ཀྲུང་གོ་དང་ཧྥི་ལི་ཕིན་གྱིས་ཧྥི་ལི་ཕིན་གྱི་རྒྱ་ཡིག་དགེ་འོས་སློབ་གསོའི་རབ་འབྱམས་པ་མཉམ་དུ་གསོ་སྐྱོང་བྱ་རྒྱུ་ཡིན་པ།
སྤེལ་དུས 2019-12-11
ཡོང་ཁུངས། ཤིན་ཧྭ་གསར་འགྱུར་ཁང་།
རྩོམ་པ་པོ།
ཉེ་ཆར། ཧྥི་ལི་ཕིན་སློབ་གསོ་པུའུ་དང་ཀྲུང་གོ་ཁུང་ཙི་སློབ་གླིང་སྤྱི་ཁྱབ་པུའུ་ཡིས་མ་ནི་ལར་གྲོས་མཐུན་ལ་མིང་རྟགས་བཀོད་ནས་ཕྱོགས་གཉིས་པོའི་མཉམ་ལས་རྣམ་གྲངས་ལག་ལེན་བསྟར་རྒྱུའི་མོས་མཐུན་བྱས་པ་དང་། ཧྥི་ལི་ཕིན་གཞུང་བཙུགས་སློབ་འབྲིང་གི་ཡུལ་དེ་གའི་རྒྱ་ཡིག་དགེ་རྒན་བདམས་ནས་ཧྥི་ལི་ཕིན་དུ་རྒྱ་ཡིག་དགེ་འོས་སློབ་གསོའི་རབ་འབྱམས་པའི་སློབ་ཚན་སློབ་སྦྱོང་བྱེད་དུ་བཅུག་སྟེ། རྒྱལ་ཁབ་དེ་གའི་རྒྱ་ཡིག་སློབ་ཁྲིད་རྒྱུན་མཐུད་འཕེལ་རྒྱས་འགྲོ་རྒྱུ་སྐུལ་འདེད་གཏོང་རྒྱུ་རེད།
གྲོས་མཐུན་གཞིར་བཟུང་། འབྱུང་འགྱུར་ལོ་5ཡི་ནང་ཧྥི་ལི་ཕིན་གཞུང་བཙུགས་སློབ་འབྲིང་གིས་ཡུལ་དེ་གའི་རྒྱ་ཡིག་དགེ་རྒན་300བདམས་ནས་ཀྲུང་གོ་ཁུང་ཙི་སློབ་གླིང་སྤྱི་ཁྱབ་པུའུ་དང་ཧྥི་ལི་ཕིན་ཧུང་ཤིས་ལི་ཧྲི་སློབ་ཆེན་གྱིས་མཉམ་དུ་སློབ་གྲྭ་དེར་བཙུགས་པའི་རྒྱ་ཡིག་དགེ་འོས་སློབ་གསོའི་རབ་འབྱམས་པའི་ཆེད་ལས་ལོ་གཉིས་སློབ་སྦྱོང་བྱ་རྒྱུ་དང་། དེའི་རིང་ཧྥུའུ་ཅན་དགེ་འོས་སློབ་ཆེན་དུ་ལོ་ཕྱེད་རིང་སློབ་སྦྱོང་བྱེད་པར་བསྐྱོད་རྒྱུ་དང་། རབ་འབྱམས་པའི་ཡོན་ཚད་རག་རྗེས་དེ་སྔའི་སློབ་འབྲིང་དུ་མུ་མཐུད་སློབ་ཁྲིད་བྱེད་པར་ལོག་རྒྱུ་རེད།
དེ་ཉིན་ཧྥི་ལི་ཕིན་སློབ་གསོ་པུའི་པུའུ་ཀྲང་ལའེ་ཨང་ནོར·པུའུ་ལི་ཨའོ་ནི་སིས། ཉེ་བའི་ལོ་ཤས་རིང་ཧྥི་ཀྲུང་རྒྱལ་ཁབ་གཉིས་པོའི་མཛའ་གྲོགས་འབྲེལ་བ་རྒྱུན་ཆད་མེད་པར་འཕེལ་རྒྱས་ཕྱིན་པ་དང་བསྟུན་ནས་ཧྥི་ལི་ཕིན་གྱི་གཞོན་ནུ་དེ་བས་མང་བ་ཞིག་གིས་རྒྱ་ཡིག་སློབ་སྦྱོང་བྱེད་པའི་གལ་ཆེན་རང་བཞིན་ཤེས་རྟོགས་ཐུབ་ཡོད། ལག་ལེན་བསྟར་ཉེར་ཡོད་པའི་མཉམ་ལས་རྣམ་གྲངས་ཀྱིས་ཧྥི་ལི་ཕིན་གྱི་ཡུལ་དེ་གའི་རྒྱ་ཡིག་དགེ་རྒན་གྱི་ཆུ་ཚད་མཐོ་རུ་གཏོང་རྒྱུར་དམིགས་པ་དེ་ཧྥི་ལི་ཕིན་གྱི་རྒྱ་ཡིག་སློབ་ཁྲིད་ཀྱི་ངོས་ནས་བརྗོད་ན་གལ་ཧ་ཅང་ཆེན་པོ་ཡོད་ཅེས་བརྗོད་པ་རེད།
ཧྥི་ལི་ཕིན་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་གི་རིག་གནས་ཚན་ཙན་ཐན་ཧྲན་ཐིང་གིས། གསོ་སྦྱོང་རྣམ་གྲངས་འདིས་ཧྥི་ལི་ཕིན་གཞུང་བཙུགས་སློབ་འབྲིང་གི་རྒྱ་ཡིག་སློབ་ཁྲིད་འཕེལ་རྒྱས་ལ་སྔར་བས་སྐུལ་འདེད་ཐུབ་ནས་ཀྲུང་གོའི་རིག་གནས་ཤེས་རྟོགས་བྱེད་པའི་ཧྥི་ལི་ཕིན་གྱི་གཞོན་ནུ་དེ་བས་མང་བའི་བློ་སྒོ་འབྱེད་རྒྱུ་རེད་ཅེས་བརྗོད་པ་རེད།
རྩོམ་སྒྲིག་པ། བདེ་སྒྲོལ།