ཚེས་3ཉིན་གྱི་ཕྱི་དྲོར་རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་གསར་འགྱུར་ཡོངས་བསྒྲགས་ཚོགས་འདུ་འཚོགས་པ་དང་། ཚོགས་ཆེན་གྱི་གསར་འགྱུར་མགྲིན་ཚབ་པ་ལིའུ་ཅེ་དབྱི་ཡིས་ངོ་སྤྲོད་གནང་བར་གཞིགས་ན། རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་བཞི་པ་ཚེས་4ཉིན་གྱི་ཕྱི་དྲོའི་ཆུ་ཚོད་གསུམ་པར་མི་དམངས་ཚོགས་ཁང་ཆེན་མོར་འཚོག་འགོ་འཛུགས་རྒྱུ་དང་། ཟླ་3ཚེས་11ཉིན་གྱི་སྔ་དྲོར་འཚོག་མཇུག་འགྲིལ་རྒྱུ་ཡིན་ཞིང་། ཚོགས་ཡུན་ཉིན་བདུན་ཡིན་པ་རེད།
ལིའུ་ཅེ་དབྱི་ཡིས་“ལོ་ལྔ་ཚན་གྱི་འཆར་འགོད་བཅུ་བཞི་པའི་”ཚུན་དུ་རྒྱལ་ཡོངས་སྲིད་གྲོས་ཀྱིས་“ལོ་ལྔ་ཚན་གྱི་འཆར་འགོད་བཅུ་བཞི་པའི་”ཁྲོད་ཀྱི་ཆུ་ཚད་མཐོ་བའི་སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་སྒྲིག་སྲོལ་འཛུགས་པ་དང་གྲོང་གསེབ་ཀྱི་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བ་སོགས་ཀྱི་གནད་དོན་གལ་ཆེན་ལ་དམིགས་པས་སྤུས་ཚད་མཐོ་བའི་ཞིབ་འཇུག་གྲུབ་འབྲས་ཁག་གཅིག་ཐོབ་ཡོད། 2025ལོར་རྒྱལ་ཡོངས་སྲིད་གྲོས་ཀྱིས་“ལོ་ལྔ་ཚན་གྱི་འཆར་འགོད་བཅོ་ལྔ་པའི་”དུས་སྐབས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཁྲོད་ཀྱི་འགག་རྩའི་རང་བཞིན་དང་ཐག་གཅོད་རང་བཞིན་གྱི་རྒྱུ་རྐྱེན་དང་། ཀྲུང་གོ་རྣམ་པའི་དེང་རབས་ཅན་འཛུགས་སྐྲུན་ཁྲོད་ཐག་གཅོད་བྱེད་དགོས་པའི་རིགས་པའི་གཞུང་ལུགས་དང་ལག་ལེན་གྱི་གནད་དོན། རྒྱང་ལམ་གསར་པའི་ཐོག་གི་འཕེལ་ཕྱོགས་རང་བཞིན་དང་ཆོས་ཉིད་རང་བཞིན་ལྡན་པའི་འཕེལ་རྒྱས་དང་འགྱུར་ལྡོག རྒྱང་ལྟའི་རང་བཞིན་དང་སྣེ་ཁྲིད་རང་བཞིན་ལྡན་པའི་འཐབ་ཇུས་ལས་འགན་བཅས་ལ་དམིགས་ནས་ཨུ་ཡོན་གྱི་བསམ་འཆར་དང་གྲོས་འགོ་རྒྱ་ཁྱབ་ཏུ་བསྡུ་ལེན་བྱས་ཡོད་ཅེས་ངོ་སྤྲོད་གནང་འདུག
