ཆ་སྙོམས་མཚོ་འཕགས་སྨི4500བརྒལ་བའི་མཚོ་སྔོན་ཞིང་ཆེན་ཡུས་ཧྲུའུ་བོད་རིགས་རང་སྐྱོང་ཁུལ་ཆུ་དམར་ལེབ་རྫོང་གི་གནམ་ཟླ་སྔར་བཞིན་གྲང་ངར་ལྡན་པ་ཡིན། སོས་དལ་བའི་སྐལ་བཟང་གིས་གྲོགས་པོ་དང་མཉམ་དུ་རྟ་ཞོན་ནས་ཨ་ཆེན་གངས་རྒྱབ་མཐའ་མཚམས་སུ་བསྐྱོད་དེ་རང་འགུལ་གྱིས་མཚོ་བོད་གཞུང་ལམ་འགྲམ་རྒྱུད་དུ་སྐོར་ཞིབ་བྱས་པ་དང་། གཞུང་ལམ་ནང་རྒྱུ་བའི་རླངས་འཁོར་ཁ་ལོ་བ་དང་ཡུལ་སྐོར་པས་གད་སྙིགས་གང་སར་མི་འཕེན་པ་དང་ཁོར་ཡུག་ལ་སྲུང་སྐྱོབ་བྱེད་དགོས་པ་སྐུལ་སློང་བྱས།
སྐལ་བཟང་ད་ལོར་ལོ68ཡིན་པ་དང་ཆུ་དམར་ལེབ་རྫོང་ཆུ་དམར་ཤང་ལི་ཁྲི་གྲོང་ཚོའི་མི་ཡིན། གྲོང་ཚོ་དེའི་ཉེ་འགྲམ་ནི་ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་ཏེ་རི་སྐྱེས་སྲོག་ཆགས་གཙོད་ཀྱི་འཚོ་སྡོད་གནས་ཡིན། ལོ་རེའི་ཟླ5བ་ནས་ཟླ7བར་དུ་མངལ་སྦྲུམ་པའི་གཙོད་རྣམས་གྲོང་ཚོ་ནས་ཨ་ཆེན་གངས་རྒྱབ་ཀྱི་བྲག་ནག་མཚོ་ཁྱབ་ཁོངས་སུ་གཙོད་ཕྲུག་བཙའ་རུ་བསྐྱོད་པ་རེད། ཟླ8པར་གཙོད་ཕྲུག་ཁྲིད་དེ་ལམ་ཐག་རིང་བོ་བརྒྱུད་ནས་ཕྱིར་ལོག་པ་རེད།
2023ལོའི་ཟླ5བའི་ཚེས25ཉིན་པར་བླངས་པའི་ཆུ་དམར་ལེབ་རྫོང་ལི་ཁྲི་གྲོང་ཚོའི་གཙོད་ཁྱུ་གནས་སྤར་པའི་ལམ་སྲུང་བའི་རུ་མི་རྣམས་ཡིན།
ཨ་ཆེན་གངས་རྒྱབ་ནི་གཙོད་སོགས་རི་སྐྱེས་སྲོག་ཆགས་རྩ་ཆེན་རིགས་ཀྱི་ཁྱིམ་གཞིས་ཡིན། སྔོན་ཆད་གཙོད་པགས་ཀྱིས་བཟོས་པའི་དཔུང་རྒྱན་གྱིས་ཁེ་ཕན་བསྐྲུན་པས། རི་དྭགས་རྔོན་མཁན་ཚོ་གནས་དེར་ཡོང་ནས་གཙོད་རྔོན་པས་ཨ་ཆེན་གངས་རྒྱབ་ཀྱི་གཙོད་ཀྱི་གྲངས་འབོར་ཁྲི20ནས་ཁྲི2བར་ཇེ་ཉུང་དུ་སོང་།
