རྒྱལ་ཡོངས་སྲིད་གྲོས་ཀྱི་ཨུ་ཡོན་ཝང་ཡུང་ཧྥུང་གིས་གསུངས་དོན།

རྒྱལ་ཡོངས་སྲིད་གྲོས་ཀྱི་ཨུ་ཡོན་ཝང་ཡུང་ཧྥུང་གིས་སྨྱན་སྦྱོར་གྱི་བཅར་འདྲི་དང་ལེན་བྱེད་བཞིན་པ། 

           ཟླ3པའི་ཚེས4ཉིན། རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་བཞི་པའི“ཨུ་ཡོན་གྱི་བགྲོད་ལམ”གྱི་མཉམ་སྡེབ་བཅར་འདྲིའི་བྱེད་སྒོ་ཐོག་མ་དེ་མི་དམངས་ཚོགས་ཁང་ཆེན་མོར་སྤེལ་བ་རེད། རྒྱལ་ཡོངས་སྲིད་གྲོས་ཀྱི་ཨུ་ཡོན་དང་། ཀྲུང་གོ་རི་འཛེག་མཐུན་ཚོགས་ཀྱི་ཀྲུའུ་ཞི་གཞོན་པ་ཝང་ཡུང་ཧྥུང་གིས་རི་འཛེག་སྙིང་སྟོབས་དང་དེ་བཞིན་ཇི་ལྟར་བྱས་ནས་སྙིང་སྟོབས་དེ་རིགས་ལ་བརྟེན་ནས་མི་དེ་བས་མང་བ་རང་སོ་སོའི་ཁྱབ་ཁོངས་སུ་དཔའ་ངར་ཆེན་པོས་མདུན་སྐྱོད་བྱ་རྒྱུར་སྐུལ་མ་གཏོང་རྒྱུའི་སྐོར་གཏམ་གླེང་གནང་བ་རེད། 

       རི་འཛེག་ཁྱབ་ཁོངས་སུ་ལོ40ལྷག་ཙམ་གཉེར་ནས་རི་འཛེག་སྙིང་སྟོབས་དར་སྤེལ་དང་ཀྲུང་གོའི་རི་འཛེག་བྱ་གཞག་འཕེལ་རྒྱས་འགྲོ་ཚུལ་དངོས་སུ་བརྒྱུད་མྱོང་བ་དང་དཔང་པོ་ཡང་བྱེད་མྱོང་བའི་ཝང་ཡུང་ཧྥུང་ལ་རི་འཛེག་གི་སྙིང་སྟོབས་བརྗེད་པར་དཀའ་བ་ཞིག་ཡོད་པ་ནི། 1993ལོར་མཚོ་འགག་ངོགས་གཉིས་ཀྱི་ཇོ་རིའི་མཉམ་འབྲེལ་རི་འཛེག་རུ་ཁག་ཇོ་མོ་གླང་མའི་དབུ་རྩེར་འཛེགས་རྗེས་གསོ་རླུང་ཧ་ཅང་དཀོན་པའི་དབང་གིས་མིག་གཡས་པ་ལོང་བར་གྱུར་ནས་ཆུ་ཚོད28རིང་ལམ་ནོར་ཐེབས་པར་གྱུར། ས་བབ་མཐོ་བའི་རི་འཛེག་ལམ་ནོར་ཐེབས་ནས་ཆུ་ཚོད24ལྷག་ཙམ་ཕྱིན་པ་དེ་ཐོག་ནས་གསོན་པའི་རེ་བ་བྲལ་བ་མཚོན་གྱི་ཡོད། རྗེས་སུ་ཁོང་གིས་དཔུང་ཁག་གཞན་གྱིས་དོར་བའི་སྒར་ས་ནས་ལྷག་ལུས་ཀྱི་དབྱང་རླུང་ཤེལ་དམ་འགའ་རྙེད་ནས་མཐར་ཨམ་གཙིགས་བསྡམས་ནས་གཅིག་པུར་སྒར་སར་ཕྱིར་ལོག་པ་རེད། 

ཇོ་མོ་གླང་མའི་དབུ་རྩེར་འཛེགས་པའི་རི་འཛེག་དཔའ་བོ་གསུམ། གཡས་ནས་ཝང་ཧྥུ་ཀྲོའུ་དང་། མགོན་པོ། ཆུས་དབྱིན་ཧྭ། 

