རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་གསུམ་པའི་གསར་འགྱུར་ཡོངས་བསྒྲགས་ཚོགས་འདུ་ཚེས3ཉིན་གྱི་ཆུ་ཚོད15སྟེང་འགོ་ཚུགས་པ་དང་། ཚོགས་ཆེན་གྱི་གསར་འགྱུར་མགྲིན་ཚབ་པ་ལིའུ་ཅེ་དབྱི་ཡིས་ཀྲུང་གོ་དང་ཕྱི་རྒྱལ་གྱི་སྨྱན་སྦྱོར་ལ་ཐེངས་འདིའི་ཚོགས་ཆེན་གྱི་འབྲེལ་ཡོད་གནས་ཚུལ་ངོ་སྤྲོད་བྱས་པ་དང་འབྲེལ་གསར་འགོད་པའི་དྲི་བར་ལན་བཏབ།
རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་གསུམ་པའི་ཚོགས་ཡུན་ཉིན་དྲུག་ཡིན་པ་རེད།
ཚོགས་ཆེན་གྱི་གསར་འགྱུར་མགྲིན་ཚབ་པ་ལིའུ་ཅེ་དབྱི་ཡིས་ངོ་སྤྲོད་བྱས་པར་གཞིགས་ན། རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་གསུམ་པ་ཟླ3པའི་ཚེས4ཉིན་གྱི་ཕྱི་དྲོའི་ཆུ་ཚོད3པར་མི་དམངས་ཚོགས་ཁང་ཆེན་མོར་འགོ་ཚུགས་རྒྱུ་ཡིན་པ་དང་། ཟླ3པའི་ཚེས10ཉིན་གྱི་སྔ་དྲོར་མཇུག་སྒྲིལ་རྒྱུ་ཡིན་ལ། ཚོགས་ཡུན་ཉིན6ཡིན་པ་རེད།
ཐེངས་འདིའི་སྲིད་གྲོས་ཚོགས་ཆེན་གྱི་གྲོས་རིམ་གཙོ་བོ།
ཚོགས་ཆེན་གྱི་གསར་འགྱུར་མགྲིན་ཚབ་པ་ལིའུ་ཅེ་དབྱི་ཡིས་བཤད་རྒྱུར། ཚོགས་ཆེན་གྱི་གྲོས་རིམ་གཙོ་བོ་ནི་རྒྱལ་ཡོངས་སྲིད་གྲོས་རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་ཞུ་དང་གྲོས་གཞིའི་ལས་དོན་གནས་ཚུལ་གྱི་སྙན་སེང་ལ་གསན་ཞིང་གྲོས་ཞིབ་བྱེད་པ་དང་། རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་གྲོས་ཚོགས་ཐེངས་གསུམ་པར་ཟུར་ཞུགས་བྱས་ནས། སྲིད་གཞུང་གི་ལས་དོན་སྙན་ཞུ་དང་དེ་བཞིན་འབྲེལ་ཡོད་སྙན་སེང་གཞན་དག་ཉན་པ་དང་གྲོས་བསྡུར་བྱ་རྒྱུ་ཡིན་ལ། རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་གསུམ་པའི་ཆབ་སྲིད་ཀྱི་གྲོས་ཆོད་དང་། རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་ཞུའི་སྐོར་གྱི་གྲོས་ཆོད། རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་གཉིས་པ་ཚུན་གྱི་གྲོས་གཞིའི་ལས་དོན་གནས་ཚུལ་གྱི་སྙན་ཞུའི་སྐོར་གྱི་གྲོས་ཆོད། རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་གསུམ་པའི་གྲོས་གཞིར་ཞིབ་བཤེར་བྱས་ཚུལ་སྐོར་གྱི་སྙན་སེང་ལ་གྲོས་ཞིབ་བྱས་ནས་གྲོས་འཆམ་བྱུང་རྒྱུ་རེད།