ལིའུ་ཅེ་དབྱི་ཡིས་“གཏིང་ཟབ་པའི་ཞིབ་འཇུག་དང་ཐབས་ཇུས་ཞིབ་འཇུག གྲོས་གཞི་480ལྷག་ཙམ་བཏོན་པ། ཆ་འཕྲིན་200ལྷག་ཙམ་ཕུལ་བ་བཅས་བྱས་ཏེ། ‘ལོ་ལྔ་ཚན་གྱི་འཆར་འགོད་བཅོ་ལྔ་པ་’ བཟོ་རྒྱུར་དཔྱད་གཞི་གལ་ཆེན་མཁོ་འདོན་བྱས་ཡོད་”ཅེས་བརྗོད་པ་རེད།
འདས་མ་ཐག་པའི་“ལོ་རྒྱུས་ཐོག་རིང་ཤོས་”ཀྱི་དཔྱིད་གསར་དུས་ཆེན་གྱི་གུང་གསེང་སྐབས་བཟའ་བཏུང་དང་། རོལ་རྩེད། ཁྲོམ་ར་བཅས་ལ་མི་ཚོགས་འཁྲུག་ཅིང་། རྒྱལ་ནང་གི་ཡུལ་སྐོར་བའི་འཛད་སྤྱོད་བསྡོམས་འབོར་སྒོར་དུང་ཕྱུར་8034ལས་བརྒལ་ནས་ན་ནིང་གི་དུས་མཚུངས་ལས་སྒོར་དུང་ཕྱུར་1264མང་དུ་ཕྱིན་པ་དང་། དཔྱིད་གསར་དུས་ཆེན་གྱི་སྤྱི་ཚོགས་ཡོངས་ཀྱི་ས་ཁོངས་ལས་བརྒལ་བའི་མི་སྣ་འགྲོ་སྐྱོད་བྱེད་ཚད་སྔོན་དཔག་བྱས་ན་མི་ཐེངས་དུང་ཕྱུར་95ཟིན་བཟོ་ཡོད་ཅིང་། དེ་གོ་ལ་ཧྲིལ་པོའི་མི་ཡོངས་རྫོགས་ཆ་སྙོམས་འགྲོ་སྐྱོད་ཐེངས་1ཡན་བྱས་པ་དང་གཅིག་མཚུངས་ཡིན། ལིའུ་ཅེ་དབྱི་ཡིས་རང་རྒྱལ་གྱི་དཔལ་འབྱོར་སྤྱི་འབོར་སྒོར་དུང་ཕྱུར་ཁྲི་140ཡི་སྐས་རིམ་གསར་པར་སླེབས་ཡོད་པ་དང་། འཕར་ཚད་དེ་གོ་ལ་ཧྲིལ་པོའི་དཔལ་འབྱོར་དངོས་ཚན་གཙོ་བོའི་ཁྲོད་མུ་མཐུད་མདུན་གྲལ་དུ་གནས་ཡོད་ཅེས་བརྗོད་ཡོད།
ལིའུ་ཅེ་དབྱི་ཡིས་“ང་ཚོས་ཡིད་ཆེས་བརྟན་དུ་གཏོང་བ་དང་། ལེགས་ཆ་བེད་སྤྱོད་ཡག་པོ་བྱེད་པ། འགྲན་སློང་ལ་ཁ་གཏད་གཅོག་པ་བཅས་བྱས་ཚེ་བརྟན་ལྷིང་ཁྲོད་ལེགས་སུ་འགྲོ་བའི་འཕེལ་ཕྱོགས་རྒྱུན་ཆད་མེད་པར་སྲ་བརྟན་དང་རྒྱ་བསྐྱེད་བྱུང་ནས་རང་རྒྱལ་གྱི་དཔལ་འབྱོར་རླབས་གཤགས་མདུན་སྐྱོད་དང་བརྟན་ཐོག་རྒྱང་བགྲོད་ཡོང་བར་སྐུལ་འདེད་གཏོང་ཐུབ་ངེས་ཡིན་”ཞེས་བརྗོད་ཡོད།
