བདེ་སྐྱིད་ཀྱིས་ཁྱེད་རང་བོད་ཁྱིམ་དུ་ཁྲིད་པ།
སྟེས་དབང་དུ་ཁེ་སྨད་གྲོང་ཚོའི་སྟོན་བསྡུ་དང་འཕྲད་བྱུང་།
སྤེལ་དུས 2019-09-06
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
ང་དང་བདེ་སྐྱིད་མུ་མཐུད་ནས་ང་ཚོའི་བོད་ཀྱི་དམངས་སྲོལ་རིག་གནས་ཡུལ་སྐོར་ལ་བསྐྱོད་པ་ཡིན། ཉིན་དེར་ང་ཚོ་བོད་རང་སྐྱོང་ལྗོངས་ལ་དམངས་གཙོའི་བཅོས་བསྒྱུར་བཏང་པའི་གྲོང་ཚོ་དང་པོ་སྟེ་ལྷོ་ཁ་གྲོང་ཁྱེར་སྣེ་གདོང་ཆུས་ཁྲ་འབྲུག་གྲོང་རྡལ་ཁེ་གསུམ་གྲོང་ཚོའི་ཞིང་པའི་ཁྱིམ་ཚང་གི་འཚོ་བའི་གནས་ཚུལ་སྐོར་ལ་བཅར་འདྲི་བྱེད་པར་ཕྱིན། ཕྱིར་ལོག་དུས་གྲོ་ཞིང་བརྒྱུད་ནས་ཡོང་སྐབས། སྟེས་དབང་དུ་དེའི་ཉེ་འགྲམ་གྱི་ཁེ་སྨད་གྲོང་ཚོའི་གྲོང་མིས་སྟོན་ཐོག་སྡུད་པ་དང་འཕྲད།
རྒྱང་རིང་ནས་བལྟ་དུས། བརྔ་བསྡུའི་འཕྲུལ་འཁོར་དང་འདྲུད་འཐེན་འཁོར་ལོ་གྲོ་ཞིང་གི་དཀྱིལ་དུ་རྒྱུ་བཞིན་པ་དང་། གྲོང་མི་བཅུ་གྲངས་ཤིག་གིས་ཞིང་གི་གྲུ་ག་སོ་སོ་རུ་ཁ་ཐོར་ནས་གོ་རིམ་ཡོད་པའི་སྒོ་ནས་ཞིང་ཁའི་ལས་ཀ་ལ་བྲེལ་བཞིན་པ་མཐོང་། མཐའ་ཡས་པའི་གྲོ་ཞིང་དང་ཞིང་ཁའི་ལས་ལ་བྲེལ་བའི་རྣམ་པ་དེས་ང་ཚོའི་ཡིད་དབང་ཅིག་ཅར་དུ་འཕྲོག་སོང་།
དེ་ནས་བདེ་སྐྱིད་ཀྱིས་ང་རང་ཁྲིད་ནས་བོད་རིགས་ཞིང་པའི་སྟོན་བསྡུའི་ཁྲོད་ཀྱི་བྲེལ་བ་དག་ཁོ་མོ་དང་ལྷན་དུ་ཉམས་སུ་མྱོང་བར་ཁྲིད། གྲོང་མི་རྣམས་དང་ཁ་བརྡ་སྟབས་བདེ་ཞིག་བྱས་རྗེས། ང་ཚོས་རང་འགུལ་ངང་བོད་ཀྱི་ཨ་ཅག་རྣམས་ལ་ངེད་གཉིས་ཀྱིས་ས་ཞིང་གི་ལས་ཀ་ཉམས་སུ་མྱོང་ན་འདོད་ཅེས་བཤད། བལྟས་ན་ལས་སླ་བའི་གྲོ་ཞིང་གི་ལས་ཀ་འདི་རྒྱུན་འཁྱོངས་བྱེད་རྒྱུ་དེ་འདྲ་སླ་བོ་ཞིག་མ་རེད།
ཉིན་གུང་གི་དུས་སུ། གྲོང་མི་རྣམས་ཀྱིས་སྤྲོ་སེམས་འཁོལ་པོའི་ངང་ང་ཚོ་ཁོ་ཚོ་དང་མཉམ་དུ་སྔར་ནས་གྲ་སྒྲིག་བྱས་ཟིན་པའི་གུང་ཟས་ལ་རོལ་བར་བོས། གུང་ཟས་ནི་གྲོའི་བག་ལེབ་དང་རང་ཁྱིམ་ནས་བཟོས་པའི་བསྲུབས་ཇ་ཙམ་ཡིན་རུང་། ང་ཚོས་ཟོས་དུས་ཧ་ཅང་ཞིམ་མངར་ལྡན་པ་བྱུང་། གུང་ཟས་སྟབས་བདེ་ཞིག་རོལ་རྗེས། གྲོང་མི་རྣམས་མྱུར་དུ་ཡང་བསྐྱར་ཞིང་བརྔ་བའི་ལས་ལ་བྲེལ་སོང་།
དུས་ཐུང་གི་ཞིང་བརྔ་བའི་མྱོང་བ་དང་། གུང་ཟས་སྟབས་བདེ། དེ་མིན་ཁོ་ཚོ་དང་སྤྱིར་བཏང་གི་ཁ་བརྡ་བྱས་པ་བཅས་ཀྱིས་ང་ལ་བག་ཆགས་ཟབ་མོ་ཞིག་བཞག་བྱུང་། ལྷག་པར་དུ་གྲོང་མི་རྣམས་ཀྱི་སྙིང་ཉེ་བ་དང་བརྩེ་སེམས་ལྡན་པའི་ངང་ཚུལ་དེས་ང་ཚོའི་བར་གྱི་བར་ཐག་གློ་བུར་དུ་ཇེ་ཉེ་རུ་གྱུར་ལ། ཕ་ཡུལ་དང་ཁ་ཐག་རིང་བའི་མཚོ་བོད་མཐོ་སྒང་གི་ཡུལ་གྲུ་འདི་ནས་ཀྱང་ང་ལ་ཕ་ཡུལ་ལྟ་བུའི་བརྩེ་བ་དྲོན་མོ་ཉམས་སུ་མྱོང་དུ་བཅུག
རྩོམ་སྒྲིག་པ། སྣང་རྡོར།