ཐེངས་འདིའི་སྲིད་གྲོས་ཚོགས་ཆེན་ལ་འགོ་ཚུགས་ཚོགས་འདུ་དང་། མཇུག་སྒྲིལ་ཚོགས་འདུ། དེ་བཞིན་ཚོགས་ཆེན་ཐོག་གཏམ་བཤད་ཐེངས་གཉིས་བཀོད་སྒྲིག་བྱ་རྒྱུ་རེད།
ཚོགས་ཆེན་གྱི་གསར་འགྱུར་མགྲིན་ཚབ་པ་ལིའུ་ཅེ་དབྱི་ཡིས་ངོ་སྤྲོད་བྱས་པར་གཞིགས་ན། ཚོགས་ཆེན་རིང་འགོ་ཚུགས་ཚོགས་འདུ་དང་། མཇུག་སྒྲིལ་ཚོགས་འདུ། དེ་བཞིན་ཚོགས་ཆེན་ཐོག་གཏམ་བཤད་ཐེངས་གཉིས་བཀོད་སྒྲིག་བྱ་རྒྱུ་དང་། ཨུ་ཡོན་བཅའ་སྡོད་བྱ་ཡུལ་དུ་ལས་རིགས་ཁག་གི་ཚོགས་ཆུང་གི་ཚོགས་འདུ་ཁག་སོ་སོར་བགོས་ནས་ཐེངས་མང་འཚོགས་པ་དང་། ལས་རིགས་ཁག་གིས་ད་དུང་ལས་རིགས་ཁག་གི་གྲོས་མོལ་ཚོགས་འདུ་འཚོགས་རྒྱུ་རེད། འགོ་ཚུགས་ཚོགས་འདུ་དང་མཇུག་སྒྲིལ་ཚོགས་འདུར་ཀྲུང་གོར་བཅའ་སྡོད་ཕྱི་རྒྱལ་གྱི་གཞུང་ཚབ་གདན་འདྲེན་ཞུས་ནས་ཟུར་ཉན་བྱ་རྒྱུ་རེད།
སྲིད་གྲོས་ཚོགས་ཆེན་གྱིས“ཨུ་ཡོན་བགྲོད་ལམ”གྱི་བཅར་འདྲིའི་བྱེད་སྒོ་ཐེངས3གཉེར་རྒྱུ།
ཚོགས་ཆེན་གྱི་གསར་འགྱུར་མགྲིན་ཚབ་པ་ལིའུ་ཅེ་དབྱི་ཡིས་ངོ་སྤྲོད་བྱས་པར་གཞིགས་ན། ཁ་སང་གི་གསར་འགྱུར་ཡོངས་བསྒྲགས་ཚོགས་འདུ་ཕུད། ཚོགས་ཆེན་གྱིས“ཨུ་ཡོན་བགྲོད་ལམ”གྱི་བཅར་འདྲིའི་བྱེད་སྒོ་ཐེངས་གསུམ་འཚོག་རྒྱུ་ཡིན་པ་དང་། ཨུ་ཡོན་ཁག་བཅའ་སྡོད་བྱ་ཡུལ་ཚང་མར་བཅར་འདྲི་ཁང་བཙུགས་ཡོད། ཚོགས་ཆེན་དྲུང་ཡིག་ཁྲུའུ་ཡི་གསར་འགྱུར་ཚོགས་ཆུང་དང་བཅའ་སྡོད་བྱ་ཡུལ་གྱི་གསར་འགྱུར་འབྲེལ་གཏུག་མི་སྣས་ཀྲུང་གོ་དང་ཕྱི་རྒྱལ་གྱི་གསར་འགོད་པའི་གྲོགས་པོར་བཅར་འདྲི་བྱེད་པར་ཞབས་འདེགས་ཧུར་ཐག་ཞུ་རྒྱུ་རེད། རྒྱལ་ཡོངས་སྲིད་གྲོས་གཞུང་དོན་དྲ་བའི་གསར་འགྱུར་ལྟེ་གནས་ཀྱིས་ཚོགས་ཆེན་གྱི་འབྲེལ་ཡོད་བཀོད་སྒྲིག་དང་། ཡིག་ཆ་གཙོ་བོ། དཔྱད་གཞིའི་ཆ་འཕྲིན་བཅས་ཁྱབ་བསྒྲགས་བྱ་རྒྱུ་ཡིན་པས་ཚང་མས་དུས་ཐོག་ཏུ་དོ་ཁུར་གནང་རོགས་ཞུས། ཀྲུང་གོ་དང་ཕྱི་རྒྱལ་གྱི་གསར་འགོད་པས་ཡུལ་དངོས་དང་། དྲ་རྒྱ། བརྙན་ལམ། ཁ་པར་བཅར་འདྲི་སོགས་བྱེད་ཐབས་སྣ་ཚོགས་བརྒྱུད་ནས་སྲིད་གྲོས་ཚོགས་ཆེན་གྱི་གནས་ཚུལ་སྤེལ་བར་དགའ་བསུ་ཞུ།