ཀྲུང་གོའི་རི་འཛེག་རུ་ཁག་གི་རུ་མི་མཐོ་ཚད་ལ་རྒྱ་མཚོའི་ངོས་ལས་སྨི7150ཡོད་པའི་གངས་འཁྱགས་ཀྱིས་བསྡམས་པའི་རི་ལྡེབས་སུ་བསྐྱོད་པ། པར་འདི་ནི1960ལོའི་ཟླ5པར་བླངས་པ་རེད། 

       ཝང་ཡུང་ཧྥུང་གིས་རི་འཛེག་ནི་མི་གཅིག་གི་གདོང་མཆོང་ཞིག་གཏན་ནས་མིན་པར་དཔུང་ཁག་གི་རྡོག་རྩ་གཅིག་ཏུ་བསྒྲིལ་ནས་ལས་འགན་ལེགས་འགྲུབ་བྱེད་པ་ཞིག་རེད་ཟེར། 1960ལོར་ཀྲུང་གོའི་རི་འཛེག་རུ་ཁག་གི་རུ་མི་ཝང་ཧྥུ་ཀྲོའུ་དང་། ཆུས་དབྱིན་ཧྭ། མགོན་པོ། ལིའུ་ལན་མན་བཅས་ཀྱིས་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ30ལྷག་ཙམ་གྱི་ཁ་བ་བུ་ཡུག་ཁྲོད་དུ་དཀའ་སྡུག་སྣ་ཚོགས་ལས་རྣམ་པར་རྒྱལ་ཏེ། སྐར་ལྔའི་དར་དམར་ཐེངས་དང་པོར་འཛམ་གླིང་གི་དབུ་རྩེར་ལྷབ་ལྷུབ་ཏུ་གཡོ་བར་བྱས།  ལོ་བཅུ་ཕྲག་ཁ་ཤས་རིང་དཀའ་ངལ་དང་ཉེན་ཁར་མི་སྐྲག་པ་དང་། སྙིང་རུས་ཆེན་པོས་འབད་འཐབ། མཐུན་སྒྲིལ་རོགས་ལས། དཔའ་ངར་ཆེན་པོས་རི་རྩེར་འཛེག་པའི་རི་འཛེག་སྙིང་སྟོབས་དེ་རི་འཛེག་པའི་མི་རབས་ནས་མི་རབས་བར་རྒྱུན་འཛིན་བྱས་ཡོད། 2020ལོར་ཁོང་གིས་ཇོ་མོ་གླ་མའི་མཐོ་ཚད་ཚད་འཇལ་རི་འཛེག་རུ་ཁག་གི་སྤྱི་ཁྱབ་བཀོད་འདོམས་ཀྱི་འགན་ཁུར་ནས་རུ་མི་ཚོའི་སྣེ་ཁྲིད་དེ་དཀའ་ངལ་མང་པོ་ཁྱད་བསད་བྱས་ཏེ། རང་རྒྱལ་གྱིས་རང་བརྟེན་ཞིབ་འཇུག་གསར་སྤེལ་བྱས་པའི་སྔོན་ཐོན་གྱི་ཚད་འཇལ་སྒྲིག་ཆས་ལ་བརྟེན་ནས་ཇོ་མོ་གླང་མའི་མཐོ་ཚད་གསར་ཤོས་གནད་ལ་འཁེལ་ཤོས་སྨི8848.86ཚད་འཇལ་ཐུབ་པ་བྱུང་ཡོད། 

       ད་ཆ་རི་རྒྱལ་ལྷུན་པོར་འཛེག་པ་ནི་ཆེད་ལས་རི་འཛེག་ལུས་རྩལ་པའི་འགྲན་སློང་ཁོ་ན་མིན། རི་འཛེག་ལ་དགའ་ཞེན་ཡོད་མཁན་མང་པོ་དཔུང་ཁག་དེར་ཞུགས་ཡོད། 2025ལོར་ཀྲུང་གོ་བ51ཇོ་མོ་གླང་མའི་དབུ་རྩེར་འཛེགས་པ་དེས། རང་རྒྱལ་གྱི་ཚན་རྩལ་ཡར་ཐོན་དང་ཕྱོགས་བསྡུས་རྒྱལ་སྟོབས་ཀྱི་འདེགས་སྐྱོར་ཆེན་པོ་ཡོད་པ་མཚོན། 

