2024ལོའི་རྒྱལ་ཡོངས་ཚོགས་ཆེན་གཉིས་ཀྱི་རིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཅང་སུའུ་འཐུས་མི་ཚོགས་པའི་གྲོས་ཞིབ་ནང་ཞུགས་སྐབས། སྤུས་ཚད་མཐོ་བའི་འཕེལ་རྒྱས་ཀྱི་ལས་འགན་ཨང་དང་པོ་དེར་དམ་འཛིན་ཡག་པོ་བྱས་ཏེ། ཡུལ་བབ་དང་བསྟུན་ནས་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་དགོས་ཞེས་ནན་སྟོན་གནང་།
ལོ་གཅིག་སོང་བའི་རིང་ལ། སྲོལ་རྒྱུན་ཐོན་ལས་བསྒྱུར་བཀོད་རིམ་སྤོར་ནས་གསར་དར་ཐོན་ལས་གསོ་སྤེལ་སྟོབས་ཆེར་གཏོང་བའི་བར་དང་། དེ་ནས་འབྱུང་འགྱུར་ཐོན་ལས་བཀོད་སྒྲིག་འཛུགས་སྐྲུན་བྱེད་པའི་བར། སྤུས་གསར་ཐོན་སྐྱེད་ནུས་ཤུགས་ཀྱི་འདེགས་སྐྱོར་དང་སྣེ་ཁྲིད་འོག ཀྲུང་གོའི་དཔལ་འབྱོར་སྤུས་ཚད་མཐོ་བའི་སྒོ་ནས་འཕེལ་རྒྱས་འགྲོ་བའི་སྒུལ་ཤུགས་ཟམ་མི་ཆད་པར་ཆེ་རུ་འགྲོ་བཞིན་ཡོད།
ཞུས་ཀུང་ཚོགས་པའི་རྩེར་སོན་བཟོ་སྐྲུན་འཕྲུལ་ཆས་རིག་ནུས་བཟོ་སྐྲུན་རྒྱལ་ཡོངས་ཀྱི་གཙོ་གནད་ཚོད་ལྟ་ཁང་ནང་། ཞིབ་འཇུག་གསར་སྤེལ་ཚོགས་པས་འདྲ་བཟོའི་ལག་རྩལ་སྤྱད་དེ། མངོན་སུམ་གྱི་ལྗིད་འདེགས་འཕྲུལ་འཁོར་དེ་མངོན་མེད་རྟོག་བཟོའི་གྲངས་འཛིན་འཕྲུལ་ཆས་སུ་བསྒྱུར་བཀོད་བྱེད་བཞིན་ཡོད། རླངས་འཁོར་གྱི་ཕྱི་དབྱིབས་དང་བཀོལ་སྤྱོད་ཉམས་ལེན་སོགས་གང་གི་ཐད་ནས་བརྗོད་ཀྱང་། གྲངས་འཛིན་ཅན་གྱི་ལྗིད་འདེགས་འཕྲུལ་འཁོར་དེ་ལྗིད་འདེགས་འཕྲུལ་འཁོར་ངོ་མ་དང་ཁྱད་པར་ཆེན་པོ་མེད། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི། ཞུས་ཀུང་ཚོགས་པ་བཟོ་སྐྲུན་འཕྲུལ་ཆས་མ་རྐང་ཚད་ཡོད་ཀུང་སིའི་སྤྱི་ཁྱབ་བཟོ་སྐྲུན་པ་ཧྲན་ཙེང་ཧའེ་ཡིས། ཐོན་རྫས་ཀྱི་ལས་སྒྲུབ་སྐབས་ཀྱི་འཛེར་སྒྲ་ཆུང་དུ་གཏོང་གང་ཐུབ་བྱས་ནས། འཕྲུལ་འཁོར་བཀོལ་སྤྱོད་བྱེད་མཁན་ལ་དེ་བས་སྐྱིད་སྣང་དོད་པའི་ལས་སྒྲུབ་ཁོར་ཡུག་བསྐྲུན་པ་མ་ཟད། འཕྲུལ་འཁོར་གྱི་སྤྱོད་ཡུན་ཇེ་རིང་དུ་ཕྱིན་ཡོད། ད་ལྟ“རིག་ལྡན་བསྒྱུར་བཀོད་དང་གྲངས་འཛིན་བརྗེ་སྒྱུར་དྲ་ཐོག་སྦྲེལ་མཐུད”དེ་ལས་གཞི་ཆེ་ཤོས་སུ་བརྩིས་ནས། གྲངས་འཛིན་ཅན་གྱི་བརྗེ་སྒྱུར་ལ་སྐུལ་འདེད་མགྱོགས་པོ་གཏོང་བཞིན་ཡོད་ཅེས་གསུངས།
རིག་ལྡན་བསྒྱུར་བཀོད་དང་གྲངས་འཛིན་བརྗེ་སྒྱུར་དྲ་ལམ་སྦྲེལ་མཐུད་ནི་ཅང་སུའུ་ཡིས་དངོས་ཚན་དང་གྲངས་འཛིན་ཅན་མཉམ་འདྲེས་བྱེད་པར་བརྟེན་ནས་བཟོ་སྐྲུན་ལས་རིགས་ཀྱི་ལྟེ་བའི་འགྲན་རྩོད་ནུས་པ་ཆེ་རུ་གཏོང་བ་དང་། ཡུལ་བབ་དང་བསྟུན་ནས་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བའི་འགག་རྩའི་བྱེད་ཐབས་ཤིག་རེད། ད་ཆ། ཅང་སུའུ་ཞིང་ཆེན་གྱི་གྲངས་འཛིན་ཅན་གྱི་ཞིབ་འཇུག་གསར་སྤེལ་ཇུས་འགོད་ཡོ་བྱད་ཁྱབ་གདལ་ཐུབ་ཚད91.2%ཟིན་པ་དང་། འགག་རྩའི་ལས་རིམ་གྲངས་འཛིན་ཅན་གྱིས་ཚོད་འཛིན་ཐུབ་ཚད70.1%ཟིན་ནས། རྒྱལ་ཡོངས་ཀྱི་ཨང་དང་པོར་སླེབས་ཡོད། ཅང་སུའུ་ཞིང་ཆེན་བཟོ་ལས་དང་ཆ་འཕྲིན་ཅན་ཐིང་གི་ཐིང་ཀྲང་ཀྲུའུ་ཨའེ་ཞུན་གྱིས། སྲོལ་རྒྱུན་ཐོན་ལས་ནི་ཅང་སུའུ་ཞིང་ཆེན་གྱི་དཔལ་འབྱོར་གྱི་ཀ་རྟེན་གལ་ཆེན་ཞིག་ཡིན། སྲོལ་རྒྱུན་ཐོན་ལས་ཡིན་ན་རྗེས་ལུས་ཐོན་ལས་ཡིན་པའི་ངེས་པ་མེད། གལ་ཏེ་དེང་རབས་ཀྱི་ཆེས་སྔོན་ཐོན་གྱི་ལག་རྩལ་དང་གྲངས་འཛིན་ཅན་བེད་སྤྱོད་བྱས་ན། སྲོལ་རྒྱུན་ཐོན་ལས་ལའང་སྐྱེ་སྟོབས་གསར་པ་ཐོན་སྲིད་ཅེས་གསུངས་ཡོད།
སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་རྒྱུ་ནི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ནང་གནས་ཀྱི་བླང་བྱ་དང་ཤུགས་རྒྱག་ས་གཙོ་བོ་ཞིག་ཡིན། 2024ལོའི་རྒྱལ་ཡོངས་ཚོགས་ཆེན་གཉིས་ཀྱི་རིང་ལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཅང་སུའུ་འཐུས་མི་ཚོགས་པའི་གྲོས་ཞིབ་ནང་ཞུགས་སྐབས་སུ། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བ་དེ་ནི་སྲོལ་རྒྱུན་ཐོན་ལས་སྣང་མེད་དང་བེད་མེད་དུ་གཏོང་བ་ཞིག་མིན་པས། འུར་རྒྱག་པ་དང་ཕྱི་རྫིག་ནང་སྟོང་བྱེད་མི་རུང་ལ། རྣམ་པ་གཅིག་ཁོ་ན་ཡང་བྱེད་མི་རུང་། ས་གནས་ཁག་གིས་དོན་དངོས་དང་བསྟུན་ཐོག སྔོན་འཛུགས་རྗེས་གཏོར་དང་། ཡུལ་བབ་དང་བསྟུན་པ། རིགས་དབྱེ་མཛུབ་ཁྲིད་བཅས་མཐའ་འཁྱོངས་བྱས་ཏེ། ས་གནས་དེ་གའི་ཐོན་ཁུངས་ཀྱི་ཁྱད་ཆོས་དང་ཐོན་ལས་ཀྱི་རྨང་གཞི། ཚན་ཞིབ་ཆ་རྐྱེན་སོགས་གཞིར་བཟུང་གདམ་ག་ཡོད་པའི་སྒོ་ནས་ཐོན་ལས་གསར་པ་དང་རྣམ་པ་གསར་པ། སྒུལ་ཤུགས་གསར་པ་བཅས་འཕེལ་རྒྱས་གཏོང་རྒྱུར་སྐུལ་འདེད་གཏོང་བ་དང་། ལག་རྩལ་གསར་པར་བརྟེན་ནས་སྲོལ་རྒྱུན་ཐོན་ལས་བསྒྱུར་བཀོད་དང་རིམ་སྤོར་བྱེད་པ། ཐོན་ལས་རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་ལ་སྐུལ་འདེད་ཧུར་ཐག་གཏོང་དགོས་ཞེས་ནན་གྱིས་བསྟན་ཡོད།
དོན་དངོས་དང་ཟུང་འབྲེལ་དང་། ཡུལ་བབ་དང་བསྟུན་པ། གསར་གཏོད་བྱེད་ཕོད་པ་བཅས་ལ་བརྟེན་ནས། ས་གནས་ཁག་གིས་སྤུས་གསར་ཐོན་སྐྱེད་ནུས་ཤུགས་གསོ་སྐྱོང་དང་འཕེལ་རྒྱས་གཏོང་བའི་ཐད་སྔོན་ལ་སྐྱོད་གང་ཐུབ་བྱེད་བཞིན་ཡོད། ཧྲང་ཧའེ་ཝའེ་ཀའོ་ཆའོ་གྲུ་བཟོའི་གྲུ་འཇོག་ཁང་ནང་། རང་རྒྱལ་གྱི་རྒྱལ་ནང་ནས་ཐོན་སྐྱེད་བྱས་པའི་རྒྱས་སྤྲོས་ཅན་གྱི་ཡུལ་སྐོར་གྲུ་གཟིངས་ཆེ་གྲས་གཉིས་པ“ཨའེ་ཏ•ཧྭ་ཁྲེང་རྟགས་ཅན་གྱི་གྲུ་གཟིངས”ཚ་ཚ་འུར་འུར་ངང་སྐྲུན་བཞིན་ཡོད་པ་དང་། འཆར་གཞི་ལྟར་ན། ཟླ་རྗེས་མར་གྲུ་གཟིངས་ཆུ་ཁར་ཐེངས་དང་པོར་འདོན་ཐུབ་པ་བྱ་རྒྱུ་རེད།
