བཀྲ་ཤིས་ལྷུན་པོ་དགོན།
སྤེལ་དུས 2019-12-16
ཡོང་ཁུངས། ཡོངས་འཛིན།
རྩོམ་པ་པོ།
1 ངོ་སྤྲོད།
གདན་ས་བཀྲ་ཤིས་ལྷུན་པོ་ནི་གཞིས་རྩེ་གྲོང་ཁྱེར་གྱི་ནུབ་ངོས་ཉེ་སྐོར་ཉི་མ་རིའི་ལྷོ་འདབས་སུ་ཆགས་ཤིང་། དེ་ནི་གཙང་ཁུལ་གྱི་དགེ་ལུགས་པའི་དགོན་སྡེ་ཆེ་ཤོས་ཡིན། གདན་ས་དེ་ནི་རྒྱལ་བ་ཙོང་ཁ་པའི་ཞལ་སློབ་ཏཱ་ལའི་བླ་མ་སྐུ་ཕྲེང་དང་པོ་རྒྱལ་བ་དགེ་འདུན་གྲུབ་ཀྱིས་སྤྱི་ལོ1447ལོར་ཐོག་མར་ཕྱག་བཏབ། རྒྱལ་བ་དགེ་འདུན་གྲུབ་ནི་སྤྱི་ལོ1391ལོར་གཙང་གི་སྲས་གུར་མེ་ཞེས་པའི་འབྲོག་ཁྱིམ་དུ་འཁྲུངས། སྐུ་གཞོན་ནུའི་དུས་ནས་གསན་བསམ་སློབ་གཉེར་ལ་སྦྱང་བརྩོན་ཤིན་ཏུ་ཆེ། སྐུ་ནར་སོན་ནས་རྗེ་ཙོང་ཁ་པ་སོགས་རྩ་བའི་བླ་མ་མང་པོ་ལས་མདོ་སྔགས་ཀྱི་ཆོས་མང་དུ་གསན་ཞིང་རིག་པའི་གནས་བཅུར་མཁས་པའི་ཆོས་ལུགས་ཐད་ཀྱི་གྲགས་ཅན་མི་སྣར་གྱུར། སྤྱི་ལོ1447ལོར་ཕྱུག་གཞུང་དར་རྒྱས་པ་དཔོན་བསོད་ནམས་དཔལ་བཟང་གིས་མཐུན་རྐྱེན་སྦྱར་ཏེ་ས་ཡི་དགེ་བཅུ་སོགས་ཚང་བའི་ས་དཔྱད་ཁྱད་པར་ཅན་དུ་ལྡན་པའི་གནས་དེར་བཀྲ་ཤིས་ལྷུན་ཆོས་སྡེ་འདི་ཉིད་ཐོག་མར་ཕྱག་བཏབ་ནས་སྔ་རྗེས་སུ་ལོ་བཅུ་གཉིས་འགོར། རྒྱལ་བ་དགེ་འདུན་གྲུབ་པས་ཆོས་སྡེ་འདིའི་ཁྲི་པ་དང་པོ་མཛད་ནས་སྤྱི་ལོ1959ལོ་བར་ཁྱོན་བསྡོམས་ཁྲི་རབས་ཉི་ཤུ་རྩ་གཅིག་འཕོས། སྤྱི་ལོ1600ལོར་པཎ་ཆེན་སྐུ་ཕྲེང་བཞི་པ་བློ་བཟང་ཆོས་ཀྱི་རྒྱལ་མཚན་གྱིས་ཆོས་སྡེ་འདི་རྒྱས་སྐྲུན་མཛད་པ་ནས་བཟུང་པན་ཆེན་སྐུ་ཐོག་རིམ་བྱོན་གྱིས་ཉམས་གསོ་རྒྱས་སྐྲུན་མཛད་ནས་དེང་གི་གཞི་ཁྱོན་འདི་ཙམ་བྱུང་ལ་། གསེར་འོད་ཆེམ་ཆེམ་དུ་འཕྲོ་བའི་གསེར་ཕིབས་དང་། རྒྱལ་མཚན། གཉྫིར་བཅས་ཀྱི་སྟེང་དུ་མཛེས་པའི་རྣམ་པ་ནི་བརྒྱ་བྱིན་རྣམ་པར་རྒྱལ་བའི་ཁང་བཟང་ཕྱོགས་འདིར་འཕོས་པ་ལྟ་བུའི་བརྗིད་ཉམས་དང་ལྡན་ཞིང་། ལྟ་བས་ཆོག་མི་ཤེས་པ་ཞིག་དང་། གཞིས་རྩེ་གྲོང་ཁྱེར་གྱི་ཡུལ་ལྗོངས་ཀུན་ནས་མཛེས་པའི་རྒྱན་དུ་གྱུར་ཅིང་། གཞིས་རྩེའི་ནུབ་ངོས་ཉི་མ་གདོང་གི་རི་རྒྱུད་རྒྱབ་རི་གླང་ཆེན་འགྱིངས་པ་དང་འདྲ་བའི་ལྷོ་འདབས་སུ་རྔམ་བརྗིད་དང་ལྡན་པར་གནས་ཡོད།
