ལོ་ངོ་གསུམ་བརྒྱུད་མཐར《སློབ་ཆུང་བོད་ཡིག་མིང་མཛོད》འགྲེམ་སྤེལ་བྱས་སོང་།
སྤེལ་དུས 2019-08-23
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། འབྲུག་རྒྱལ་མཁར་གྱིས་བསྒྱུར།
མིག་སྔར་བོད་ལྗོངས་མི་དམངས་དཔེ་སྐྲུན་ཁང་གིས་ཁྱབ་སྤེལ་བྱས་པའི་《སློབ་ཆུང་བོད་ཡིག་མིང་མཛོད》དང་ཀློག་པ་པོ་ཐོག་མར་ངོ་འཕྲད་བྱུང་། མིང་མཛོད་འདི་ནི་ལྷ་ས་བྱ་དགའི་སྐད་ཡིག་ཟུར་ཁྲིད་སློབ་གྲྭའི་སློབ་གཙོ་ཚེ་རིང་ནོར་བུ་དང་ལྷ་ས་བྱ་དགའི་སྐད་ཡིག་ཟུར་ཁྲིད་སློབ་གྲྭའི་དགེ་རྒན་རྣམ་རྒྱལ་སྐྱབས་གཉིས་ཀྱིས་མཉམ་དུ་གཙོ་སྒྲིག་མཛད། ལོ་ངོ་གསུམ་རིང་གི་རྩོམ་སྒྲིག་བརྒྱུད་ནས་ཡོངས་སུ་རྫོགས་པ་དང་། པར་ཡིག་སྤེལ་མའི་རྣམ་པའི་སྒོ་ནས་སློབ་ཆུང་ལོ་རིམ་དང་པོ་ནས་ལོ་རིམ་དྲུག་པའི་བར་གྱི་ཐ་སྙད་ཡོངས་རྫོགས་དང་འཚོ་བའི་ཁྲོད་ཀྱི་རྒྱུན་བཀོལ་གྱི་ཐ་སྙད་གསར་པ་འདུས་ཡོད། མིང་མཛོད་འདིས་སློབ་ཆུང་སློབ་མ་རྣམས་ཀྱིས་ཐད་ཀར་ཐ་སྙད་ཀྱི་གོ་དོན་མྱོང་ཐུབ་པ་དང་ཡང་ན་ཐ་སྙད་ལ་བག་ཆགས་ཟབ་མོ་ཆགས་སུ་བཅུག་ཡོད།
ཚེ་རིང་ནོར་བུས་གསར་འགོད་པར་འགྲེམ་སྤེལ་བྱས་པའི་མིང་མཛོད་འདི་འགྲེམས་སྟོན་གནང་བ་དང་། ད་དུང་ཁོས་“མིང་མཛོད་རྩོམ་སྒྲིག་ནི་ལས་གཞི་ཧ་ཅང་ཆེན་པོ་ཞིག་ཡིན་པ་དང་། རྒྱུ་ཆ་ཤིན་ཏུ་མང་པོ་ཞིག་འཚོལ་བསྡུ་བྱེད་དགོས་ལ། ད་དུང་ལོ་རྒྱུས་དཔེ་རྙིང་ཀྱང་འཚོལ་དགོས། ”ཞེས་ངོ་སྤྲོད་གནང་། མིག་སྔར་ཡོད་པའི་བོད་ཡིག་གི་རྒྱུ་ཆའི་དཔེ་དེབ་སྤྱིར་སྣ་ཁ་ཅུང་མང་རུང་། ནང་དོན་གྱི་ཐད་ནས་ཆེད་དོན་ཐ་སྙད་ཡིན་པས། ཕྱོགས་བསྡུས་རང་བཞིན་དང་དབང་གྲགས་རང་བཞིན་མེད་ལ། ད་ལྟའི་སྤྱི་ཚོགས་ཀྱི་ཐ་སྙད་གསར་པའི་མགྱོགས་མྱུར་འཕེལ་རྒྱས་ཀྱི་དུས་རབས་ཀྱི་འཕོ་འགྱུར་དང་གཏན་ནས་འཚམས་མི་ཐུབ་ལ། ད་དུང་ཐ་སྙད་མང་པོ་ཞིག་གི་བཀོལ་སྤྱོད་ཀྱི་རྒྱ་ཆུང་ཞིང་། སྔར་བཞིན་ཐ་སྙད་རྙིང་པ་བཀོལ་བཞིན་པ་དང་། ཅུང་མཁྲེགས་པོ་དང་གང་ལ་གང་འཚམས་ཀྱི་ཆ་ཞན། དེ་དང་ཆབས་ཅིག་རྒྱུན་བཀོལ་རྒྱུ་ཆའི་རང་བཞིན་གྱི་མིང་བརྡའི་མཛོད་དང་མིང་མཛོད་དུས་དང་མཐུན་པར་གསར་བསྒྱུར་བྱེད་མི་ཐུབ་པས། མིང་གི་བརྡ་དོན་དང་ཐ་ན་རྨང་གཞིའི་ཐ་སྙད་ཧ་ཅང་མི་འདང་བའི་དཀའ་ཁག་གི་གནས་ཚུལ་དང་འཕྲད་སྲིད། ཐེངས་འདིར་འགྲེམས་སྤེལ་བྱས་པའི་《སློབ་ཆུང་བོད་ཡིག་མིང་མཛོད》ནི་སྔོན་ཆད་ཀྱི་《བོད་ཡིག་མིང་མཛོད》དག་དང་བསྡུར་ན་ཐ་སྙད་ཁག་ཅིག་ཁ་སྣོན་དང་། བརྡ་དོན་འགྲེལ་བཤད་དང་དཔེ་བརྗོད་གསར་པའང་བསྣན་ཡོད། དེ་དང་མཉམ་དུ་གཟུགས་མི་འདྲ་བའི་ཡི་གེ་དང་རྒྱུན་པར་མི་བཀོལ་བའི་ཡི་གེའི་ཁག་ཇེ་ཉུང་དུ་བཏང་ཡོད་ལ། པར་རིས་དང་ཡི་གེ་སྦྲགས་མའི་རྣམ་པས་སློབ་ཆུང་ལོ་རིམ་དང་པོ་ནས་ལོ་རིམ་དྲུག་པའི་བར་གྱི་ཐ་སྙད་ཚང་མ་དང་འཚོ་བའི་ཁྲོད་ཀྱི་རྒྱུན་བཀོལ་གྱི་ཐ་སྙད་བཅས་ཚུད་པར་བྱས་ཡོད།
ཚེ་དབང་ནོར་བུས་བསྟན་དོན། ཐེངས་འདིར་《སློབ་ཆུང་བོད་ཡིག་མིང་མཛོད》པར་གཞི་ཐོག་མ་པར་སྐྲུན་འགྲེམས་སྤེལ་བྱས་པ་འདིའི་ཁྲོད་ནོར་འཁྲུལ་དང་མི་འདང་ས་ཡོད་སྲིད་སྟབས། དེབ་5000ལས་དཔར་མེད། རྗེས་ཕྱོགས་མུ་མཐུད་ཐ་སྙད་གསར་པ་དང་ནང་དོན་གསར་པ་ཁ་སྣོན་བྱས་རྗེས། སྔར་ལས་འཐུས་ཚང་ཡོང་ཐུབ་པ་དང་། སྐབས་དེར་ང་ཚོས་པར་གཞི་གཉིས་པ་དང་པར་གཞི་གསུམ་པ་སོགས་པར་ཏུ་བཏབ་ཆོག་ཟེར།
《མིང་མཛོད》འདི་འགྲེམས་སྤེལ་བྱེད་ས་སྟེ་ང་དང་དེབ་ཞེས་པའི་དཔེ་ཁང་དུ་ཡོང་ནས་《མིང་མཛོད》འདི་ཉོ་མཁན་གྱི་གྲོང་མི་རྒྱུན་མི་ཆད་པ་དང་། དཔེ་ཁང་གིས་ཆེད་དུ་《སློབ་ཆུང་བོད་ཡིག་མིང་མཛོད》དཔེ་སྒྲོམ་གྱི་མཐོང་སླ་བའི་གནས་སུ་བཞག་ཡོད།
གསར་འགོད་པས་ཕ་དང་ཁོང་གི་བུ་མོས་《སློབ་ཆུང་བོད་ཡིག་མིང་མཛོད》ཉོ་བཞིན་པ་མཐོང་། ཨ་ཕ་དེས་གསར་འགོད་པར་བརྗོད་དོན། དགེ་རྒན་གྱིས་བཀོད་སྒྲིག་བྱས་པའི་ལས་བྱའི་ཁྲོད་དུ་ཐ་སྙད་གསར་པ་མང་པོ་འདུག ང་ཚོ་ཁྱིམ་བདག་གིས་འགྲེལ་བཤད་རྒྱག་མི་ཐུབ་པས། ད་ཐེངས་ཡོང་ནས་མིང་མཛོད་འདི་ཉོས་པས། རྗེས་ཕྱོགས་ཕྲུ་གུས་མི་ཤེས་པའི་ཐ་སྙད་མིང་མཛོད་ལས་འཚོལ་ཆོག ཧ་ཅང་སྟབས་བདེ་རེད་ཟེར།