སྐབས་བཅུ་པའི་རྒྱལ་ཡོངས་བོད་ལུགས་གསོ་རིག་མཐོ་རིམ་ཟབ་སྦྱོང་འཛིན་གྲྭ་པེ་ཅིང་ནས་བསྡུས་པ།
སྤེལ་དུས 2019-10-18
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། འབྲུག་རྒྱལ་མཁར་གྱིས་བསྒྱུར།
སྐབས་བཅུ་པའི་རྒྱལ་ཡོངས་བོད་ལུགས་གསོ་རིག་མཐོ་རིམ་ཟབ་སྦྱོང་འཛིན་གྲྭའི་དགེ་སློབ་མཉམ་པར།
ཀྲུང་གོའི་བོད་ལྗོངས་དྲ་བའི་འཕྲིན། ཟླ་10པའི་ཚེས་17ཉིན་གྱི་སྔ་དྲོར། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱིས་གཙོ་སྒྲུབ་བྱས་ཤིང་། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཚན་ཞིབ་ཁང་དང་པེ་ཅིང་བོད་ལུགས་སྨན་ཁང་། བོད་ལུགས་གསོ་རིག་ཁང་བཅས་ཀྱིས་མཉམ་དུ་འགན་སྒྲུབ་མཛད་པའི་ཉིན་བདུན་རིང་གི་སྐབས་བཅུ་པའི་རྒྱལ་ཡོངས་བོད་ལུགས་གསོ་རིག་མཐོ་རིམ་ཟབ་སྦྱོང་འཛིན་གྲྭའི་དབུ་ཚུགས་མཛད་སྒོའི་ཚོགས་འདུ་པེ་ཅིང་བོད་ལུགས་སྨན་ཁང་ནས་བསྡུས། ཐེངས་འདིའི་ཟབ་སྦྱོང་འཛིན་གྲྭར་བོད་ལྗོངས་ཀྱི་མིང་དུ་གྲགས་པའི་སྨན་པ་རྒན་པ་སློབ་དཔོན་དགའ་བའི་རྡོ་རྗེ་ལགས་གདན་འདྲེན་ཞུས་ནས《ལག་ལེན་གཅེས་བཏུས་ཀུན་གསལ་སྣང་མཛོད་ཀྱི་དགོངས་འགྲེལ་དེལ་དམར་ཞལ་ལུང》ཞེས་པ་སློབ་ཁྲིད་གནང་། བོད་ལྗོངས་དང་མཚོ་སྔོན། སི་ཁྲོན། ཀན་སུའུ། ཡུན་ནན། ནང་སོག་དང་དེ་མིན་པེ་ཅིང་ནས་ཡོང་བའི་སློབ་མ་150ལྷག་ཟབ་སྦྱོང་འཛིན་གྲྭར་ཞུགས་ཡོད།
དབུ་ཚུགས་མཛད་སྒོའི་སྟེང་། གཙོ་སྒྲུབ་ལས་ཁུངས་ཀྱི་སྐུ་ཚབ་པས་སློབ་དཔོན་དགའ་བའི་རྡོ་རྗེ་ལགས་ལ་ཁ་བཏགས་འབུལ་བ་དང་། པེ་ཅིང་བོད་ལུགས་སྨན་ཁང་གི་འགོ་གཙོ་སྒྲོལ་དཀར་སྐྱབས་ཀྱིས་སྐབས་སོ་སོའི་ཟབ་སྦྱོང་འཛིན་གྲྭའི་གནས་ཚུལ་དང་གྲུབ་འབྲས་གཙོ་བོ། དེ་མིན་པེ་ཅིང་བོད་ལུགས་སྨན་ཁང་གི་འཕེལ་རྒྱས་དང་འཛུགས་སྐྲུན་སོགས་ཀྱི་གནས་ཚུལ་ངོ་སྤྲོད་གནང་།
