ལྷ་ས་ཁྲེང་ཀོན་ཆུས་ཀྱིས་མི་རིགས་མཐུན་སྒྲིལ་གྱི་ཅའོ་ཙིའི་གསོལ་སྟོན་སྐབས་དང་པོ་སྤེལ་བ།
སྤེལ་དུས 2020-09-25
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ། འབྲུག་རྒྱལ་མཁར་གྱིས་བསྒྱུར།
ཟླ་9ཚེས་22ཉིན། ལྷ་ས་གྲོང་ཁྱེར་ཁྲེང་ཀོན་ཆུས་ཀྱི་“ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། ། བློ་སེམས་གཅིག་མཐུན་ཀྲུང་གོའི་ཕུགས་འདུན་བསྐྲུན། །”ཞེས་པའི་མི་རིགས་མཐུན་སྒྲིལ་གྱི་ཅའོ་ཙིའི་གསོལ་སྟོན་བྱེད་སྒོ་སྐབས་དང་པོ་ཀྲི་ཀྲའོ་ཐོན་ལས་གླིང་དུ་སྤེལ་བ་རེད། ཐེངས་འདིའི་བྱེད་སྒོའི་དམིགས་ཡུལ་ནི་ཁྲེང་ཀོན་ཆུས་ཀྱི་མི་རིགས་ཁག་གིས་མཐུན་སྒྲིལ་རྡོག་རྩ་གཅིག་སྒྲིལ་དང་། ཕན་ཚུན་རོགས་རེས། ཁྱིམ་ཚང་གཅིག་ལྟར་གཅེས་པའི་མཛའ་བརྩེ་བཅས་སྔར་ལས་ཇེ་ཟབ་ཇེ་ལེགས་སུ་གཏོང་བའི་ཆེད་ཡིན་ལ། ཐུན་མོང་ཐོག་བོད་རང་སྐྱོང་ལྗོངས་ཀྱི་“མི་རིགས་མཐུན་སྒྲིལ་ཡར་ཐོན་གྱི་ཟླ་བ”ཐེངས་སུམ་ཅུ་པ་ལ་རྟེན་འབྲེལ་ཞུས་པ་རེད།
བྱེད་སྒོའི་ཡུལ་དངོས་སུ་ཁྲེང་ཀོན་ཆུས་སྲང་ལམ་གྱི་སྡེ་ཁུལ་ཁག་གིས་བྲོ་བ་སྣ་ཚོགས་ལྡན་པའི་ཅའོ་ཙེ་མང་པོ་བཟོས་ནས་“མི་རིགས་མཐུན་སྒྲིལ་གྱི་ཅའོ་ཙིའི་གསོལ་སྟོན”གྱི་འགྲན་བསྡུར་ལ་ཞུགས་ཤིང་། དཔྱད་འདེམས་པས་ཅོ་ཙི་སྣ་རེ་རེའི་དབྱིབས་དང་རྣམ་པ་མི་འདྲ་བའི་ཁྱད་ཆོས་ལ་གཞིགས་ནས་ཡུལ་དངོས་སུ་སྐར་མ་བརྒྱབ་པ་རེད། དེའི་ཁྲོད་བར་སྐོར་གྱི་རབ་གསལ་སྡེ་ཁུལ་གྱི་འགྲན་ཞུགས་བརྩམས་ཆོས་ནི་ཅའོ་ཙེ་56གིས་གནམ་བདེ་སྒོ་མོ་ཆེའི་མཐའ་བསྐོར་བའི་རྣམ་པ་ཡིན་ལ། དེའི་མིང་ལ་“དྲོད་ཁོལ་ལྡན་པའི་མི་རིགས་མཐུན་སྒྲིལ”ཞེས་ཟེར་ཞིང་། མཐའ་མར་བྱ་དགའ་ཨང་དང་པོ་ཐོབ་པ་རེད།
གསར་འགོད་པས་ཤེས་རྟོགས་བྱུང་བར། འགྲན་ཞུགས་རུ་ཁག་སོ་སོས་ཞིབ་ཚགས་ངང་གྲ་སྒྲིག་བྱས་པའི་ཅའོ་ཙིའི་གསོལ་སྟོན་བརྩམས་ཆོས་ལ་གསར་གཏོད་ཆེན་པོ་ལྡན་ལ། ནང་དོན་ཟབ་ཅིང་ཕྱི་ཚུལ་གསོན་ཉམས་ལྡན་པས། མི་རིགས་མཐུན་སྒྲིལ་དང་དབུལ་སྒྲོལ་འགག་སྒྲོལ། སྤྱི་ཚོགས་རིང་ལུགས་ཀྱི་སྲོག་ཤིང་གི་རིན་ཐང་ལྟ་བ་སོགས་དུས་རབས་དང་མཐུན་པའི་བརྗོད་བྱ་གཙོ་བོ་དག་གང་ལེགས་སྒོས་མཚོན་ཡོད་སྟབས། མི་རིགས་ཁག་གི་མང་ཚོགས་ཀྱི་དང་ལེན་དང་བསྔགས་བརྗོད་ཐོབ་པ་རེད། ད་ཐེངས་ཀྱི་བྱེད་སྒོ་བརྒྱུད་དེ་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་སེམས་པའི་བར་ཐག་སྔར་ལས་ཇེ་ཉེ་རུ་ཕྱིན་པ་དང་། མི་རིགས་མཐུན་སྒྲིལ་སློབ་གསོའི་གཞི་རྟེན་གསར་པ་ཞིག་བཏོད་ཅིང་། མི་རིགས་ཁག་གི་མང་ཚོགས་དབར་ཕན་ཚུན་འགྲོ་འོང་དང་། བསམ་བློ་བརྗེ་རེས། མཉམ་འདྲེས་བཅས་ཀྱི་རྣམ་པ་གསར་པ་ཞིག་བཏོད་ཡོད། “ད་ཐེངས་ཀྱི་བྱེད་སྒོར་ང་ཚོའི་སྡེ་ཁུལ་གྱི་འགྲན་ཞུགས་བརྩམས་ཆོས་ལ་བྱ་དགའ་ཨང་དང་པོ་ཐོབ་པས། སེམས་པ་ཧ་ཅང་དགའ་པོ་བྱུང་། ང་ཚོའི་སྡེ་ཁུལ་གྱིས་ཐོག་མཐའ་བར་གསུམ་དུ་ཀྲུང་དབྱང་གི་བོད་ལྗོངས་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་དགོངས་དོན་གལ་ཆེན་མཛུབ་སྟོན་དུ་འཛིན་རྒྱུ་རྒྱུན་འཁྱོངས་བྱས་ཏེ། དམངས་འཚོ་ལེགས་བཅོས་དང་མི་སེམས་གཅིག་སྒྲིལ་བྱ་རྒྱུ་དེ་བྱེ་བྲག་གི་ལས་དོན་གྱི་འགོ་འཛུགས་ས་དང་མཐར་ཐུག་གི་དོན་ལ་བབས་སར་བརྩིས་ནས། ང་ཚོའི་སྡེ་ཁུལ་གྱི་ལས་དོན་ཁག་དོན་འཁྱོལ་ཡག་པོ་བྱས་པ་ཡིན།”ཞེས་བར་སྐོར་གྱི་རབ་གསལ་སྡེ་ཁུལ་གྱི་ལས་དོན་མི་སྣ་ཁཱང་ཅུན་ཡོན་གྱིས་དེ་ལྟར་བཤད།
དཔྱད་འདེམས་མཇུག་འགྲིལ་རྗེས། མི་རིགས་ཁག་གི་གཅེན་གཅུང་མིང་སྲིང་རྣམས་མཉམ་དུ་འདུས་ནས་ཅའོ་ཙེ་བཟོ་བ་དང་། ལབ་གླེང་སྣ་ཚོགས་བྱེད་པ། ཅའོ་ཙིའི་བྲོ་བ་མྱོང་བ་སོགས་བྱས་པས། རྣམ་པ་འཁྲུག་ཆ་དོད་པོ་ཡོད། མི་ཚང་མས《ང་དང་ངའི་མེས་རྒྱལ》ཞེས་པའི་གླུ་དབྱངས་མཉམ་ལེན་བྱས་པ་དང་བསྟུན་ནས་བྱེད་སྒོ་དེའང་མཐོ་རླབས་སུ་ཕྱིན།
“ད་ཐེངས་ང་ཚོས་མི་རིགས་མཐུན་སྒྲིལ་གྱི་གསོལ་སྟོན་བསྡུས་ནས། མི་རིགས་ཁག་གིས་མཉམ་ལས་དང་མཉམ་སྡོད། ཕན་ཚུན་བློ་སེམས་མཐུན་ཞིང་། ཟ་ན་མཉམ་བཟའ་དང་སྐྱིད་ན་མཉམ་སྐྱིད་བྱས་པ་ཡིན། རྣམ་པ་འདི་དག་ལ་བརྟེན་ནས་མི་རིགས་མཐུན་སྒྲིལ་ལ་སྔར་ལས་ཤུགས་སྣོན་རྒྱག་པ་དང་། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་སྲ་བརྟན་དུ་བཏང་ནས། ཧུར་བརྩོན་སྒོས་བོད་ལྗོངས་ཀྱི་མི་རིགས་མཐུན་སྒྲིལ་གྱི་དཔེ་བཟང་ཁུལ་གཏོད་རྒྱུའི་རེ་བ་ཡོད།”ཅེས་ཁྲེང་ཀོན་ཆུས་དྲིལ་སྒྲོག་པུའུ་ཡི་ལས་བྱེད་མི་སྣ་ཝང་ཅིའུ་ལེང་གིས་དེ་ལྟར་བརྗོད་པ་རེད།