བལ་ཡུལ་དུ་དྲག་ཆར་གྱིས་མི་60ཙམ་རྐྱེན་ལམ་དུ་ཤོར་བ།
སྤེལ་དུས 2019-07-16
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ།
བལ་ཡུལ་ཉེན་རྟོག་ཕྱོགས་ཀྱིས་སྤྱི་ཚེས་14ཉིན་སྤེལ་བའི་གནས་ཚུལ་ལྟར་ན། འདས་ཟིན་པའི་ཉིན་གསུམ་རིང་། རྒྱལ་ཁབ་དེར་དྲག་ཆར་བབས་པའི་རྐྱེན་གྱིས་ཉུང་མཐར་ཡང་མི་60ཙམ་རྐྱེན་ལམ་དུ་ཤོར་བ་དང་། མི་35གར་སོང་ཆ་མེད་དུ་གྱུར་ཡོད།
ཉིན་དེའི་ཕྱི་དྲོར་ཉེན་རྟོག་ཕྱོགས་ཀྱིས་ཁྱབ་བསྒྲགས་བྱས་པར་གཞིགས་ན། མིག་སྔར་བལ་ཡུལ་དུ་ཆུ་ལོག་གི་ཤུགས་རྐྱེན་ཐེབས་པའི་རྫོང་25བར་མང་དུ་ཕྱིན་ནས་ཁང་པ་ཁྲི་ལྷག་ཙམ་ཆུས་བསྣུབས་ཡོད་པ་དང་། མྱུར་སྐྱོབ་ལས་དོན་བྲེལ་འཚུབ་ངང་སྤེལ་བཞིན་ཡོད་ལ། ཆུ་ལོག་དང་འདམ་རྡོའི་ཆུ་རུད་ཀྱི་གནོད་པ་ཐེབས་པའི་མི་1100ལྷག་ཙམ་བསྐྱབས་ཡོད།
རང་བྱུང་གནོད་འཚེའི་སྐོར་ལ་ཞིབ་འཇུག་གནང་མཁན་གྱི་རིགས་གཅིག་མཁས་ཅན་ཁག་ཅིག་གི་དགོངས་ཚུལ་ལྟར་ན། ད་ལོའི་ཆར་དུས་སུ་བལ་ཡུལ་དུ་མུ་མཐུད་དུ་ཆར་པ་འབབ་པའི་ངེས་པ་ཡོད་པས་དེར་དོགས་ཟོན་བྱེད་དགོས།
སྔོན་དཔག་ལྟར་ན། འབྱུང་འགྱུར་ཉིན་ཤས་རིང་བལ་ཡུལ་དུ་མུ་མཐུད་དུ་དྲག་ཆར་འབབ་རྒྱུ་ཡིན་ཞིང་། རྒྱལ་ཡོངས་ཀྱི་སྲིད་གཞུང་གི་འབྲེལ་ཡོད་སྡེ་ཚན་ཁག་དང་། ཉེན་རྟོག་པ། དམག་དཔུང་། སྤྱི་ཚོགས་སྒྲིག་འཛུགས་སོགས་ཚང་མ་འབྲུབ་འགོག་གེགས་སེལ་ནང་ཞུགས་རྒྱུར་སྐུལ་སློང་བྱེད་བཞིན་ཡོད།
རྩོམ་སྒྲིག་པ། སངས་སྐྱབས།