ལོ་གསར་པ་ནས་བོད་ཀྱི་སྨན་བཅོས་འགན་བཅོལ་གཅིག་གྱུར་བྱེད་རྩིས་འདུག
སྤེལ་དུས 2019-12-31
ཡོང་ཁུངས། བོད་ལྗོངས་ཉིན་ཚགས་ལས།
རྩོམ་པ་པོ།
2019ལོར་རང་ལྗོངས་སུ་གྲོང་ཁྱེར་དང་གྲོང་གསེབ་ཀྱི་ཡུལ་མིའི་གཞི་རྩའི་སྨན་བཅོས་འགན་བཅོལ་ལམ་ལུགས་གཅིག་གྱུར་དངོས་སུ་བྱེད་ཆེད། རང་སྐྱོང་ལྗོངས་མི་དམངས་སྲིད་གཞུང་གཞུང་ལས་ཐིང་གིས་2019ལོའི་ཟླ་12པར《གྲོང་ཁྱེར་དང་གྲོང་གསེབ་ཀྱི་ཡུལ་མིའི་གཞི་རྩའི་སྨན་བཅོས་འགན་བཅོལ་ལམ་ལུགས་ཟླ་སྒྲིལ་གཏོང་བའི་ལས་དོན་སྔར་བས་ཡག་པོ་སྒྲུབ་དགོས་པའི་སྐོར་གྱི་བརྡ་ཐོ》བཀྲམ་ཡོད། 《བརྡ་ཐོར》ཁྱབ་ཁྱོན་དང་། མ་རྩ་གྲབས་གསོག་གི་སྲིད་ཇུས། ཐོབ་ཐང་འགན་ལེན། སྨན་བཅོས་འགན་བཅོལ་གྱི་དཀར་ཆག གནས་གཏན་འཁེལ་གྱི་དོ་དམ། ཐེབས་རྩའི་དོ་དམ་བཅས་དྲུག་ཟླ་སྒྲིལ་གཏོང་རྒྱུ་དང་ཆབས་ཅིག 2020ལོའི་ཟླ་1ཚེས་1ཉིན་ནས་བཟུང་གྲོང་ཁྱེར་དང་གྲོང་གསེབ་ཀྱི་ཡུལ་མིའི་གཞི་རྩའི་སྨན་བཅོས་འགན་བཅོལ་གྱི་ལམ་ལུགས་གཅིག་གྱུར་བྱས་ནས་དངོས་སུ་ལག་ལེན་བསྟར་རྒྱུའི་གཏན་འབེབས་ཁ་གསལ་བྱས་ཡོད་པ་རེད།
གཤམ་གྱི་ཐོབ་ཐང་དང་སྲིད་ཇུས་དག་ལོངས་སུ་སྤྱོད་ཆོག་གི་འདུག
ཤེས་རྟོགས་བྱུང་བར་གཞིགས་ན། 《བརྡ་ཐོའི》གཏན་འབེབས་གཞིར་བཟུང་། རང་ལྗོངས་ཀྱི་གྲོང་ཁྱེར་དང་གྲོང་གསེབ་ཀྱི་ཡུལ་མི་འགན་བཅོལ་ལ་ཞུགས་མཁན་ཚོས་དངུལ་སྐྱེལ་བའི་རིམ་པ་མཐོ་ཤོས་བདམས་ཚེ། གཤམ་གྱི་ཐོབ་ཐང་དང་སྲིད་ཇུས་ལོངས་སུ་སྤྱོད་ཆོག་གི་འདུག
1.སྨན་ཁང་དུ་བསྡད་ནས་ཐོན་པའི་ལུགས་མཐུན་སྨན་བཅོས་ཀྱི་འགྲོ་སོང་རྩིས་ཞུ་མཐོ་ཤོས་ཀྱི་སྡུར་ཚད་90%ཡན་ཟིན་པ་བྱ་རྒྱུ།
2.སྒོ་བསྟེན་སྨན་བཅོས་སྡེ་ཁག་ནས་དམིགས་བསལ་ནད་བལྟས་ནས་ཐོན་པའི་ལུགས་མཐུན་སྨན་བཅོས་ཀྱི་འགྲོ་སོང་རྩིས་ཞུ་མཐོ་ཤོས་ཀྱི་སྡུར་ཚད་90%ཟིན་པ་བྱ་རྒྱུ།
3.སྤྱིར་བཏང་གི་སྒོ་བསྟེན་སྨན་བཅོས་སྡེ་ཁག་ནས་ཐོན་པའི་ལུགས་མཐུན་སྨན་བཅོས་ཀྱི་འགྲོ་སོང་རྩིས་ཞུའི་སྡུར་ཚད་60%ཟིན་པ་བྱ་རྒྱུ།
4.གྲོང་ཁྱེར་དང་གྲོང་གསེབ་ཀྱི་ཡུལ་མིའི་གཞི་རྩའི་སྨན་བཅོས་འགན་བཅོལ་ནས་ལོ་འཁོར་མོར་དངུལ་མང་ཤོས་སྒོར་ཁྲི་6སྤྲོད་རྒྱུ།
5.དམིགས་བསལ་དཀའ་ངལ་ཡོད་པའི་མི་ཚོགས་ལ་དམིགས་ཏེ་མི་སྒེར་འགན་བཅོལ་ལ་ཞུགས་པའི་ཁ་གསབ་ཀྱི་སྲིད་ཇུས་དང་། དབུལ་པོ་སྨན་ཁང་དུ་སྡོད་པ་དང་སྒོ་བསྟེན་སྨན་བཅོས་སྡེ་ཁག་ནས་དམིགས་བསལ་ནད་བལྟས་པའི་འགྲོ་སོང་རྩིས་ཞུའི་སྡུར་ཚད་བརྒྱ་ཆའི་གྲངས་5མཐོ་རུ་གཏོང་བ་སོགས་ཀྱི་གཟིགས་སྐྱོང་སྲིད་ཇུས་ལག་ལེན་བསྟར་རྒྱུ།
6.གྲོང་ཁྱེར་དང་གྲོང་གསེབ་ཀྱི་སྦྲུམ་མ་ཕྲུ་གུ་བཙའ་བ་དང་ཕྲུ་གུ་དམར་འབྱར་གྱི་མྱུར་སྐྱོབ་སྨན་བཅོས་ཀྱི་གྲོན་དངུལ་གཏན་འབེབས་ལྟར་འགྲོ་སོང་ཡོངས་རྫོགས་རྩིས་ཞུ་བྱ་རྒྱུ་བཅས་རེད།
རྩོམ་སྒྲིག་པ།སྣང་རྡོར།