རྒྱལ་ཡོངས་སྲིད་གྲོས་ཀྱི་རྒྱུན་ཨུ་དང་། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱི་ཚོགས་གཙོ་བཅས་ཡིན་པའི་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོས་བོད་ལྗོངས་སུ་འགན་སྒྲུབ་ཕྱག་ལས་དང་། བརྟག་ཞིབ། ཆོས་ཕྱོགས་ཀྱི་མཛད་སྒོ་བཅས་ཕུན་སུམ་ཚོགས་པོའི་ངང་སྤེལ་གྲུབ་ཡོད། པཎ་ཆེན་རིན་པོ་ཆེས་ལྷ་ས་དང་། ཆབ་མདོ། ནག་ཆུ་བཅས་ས་ཁུལ་གསུམ་དུ་མཛད་སྒོ་ཁག་ཕུན་སུམ་ཚོགས་པོའི་ངང་སྤེལ་ཟིན་རྗེས་གཞིས་རྩེར་ཕེབས་པ་རེད། གཞིས་རྩེར་བཞུགས་རིང་། པཎ་ཆེན་རིན་པོ་ཆེས་སྔ་རྗེས་སུ་གམ་པ་རྫོང་དང་། དིང་རི་རྫོང་། པ་སྣམ་རྫོང་། བཞད་མཐོང་སྨོན་རྫོང་། རྣམ་གླིང་རྫོང་། བསམ་གྲུབ་རྩེ་ཆུས་སོགས་སུ་བརྟག་ཞིབ་གནང་བ་དང་ཆོས་ཕྱོགས་ཀྱི་མཛད་སྒོ་བསྐྱངས་པ་རེད།
པཎ་ཆེན་རིན་པོ་ཆེས་དིང་རི་རྫོང་ཟིང་དཀར་གྲོང་ཚོའི་གྲོང་མི་བཀྲ་ཤིས་ནོར་བུའི་ཁྱིམ་དུ་གེགས་རྗེས་བསྐྱར་སྐྲུན་གྱི་གནས་ཚུལ་མཁྱེན་རྟོགས་གནང་བཞིན་པ།
པཎ་ཆེན་རིན་པོ་ཆེས་དིང་རི་རྫོང་གྲམ་མཚོ་ཞང་ཟིང་དཀར་གྲོང་ཚོ་དང་ཆུ་ལྷོ་ཞང་མཚོ་སྔ་གྲོང་ཚོར་ཕེབས་ནས་གེགས་རྗེས་བསྐྱར་སྐྲུན་དང་། གྲོང་གསེབ་དར་རྒྱས། མང་ཚོགས་ཀྱི་ཐོན་སྐྱེད་དང་འཚོ་བ་བཅས་ཀྱི་གནས་ཚུལ་མཁྱེན་རྟོགས་གནང་བ་རེད།
པཎ་ཆེན་རིན་པོ་ཆེས་བསམ་གྲུབ་རྩེ་ཆུས་ཕྱུག་པོ་གཞུང་ཞང་རྐང་བཞི་གྲོང་ཚོར་ཕེབས་ནས། ཚང་མར་གྲོང་གསེབ་དར་རྒྱས་གཏོང་བའི་ནང་ཧུར་ཐག་ཞུགས་ནས་ཞིང་ལས་གྲོང་གསེབ་དེང་རབས་ཅན་དུ་གང་མགྱོགས་འགྱུར་བར་ལེགས་སྐྱེས་འབུལ་དགོས་པའི་ལྕག་སྐུལ་གནང་བ་རེད།
པཎ་ཆེན་རིན་པོ་ཆེས་ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱི་བསྟན་དོན་དང་འདུལ་ཁྲིམས་དགོངས་འགྲེལ་གྱི་སྤེལ་རེས་ཚོགས་འདུ་སྐབས་བཅུ་པ་འཚོག་བཞིན་པ།
ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱི་བོད་བརྒྱུད་ནང་བསྟན་གྱི་བསྟན་དོན་དང་འདུལ་ཁྲིམས་དགོངས་འགྲེལ་གྱི་སྤེལ་རེས་ཚོགས་འདུ་སྐབས་བཅུ་པ་གཙོ་སྐྱོང་གནང་སྐབས། པཎ་ཆེན་རིན་པོ་ཆེས་ནན་བཤད་གནང་དོན། བློ་བརྟན་འགྱུར་མེད་ངང་ཀྲུང་གོ་གུང་ཁྲན་ཏང་གི་འགོ་ཁྲིད་ལ་བརྩི་སྲུང་དང་རྒྱལ་གཅེས་ཆོས་གཅེས་ཀྱི་གཟི་བརྗིད་ལྡན་པའི་སྲོལ་རྒྱུན་རྒྱུན་འཛིན་བྱས་ནས་བོད་བརྒྱུད་ནང་བསྟན་སྐྱོན་བྲལ་ངང་རྒྱུན་འཛིན་ཐུབ་པར་སྐུལ་འདེད་གཏོང་དགོས། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་ཁྲིད་སྟོན་དུ་བྱ་རྒྱུ་མཐའ་འཁྱོངས་ཀྱིས་བོད་བརྒྱུད་ནང་བསྟན་ཀྲུང་གོ་ཅན་ལ་བརྒྱུད་རིམ་ལྡན་པའི་སྒོ་ནས་སྐུལ་འདེད་གཏོང་དགོས། བོད་བརྒྱུད་ནང་བསྟན་གྱི་རང་ངོས་འཛུགས་སྐྱོང་ལ་ཤུགས་སྣོན་རྒྱུན་མཐུད་རྒྱག་པ་དང་། ཆོས་ལུགས་ནན་སྐྱོང་ལ་ཕྱོགས་ཡོངས་ནས་སྐུལ་འདེད་གཏོང་བ། “འདུ་ཤེས་གསུམ”གྱི་སློབ་གསོ་གཏིང་ཟབ་སྤེལ་བ་བཅས་བྱས་ནས། བོད་ལྗོངས་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་ཐུན་མོང་གི་ངོས་འཛིན་གཅིག་སྡུད་དང་སྟོབས་ཤུགས་གཅིག་སྒྲིལ་བྱེད་དགོས།
པཎ་ཆེན་རིན་པོ་ཆེས་ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱི་ལས་འཛིན་ལྷན་ཚོགས་སྐབས་བཅུ་གཉིས་པའི་ཚོགས་གཙོའི་ཚོགས་འདུ་ཐེངས་བཞི་པ་འཚོག་བཞིན་པ།
ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱི་ལས་འཛིན་ལྷན་ཚོགས་སྐབས་བཅུ་གཉིས་པའི་ཚོགས་གཙོའི་ཚོགས་འདུ་ཐེངས4པའི་ཐོག པཎ་ཆེན་རིན་པོ་ཆེས་ནན་བཤད་གནང་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལྗོངས་སུ་གཟིགས་ཞིབ་གནང་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱས་ཏེ་རྩ་འཛུགས་ཀྱི་འགོ་ཁྲིད་ལ་ཤུགས་སྣོན་ཏན་ཏིག་རྒྱག་པ་དང་། གཙོ་གནད་ལས་འགན་དོན་འཁྱོལ་ནན་པོ་བྱེད་པ། 2026ལོའི་ལས་དོན་ཕྱོགས་ཡོངས་ནས་ཡག་པོ་སྒྲུབ་པ་བཅས་བྱས་ཏེ། སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པར་སྟོབས་ཤུགས་ལེགས་སྐྱེས་འབུལ་དགོས།
པཎ་ཆེན་རིན་པོ་ཆེས་གཞིས་རྩེ་ཇོ་མོ་གླང་མའི་དེང་རབས་ཞིང་ལས་ཚན་རྩལ་གསར་གཏོད་འགྲེམས་ཁང་དུ་བརྟག་ཞིབ་གནང་བཞིན་པ།
གཞིས་རྩེར་བཞུགས་རིང་། པཎ་ཆེན་རིན་པོ་ཆེས་ད་དུང་གམ་པ་རྫོང་གི་མཆོད་རྟེན་ཉི་མ་དགོན་དང་། པ་སྣམ་རྫོང་གི་འོག་མིན་ཆོས་སྡེ་དགོན་དང་བྲག་སྐྱེད་པད་དཀར་རི་ཁྲོད། བཞད་མཐོང་སྨོན་རྫོང་གི་རྟ་ནག་ཐུབ་བསྟན་དགོན། རྣམ་གླིང་རྫོང་གི་མི་ཤངས་རི་ཁྲོད་བཅས་སུ་ཆོས་ཕྱོགས་ཀྱི་མཛད་སྒོ་བསྐྱངས་པ་རེད། དགོན་སྡེ་ཁག་ཚང་མས་ཆོས་ལུགས་ཀྱི་གུས་སྲོལ་མཐོ་ཤོས་ཀྱི་ཐོག་ནས་པཎ་ཆེན་རིན་པོ་ཆེ་གདན་འདྲེན་ཞུས་པ་རེད། པཎ་ཆེན་རིན་པོ་ཆེས་དགེ་འདུན་པ་ཡོངས་ཀྱི་སྣེ་ཁྲིད་ནས་ཞལ་འདོན་དང་གནས་གཟིགས་གནང་སྟེ། ཆར་ཆུ་དུས་སུ་འབབ་པ་དང་ལོ་ཕྱུགས་རྟག་ཏུ་ལེགས་པ་དང་རྒྱལ་ཁབ་དར་ཞིང་དམངས་རྣམས་བདེ་ལ་འཁོད་པའི་གསོལ་བ་སྨོན་ལམ་བཏབ་གནང་བ་རེད།
པཎ་ཆེན་རིན་པོ་ཆེས་པ་སྣམ་རྫོང་བྲག་སྐྱེད་པད་དཀར་རི་ཁྲོད་དུ་ཞལ་འདོན་གནང་བ།