རྒྱལ་ཁབ་ཀྲུང་ལུགས་གསོ་རིག་སྨན་རྫས་དོ་དམ་ཅུས་སྨན་སྲིད་ཁང་གི་སྐོར་ཞིབ་པ་མོང་ཆིན་པིན་གྱིས་ཤིས་ཚིག་གསུང་སྐབས་ནན་གྱིས་བསྟན་དོན། དུས་རབས་གསར་པའི་གྲངས་ཉུང་མི་རིགས་ཀྱི་གསོ་རིག་ལས་དོན་ཐད་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཀྲུང་ལུགས་གསོ་རིག་ལས་དོན་དང་མི་རིགས་ལས་དོན་སྐོར་གྱི་མཛུབ་སྟོན་གལ་ཆེན་གྱི་དགོངས་དོན་ལག་ལེན་གཏིང་ཟབ་གཏོང་བ་དང་། ཏང་གི་འགོ་ཁྲིད་རྒྱུན་འཁྱོངས། འཕེལ་རྒྱས་ཀྱི་སྟོབས་ཤུགས་གཅིག་སྒྲིལ། ཞབས་ཞུའི་ནུས་པ་མཐོར་འདེགས། མི་རིགས་ཀྱི་ཁྱད་ཆོས་དར་སྤེལ་གཏོང་བ་མཐའ་འཁྱོངས་བཅས་བྱས་ཏེ། གྲངས་ཉུང་མི་རིགས་ཀྱི་གསོ་རིག་གོམ་པ་བརྟན་པོའི་ངང་མཐུན་སྦྱོར་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས། ཐེངས་འདིའི་སྐབས་འདིའི་ཟབ་སྦྱོང་འཛིན་གྲྭས་རྒྱལ་ཁབ་ཀྱི་མི་རིགས་གསོ་རིག་སྲིད་ཇུས་བྱེ་བྲག་ཏུ་ལག་བསྟར་གནང་བ་ཞིག་ཡིན་ལ། སློབ་མ་ཚོས་ཟབ་སྦྱོང་གི་སྐབས་སུ་ཕན་ཚུན་བགྲོ་གླེང་བྱེད་པར་ཤུགས་སྣོན་པ་དང་སློབ་སྦྱོང་ནན་ཏན་བྱས་ཏེ། མི་རིགས་ཀྱི་གསོ་རིག་བྱ་གཞག་དེ་རང་ཉིད་ཀྱི་འགན་འཁྲི་རུ་བརྩིས་ནས་དར་སྤེལ་གཏོང་བ་དང་། རྒྱ་ཆེའི་མི་དམངས་ལ་བདེ་སྐྱིད་བསྐྲུན་ཐུབ་པའི་རེ་བ་ཡོད་ཅེས་གསུངས་པ་རེད།
ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་འཛིན་དགྲ་འདུལ་གྱིས་ཤིས་ཚིག་གསུང་སྐབས་བསྟན་དོན། སྐབས་སོ་སོའི་ཟབ་སྦྱོང་འཛིན་གྲྭའི་དགེ་རྒན་གྱི་སྟོབས་ཤུགས་ཆེ་བ་དང་། སློབ་མའི་ཡོང་ཁུངས་ཁྱབ་ཆེ་བ། སྤྱི་ཚོགས་ཀྱི་གདེང་འཇོག་བཅས་ལེགས་པས། བོད་ལྗོངས་དང་ཞིང་ཆེན་བཞིའི་བོད་རིགས་ས་ཁུལ་གྱི་བོད་ལུགས་གསོ་རིག་གི་རིག་གཞུང་ཞིབ་འཇུག་གི་ཆུ་ཚད་དང་ནད་ཐོག་སྨན་བཅོས་ཀྱི་ཆུ་ཚད་ལ་སྐུལ་འདེད་ལེགས་པོ་ཐེབས་ཡོད། དེ་དང་ཆབས་ཅིག་ཟབ་སྦྱོང་འཛིན་གྲྭ་འདི་རྒྱལ་ནང་གི་བོད་ལུགས་གསོ་རིག་ལས་རིགས་ཁྲོད་དུ་ཁས་ལེན་བྱེད་ཚད་ལོ་རེ་བཞིན་མཐོ་རུ་ཕྱིན་ཡོད་པ་དང་། སློབ་མའི་ཡོང་ཁུངས་དེ་བོད་ལྗོངས་དང་ཞིང་ཆེན་བཞིའི་བོད་ཁུལ་ནས་པེ་ཅིང་དང་ནང་སོག