ཀྲུང་གོ་གྲུ་གཟིངས་ཚོགས་པའི་ཝའེ་ཀའོ་ཆའོ་གྲུ་བཟོའི་རང་རྒྱལ་ནས་ཐོན་པའི་ཡུལ་སྐོར་གྲུ་གཟིངས་ཆེ་གྲས་རྣམ་གྲངས་ཀྱི་ས་ཡུལ་དངོས་ཀྱི་སྤྱི་ཁྱབ་བཀོད་འདོམས་པ། སྤྱི་ཁྱབ་ཇུས་འགོད་དབུ་ཆེན་ཁྲེན་ཀང་གིས། བཤད་ཚུལ་འདི་འདྲ་ཞིག་ཡོད་པ་ནི་གྲུ་གཟིངས་བཟོ་སྐྲུན་གྱི་རྒྱལ་ཁབ་ཆེན་པོར་འགྱུར་བར་སྤྱིའི་སྒྲིག་སྦྱོར་ལ་བརྟེན་དགོས་པ་དང་། གྲུ་གཟིངས་བཟོ་སྐྲུན་གྱི་སྟོབས་ཆེན་རྒྱལ་ཁབ་ལ་འགྱུར་བར་ཆ་སྦྱོར་སྒྲིག་ཆས་ལ་བརྟེན་དགོས། རྒྱལ་ཐོན་ཅན་དང་ས་ཁུལ་དེ་རང་གྱི་ཆ་སྦྱོར་ལས་རིགས་ཀྱི་ནུས་པ་ཆེ་རུ་གཏོང་རྒྱུ་དེ་ནི་ཀྲུང་གོའི་གྲུ་གཟིངས་བཟོ་ལས་འབྱུང་འགྱུར་འཕེལ་རྒྱས་འགྲོ་བའི་གཙོ་གནད་ཁ་ཕྱོགས་ཀྱང་ཡིན་ཞེས་གསུངས་འདུག
ཀུའེ་ཀྲོའུ་ཀུའེ་དབྱང་གི་ཀུའེ་ཨན་ཚད་བརྒལ་རྩིས་རྒྱག་ལྟེ་གནས་ཀྱི་འཕྲུལ་ཁང་ནང་། ཞབས་ཞུའི་འཕྲུལ་ཆས་བརྒྱ་ལྷག་གིས་ཆུ་ཚོད24རིང་ཧྲེན་ཀྲེན་ལ་རྒྱུན་ཆད་མེད་པར་རྩིས་རྒྱག་གྲངས་གཞི་མཁོ་འདོན་བྱེད་ཀྱི་ཡོད། རྩིས་རྒྱག་ནུས་པ་ཕུན་སུམ་ཚོགས་པའི་ཀུའེ་ཀྲོའུ་ཡིས་སྔར་ལས་ལྷག་པའི་སྒོ་ནས་གྲུབ་ཆ་ལེགས་སུ་གཏོང་བ་དང་ཁྱུ་ཚོགས་ཆེ་རུ་བཏང་སྟེ། རྩིས་རྒྱག་གིས་ལས་རིགས་སྟོང་དང་ཁེ་ལས་བརྒྱ་ལྷག་ལ་ནུས་པ་འདོན་སྤྲོད་བྱེད་མགྱོགས་སུ་གཏོང་བཞིན་ཡོད། ཀུའེ་ཀྲོའུ་ཞིང་ཆེན་གྲངས་གཞི་ཆེན་པོ་འཕེལ་རྒྱས་དོ་དམ་ཅུས་ཀྱི་ཅུས་ཀྲང་གཞོན་པ་ཅང་དབྱང་གིས། བེད་སྤྱོད་ལ་བརྟེན་ནས་འཛུགས་སྐྲུན་ལ་སྐུལ་འདེད་གཏོང་བའི་བྱ་ཐབས་བརྒྱུད་རྩིས་རྒྱག་རྟེན་གཞི་ཧྲིལ་པོའི་ནུས་པ་ཆེ་རུ་གཏོང་རྒྱུར་སྐུལ་འདེད་བཏང་ནས། རིག་ནུས་རྩིས་རྒྱག་དང་ལས་རིགས་ཀྱི་དཔེ་དབྱིབས་ཆེན་པོ་གསོ་སྐྱོང་། གྲངས་གཞི་སྦྱོང་བརྡར་བཅས་ཕྱོགས་གསུམ་གྱི་ཐད་མཐོ་ས་དམ་འཛིན་དང་སྤུས་གསར་ཐོན་སྐྱེད་ནུས་ཤུགས་མགྱོགས་མྱུར་ཆགས་པ་བྱ་རྒྱུ་ཡིན་ཞེས་གསུངས་འདུག
