ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་ནི་རང་རྒྱལ་གྱིས“ལོ་ལྔ་ཚན་བཅུ་བཞི་པའི”དམིགས་ཚད་དང་ལས་འགན་གཙོ་བོ་རྒྱལ་ཁའི་ངང་ལེགས་གྲུབ་བྱེད་གྲབས་ཡོད་པ་དང་། སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཆ་ནས་མངོན་འགྱུར་བྱེད་པའི་རྨང་གཞི་སྲ་བརྟན་དུ་གཏོང་བ་དང་ཕྱོགས་ཡོངས་ནས་ཤུགས་རྒྱག་པའི་འགག་རྩའི་དུས་སྐབས་སུ་འཚོགས་པའི་ཚོགས་འདུ་གལ་ཆེན་ཞིག་རེད། ཉིན་ཤས་བསྟུད་མར། རང་ལྗོངས་ཀྱི་རིམ་པ་ཁག་དང་སྡེ་ཚན་ཁག་གིས་གཅིག་རྗེས་གཉིས་མཐུད་དུ་ཆེད་དོན་སློབ་སྦྱོང་ཚོགས་འདུ་སྒྲིག་འཛུགས་བྱས་ཏེ། ཚད་མཐོའི་ཆབ་སྲིད་ཀྱི་རང་རྟོགས་དང་བྱ་སྤྱོད་ཀྱི་རང་རྟོགས་ལ་བརྟེན་ནས་ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་བྱེད་པའི་ཚ་རླབས་གང་མགྱོགས་འཕྱུར་ཏེ་དུས་རབས་གསར་པར་དཔའ་མཛངས་རྟུལ་ཕོད་ཀྱིས་མདུན་དུ་སྐྱོད་པའི་སྟོབས་ཤུགས་ཆེན་པོ་གཅིག་ཏུ་སྒྲིལ་ཡོད།
ལྗོངས་སྤྱི་ཁྱབ་བཟོ་ཚོགས་ཏང་ཙུའུ་ཡིས་ཆེད་དོན་ཚོགས་འདུ་འཚོགས་ནས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་གཅིག་སྡུད་སློབ་སྦྱོང་བྱས་ནས་ལག་བསྟར་དོན་འཁྱོལ་གྱི་ལས་ཀའི་བྱེད་ཐབས་ལ་ཞིབ་འཇུག་བྱས་ཤིང་། ཚོགས་ཞུགས་མི་སྣས། ལས་བཟོའི་དྲ་ཐོག་དང་དྲ་ཕྱིའི་སློབ་ཚན་སོགས་ཀྱི་གཞི་རྟེན་བེད་སྤྱོད་ཡག་པོ་བྱས་ཏེ། ལས་བཟོ་མང་ཚོགས་ཀྱིས་གོ་ཐུབ་པའི་སྐད་ཆའི་ཐོག་ནས་ཚང་འཛོམས་གྲོས་ཚོགས་ཀྱི་དགོངས་དོན་གསལ་པོ་ཤོད་པ་དང་གསལ་པོ་ཤེས་པར་བྱེད་པ། ཟབ་སྦྱོང་མཐིལ་རྟོགས་བྱེད་པ། ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་ལག་བསྟར་དང་བཟོ་ཚོགས་ལས་དོན་ལ་སྐུལ་འདེད་གཏོང་བའི་འབྲེལ་མཐུད་བྱེད་ས་དང་འཇུག་གཞི་ཡང་དག་འཚོལ་བ། “འཛུགས་གཏོད་བཞིར”ཞབས་འདེགས་ཞུ་རིང་བཟོ་ཚོགས་ཀྱི་འགན་སེམས་མངོན་པ། ངལ་རྩོལ་དང་རྩལ་ནུས་འགྲན་བསྡུར་རྒྱ་ཁྱབ་བྱེད་པ། ཐོན་ལས་བཟོ་པའི་དཔུང་ཁག་འཛུགས་སྐྱོང་དང་སྒྱུར་བཅོས་གཏིང་ཟབ་ཏུ་གཏོང་བ། མི་རིགས་མཐུན་སྒྲིལ་ཡར་ཐོན་འཛུགས་གཏོད་གཏིང་ཟབ་ཏུ་གཏོང་བ། ཀྲུང་དབྱང་གི་གཏན་འབེབས་དོན་ཚན་བརྒྱད་དང་དེའི་ལག་བསྟར་ཞིབ་སྲོལ་གྱི་དགོངས་དོན་དོན་འཁྱོལ་ནན་པོ་བཅས་བྱེད་ཀྱི་ཡིན་ཞེས་མགྲིན་གཅིག་ཏུ་བརྗོད།