ཧའེ་ནན་རང་མོས་ཉོ་ཚོང་གྲུ་ཁའི་གླིང་ཕྲན་ཡོངས་ཀྱི་གློད་སྡོམ་ཟུང་འབྲེལ་ལ་དོ་ཁུར་ཆེན་པོ་བྱས་ཡོད། དཔྱིད་གསར་དུས་ཆེན་གྱི་གུང་གསེང་སྐབས་ཧའེ་ནན་གླིང་ཕྲན་ལས་བྲལ་བའི་དཔྱ་ཁྲལ་མེད་པའི་ཉོ་སྒྲུབ་དངུལ་གྲངས་ན་ནིང་གི་དཔྱིད་གསར་དུས་ཆེན་ལས་30.8%འཕར་བ་དང་། རྒྱལ་གྲོལ་འཐུས་མཆན་མི་དགོས་པར་རྒྱལ་ཁོངས་སུ་ཡོང་བའི་ཕྱི་རྒྱལ་གྱི་ཡུལ་སྐོར་བ་75.6%འཕར་ཡོད། ལིའུ་ཅེ་དབྱི་ཡིས་རྒྱལ་ཡོངས་སྲིད་གྲོས་ཀྱིས་དུས་ཡུན་རིང་པོར་རང་རྒྱལ་གྱི་ཕྱི་ཕྱོགས་སྒོ་འབྱེད་བྱ་གཞག་ལ་དོ་ཁུར་དང་ཞབས་འདེགས་ཞུས་ནས་ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་རྒྱ་ཆེར་གཏོང་ཆེད་ཧུར་ཐག་ངང་སྲིད་གླེང་ཇུས་འདོན་དང་སེམས་ཤུགས་གཅིག་སྡུད་བྱས་ཡོད་ཅེས་བརྗོད་ཡོད།
ལིའུ་ཅེ་དབྱི་ཡིས་“རང་མོས་ཉོ་ཚོང་གྲུ་ཁའི་གློད་སྡོམ་ཟུང་འབྲེལ་གྱི་བྱེད་སྟངས་དེ་ནི་ཀྲུང་གོས་སྒྲིག་སྲོལ་དང་། སྒྲིག་གཞི། དོ་དམ། ཚད་གཞི་སོགས་ལམ་ལུགས་ཀྱི་ཐོག་ནས་བརྟན་པོའི་ངང་སྒོ་འབྱེད་རྒྱ་བསྐྱེད་པའི་འཚོལ་ཞིབ་གསར་པ་ཞིག་ཡིན་ཞིང་། དེའི་ཐོག་ནས་ཀྲུང་གོས་བློ་བརྟན་འགྱུར་མེད་ངང་བསྒྱུར་བཅོས་སྒོ་འབྱེད་བྱེད་པའི་ཆོད་སེམས་བརྟན་པོ་མཚོན་ཡོད། ཀྲུང་གོས་ཐོག་མཐའ་བར་གསུམ་དུ་ཕྱི་ཕྱོགས་སྒོ་དབྱེའི་གཞི་རྩའི་རྒྱལ་ཇུས་མཐའ་འཁྱོངས་བྱེད་ཀྱི་ཡོད་པ་དང་། སྒོ་མོ་ཇི་ཙམ་དབྱེ་ན་དེ་ཙམ་གྱིས་རྒྱ་ཆེར་འགྲོ་བ་ལས་ཕྱེ་ཟིན་པའི་སྒོ་མོ་རྒྱག་མི་སྲིད་”ཅེས་བརྗོད་ཡོད།
ཡོངས་བསྒྲགས་ཚོགས་འདུའི་ཐོག ཚོགས་ཆེན་གྱི་གསར་འགྱུར་མགྲིན་ཚབ་པས་ད་དུང་ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་སྐྱོང་ལ་སྐུལ་འདེད་གཏོང་བ་དང་རྒྱལ་སྤྱིའི་དབུལ་པོ་ཉུང་དུ་གཏོང་བའི་ཀྲུང་གོའི་ཉམས་མྱོང་སོགས་ཀྱི་གནད་དོན་ཐད་གསར་འགོད་པའི་དྲི་བར་ལན་བསྐྱོན་ཡོད།