ཉེ་ལམ། བརྙན་འཕྲིན《བླ་ཤིང》ཞེས་པ་བཏང་ཞིང་། བརྙན་འཕྲིན་དེས་དུས་རབས20པའི་ལོ་རབས90ཡི་ཨ་ཆེན་གངས་རྒྱབ་ཀྱི་ལྐོག་རྔོན་ལ་ངོ་རྒོལ་བྱེད་པའི་རྣམ་པ་ལྟད་མོ་བའི་མིག་མདུན་དུ་མངོན། རྒྱས་བཟང·བསོད་ནམས་དར་རྒྱས་དང་བཀྲ་བྷ་རྡོ་རྗེ་སོགས་གཙོ་བྱས་པའི་སྐོར་ཞིབ་རུ་ཁག་གི་རུ་དཔོན་རྡོ་རྗེ་ཨ་ཆེན་གངས་རྒྱབ་ནས་གཞིས་ཚུགས་ནས་རང་སྲོག་བློས་བཏང་ཞིང་། ཨ་རྒྱན་གངས་རྒྱབ་ཀྱི་སྐྱེ་ཁམས་སྲུང་སྐྱོབ་ལས་དོན་ལ་སྐུལ་འདེད་བྱས་པའི་གཏམ་རྒྱུད་བསྟན་ཡོད། དེས་མི་ཁྲི་ཁྲི་འབུམ་འབུམ་ལ་སེམས་འགུལ་ཐེབས་སུ་བཅུག
གཙོད་ཁྱུ་མཚོ་བོད་གཞུང་ལམ་བརྒལ་ནས་ཨ་ཆེན་གངས་རྒྱབ་ཀྱི་བྲག་ནག་མཚོ་ཁར་བསྐྱོད་བཞིན་པའི་ཚུལ་རེད།
དུས་ཡུན་རིང་བོར་ཆུ་དམར་ལེབ་ནས་ལས་དོན་སྤེལ་བ་དང་སྔོན་ཆད་ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུས་ཏང་ཙུའུ་ཧྲུའུ་ཅིའི་ལས་འགན་ཁུར་བའི་ཚེ་བརྟན་གྱིས་བརྗོད་དོན།“ང་དང་བསོད་ནམས་དར་རྒྱས་གྲོགས་པོ་ཡིན། དུས་རབས20པའི་ལོ་རབས80ཡི་ལོ་མཇུག་དང་ལོ་རབས90པའི་ལོ་མགོ་ནི་གཙོད་ལྐོག་རྔོན་བྱེད་མཁན་སྨྱོ་ཧམ་གྱི་དུས་ཡིན། ང་རང1993ལོར་ཨ་ཆེན་གངས་རྒྱབ་ཏུ་བསྐྱོད་དེ་སྐོར་ཞིབ་བྱེད་དུས་ཉིན་བཅུ་ཕྲག་ལྷག་སོང་ན་ཡང་གཙོད་ཀྱི་གཟུགས་བརྙན་མཐོང་དཀའ”ཞེས་ཚེ་བརྟན་གྱིས་དེ་ལྟར་བརྗོད། ཁོང་གིས་ད་དུང་བཤད་རྒྱུར།“སྐབས་དེར་སྐོར་ཞིབ་ཆ་རྐྱེན་ཤིན་ཏུ་ཞན་ལ། དབྱར་དུས་དང་སྟོན་དུས་ཨ་ཆེན་གངས་རྒྱབ་གང་སར་ན་འདམ་ཡིན་པས་རྒྱུན་དུ་རླངས་འཁོར་འདབ་ནང་ལྷུང་བ་དང་། མཚམས་རེར་རླངས་འཁོར་སྐོར་ནས་ཉིན་གཅིག་ལ་སྨི900མ་གཏོགས་མདུན་བསྐྱོད་བྱེད་མི་ཐུབ”ཟེར།
དཔའ་བོ་རྒྱང་རིང་དུ་བཞུད་མེད་ལ། བསོད་ནམས་དར་རྒྱས་ཀྱིས་རང་སྲོག་བློས་བཏང་ཡང་སྲུང་སྐྱོབ་ལམ་དུ་ནམ་ཡང་རྒྱུན་མ་ཆད་པར་མི་སྔར་ལས་མང་པོར་སྲུང་སྐྱོབ་འདུ་ཤེས་སྐྱེད་སྲིང་བྱས། ཆུ་དམར་ལེབ་ནུབ་རྒྱུད་དང་ཨ་ཆེན་གངས་རྒྱབ་ཀྱི་རི་ཆུ་ཕན་ཚུན་སྦྲེལ་ཏེ་རི་སྐྱེས་སྲོག་ཆགས་གཙོད་ཀྱི་འཚོ་སྡོད་གནས་གཙོ་བོར་གྱུར། སྐྱེ་ཁམས་སྲུང་སྐྱོབ་ཀྱི་འདུ་ཤེས་གནས་དེ་ནས་རྩ་བ་རྒྱས་པ་རེད།