བྱང་ཤར་གྱི་བཟོ་ལས་རྟེན་གཞི་རྙིང་པ་ལེའོ་ཉིང་ཧྲེན་དབྱང་དུ། རང་རྒྱལ་གྱི་བཟོ་སྐྲུན་གཞི་ཁྱོན་ཆེ་ཤོས་ཀྱི་གྲངས་འཛིན་འཁོར་སྟེགས་ཐོན་སྐྱེད་རྟེན་གཞིའི“གློག་མེད་བཟོ་གྲྭ”ཡི་ནང་དུ་ཆུ་ཚོད24ཡི་རིང་མི་མེད་ཅན་གྱི་ལས་ཀ་བྱེད་བཞིན་ཡོད། ཀུན་སྤྱོད་ལག་རྩལ་ཧྲེན་དབྱང་འཁོར་སྟེགས་འཐབ་ཇུས་དང་གཉེར་སྐྱོང་པུའི་པུའུ་ཀྲང་ཏུང་ལིང་ཡུན་གིས། “གློག་མེད་བཟོ་གྲྭ”ནི་དོན་དངོས་ཐོག5G+ དྲ་སྦྲེལ་ལག་རྩལ་ཚུད་པའི་རིག་ནུས་ཅན་དང་རང་འགུལ་ཅན་གྱིས་ཐོན་ལས་ཀྱི་སྤུས་མཐོའི་གོང་འཕེལ་ལ་ནུས་པ་སྤྲད་ནས་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་ཡོང་བ་བྱེད་པ་དེ་ཡིན་ཞེས་གསུངས་འདུག
ཚན་རྩལ་གྲུབ་འབྲས་བརྗེ་སྒྱུར་བྱེད་པ་ནི་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བའི་དོན་གནད་ཅིག་ཡིན། ཉེ་ཆར་པེ་ཅིང་གྲོང་ཁྱེར་མི་དབྱིབས་འཕྲུལ་མི་གསར་གཏོད་ལྟེ་གནས་ཀྱིས་རང་བདག་ཞིབ་འཇུག་གསར་སྤེལ་བྱས་པའི“ལྷའི་བཟོ་བོ”མི་དབྱིབས་འཕྲུལ་མིའི་འགག་རྩའི་བྱེད་ནུས་མང་པོའི་ཐད་འགག་གཏོར་གལ་ཆེན་བྱུང་ཡོད། “ཁེ་ལས་ཀྱིས་འདྲི་བ་འདོན་པ་དང་འཕྲུལ་འཁོར་གྱིས་ལན་འདེབས་པའི”སྒྲིག་འཛུགས་དཔེ་དབྱིབས་འཚོལ་ཞིབ་བྱས་པ་བརྒྱུད། པེ་ཅིང་གིས་ཚན་རྩལ་གསར་གཏོད་ཐོན་ཁུངས་ཀྱི་གྲུབ་འབྲས་རྣམས་ཐོན་ལས་འཕེལ་རྒྱས་ཀྱི་བཟང་ཆར་ནུས་ལྡན་ངང་བསྒྱུར་རྒྱུར་མུ་མཐུད་སྐུལ་འདེད་གཏོང་བཞིན་ཡོད། པེ་ཅིང་གྲོང་ཁྱེར་ཚན་རྩལ་ཨུ་ལྷན། ཀྲུང་ཀོན་ཚུན་དོ་དམ་ཨུ་ལྷན་གྱི་ཀྲུའུ་རེན་གཞོན་པ་ལིའུ་ཝེ་ཧྭ་ཡིས། མི་ཐབས་རིག་ནུས་ལག་རྩལ་གྱི་མདུན་གྲལ་དམ་འཛིན་བྱེད་པ་དང་། པེ་ཅིང་གྲོང་ཁྱེར་གྱི་གསར་གཏོད་ཐོན་ཁུངས་ཀྱི