བོད་ལྗོངས་ཀྱི་རྒྱལ་ཁབ་རིམ་པའི་ཐུམ་འབུའི་ནད་འགོག་བཅོས་ཞིབ་འཇུག་གི་གཙོ་གནད་ཚོད་ལྟ་ཁང་ཐོག་མ་འཛུགས་རྒྱུར་ཆོག་མཆན་ཐོབ་པ།
སྤེལ་དུས 2019-07-18
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། པད་མ་རྒྱལ་གྱིས་བསྒྱུར།
ཀྲུང་གོའི་བོད་ལྗོངས་དྲ་བའི་འཕྲིན། ཉེ་ཆར། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི《རུས་ནད་ཚན་ཁག་གི་རིག་ནུས་ཡོ་ཆས་གཙོ་གནད་ཚོད་ལྟ་ཁང་སོགས་ཨུ་ལྷན་དང་ཞིང་ཆེན་གྱིས་གཙོ་གནད་ཚོད་ལྟ་ཁང་13མཉམ་སྐྲུན་བྱ་རྒྱུའི་སྐོར་གྱི་ཡི་གེ》བྱ་བའི་ཡོངས་བསྒྲགས་མིང་ཐོའི་ནང་དུ་བོད་ལྗོངས་ཀྱིས་རེ་ཞུ་བྱས་པའི“རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཐུམ་འབུའི་ནད་འགོག་བཅོས་ཞིབ་འཇུག་གི་གཙོ་གནད་ཚོད་ལྟ་ཁང་(མཉམ་སྐྲུན)”གི་མིང་ཐོ་གསལ་བོར་བཀོད་ཡོད་ཅིང་། དེའི་རེ་བཅོལ་ལས་ཁུངས་ནི་བོད་རང་སྐྱོང་ལྗོངས་ནད་ཡམས་སྔོན་འགོག་ཚོད་འཛིན་ལྟེ་གནས་ཡིན་པ་དང་། གཙོ་གཉེར་སྡེ་ཁག་ནི་བོད་རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་རེད།
ཐེངས་འདིའི་གཙོ་གནད་ཚོད་ལྟ་ཁང་དཔྱད་འདེམས་བྱེད་སྐབས་བོད་ལྗོངས་ཀྱིས་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་ལ་རེ་འདུན་ཞུ་ཡིག་འབུལ་བ་དང་། ཆེད་ལས་པས་སྐར་མ་རྒྱག་པ། སྙན་ཞུའི་རྩོད་ལན་འདེབས་པ། ཆེད་ལས་པས་བསམ་འཆར་ལྟར་སྙན་ཞུར་དག་བཅོས་བྱེད་པ་དང་། ཡུལ་དངོས་རྟོག་ཞིབ། ཚན་ཞིབ་ལས་སྒོའི་འགྲོ་གྲོན་རྣམ་གྲངས་ཀྱི་རིགས་སྒྲུབ་རྩོད་ལན་འདེབས་པ་སོགས་ཀྱི་དཔྱད་བསྡུར་རིམ་པ་མང་པོ་ཞིག་བརྒྱུད་ཅིང་། གཏན་འབེབས་དང་བླང་བྱ་ལྟར་རྒྱལ་ཁབ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་གིས་ཀྲུང་གོའི་གསོ་རིག་ཚན་རིག་ཁང་ལ་མངགས་བཅོལ་བྱས་ནས་ཆེད་ལས་པ་རྩ་འཛུགས་བྱས་ཏེ་བོད་རང་སྐྱོང་ལྗོངས་ནད་ཡམས་སྔོན་འགོག་ཚོད་འཛིན་ལྟེ་གནས་སོགས་ལས་ཁུངས་13གྱིས་ཡིག་ཐོག་སྙན་ཞུ་ཕུལ་བའི་ཨུ་ལྷན་རིམ་པའི་གཙོ་གནད་ཚོད་ལྟ་ཁང་ལ་དཔྱད་ཞིབ་དང་རིགས་པས་ཁུངས་སྐྱེལ་ཡང་ཡང་བྱས་ཏེ། ད་ལོའི་ཟླ་7པའི་ཚེས་3ཉིན་འཛུགས་སྐྲུན་བྱེད་པའི་ཆོག་མཆན་ཡི་གེ་དངོས་སུ་བཏང་བ་རེད།
རྒྱུས་ལོན་བྱུང་བ་ལྟར་ན། རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་གྱིས་དོ་དམ་འགན་འཁྲི་ཏན་ཏིག་སྒྲུབ་པ་དང་རྒྱལ་ཁབ་འཕྲོད་བསྟེན་བདེ་ཐང་གི་ཚན་རྩལ་གསར་གཏོད་ཀྱི་ལམ་ལུགས་དོན་འཁྱོལ་ཡོང་བ་བྱས་ཏེ། སླད་ཕྱིན་གཙོ་གནད་ཚོད་ལྟ་ཁང་འཛུགས་སྐྲུན་དང་འཕེལ་རྒྱས་གཏོང་རྒྱུ་དེ་ཁོངས་གཏོགས་ཁུལ་གྱི་འཕྲོད་བསྟེན་བདེ་ཐང་དང་ཚན་རྩལ་གསར་གཏོད་འཕེལ་རྒྱས་ཀྱི་འཆར་འགོད་ནང་བཅུག་ནས་ཚོད་ལྟ་ཁང་འཛུགས་སྐྲུན་དང་འཁོར་སྐྱོད་དོ་དམ་ཐད་དགོས་ངེས་ཀྱི་རྒྱབ་སྐྱོར་དང་ལྟ་སྐུལ། མཛུབ་ཁྲིད་བཅས་གནང་རྒྱུ་རེད། ཐུམ་འབུའི་ནད་འགོག་བཅོས་ཞིབ་འཇུག་གི་གཙོ་གནད་ཚོད་ལྟ་ཁང་དང་དེ་བཞིན་རེ་བཅོལ་ལས་ཁུངས་ཀྱིས་ནན་ཏན་ངང་སྒོས་གཙོ་གནད་ཚོད་ལྟ་ཁང་འཛུགས་སྐྲུན་དང་། འཁོར་སྐྱོད། དོ་དམ་བཅས་ཀྱི་འགན་འཁྲི་གཙོ་བོ་ལག་བསྟར་བྱས་ནས“ཕྱོགས་གཅིག་ནས་འཛུགས་སྐྲུན་དང་། ཕྱོགས་གཅིག་ནས་འཁོར་སྐྱོད། ཕྱོགས་གཅིག་ནས་སྒོ་དབྱེ”བྱ་བའི་རྩ་དོན་གཞིར་བཟུང་སྟེ་ཚོད་ལྟ་ཁང་འཛུགས་སྐྲུན་བྱ་བར་ཤུགས་སྣོན་དང་། དུས་ལྟར་འཛུགས་སྐྲུན་ལས་འགན་ལེགས་སྒྲུབ་ཐུབ་པར་འགན་ལེན་བྱ་རྒྱུ་རེད།