ཀྲུང་གོའི་བོད་ལྗོངས་དྲ་བའི་འཕྲིན། ཟླ4པའི་ཚེས21ཉིན། འཛམ་གླིང་གི་དཔེ་ཀློག་ཉིན་མོ་ཐེངས30པ་སླེབས་ལ་ཉེ་པའི་དུས་འདིར། བོད་རང་སྐྱོང་ལྗོངས་ཏང་ཨུད་དྲིལ་བསྒྲགས་པུས་གཙོ་གཉེར་བྱས་པའི2025ལོའི“རིག་དཔལ་དར་བའི་བོད་ལྗོངས”ཀྱི་དམངས་ཡོངས་དཔེ་ཀློག་དང་། ལྷོ་ཁ་གྲོང་ཁྱེར་གྱི“དུས་རབས་གསར་པར་ལྟ་ཀློག་དང་། རྒྱང་སྐྱོད་ལམ་བུ་གསར་པར་བསྐྱོད”ཅེས་པའི་བྱེད་སྒོ་རབ་དང་རིམ་པ་སྤེལ་འགོ་ཚུགས་པའི་མཛད་སྒོ་ལྷོ་ཁ་གྲོང་ཁྱེར་དུ་འཚོགས།
བྱ་དགའ་སྤྲོད་པའི་མཛད་སྒོ་འཚོག་ཡུལ།
འགོ་ཚུགས་མཛད་སྒོའི་ཐོག་ཏུ། 2025ལོའི་བོད་ལྗོངས་ཀྱི“རིག་དཔལ་དར་བའི་ཚན་པ”དང“ཞིང(འབྲོག)ཁྱིམ་གྱི་དཔེ་ཁང་མཛེས་ཤོས”ཀྱི་བྱ་དགའ་ཐོབ་པའི་འཐུས་མིར་བྱང་བུ་སྤྲད་ཅིང་། རྒྱལ་ཁབ་དཔེ་སྐྲུན་ཐེབས་རྩ་ལྷན་ཚོགས་དང་། ཐའོ་ཧྥིན་ཐེབས་རྩ་ལྷན་ཚོགས། ཧྲང་ཧའེ་དབྱིང་ཅའོ་དྲ་རྒྱའི་ཚན་རྩལ་ཀུང་སི། དུས་རབས21པའི་དཔེ་སྐྲུན་ཁང་ཚོགས་པ། པེ་ཅིང་ཀྲུང་ཧྲུའུ་མཉམ་འགུལ་རོལ་རྩེད་དྲ་རྒྱའི་ཚན་རྩལ་ཚད་ཡོད་ཀུང་སི། ཧུའུ་ནན་ཞིང་ཆེན་ཤིན་ཧྭ་དཔེ་ཚོང་ཁང་བཅས་ཀྱིས་ཁྱོན་རིན་ཐང་སྒོར་ཁྲི250ཟིན་པའི་ཕུལ་བྱུང་དཔེ་སྐྲུན་དངོས་པོ་ཞལ་འདེབས་བརྒྱབ།
“ཞིང(འབྲོག)ཁྱིམ་གྱི་དཔེ་ཁང་མཛེས་ཤོས”ཀྱི་བྱ་དགའ་ཐོབ་པའི་འཐུས་མི་དང་། ཉིང་ཁྲི་གྲོང་ཁྱེར་སྨན་གླིང་གྲོང་ཁྱེར་ཆབ་ནག་ཞང་ཤེལ་དཀར་མོན་པ་གྲོང་ཚོའི་བཅའ་སྡོད་ལས་དོན་རུ་ཁག་གི་རུ་དཔོན་གཞོན་པ་ཏུང་ཧུང་ཧྲུའོ་ཡིས། ཉེ་བའི་ལོ་ཤས་རིང་ལ། ང་ཚོས“ཚོགས་རིགས་དབྱེ་བ་དང་ལྗོངས་རྣམ་ཅན་ཟུང་དུ་འབྲེལ་བའི”ཞབས་འདེགས་ཞུ་སྟངས་གསར་གཏོད་བྱས་ནས། གཞི་རིམ་གྱི་དྲིལ་བསྒྲགས་པ་སྒྲིག་འཛུགས་བྱས་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