སྐལ་བཟང་གིས་བཤད་རྒྱུར།“བསོད་ནམས་དར་རྒྱས་ཀྱིས་རི་སྐྱེས་སྲོག་ཆགས་གཙོད་ལ་སྲུང་སྐྱོབ་བྱ་ཆེད་རང་སྲོག་བློས་བཏང་པ་ཡིན། ང་ཚོས་གནས་འདི་གཙོད་འཚོ་སྡོད་བྱེད་ས་ཡིན་པའི་ངོས་ནས་ལས་དོན་སྤེལ་དགོས་ཤིང་། བསོད་ནམས་དར་རྒྱས་ཀྱི་སྙིང་སྟོབས་ཀྱང་རྒྱུད་འཛིན་བྱེད་དགོས”ཟེར།
དེ་བས། 2007ལོར་སྐལ་བཟང་གི་གྲོས་འདོན་འོག་ལི་ཁྲི་གྲོང་ཚོ་ཡིས་གཙོད་ཀྱི་གནས་སྤར་སྲུང་སྐྱེལ་རི་ཁག་བཙུགས། ལོ་རེར་གཙོད་ཁྱུ་གནས་སྤར་ནས་གཙོད་ཕྲུག་བཙའ་བའི་གོ་རིམ་ཁྲོད་གཙོད་ཁྱུ་གྲོང་ཚོ་ནས་མཚོ་བོད་གཞུང་ལམ་བྱང་རྒྱུད་དུ་སྐྱེལ་བའི་ལས་དོན་གྱི་འགན་ཁུར་ཞིང་། གཙོད་ཕྲུག་བཙས་རྗེས་ཡང་བསྐྱར་གྲོང་ཚོ་རུ་སྐྱེལ་བའི་ལས་འགན་ཁུར་ཡོད། འགྲོ་ཐེངས་གཅིག་ལ་སྤྱི་ལེ140ཙམ་ཟིན་པ་དང་། གཙོད་ཁྱུ་དང་གཙོད་ཕྲུག་ལ་སྐོག་རྔོན་མི་བྱེད་པ་དང་རང་བྱུང་གནོད་འཚོ་མི་ཐེབས་པར་སྲུང་སྐྱོབ་བྱས།
2025ལོའི་ཟླ8པར་ཆུ་དམར་ལེབ་རྫོང་ལི་ཁྲོ་གྲོང་ཚོའི་གཙོད་ཁྱུ་སྲུང་སྐྱེལ་རུ་ཁག་གི་རུ་མི་ཚོས་སྦྲ་ཕུབ་བཞིན་པའི་ཚུལ་རེད།
གཙོད་ཁྱུ་སྲུང་སྐྱོབ་ལམ་བུའི་ཁྲོད་སྐལ་བཟང་དང་རུ་མི་རྣམས་ཀྱིས་དཀའ་སྡུག་མང་པོ་མྱངས་ཡོད། 2012ལོར་གཙོད་ཁྱུ་སྲུང་སྐྱོབ་བྱེད་དུས་ཉིན་ཞིག་གི་ཕྱི་དྲོ་དྲག་ཆར་བབས་པ་དང་སྦག་སྦག་འཁོར་ལོ་བཞི་ནས་ལྔ་འདམ་ནང་དུ་ཟུག་པ་དང་། མེ་སྒྲོན་བྱེད་ཀྱི་ཨོང་བ་ཡང་རློན་པར་གྱུར་པ་དང་ཟ་མ་རྩམ་པ་ཉུང་ཙམ་མ་གཏོགས་མེད་པས། དེ་དག་ལ་བརྟེན་ནས་སྐལ་བཟང་དང་རུ་མི་རྣམས་དུས་ཚོད24རྒྱུན་འཁྱོངས་བྱས་ཏེ། ཉིན་གཉིས་པའི་ཕྱི་དྲོ་ད་གཟོད་སྦག་སྦག་འཁོར་ལོ་འདམ་ནས་བླངས་པ་རེད།
དོན་དག་དེ་དང་འདྲ་བ་ནམ་ཡང་བྱུང་བཞིན་ཡོད་ཀྱང་། སྲུང་སྐྱེལ་རུ་ཁག་གི་རུ་མི་ཚོས་གཏན་ནས་སྡུག་ཡུས་བཏོན་མ་མྱོང་།
