ཟླ་3ཚེས་6ཉིན། རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་དང་པོའི་བཅིངས་འགྲོལ་དམག་དང་དྲག་པོའི་ཉེན་རྟོག་དཔུང་སྡེའི་འཐུས་མི་ཚོགས་པའི་གསར་འགྱུར་མགྲིན་ཚབ་པ་ཐན་ཁེ་ཧྥེ་ཡིས་སྨྱན་སྦྱོར་གྱི་བཅར་འདྲི་དང་ལེན་གནང་བ་རེད།
གསར་འགོད་པ་ཞིག་གིས་དྲིས་དོན། དེང་སྐབས་ཀྱི་འཛམ་གླིང་དེ་ཟིང་ཆའི་འཕོ་འགྱུར་གྱི་དུས་སྐབས་སུ་སླེབས་པ་དང་། བརྟན་མིན་དང་གཏན་འཁེལ་མེད་པའི་རང་བཞིན་མངོན་གསལ་དོད་པོས་མང་དུ་ཕྱིན་པ། ཨ་རི་སོགས་རྒྱལ་ཁབ་ཀྱིས་དམག་གྲོན་གྱི་སྔོན་རྩིས་མང་དུ་ཤུགས་ཆེན་བཏང་ཡོད། ད་ལོའི་ཀྲུང་གོའི་རྒྱལ་སྲུང་གྲོན་དངུལ་གྱི་སྔོན་རྩིས་བཀོད་སྒྲིག་གི་འབྲེལ་ཡོད་གནས་ཚུལ་ངོ་སྤྲོད་གནང་རོགས།
ཐན་ཁེ་ཧྥེ་ཡིས་བཤད་དོན། ཀྲུང་གོའི་སྲིད་གཞུང་གིས་རྒྱལ་སྲུང་འཛུགས་སྐྲུན་དང་དཔལ་འབྱོར་འཛུགས་སྐྲུན་མཐུན་སྦྱོར་འཕེལ་རྒྱས་ཀྱི་བྱེད་ཕྱོགས་མཐའ་འཁྱོངས་བྱེད་ཀྱིན་ཡོད། རྒྱལ་སྲུང་གི་དགོས་མཁོ་དང་རྒྱལ་དམངས་དཔལ་འབྱོར་འཕེལ་རྒྱས་ཀྱི་ཆུ་ཚད་ལ་གཞིགས་ནས་རྒྱལ་སྲུང་གཏོང་དངུལ་མང་ཉུང་ལུགས་མཐུན་ངང་གཏན་འཁེལ་བྱེད་ཀྱིན་ཡོད། ཉེ་བའི་ལོ་ཤས་རིང་། དཔལ་འབྱོར་དང་སྤྱི་ཚོགས་རྒྱུན་མཐུད་དང་སྐྱོན་བྲལ་ངང་འཕེལ་རྒྱས་བྱུང་བ་དང་དུས་མཚུངས་སུ། རྒྱལ་སྲུང་གི་གཏོང་དངུལ་འཕར་སྣོན་འོས་འཚམ་ཡོང་བ་སྲུང་འཛིན་བྱས་ཏེ། རྒྱལ་སྲུང་གི་དངོས་ཡོད་སྟོབས་ཤུགས་དང་དཔལ་འབྱོར་གྱི་དངོས་ཡོད་སྟོབས་ཤུགས་དུས་མཉམ་དུ་ཆེ་རུ་འགྲོ་བར་སྐུལ་འདེད་བཏང་ཡོད།
2023ལོའི་རྒྱལ་ཡོངས་ཀྱི་སྤྱིར་བཏང་གི་སྤྱི་པའི་སྔོན་རྩིས་བཀོད་སྒྲིག་བྱས་ནས་རྒྱལ་སྲུང་གཏོང་དངུལ་སྒོར་དུང་ཕྱུར་ཁྲི་1.58ཟིན་པ་དེ། ལོ་གོང་མའི་ལག་བསྟར་བྱས་གྲངས་ལས་7.2%འཕར་བའི་ནང་ཀྲུང་དབྱང་རིམ་པའི་གཏོང་དངུལ་སྒོར་དུང་ཕྱུར་ཁྲི་1.55ཟིན་པས། ལོ་གོང་མའི་ལག་བསྟར་བྱས་གྲངས་ལས་7.2%འཕར་ཡོད། རྒྱལ་སྲུང་ཐད་ཀྱི་གཏོང་དངུལ་འཕར་སྣོན་བྱུང་བ་རྣམས་གཙོ་བོ་གཤམ་གསལ་གྱི་ཕྱོགས་འགར་སྤྱོད་རྒྱུ་སྟེ།
གཅིག་ནས་དམག་དཔུང་འཛུགས་སྐྱོང་གི་“ལོ་ལྔ་ཚན་བཅུ་བཞི་པའི་”འཆར་འགོད་ཀྱི་བཀོད་སྒྲིག་ལྟར། དམག་སྦྱོང་དང་དམག་གྲབས་ལ་ཕྱོགས་ཡོངས་ནས་ཤུགས་སྣོན་རྒྱག་པ་དང་། གཞི་གཅིག་ཅན་གྱི་རྒྱལ་ཁབ་འཐབ་ཇུས་མ་ལག་དང་ནུས་པ་སྲ་བརྟན་དང་མཐོར་འདེགས་གཏོང་དགོས།