་དང་། དམངས་ཕན་སྲིད་ཇུས་གསལ་འགྲེལ་བྱེད་པ་དང་། ཟླ་རེར་བརྗོད་དོན་གཙོ་བོའི་ཏང་གི་ཉིན་མོའི་དཔེ་ཀློག་མཉམ་སྤྱོད་འདུ་ཚོགས་གཉེར་བར་མ་ཟད། ད་དུང་མོན་པ་རིགས་ཀྱི་རྒན་པ་དག་གདན་དྲངས་ཏེ། ལོ་རྒྱུས་བཤད་པ་དང་མངོན་མིན་རིག་གནས་ཤུལ་བཞག་གི་ལག་རྩལ་ངོམ་སྟོན་བྱས་ཡོད། ད་ཆ། དཔེ་ཀློག་ས་ཚིགས་ཞིང་གྲོང་དུ་རྒྱ་བསྐྱེད་དེ། དུས་དང་རྣམ་པ་ཀུན་ཏུ་ལྟ་ཀློག་ཐུབ་པར་བྱས་ཡོད་ཅེས་བཤད།
དཔེ་དེབ་ཞལ་འདེབས་རྒྱག་བཞིན་པ།
“ཞིང(འབྲོག)ཁྱིམ་གྱི་དཔེ་ཁང་མཛེས་ཤོས”ཀྱི་བྱ་དགའ་ཐོབ་པའི་འཐུས་མི་དང་། འཕྱོངས་རྒྱས་རྫོང་ལྷ་ཡུལ་ཞང་སྡེ་ཆེན་གྲོང་ཚོར་བཅའ་སྡོད་ལས་དོན་རུ་ཁག་གི་རུ་དཔོན་ཕུན་ཚོགས་དགྲ་འདུལ་གྱིས། གཟི་བརྗིད་མཚན་སྙན་དེ་ཐོབ་པ་ནི་ང་ཚོས་གྲོང་གསེབ་ཀྱི་རིག་གནས་གཏིང་ཟབ་བཏོད་པར་ཁས་ལེན་བྱས་པ་ཞིག་ཡིན་པས། ང་ཚོས་ཞབས་ཞུའི་ནུས་པ་མུ་མཐུད་ཆེ་རུ་བཏང་ནས། དེ་བས་མཐོ་བའི་ཚད་གཞི་དང་། དེ་བས་ཕུན་སུམ་ཚོགས་པའི་བྱེད་སྒོ། དེ་བས་སྤུས་ལེགས་ཀྱི་ཞབས་ཞུ་བཅས་ལ་བརྟེན་ཏེ་རིག་གནས་ཀྱི་གཡུལ་སའི་ནུས་པ་མུ་མཐུད་འདོན་སྤེལ་གྱིས་རིག་དཔལ་གྲོང་གསེབ་ཡོངས་སུ་ཁྱབ་པར་བྱ་རྒྱུ་ཡིན་ཞེས་བཤད།
གྲོང་མི་ཚོས་ཡིག་རིས་འགྲེམས་སྟོན་ལ་ལྟ་བཞིན་པ།
བྱེད་སྒོའི་ཡུལ་དངོས་སུ་ད་དུང་བརྗོད་དོན་གཙོ་བོའི་ཕུལ་བྱུང་དཔེ་སྐྲུན་དངོས་པོ་དང་། ཡིག་རིས་པར་ལེན་བརྩམས་ཆོས། རྫོང(ཆུས་དང་གྲོང་ཁྱེར)ཁག་གི་ཁྱད་ལྡན་ཐོན་རྫས་འགྲེམས་ཁུལ་སོགས་བཙུགས་ཡོད་པས། ལྟད་མོ་བ་ཚོས་ངོ་མཚར་ཆེ་བའི་ལེ་ཚན་མྱོང་རོལ་བྱེད་པ་དང་ཆབས་ཅིག ལྟ་ཀློག་བྱེད་སྒོར་དངོས་སུ་ཞུགས་ནས། ལྟ་ཀློག་གི་མཚར་སྡུག་དང་སྤྲོ་སྣང་ལོངས་སུ་སྤྱོད་ཐུབ།
རྩོམ་སྒྲིག་པ། མང་ག་མཚོ།
