▶སྒྱུ་འཕྲུལ་དང་འདྲ་བའི་ཚན་རྩལ་འདི་དག་ཁྱེད་དང་ཐག་རིང་པོ་མིན།
སྤེལ་དུས 2019-11-11
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས
རྩོམ་པ་པོ།
ནང་འདྲེན་དངོས་མང་འགྲེམ་ཚོགས་སྐབས་གཉིས་པ་ཧྲང་ཧའེ་རུ་འཚོགས་བཞིན་ཡོད་ཅིང་། དེར་སྨི་ངོས་སྙོམས་གྲུ་བཞི་མ་ཁྲི་3ཡོད་པའི་རླངས་འཁོར་འགྲེམ་ཁུལ་དང་། སྨི་ངོས་སྙོམས་གྲུ་བཞི་མ་ཁྲི་2.7ཡོད་པའི་ཚན་རྩལ་འཚོ་བའི་འགྲེམ་ཁུལ། སྨི་ངོས་སྙོམས་གྲུ་བཞི་མ་4000ཡོད་པའི་གངས་འཁྱག་ཉམས་ལེན་ཁུལ་སོགས་ཡོད་ཅིང་དེ་དག་ངོ་མཚར་རབ་ཏུ་ཆེ། རིགས་ཆེན་པོ་ལྔ་དང་འགྲེམ་ཁུལ་བདུན་ཅན་གྱི་ཁེ་ལས་དང་ཚོང་ལས་འགྲེམ་ཁང་གིས་སྨི་ངོས་སྙོམས་གྲུ་བཞི་མ་ཁྲི་33ཟིན་ཞིང་། རྒྱལ་ཁབ་དང་ས་ཁུལ་150ཙམ་གྱི་ཁེ་ལས་3000ལྷག་ཙམ་འགྲེམ་སྟོན་དུ་ཞུགས་ཡོད།
ཚན་རྩལ་འཚོ་བའི་འགྲེམ་ཁུལ་དུ་རིག་ལྡན་ཁྱིམ་ཆས་དང་། རིག་ལྡན་ཁྱིམ་སྤྱོད་གློག་ཆས། འཚོ་བའི་གློག་ཆས། ཞབས་ཞུའི་འཕྲུལ་མི། ལུས་རྩལ་ཚན་རྩལ་སོགས་དམངས་ཀྱི་འཚོ་བ་དང་ཁ་ཐག་ཉེ་བའི་ཚན་རྩལ་ཚུད་ཡོད་ཅིང་། ཁྱེད་རང་གི་ཕུགས་བསམ་ཁྲོད་ཀྱི་ཚན་རྩལ་འཚོ་བ་དེ་སྒྱུ་འཕྲུལ་དང་འདྲ་བའི་ཚན་རྩལ་འདི་དག་གིས་མངོན་དུ་བསྒྱུར་ཐུབ་ཀྱིན་ཡོད།
ད་ལོའི་ཚན་རྩལ་འཚོ་བའི་འགྲེམ་ཁུལ་ནི་ན་ནིང་གི་ནང་འདྲེན་དངོས་མང་སྟོན་ཚོགས་ཀྱི་འཛད་སྤྱོད་གློག་རྡུལ་དང་ཁྱིམ་སྤྱོད་གློག་ཆས་འགྲེམ་ཁང་གི་རྨང་གཞིའི་ཐོག་རིམ་སྤོར་བྱས་ཏེ་བྱུང་བ་ཞིག་ཡིན་ཞིང་། དེ་ན་ནིང་དང་བསྡུར་ན་འགྲེམ་རྫས་དེ་བས་མང་ཞིང་ཆ་ཚང་བ་དང་། དེ་བས་ཁྱད་མཚར་དང་ལྡན་པ་ཞིག་ཡིན།
བརྙན་ཐུང་ལ་བལྟས་ན། གནས་ཚུལ་དེ་ལས་མང་བ་ཤེས་རྟོགས་བྱེད་ཐུབ།
ཐོག་མར་འགྲེམ་སྤེལ་བྱས་པའི་ཐོན་རྫས་མང་བ།
ལྟེབ་ཆོག་པའི་ལག་ཐོགས་ཁ་པར་ནང་འདྲེན་དངོས་མང་འགྲེམ་ཚོགས་སུ་ཞུགས་པ།
