱུང་བ་དང་། མངའ་རིས་ས་ཁུལ་གྱི་སྨན་བཅོས་བྱ་གཞག་འཕེལ་རྒྱས་ལ་འཕེལ་ཕྱོགས་གསར་པ་སྔར་ལས་མང་བ་བྱུང་།