       རི་འཛེག་སྙིང་སྟོབས་ནི་ལུས་རྩལ་སྟོབས་ཆེའི་རྒྱལ་ཁབ་འཛུགས་སྐྲུན་གྱི་གསོན་ཉམས་ལྡན་པའི་མཚོན་ཚུལ་ཞིག་དེ་བས་ཀྱང་ཡིན། མཇུག་འགྲིལ་མ་ཐག་པའི་སྨི་ལན་དགུན་དུས་ཨོ་རྩལ་འགྲན་ཚོགས་ཐོག རང་རྒྱལ་གྱི་ལུས་རྩལ་པ་ཚོས་རྣམ་གྲངས་མང་པོའི་ཐད་ཚད་བརྒལ་བྱུང་བ་དང་འབྲེལ་སྐབས་རིམ་བྱུང་གི་དགུན་དུས་ཨོ་རྩལ་འགྲན་ཚོགས་སུ་ཀྲུང་གོའི་ལུས་རྩལ་འཐུས་མི་ཚོགས་པའི་ཕྱི་རྒྱལ་གྱི་འགྲན་བསྡུར་ལ་ཞུགས་པའི་གྲུབ་འབྲས་ཡག་ཤོས་ཀྱང་བཏོད་ཡོད། 

 ཀོང་ཏུང་ཧྲེན་ཀྲེན་གྱི“མི་སེར་རི་འཛེག་མཁན”ལིའུ་ཡུང་ཀྲུང་། 

       ཝང་ཡུང་ཧྥུང་གིས་རི་འཛེག་གི་སྙིང་སྟོབས་དེའང་མི་སེར་དཀྱུས་མས་བདེ་ཐང་དོན་གཉེར་དང་རང་ཉིད་ལ་འགྲན་སློང་བྱེད་པའི་རྒྱུན་གཏན་གྱི་འཚོ་བའི་ཁྲོད་དུའང་གནས་ཡོད། མིག་སྔར་རང་རྒྱལ་གྱི་ལོ་ལྟར་ལུས་རྩལ་སྦྱོང་བརྡར་ལ་ཞུགས་མཁན་མི་གྲངས་ཀྱི་བསྡུར་ཚད38.52%ཟིན་པ་དང་། མི་རེས་ལུས་རྩལ་ཐང་སྤྱོད་པའི་རྒྱ་ཁྱོན་སྨི་གྲུ་བཞི་མ3ཟིན་པ། རྒྱལ་དམངས་ཀྱི་གཟུགས་གཞི་བདེ་ཐང་གི་ཚད་གཞི་ལོན་ཚད84.9%ཟིན་ཡོད། འདི་དག་ནི་སྤྱིར་བཏང་གི་མི་བགྲོད་ལམ་དང་། ཆུ་རྐྱལ་རྫིང་བུ། ལུས་སྦྱོང་ཁང་། རི་མ་ཐང་བཅས་སུ་རང་གིས་རང་ལ་འགྲན་སློང་བྱེད་པ་ཞིག་ཡིན། ཀྲུང་གོའི་རྣམ་པའི་དེང་རབས་ཅན་འཛུགས་སྐྲུན་བྱེད་པར་ཡང་རི་འཛེག་གི་སྙིང་སྟོབས་ཡོད་དགོས། ང་ཚོས་སྙིང་སྟོབས་འདི་རྒྱུན་འཁྱོངས་དང་། དམིགས་འབེན་གཏན་འཁེལ། ཏན་ཏན་ཏིག་ཏིག་བཅས་བྱས་ནས་དཔའ་ངར་བརྟན་པོས་བསྒྲུབས་ན་དེ་ལས་འདས་མི་ཐུབ་པའི་ཉེན་ཁ་མེད་པ་དང་མངོན་འགྱུར་མི་ཐུབ་པའི་ཕུགས་འདུན་ཡང་མེད་པ་རྟོགས་ངེས་ཡིན།