རང་སྐྱོང་ལྗོངས་གཡོས་སྦྱོར་བཟའ་བཏུང་ཟ་ཁང་མཐུན་ཚོགས་ཀྱིས་ཆབ་མདོ་གྲོང་ཁྱེར་གྱི་ཞིང་འབྲོག་པ་དབུལ་པོར་རོགས་སྐྱོར་བྱས་པ།
སྤེལ་དུས 2019-12-13
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། བཀྲ་ཤིས་རྒྱལ་གྱིས་བསྒྱུར།
ཀྲུང་གོའི་བོད་ལྗོངས་དྲ་བའི་འཕྲིན། ཟླ་10པའི་ཟླ་དཀྱིལ་དུ། རང་སྐྱོང་ལྗོངས་གཡོས་སྦྱོར་བཟའ་བཏུང་ཟ་ཁང་མཐུན་ཚོགས་ཀྱི་ཚོགས་གཙོ་ཁྲུའུ་ལི་ཆུན་གྱིས་ལས་བྱེད་མི་སྣ་དང་རྩལ་ནུས་སློབ་གསོའི་དགེ་རྒན་བཅས་པའི་མི་སྣ་10ལྷག་ཙམ་སྣེ་ཁྲིད་དེ་ཆབ་མདོ་གྲོང་ཁྱེར་བྲག་གཡབ་རྫོང་དང་གོ་འཇོ་རྫོང་དུ་མཐུན་ཚོགས་ཀྱིས་སྒྲུབ་འགན་ཁུར་བའི་ཀྲུང་དབྱང་ནོར་སྲིད་བོད་རང་སྐྱོང་ལྗོངས་གཡོས་སྦྱོར་བཟའ་བཏུང་ཟ་ཁང་ལས་རིགས་མཐུན་ཚོགས་ཀྱིས་ཆབ་མདོ་གྲོང་ཁྱེར་བྲག་གཡབ་རྫོང་དང་གོ་འཇོ་རྫོང་གི་མཐའ་མཚམས་ཞིང་འབྲོག་དབུལ་པོའི་བོད་བཟོའི་བཟའ་བཏུང་ལས་གཏོད་སློབ་གསོ་འཕེལ་རྒྱས་ཀྱི་དཔེ་སྟོན་རྣམ་གྲངས་ལ་རོགས་སྐྱོར་བྱས་པ་རེད།
ཆབ་མདོ་གྲོང་ཁྱེར་བུད་མེད་མཉམ་འབྲེལ་ལྷན་ཚོགས་ཀྱི་ཏང་ཙུའུ་ཡི་ཧྲུའུ་ཅི་གཞོན་པ། ཀྲུའུ་ཞི་ཝང་དབྱིང་ཧུང་སྐུ་དངོས་ཀྱིས་བྲག་གཡབ་རྫོང་དང་གོ་འཇོ་རྫོང་དུ་ལས་དོན་མཛུབ་ཁྲིད་གནང་བར་ཕེབས་རོགས་བྱས་པ་དང་། རྫོང་དེ་གཉིས་ཀྱི་རྫོང་ཨུད་དང་རྫོང་སྲིད་གཞུང་། རྫོང་བུད་མེད་མཉམ་འབྲེལ་ལྷན་ཚོགས། རྫོང་སྤྱི་ཁྱབ་བཟོ་ཚོགས། མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཅུས་བཅས་ཀྱི་འགོ་ཁྲིད་ཀྱིས་ཚད་མཐོའི་མཐོང་ཆེན་གནང་ཞིང་ལས་དོན་མཐུན་སྦྱོར་གནང་པར་བརྟེན་རྣམ་གྲངས་བདེ་བླག་ངང་ལག་བསྟར་ཐུབ་པར་ཁག་ཐེག་གནང་པ་རེད།
ད་རེས་ཀྲུང་དབྱང་ནོར་སྲིད་བོད་རང་སྐྱོང་ལྗོངས་གཡོས་སྦྱོར་བཟའ་བཏུང་ཟ་ཁང་མཐུན་ཚོགས་ཀྱིས་ཆབ་མདོ་གྲོང་ཁྱེར་བྲག་གཡབ་རྫོང་དང་གོ་འཇོ་རྫོང་གི་མཐའ་མཚམས་ཞིང་འབྲོག་དབུལ་པོའི་བོད་བཟོའི་བཟའ་བཏུང་ལས་གཏོད་སློབ་གསོ་འཕེལ་རྒྱས་ཀྱི་དཔེ་སྟོན་རྣམ་གྲངས་ལ་ཞུགས་པའི་སློབ་མ་ཁྱོན་100ཡོད་ཅིང་། དེ་དག་ནི་ཡིག་ཚགས་དང་གཱ་བཟོས་པའི་དུད་ཚང་དང་ཡུལ་གཞན་དུ་གནས་སྤོས་བྱས་པའི་ཞིང་འབྲོག་པ་ཡིན་པ་དང་ཁོ་ཚོར་དུས་ཡུན་ཉིན་15ཡི་རྨང་གཞིའི་སློབ་གསོ་དང་ཉིན་30ཡི་དོན་དངོས་བཀོལ་སྤྱོད་བྱེད་སྟངས། དུད་ཚང་དུ་བསྐྱོད་དེ་སློབ་སྦྱོང་ ལ་མཛུབ་ཁྲིད་བཅས་བྱས་པ་རེད།
ཁྲུའུ་ལི་ཆུན་གྱིས་འགོ་ཚུགས་མཛད་སྒོའི་ཐོག ད་རེས་ཀྱི་དཔེ་སྟོན་རྣམ་གྲངས་ལག་བསྟར་བྱས་པ་བརྒྱུད་བྲག་གཡབ་རྫོང་དང་གོ་འཇོ་རྫོང་གི་མཐའ་མཚམས་ཀྱི་ཞིང་འབྲོག་མང་ཚོགས་དབུལ་པོར་ཆེད་ལས་དང་བརྒྱུད་རིམ་ལྡན་པའི་སློབ་སྦྱོང་གི་གོ་སྐབས་ཐོབ་པ་དང་། དུད་ཚང་དབུལ་པོའི་བསམ་བློ་བཅོས་སྒྱུར་ལ་རོགས་རམ་བྱེད་པ། ལས་གཏོད་ཀྱི་འདུན་པ་ཡོད་པའི་ཞིང་འབྲོག་པས་ལས་གཏོད་བྱ་རྒྱུར་སྣེ་ཁྲིད་བཅས་བྱས་ནས་ཁོང་ཚོར་ལག་རྩལ་སྣ་གཅིག་ཁོང་དུ་ཆུད་པར་བྱ་རྒྱུ་དང་། ཕྱུག་འགྱུར་གྱི་ལམ་བུ་རྒྱ་ཆེར་བཏང་བ་མ་ཟད། ཉེ་འཁོར་གྱི་མང་ཚོགས་དབུལ་པོ་ས་ཆ་དེ་རང་དུ་ལས་ཞུགས་ཐུབ་རྒྱུར་སྐུལ་ཁྲིད་བྱས་ཏེ་དབུལ་སྐྱོར་གནད་འཁེལ་ཐུབ་པ་བྱ་རྒྱུ་ཡིན་ཞེས་བསྟན་པ་རེད།