ཉེ་ཆར། འདམ་གཞུང་རྫོང་གི་མང་ཚོགས་སངས་ཆེ་གེ་མོས་“གཅེས་སུ་འོས་པའི་འདམ་གཞུང་སྤྱི་བདེ་ལ་ཐུགས་རྗེ་ཆེ་ཞུ། ངའི་ནོར་གནག་འཚོལ་རོགས་བྱས་ནས་རྙེད་བྱུང་།”ཞེས་བྲིས་པའི་བོད་ཡིག་གི་དར་ཆ་ཞིག་འདམ་གཞུང་རྫོང་སྤྱི་བདེ་ཅུས་ཀྱི་ཉེས་དོན་ཉེན་རྟོག་རུ་ཆེན་གྱི་མི་དམངས་ཉེན་རྟོག་པའི་ལག་ཏུ་ཕུལ་ནས། འདམ་གཞུང་རྫོང་སྤྱི་བདེ་ཅུས་ཉེས་དོན་ཉེན་རྟོག་རུ་ཆེན་གྱིས་ཟླ་ཕྱེད་ཙམ་ལ་ཞིང་ཆེན་གཉིས་བརྒལ་ཏེ། ཁོའི་ནོར་གནག་ཚང་མ་ཕྱིར་རྙེད་པར་ཐུགས་རྗེ་ཆེ་ཞུས་པ་རེད།
དོན་དག་དེ་ནི་འདི་འདྲ་ཞིག་ཡིན་ཏེ།
ཟླ་7པའི་ཚེས་14ཉིན་གྱི་ཆུ་ཚོད་22ཙམ་ལ། འདམ་གཞུང་རྫོང་གནམ་མཚོ་ཤང་གནམ་མཚོ་གྲོང་ཚོའི་གྲོང་མི་སངས་ཆེ་གེ་མོས་སྤྱི་བདེ་ལས་ཁུངས་ལ་ཁོ་རང་གི་ཁྱིམ་གྱི་ནོར་གནག་18བོར་སོང་བས། སྤྱི་བདེ་ལས་ཁུངས་ཀྱིས་དོན་དག་དེར་བརྟག་དཔྱད་བྱ་རྒྱུའི་རེ་བ་ཞུས།
ཉེན་བརྡ་འབྱོར་མ་ཐག་འདམ་གཞུང་རྫོང་སྤྱི་བདེ་ཅུས་ཉེས་དོན་ཉེན་རྟོག་རུ་ཆེན་གྱིས་འཕྲལ་དུ་མི་དམངས་ཉེན་རྟོག་པ་སྒྲིག་འཛུགས་བྱས་ནས་བརྟག་དཔྱད་དཔང་ལེན་བྱས་པ་དང་། དོན་རྐྱེན་བྱུང་སར་རྩད་ཞིབ་བརྟག་དཔྱད་བྱས་ནས་བདེན་དཔང་འབོར་ཆེན་བཙལ་ནས་ཡུལ་ཕྱོགས་གཅིག་པའི་ཚེ་ཆེ་གེ་མོར་དོགས་པ་ཆེན་པོ་ཡོད་པར་གཏན་འཁེལ་བྱས་པར་མ་ཟད། ཟླ་7པའི་ཚེས་15ཉིན། འདམ་གཞུང་རྫོང་གནམ་མཚོ་ཤང་གནམ་མཚོ་གྲོང་ཚོར་དོགས་ཡོད་ཉེས་ཅན་ཚེ་ཆེ་གེ་མོ་འཛིན་བཟུང་བྱས།
བརྟག་དཔྱད་བྱས་པ་བརྒྱུད་ཤེས་རྟོགས་བྱུང་བ་ལྟར་ན། ཟླ་7པའི་ཚེས་14ཉིན། ཚེ་ཆེ་གེ་མོས་སངས་ཆེ་གེ་མོའི་ནོར་གནག་18དེ་སྒོར་ཁྲི་13བྱས་ནས་མི་གཞན་ཞིག་ལ་བཙོངས་པ་དང་། སྒོར་མོ་དེས་རང་གི་དངུལ་བུན་འཇལ་བ་རེད། དེ་རྗེས་མི་དམངས་ཉེན་རྟོག་པས་ནོར་ཉོ་མཁན་དང་འབྲེལ་གཏུག་བྱས་ནས་བརྐུས་རྫས་ཀྱི་གནས་ཚུལ་དྲིས་པ་ན། ཁོས་མི་དམངས་ཉེན་རྟོག་པར་འབྲི་གཡག་18དེ་སླར་ཡང་མི་གཞན་པ་ཞིག་ལ་བཙོངས་པ་ཡིན་ཞེས་བཤད།
ཉེས་དོན་ཉེན་རྟོག་རུ་ཆེན་གྱི་མི་དམངས་ཉེན་རྟོག་པས་ནོར་ཉོ་མཁན་སྔ་མ་དེས་མཁོ་འདོན་བྱས་པའི་ཁུངས་སྣེ་དེར་གཞིགས་ནས་ཟླ་ཕྱེད་རིང་རྩད་གཅོད་བྱས་ཤིང་། མཚོ་སྔོན་གྱི་ཉེན་རྟོག་པའི་རོགས་རམ་འོག་ནོར་གནག་18ཚང་མ་ཕྱིར་བླངས་ནས་བདག་པོར་སྤྲད།
མིག་སྔར་དོགས་ཡོད་ཉེས་ཅན་ཚེ་ཆེ་གེ་མོ་ཁྲིམས་ལྟར་ཉེས་དོན་བཀག་ཉར་བྱས་ཡོད་ལ། གྱོད་གཞི་མུ་མཐུད་ནས་ཐག་གཅོད་བྱེད་བཞིན་ཡོད་པ་རེད།
རྩོམ་སྒྲིག་པ། རིག་གྲོལ།