་བཟང་ཆ་འདོན་སྤེལ་གང་ལེགས་བྱེད་པ། སྡེ་ཚན་གྱི་མཐུན་སྦྱོར་དང་ཐོན་ཁུངས་ཟླ་སྒྲིལ་གཏོང་ཤུགས་ཆེ་རུ་གཏོང་བ་བཅས་བྱས་ནས། རིག་ནུས་ལག་རྩལ་གསར་གཏོད་དང་ཐོན་ལས་གསོ་སྐྱོང་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏོང་བཞིན་ཡོད་ཅེས་གསུངས་འདུག
སྲོལ་རྒྱུན་ཐོན་ལས་རྒྱུན་མཐུད་ངང་རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་སུ་བསྒྱུར་བཞིན་ཡོད་པ་དང་། རིག་ནུས་སྒྲིག་ཆས་ཁྱབ་གདལ་མགྱོགས་སུ་འགྲོ་བཞིན་ཡོད། འདས་ཟིན་པའི་ལོ་གཅིག་ནང་། རང་རྒྱལ་གྱི་ཚན་རྩལ་གསར་གཏོད་དང་ཐོན་ལས་གསར་གཏོད་གཉིས་མཉམ་འདྲེས་གཏིང་ཟབ་ཏུ་ཕྱིན་པ་དང་། དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་མགྱོགས་སུ་ཕྱིན་པ། སྤུས་གསར་ཐོན་སྐྱེད་ནུས་ཤུགས་ལ་ཕན་འབྲས་མངོན་གསལ་དོད་པོ་ཐོན་པ། དཔལ་འབྱོར་འཕེལ་རྒྱས་དེ“གསར་པའི”ཕྱོགས་སུ་བསྐྱོད་བཞིན་པ་དང་། “སྤུས་ཚད”ལ་བརྟེན་ནས་རྒྱང་བགྲོད་བྱེད་བཞིན་ཡོད། བཟོ་ལས་དང་ཆ་འཕྲིན་ཅན་པུའུ་ཡི་པུའུ་ཀྲང་གཞོན་པ་ཀྲང་ཡུན་མིང་གིས། ཐོན་ལས་འཕེལ་རྒྱས་ཀྱི་དགོས་མཁོས་སྣེ་ཁྲིད་དང་ཁེ་ལས་ཀྱིས་གཙོ་གཟུགས་བྱས་ཏེ། ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏིང་ཟབ་གཏོང་བ་དང་། གསར་གཏོད་མ་ལག་གི་སྤྱི་ཡོངས་ཕན་ནུས་ཆེ་རུ་གཏོང་བ། ཚན་རྩལ་གསར་གཏོད་ཀྱི་འགག་རྩའི་གནས་དེ་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བ་དང་བཟོ་ལས་ཅན་གསར་པར་སྐུལ་འདེད་གཏོང་བའི་འཕར་ཚད་ཆེ་ཤོས་སུ་བསྒྱུར་བ་བཅས་བྱས་ནས། དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་ལ་མཚོན་རྟགས་རང་བཞིན་གྱི་གྲུབ་འབྲས་གལ་ཆེན་དེ་བས་མང་བ་ཐོབ་རྒྱུར་སྐུལ་འདེད་གཏོང་དགོས་གསུངས་ཡོད།