ཧྲན་ཞི་སོགས་ས་ཆ་མང་པོར་ཁྱབ་པ་དང་། ཟབ་སྦྱོང་ནང་ཞུགས་མཁན་སློབ་མ་མི་ཐེངས་ཆིག་སྟོང་ལྷག་ཟིན་པས། འཕེལ་རྒྱས་ཀྱི་རྣམ་པ་བཟང་པོ་ཞིག་མངོན་འདུག རྒྱལ་ཡོངས་བོད་ལུགས་གསོ་རིག་མཐོ་རིམ་ཟབ་སྦྱོང་འཛིན་གྲྭ་འདི་ཡང་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱིས་རྒྱལ་ཡོངས་ཀྱི་བོད་རིག་པའི་ཞིབ་འཇུག་ལ་སྣེ་ཁྲིད་དང་མཐུན་སྦྱོར་བྱེད་པའི་ནུས་པ་འདོན་སྤེལ་བྱས་ཏེ། བོད་ལྗོངས་དང་ཞིང་ཆེན་བཞིའི་བོད་རིགས་ས་ཁུལ་གྱི་གསོ་རིག་ལས་མིའི་ཞིབ་འཇུག་གི་ནུས་པ་ཆེ་རུ་གཏོང་བ་དང་བོད་ལུགས་གསོ་རིག་གི་བྱང་ཚད་མཐོ་རུ་གཏོང་བ། བོད་ལུགས་གསོ་རིག་བྱ་གཞག་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་བྱེད་ཐབས་གལ་ཆེན་ཞིག་ཏུ་གྱུར་ཡོད་ཅེས་བསྟན།
སྐབས་བཅུ་པའི་རྒྱལ་ཡོངས་བོད་ལུགས་གསོ་རིག་མཐོ་རིམ་ཟབ་སྦྱོང་འཛིན་གྲྭར་ཞུགས་པའི་སློབ་མ་རྣམ་པ།
དགྲ་འདུལ་གྱིས་ནན་གྱིས་བསྟན་དོན། ཐེངས་འདིའི་ཟབ་སྦྱོང་འཛིན་གྲྭར་སློབ་དཔོན་དགའ་བའི་རྡོ་རྗེ་ལགས་ཆེད་དུ་སློབ་མ་རྣམས་ལ་སློབ་ཁྲིད་བྱེད་པར་གདན་དྲངས་བ་ཡིན་ལ། གཙོ་བོ《ལག་ལེན་གཅེས་བཏུས་ཀུན་གསལ་སྣང་མཛོད་ཀྱི་དགོངས་འགྲེལ་དེལ་དམར་ཞལ་ལུང》ཞེས་པ་སློབ་ཁྲིད་གནང་རྒྱུ་རེད། འདིའི་དམིགས་ཡུལ་ནི་ཚང་མས་བར་ཐག་ཉེ་ས་ནས་ཆེད་མཁས་པའི་སློབ་ཁྲིར་ཉན་པ་དང་། ཐད་ཀར་ངོ་ཐུག་ནས་དྲི་གཞིའི་དོགས་པ་སེལ་བར་བྱས་ཏེ། ལས་སྒོའི་ཆུ་ཚད་མཐོ་རུ་གཏོང་བ་དང་། ཁྱོན་ཡོངས་ནས་ལས་སྒོའི་བྱང་ཚད་མཐོ་རུ་གཏོང་བ་བཅས་ཀྱི་ཆེད་དུ་ཡིན་པས། ཟབ་སྦྱོང་ནང་ཞུགས་མཁན་སློབ་མ་རྣམ་པས་གོ་སྐབས་ལ་གཅེས་སྤྲས་དང་། ནན་ནན་ཏིག་ཏིག རྣམ་འགྱུར་ཡང་དག་དང་སྤྲོ་སེམས་ཆེན་པོས་ཟབ་སྦྱོང་ཁྲོད་སློབ་སྦྱོང་ལ་གྲུབ་འབྲས་ཐོབ་པ་དང་སློབ་པ་གོ་ཆོད་པ་བཅས་ཡོང་བར་བྱེད་དགོས་ཞེས་གསུངས།