གཉིས་ནི་དེང་རབས་ཅན་དུ་འགྱུར་བའི་རྒྱབ་ཕྱོགས་ཀྱི་མཁོ་སྒྲུབ་འཛུགས་སྐྲུན་མགྱོགས་སུ་གཏོང་བ་དང་། རྒྱལ་སྲུང་ཚན་རྩལ་དང་མཚོན་ཆ་སྒྲིག་ཆས་ཀྱི་ལས་གྲྭ་གལ་ཆེན་ལག་བསྟར་བྱས་ནས། ཚན་རྩལ་དེ་འཐབ་འཛིང་ནུས་ཤུགས་སུ་མགྱོགས་མྱུར་བསྒྱུར་དགོས།
གསུམ་ནས་རྒྱལ་སྲུང་དང་དམག་དཔུང་སྒྱུར་བཅོས་ཀྱི་གྲུབ་འབྲས་སྲ་བརྟན་དུ་གཏོང་བ་དང་། རྒྱ་ཆེར་བཏང་ནས་ཁྱབ་ཁོངས་གལ་ཆེན་གྱི་སྒྱུར་བཅོས་བྱེད་ཐབས་དང་། འཕྲལ་མཁོ་ཆེ་བའི་སྲིད་ཇུས་དང་ལམ་ལུགས་ལག་ལེན་བསྟར་རྒྱུར་འགན་ལེན་བྱས་ཏེ་དམག་དོན་བཅོས་སྐྱོང་གི་ཆུ་ཚད་མཐོ་རུ་གཏོང་དགོས།
བཞི་ནས་རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཆུ་ཚད་དང་འཚམ་པར་བྱས་ནས། དཔུང་སྡེའི་ལས་དོན་དང་སྦྱོང་བརྡར། འཚོ་བ་འགན་ལེན་བཅས་ཀྱི་ཆ་རྐྱེན་མུ་མཐུད་ལེགས་སུ་གཏོང་དགོས།
ཐན་ཁེ་ཧྥེ་ཡིས་བཤད་དོན། ཀྲུང་གོས་ཞི་བདེ་འཕེལ་རྒྱས་ཀྱི་འགྲོ་ལམ་ཐོག་བསྐྱོད་རྒྱུ་མཐའ་འཁྱོངས་དང་། འགོག་སྲུང་རང་བཞིན་གྱི་རྒྱལ་སྲུང་སྲིད་ཇུས་ལག་ལེན་བསྟར་བ། མཉམ་འབྲེལ་རྒྱལ་ཚོགས་ཀྱི་དམག་གྲོན་ཕྱི་གསལ་ནང་གསལ་གྱི་ལམ་ལུགས་ནང་ཧུར་ཐག་ཞུགས་པ་བཅས་བྱས་ནས། 2008ལོ་ནས་བཟུང་ལོ་རེར་མཉམ་འབྲེལ་རྒྱལ་ཚོགས་ལ་ལོ་གོང་མའི་ནོར་སྲིད་ཀྱི་ལོ་འཁོར་གྱི་དམག་དོན་གཏོང་དངུལ་སྙན་ཞུ་ཕུལ་ཡོད། ཨ་རི་སོགས་དམག་དོན་གྱི་རྒྱལ་ཁབ་ཆེན་པོ་དང་བསྡུར་ན། ཀྲུང་གོའི་རྒྱལ་སྲུང་གཏོང་དངུལ་གྱིས་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་གྱི་བསྡུར་ཚད་དང་། རྒྱལ་ཁབ་ཀྱི་ནོར་སྲིད་གཏོང་དངུལ་གྱི་བསྡུར་ཚད་ཟིན་པའམ་ཡང་ན་རྒྱལ་དམངས་མི་རེའི་ཆ་སྙོམས་ཀྱི་རྒྱལ་སྲུང་གཏོང་དངུལ། དམག་མི་མི་རེའི་ཆ་སྙོམས་ཀྱི་རྒྱལ་སྲུང་གཏོང་དངུལ་སོགས་གང་ཞིག་ཡིན་རུང་ཚང་མ་ཅུང་དམའ་པོ་རེད། ཀྲུང་གོའི་ཚད་ཡོད་ཀྱི་རྒྱལ་སྲུང་གཏོང་དངུལ་ནི་རྒྱལ་ཁབ་ཀྱི་བདག་དབང་དང་བདེ་འཇགས། འཕེལ་རྒྱས་བཅས་ཀྱི་ཁེ་ཕན་སྲུང་སྐྱོང་བྱེད་པའི་ཆེད་དུ་ཡིན།
རྩོམ་སྒྲིག་པ། སྣང་རྡོར།