ལྷ་ས་གྲོང་ཁྱེར་ཁྲེང་ཀོན་ཆུས་འདམ་ར་སྡེ་ཁུལ་གྱིས་ཀྲེ་ཅང་སློབ་ཆེན་མར་ཁེ་སི་རིང་ལུགས་སློབ་གླིང་གི་འབུམ་རམས་པའི་སློབ་དཔོན་དང་ཀྲུང་གུང་ཏང་གི་ལོ་རྒྱུས་ཏང་འཛུགས་སྐྱོང་ཞིབ་འཇུག་སུའོ་ཡི་སུའོ་ཀྲང་ཏོན་ཀྲི་ཝུན་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སྒྲོག་འགྲེལ་བྱེད་པར་གདན་དྲངས་བ་རེད། སྒྲོག་འགྲེལ་ཚོགས་འདུའི་ཐོག ཏོན་ཀྲི་ཝུན་གྱིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དོན་སྙིང་གལ་ཆེན་དང་། ལྟེ་བའི་ནང་དོན། དགོངས་དོན་གྱི་ངོ་བོ་བཅས་ལ་དམིགས་ནས་གོ་རིམ་ལྡན་པའི་ངང་འཆད་འགྲེལ་དང་གསལ་འགྲེལ་གཏིང་ཟབ་བསྐྱོན་གནང་བ་རེད། སྒྲོག་འགྲེལ་མཇུག་འགྲིལ་རྗེས། འདམ་ར་སྡེ་ཁུལ་གྱི་ལས་དོན་པ་བསོད་ནམས་སྒྲོལ་མས“ད་ཐེངས་ཀྱི་སྒྲོག་འགྲེལ་ལས་ངས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་ལ་ཕྱོགས་ཡོངས་ནས་ངོས་འཛིན་དང་ཤེས་རྟོགས་དེ་བས་གཏིང་ཟབ་ཐུབ་བྱུང་། ངས་ཚང་འཛོམས་གྲོས་ཚོགས་ཀྱི་དགོངས་དོན་ནན་ཏན་གྱིས་སློབ་སྦྱོང་དང་ལག་བསྟར་བྱས་ནས་བསམ་བློའི་ངོས་འཛིན་ཟབ་ཏུ་གཏོང་བ་དང་། རང་རྟོགས་ངང་སློབ་སྦྱོང་གི་གྲུབ་འབྲས་དེ་གཞི་རིམ་སྤྱི་ཚོགས་བཅོས་སྐྱོང་གི་གསར་གཏོད་ལ་སྐུལ་འདེད་གཏོང་བ་དང་། སྡེ་ཁུལ་གྱི་ཞབས་ཞུ་ལེགས་སུ་གཏོང་བ། དམངས་འཚོ་འགན་སྲུང་དང་ལེགས་སུ་གཏོང་བ་བཅས་ཀྱི་དངོས་ཡོད་ནུས་པ་དང་ཕན་འབྲས་ལ་ཏན་ཏིག་བསྒྱུར་བར་བྱེད་ཀྱི་ཡིན”ཞེས་བརྗོད།
ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་འཚོགས་རྗེས། ནག་ཆུ་གྲོང་ཁྱེར་གྱི་ལས་བྲལ་དང་རྒན་ཡོལ་ཞུ་མཁན་ཁྱབ་ཁོངས་སུ་དང་ལེན་མྱུར་པོ་དང་གོ་རིམ་ལྡན་པའི་བཀོད་སྒྲིག་བྱས་ཏེ། ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་བྱེད་པའི་ཚ་རླབས་ཕྱོགས་ཡོངས་ནས་འཕྱུར་ཡོད། གྲོང་ཨུད་རྩ་འཛུགས་པུའུ་ཡི་སྐུལ་ཁྲིད་འོག གྲོང་ཁྱེར་ཡོངས་ཀྱི་ལས་བྲལ་དང་རྒན་ཡོལ་ཞུས་པའི་ལས་བྱེད་པའི་ཏང་རྩ་འཛུགས་51གིས་ལས་བྱེད་པ་རྒན་གྲས་བྱེད་སྒོའི་ལྟེ་གནས་དང་གཞི་རིམ་གྱི་ལས་བྲལ་དང་རྒན་ཡོལ་ཞུས་པའི་ལས་བྱེད་པའི་ཏང་ཀྲི་པུའུ་སོགས་གཡུལ་ས་གཙོ་བོར་བརྟེན་ནས། ཇི་མ་ཇི་བཞིན་སློབ་སྦྱོང་དང་། རྣམ་པ་ཕུན་སུམ་ཚོགས་པོའི་སྒོ་ནས་སློབ་སྦྱོང་། ཤེས་སྦྱོར་གཅིག་མཐུན་གྱི་སྒོ་ནས་སློབ་སྦྱོང་བཅས་བྱེད་རྒྱུ་རྒྱུན་འཁྱོངས་བྱས་ཏེ། བློ་མཐུན་རྒན་གྲས་ཀྱིས་སློབ་སྦྱོང་བྱེད་པའི“ཁྱབ་ཁོངས་དྲ་བ”ཆགས་པར་བྱེད་པ་དང་། “གཅིག་སྡུད་དང་མི་སྒེར”ཟུང་འབྲེལ་དང“དྲ་ཐོག་དང་དྲ་ཕྱི”ཟུང་འབྲེལ་བྱེད་སྟངས་བརྒྱུད། གྲོང་ཁྱེར་ཡོངས་ཀྱི་ལས་བྲལ་དང་རྒན་ཡོལ་ཞུ་མཁན་ཁྱབ་ཁོངས་སུ་གཅིག་སྡུད་སློབ་སྦྱོང་ཐེངས་80ལྷག་ཙམ་བྱས་པ་དང་། མི་ཐེངས་3200ལྷག་ཙམ་ལ་ཁྱབ་པ། སློབ་སྦྱོང་གི་ནང་དོན་200ལྷག་ཙམ་ཁྱབ་གདལ་བཏང་བ་བཅས་བྱས་ཏེ་ཁྱོན་ཡོངས་ལ་ཁྱབ་པ་དང་སྟབས་བདེ་ནུས་ཆེའི་སློབ་སྦྱོང་གི་རྣམ་པ་ཞིག་ཆགས་པར་བྱས་ཡོད།
ལྷོ་ཁ་གྲོང་ཨུད་རྩ་འཛུགས་པུའི་རྒྱུན་ལས་པུའུ་ཀྲང་གཞོན་པ་ཚའོ་ཙུའུ་ཡུས་ཀྱིས། “ང་ཚོས་ཐོག་མཐའ་བར་གསུམ་དུ‘རྒྱལ་ཁབ་ཀྱི་དོན་ཆེན’དང་ཏང་གི་ཇུས་ཆེན་སེམས་ལ་འཆང་བཞིན་ཐོག་མཐའ་བར་གསུམ་དུ་ལྟེ་བར་དམིགས་པ་དང་། སྤྱི་ཡོངས་ལ་ཞབས་འདེགས་ཞུ་བ། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་ལག་བསྟར་ཡག་པོ་བྱེད་པ། ཏང་གི་བྱ་གཞག་ལ་སྐུལ་འདེད་གཏོང་བ་དང་ཏང་གི་ལྟེ་བའི་ལས་འགན་ལེགས་འགྲུབ་བྱེད་རིང་འགན་ནུས་འདོན་སྤེལ་གང་ལེགས་བྱེད་པ། ནུས་ཤུགས་ཡོད་རྒུས་རིགས་པའི་གཞུང་ལུགས་ཀྱིས་དྲག་ཆས་སྤྲོས་པ་དང་། བཟང་འདེམས་འཇོན་བསྐོ། རྩ་སྲ་རྨང་བརྟན། ཤེས་ལྡན་པ་སྐྱོང་བ་དང་བློ་འགུག་སོགས་ཀྱི་ལས་དོན་ལ་དམ་འཛིན་ཡག་པོ་བྱེད་པ། རྩ་འཛུགས་ཀྱི་སྟོབས་ཤུགས་དང་རྩ་འཛུགས་ཀྱི་ལེགས་ཆ་འཕེལ་རྒྱས་ཀྱི་སྒུལ་ཤུགས་དང་ལེགས་ཆར་འགྱུར་བ་བཅས་བྱས་ནས། ཀྲུང་གོའི་ལུགས་ཀྱི་དེང་རབས་ཅན་གྱི་ལྷོ་ཁའི་ལེའུ་རྩོམ་ཆེད་ལེགས་སྐྱེས་དེ་བས་ཆེ་བ་འབུལ་གྱི་ཡིན་ཞེས་བརྗོད།
གུང་གཞོན་སྡེ་ཚོགས་ཉིང་ཁྲི་གྲོང་ཨུད་ཀྱིས་ཆེད་དོན་སློབ་སྦྱོང་ཚོགས་འདུ་འཚོགས་ནས་ཚང་འཛོམས་གྲོས་ཚོགས་ཀྱི་དགོངས་དོན་གསལ་འགྲེལ་གཏིང་ཟབ་བྱས་ཤིང་། གུང་གཞོན་སྡེ་ཚོགས་ཉིང་ཁྲི་གྲོང་ཨུད་ཀྱི་ཧྲུའུ་ཅི་གཞོན་པ་པ་སངས་ཚེ་རིང་གིས“ང་ཚོས་ཚང་འཛོམས་གྲོས་ཚོགས་ཀྱི་དགོངས་དོན་མཛུབ་ཁྲིད་དུ་བྱས་ཏེ། ཉིང་ཁྲི་གྲོང་ཁྱེར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་སྒྱུར་བཅོས་སྒོ་དབྱེར་སྐུལ་འདེད་གཏོང་བའི་སྔོན་སྤེལ་འཐབ་ས་གཙོ་བོར་ལང་ཚོའི་རིན་ཐང་མངོན་པར་བྱས་ཏེ། སློབ་སྦྱོང་གི་གྲུབ་འབྲས་དེ་གཞོན་ནུ་འཚར་ལོངས་ལ་ཞབས་འདེགས་ཞུ་བ་དང་ས་གནས་འཕེལ་རྒྱས་ལ་རམ་འདེགས་བྱེད་པའི་བྱ་སྤྱོད་དངོས་ལ་འགྱུར་བ་བྱེད་ཀྱི་ཡིན”ཞེས་བརྗོད།