ལྷོ་ཁོ་རེ་ཡས་ཐོན་སྐྱེད་བྱས་པའི་ལྟེབ་ཆོག་པའི་ལག་ཐོགས་ཁ་པར་འདིར་ལྟེབ་རྩེག་འཆར་སྟོན་ལག་རྩལ་སྤྱད་ཡོད་ཅིང་། སྒྲིག་ཆས་གཅིག་ཏུ་ལག་ཐོགས་ཁ་པར་དང་ངོས་ལེབ་གློག་ཀླད་གཉིས་ཀ་སྤྱོད་རྒྱུ་མངོན་འགྱུར་བྱུང་ཡོད། ཐོན་རྫས་དེ་ནང་འདྲེན་དངོས་མང་འགྲེམ་ཚོགས་སྐབས་གཉིས་པའི་ཐོག་འགྲེམ་སྟོན་བྱས་རྗེས། ཟླ་11ཚེས་8ཉིན་ནས་བཟུང་རྒྱལ་ནང་དུ་འཚོང་འགོ་ཚུགས་ཡོད་ཅིང་། ཀྲུང་གོའི་འཛད་སྤྱོད་པས་ལྟེབ་རྩེག་བརྙན་ཤེལ་ལག་རྩལ་ཉམས་སུ་མྱོང་ཐུབ་པར་གྱུར་ཡོད།
འགྲེམ་རྫས་རིགས་སྣ་མང་ཞིང་འཚོ་བར་ཚན་རྩལ་གྱི་ཆ་བསྣན་པ།
ད་ལོའི་ཚན་རྩལ་འཚོ་བའི་འགྲེམ་ཁུལ་དུ་འགྲེམ་སྟོན་བྱས་པའི་ཐོན་རྫས་ཀྱི་གྲངས་འབོར་མང་ཞིང་ཐོན་རྫས་གསར་པ་མང་བ་མ་ཟད། རིགས་སྣ་ཡང་སྔར་བས་ཆ་ཚང་དུ་ཕྱིན་ཡོད། དེ་གར་ཕྱོགས་ཡོངས་ནས་རིག་ལྡན་འཚོ་བ་རོལ་ཐུབ་པའི་ཐོན་རྫས་ཡོད་ལ། འཚོ་བའི་ཕྱོགས་ཆུང་ཙག་ལ་ཚན་རྩལ་གྱི་ཆ་སྣོན་ཐུབ་པའི་ཐོན་རྫས་ཀྱང་ཡོད་པ་སྟེ། དཔེར་ན་འགྲེམ་ཁང་དུ་རྒན་གསོ་དང་བདེ་ཐང་ལ་སྨན་པའི་སྒྲིག་ཆས་ཉམས་སུ་མྱོང་ས་དང་། རིག་ལྡན་ཉལ་ཁང་དང་རིག་ལྡན་ལུས་འཁྲུད་ཁང་སོགས་ཡོད།
འགྲེམ་སྟོན་བྱས་པའི་རིག་ལྡན་འཕྲུལ་མི་མི་ཉུང་བས་ཁྱེད་ལ་ངོ་མཚར་བའི་མྱོང་ཚོར་གསར་པ་སྟེར་ཐུབ།
ན་ནིང་གི་ནང་འདྲེན་དངོས་མང་འགྲེམ་ཚོགས་ཀྱི་འཛད་སྤྱོད་གློག་རྡུལ་དང་ཁྱིམ་སྤྱོད་གློག་ཆས་ཁང་དང་བསྡུར་ན། ད་ལོའི་ཚན་རྩལ་འཚོ་བའི་འགྲེམ་ཁུལ་ནི་དེ་བས་ངོ་མཚར་ལྡན་པ་ཞིག་སྟེ། ད་ལོ་AR/VRཉམས་ལེན་ཁུལ་གསར་དུ་བཙུགས་ཡོད་པ་མ་ཟད། ད་དུང་མིས་བཟོས་རིག་ནུས་འཕྲུལ་ཆས་མང་པོ་ཞིག་འགྲེམ་སྟོན་བྱས་ཡོད་པ་དཔེར་ན། མིང་ལ་Roboyཟེར་བའི་3Dཔར་འདེབ་མི་གཟུགས་འཕྲུལ་མི་ཞིག་ཡོད་པ་དེ་དགོད་ཤེས་ཤིང་སྐད་འུར་རྒྱག་ཤེས་པ་མ་ཟད། ད་དུང་ངོ་ཚ་ཤེས་ཤིང་གཅེས་ལང་བྱེད་ཀྱང་ཤེས་པ་དང་། དེ་ནི་རྣམ་འགྱུར་མང་ཤོས་ཀྱི་འཕྲུལ་མིར་གྱུར་ཡོད།
རྩོམ་སྒྲིག་པ།སྣང་རྡོར།