ལོ་རེར་སྲུང་སྐྱེལ་རུ་ཁག་གིས་རི་སྐྱེས་སྲོག་ཆགས་ཁྲི་ལྷག་གྲོང་ཚོ་ནས་སྲུང་སྐྱོབ་བྱས་ཏེ་འདེད་དགོས་ལ། གནས་སྤར་བའི་གཙོད་ཀྱི་གྲངས་འབོར་ལོ་རེ་བཞིན་མང་དུ་འཕེལ་བ་མཐོང་དུས་སྐལ་བཟང་གི་སེམས་ནས་བརྗོད་མི་ཐུབ་པའི་དགས་སྤྲོ་ཞིག་སྐྱེས། ད་ལྟ། སྲུང་སྐྱེལ་རུ་ཁག་གི་རུ་མི་ཡང་སྔོན་ཆད་ཀྱི30ནས54བར་འཕར་ཡོད་པ་དང་། སྐལ་བཟང་ལོ་ཆེས་ཆེ་བ་ཡིན་ཡང་ལོ་རྒྱུན་གཙོད་ཁྱུ་སྲུང་སྐྱོབ་ལས་དོན་ནང་ཞུགས་ནས་ཆུ་བོ་བརྒལ་བ་དང་ཐང་དཀྱིལ་ནས་བསྡད་པས་ཁོའི་གྲུམ་ནད་ནམ་ཡང་ན་བཞིན་ཡོད། ཡིན་ཡང་ཁོས་སྔར་བཞིན་ལས་དོན་དེ་གཉེར་བཞིན་ཡོད་ཅིང་། ལས་མཚམས་འཇོག་རྒྱུ་གཏན་ནས་དྲན་མ་མྱོང་།
སྐལ་བཟང་དང་འདྲ་བར་ཨ་ཆེན་གངས་རྒྱབ་ཏུ་ལས་དོན་གཉེར་ནས་ལོ་ངོ་བཅུ་ཕྲག་ཟིན་པའི་ཚེ་བརྟན་གྱིས་ཀྱང་གནས་དེའི་རྩྭ་ཆུ་བརྟན་སྲུང་བྱེད་བཞིན་ཡོད། ཁོ་ལས་གནས་ནས་ངལ་གསོས་ཀྱང་རྒྱུན་དུ་ཨ་ཆེན་གངས་རྒྱབ་བསོད་ནམས་དར་རྒྱས་སྲུང་སྐྱོབ་ས་ཚིགས་སུ་བསྐྱོད་དེ་འོས་འགན་སྒྲོག་འགྲེལ་དང་ཁོར་སྲུང་འདུ་ཤེས་དྲིལ་སྒྲོག་བྱས། “ཨ་ཆེན་གངས་རྒྱབ་ནི་ངའི་ཕ་ཡུལ་ཡིན་པས། ངའི་ཚེ་སྲོག་ནམ་ཡང་གཙོད་ཁྱུ་དང་དམ་པོར་སྦྲེལ་ཡོད”ཟེར།
ད་ལྟ། ཐང་རྒོད་དེ་རུ་མདེའུ་ཡི་སྒྲ་རིམ་བཞིན་མཚམས་ཆད་ཡོད་པས། གཙོད་ཁྱུའི་གྲངས་འབོར་ཡང་ཁྲི7ལས་བརྒལ་པ་རེད། བསོད་ནམས་དར་རྒྱས་སྔ་རྗེས་སུ་ཐེངས12ལ་ཨ་ཆེན་གངས་རྒྱབ་ལ་བསྐྱོད་པ་ནས་ཚེ་བརྟན་གྱིས་ལོ་བཅུ་ཕྲག་རིང་ལ་ཨ་ཆེན་གངས་རྒྱབ་བརྟན་སྲུང་བྱེད་པ། དེ་ནས་སྲུང་སྐྱེལ་རུ་ཁག་གིས་ལོ་ངོ19རིང་ལ་རང་འགུལ་གྱིས་ཨ་ཆེན་གངས་རྒྱབ་སྲུང་བ། འོད་ཅིག་ནས་མེ་ཕུང་ཞིག་གི་བར་དང་། དེ་ནས་མི་གཅིག་ནས་མི་སྐོར་ཞིག་གི་བར། གཙད་ཁྱུ་སྲུང་སྐྱོབ་ལས་དོན་ཡང་ཚེ་སྲོག་གི་སྡོང་བོ་གཅིག་ནས་ནགས་ཚལ་ཞིག་ཏུ་གྲུབ་པ་རེད།
རྩོམ་སྒྲིག་པ། རིག་གྲོལ།