2 བཟོ་བཀོད།
བཀྲ་ཤིས་ལྷུན་དགོན་དུ་ཤར་རྩེ་དང་། དཀྱིལ་ཁང་། ཐོས་བསམ་གླིང་། སྔགས་པ་སོགས་གྲྭ་ཚང་བཞི་ཡོད་ཁོངས་ནས་སྔགས་པ་གྲྭ་ཚང་ནི་པཎ་ཆེན་སྐུ་ཕྲེང་བཞི་པ་བློ་བཟང་ཆོས་ཀྱི་རྒྱལ་མཚན་གྱིས་དུས་ཕྱིས་ཕྱག་བཏབ་པ་ཞིག་ཡིན་པ་དང་། གྲྭ་ཚང་སོ་སོའི་སྔར་ཡོད་མི་ཚན་ཉེར་དྲུག་གི་སྟེང་དུ་རྗེ་དིའི་སྐུ་དུས་སུ་གསར་འཕར་མི་ཚན་སུམ་ཅུ་སོ་གཉིས་བྱུང་བ་བཅས་བསྡོམས་མི་ཚན་ལྔ་བཅུ་ང་བརྒྱད་ཡོད་པ་དང་། ལྷ་ཁང་གསར་བཞེངས་ཐད་ལི་མ་ལྷ་ཁང་། བཀའ་འགྱུར་ལྷ་ཁང་། ཡང་རྩེ་ལྷ་ཁང་། མངོན་དགའ་ལྷ་ཁང་། རྒྱ་ནག་ལྷ་ཁང་། རིན་ཆེན་ལྷ་ཁང་། ངུར་སྨྲིག་ལྷ་ཁང་། པཎ་གྲུབ་ལྷ་ཁང་། དགའ་གདོང་ལྷ་ཁང་། བླ་མ་ལྷ་ཁང་། གཡབ་བར་ལི་མ་ལྷ་ཁང་ནུབ་མ། གཡབ་བར་ལི་མ་ལྷ་ཁང་དབུས་མ། གཡབ་བར་ལི་མ་ལྷ་ཁང་ཤར་མ། གཡབ་བར་དངུལ་གདུང་ལྷ་ཁང་སོགས་དང་། གཞན་ཡང་དུས་གསུམ་སངས་རྒྱས་ཀྱི་གོས་སྐུ་ཆེན་མོ་གསུམ་དང་། དབྱེན་སྡུམ་མཆོད་རྟེན་ཤར་མ་དང་། བཀག་སྣེ་སྒོ་བཞི་བཅས་ཀྱང་གསར་བཞེངས་མཛད་པས་དུས་དེ་ནས་བཟུང་ཆོས་སྡེ་འདི་ཉིད་པཎ་ཆེན་རིན་པོ་ཆེའི་ཆོས་བཞུགས་བླ་བྲང་དུ་གྱུར། ཆོས་སྡེ་འདིའི་གྲྭ་གྲངས་ཐད་དར་རྒྱས་ཆེ་ཤོས་ཀྱི་སྐབས་སུ་སྒྲིག་བཞུགས་དགེ་འདུན་ཞལ་གྲངས་བཞི་སྟོང་ལྷག་ཙམ་ཟིན།
3 རྟེན་གཙོ།
དགོན་པ་འདིའི་འདུ་ཁང་གི་རྒྱ་ཁྱོན་ཀ་བ་བཞི་བཅུ་ཞེ་བརྒྱད་ཡོད་པ་དང་། དེའི་གཙང་ཁང་དབུས་མར་རྗེ་དགེ་འདུན་གྲུབ་པས་བལ་བོད་ཀྱི་བཟོ་བོ་བཀུག་ནས་བཞེངས་པའི་གསེར་ཟངས་ཀྱི་ཐུབ་དབང་སྐུ་ཚད་སྤྱི་ཁྲེ་ལྔ་ལྷག་ཙམ་ཡོད་པ་བཞུགས་ཤིང་། ནང་བཞུགས་སུ་སངས་རྒྱས་ཤཱཀྱ་ཐུབ་པའི་རིང་བསྲེལ་དང་། ཙོང་ཁ་པའི་དབུ་སྐྲ། རྗེ་དགེ་འདུན་གྲུབ་པའི་རྩ་བའི་བླ་མ་ཤེས་རབ་སེང་གེའི་དབུ་ཐོད་བཅས་ཡོད། དེའི་གཡས་གཡོན་དུ་ཉེ་སྲས་བརྒྱད་ཀྱི་འཇིམ་སྐུ་བཞུགས་པ་དེ་ནི་བཀྲ་ཤིས་ལྷུན་དགོན་གྱི་རྟེན་གཙོའི་གྲས་ཡིན། དེའི་གཡས་ཀྱི་བྱམས་ཁང་དུ་རྟེན་གཙོ་གསེར་ཟངས་ལས་གྲུབ་པའི་རྒྱལ་བ་མི་ཕམ་མགོན་པོ་སྐུ་ཚད་སྤྱི་ཁྲེ་བཅུ་གཉིས་དང་ལྡན་པ། ནང་བཞུགས་སུ་རྒྱལ་བ་ཤཱཀྱ་ཐུབ་པས་མཚོན་པའི་དམ་པ་མང་པོའི་རིང་བསྲེལ་ལྡན་པ་བཞུགས། བྱམས་མགོན་གྱི་གཞོགས་གཉིས་སུ་རྗེ་དགེ་འདུན་གྲུབ་པའི་ཕྱག་བཟོའི་སྨན་འཇིམ་གྱི་སྤྱན་རས་གཟིགས་དང་། འཇམ་དབྱངས་བཞེངས་སྐུ་ཐོག་ཚད་མ་གཉིས་བཞུགས། གཡོན་གྱི་སྒྲོལ་མ་ལྷ་ཁང་ནང་རྟེན་གཙོ་གསེར་ཟངས་ཀྱི་སྒྲོལ་དཀར་ཡིད་བཞིན་འཁོར་ལོའི་སྣང་བརྙན་སྐུ་ཚད་སྤྱི་ཁྲེ་གསུམ་ལྡན་མ་བཞུགས་ཤིང་། དེའི་ནང་བཞུགས་སུ་སངས་རྒྱས་བྱང་སེམས་མང་པོའི་རིང་བསྲེལ་དང་། སྒྲོལ་མ་རང་བྱོན་མཐོ་གང་པ་བྱིན་རླབས་ཅན་ཞིག་བཅས་བཞུགས།
4 བྱམས་ཁང་ཆེན་མོ།
དགོན་པའི་ནུབ་ངོས་བྱམས་ཁང་ཆེན་མོ་མཐོ་ཚད་སྤྱི་ཁྲེ་སུམ་ཅུ་ལྷག་ཙམ་བྱས་པ་ཞིག་ཡོད་པ་དེར་རྒྱ་ཁྱོན་སྤྱི་ཁྲེ་གྲུ་བཞི་མ་བརྒྱད་བརྒྱ་དྲུག་ཅུ་ལྷག་ཙམ་ཡོད། བྱམས་ཁང་ཆེན་མོའི་རྟེན་གཙོར་གསེར་ཟངས་ཀྱི་རྗེ་བཙུན་བྱམས་པ་མགོན་པོ་སྐུ་ཚད་སྤྱི་ཁྲེ་ཉི་ཤུ་རྩ་དྲུག་དང་སྐར་མ་བདུན་ཅུ་ལྡན་པ་བཞུགས་ལ་དེའི་ཕྱག་མགོ་གཅིག་པུར་རིང་ཚད་སྤྱི་ཁྲེ་གསུམ་ཙམ་དང་། ཕྱག་དཔུང་གཡས་གཡོན་བར་གྱི་ཕྲག་ཞེང་ལ་སྤྱི་ཁྲེ་བཅུ་གཅིག་དང་ཕྱེད་ཙམ་ཟིན། དེའི་དབུ་དཔལ་གྱི་དཀྱིལ་དུ་རིན་ཆེན་རྡོ་རྗེ་ཕ་ལམ་གྱི་ཕྲ་ཚོམ་སྒོ་ང་ཙམ་ཞིག་ཡོད་པ་དང་། སྐུ་གཟུགས་ཧྲིལ་པོར་གཡུ་མུ་ཏིག་དང་། གཟི་བྱུ་རུ་ལ་སོགས་པའི་རིན་པོ་ཆེའི་ཕྲ་རྒྱན་བསམ་གྱིས་མི་ཁྱབ་པ་ཡོད་ལ། འཛམ་གླིང་ཡོངས་ན་དཔེ་ཟླ་བཙལ་དུ་མེད་པ་དེ་ལྟ་བུའི་རྗེ་བཙུན་བྱམས་པ་མགོན་པོའི་སྐུ་བརྙན་འདི་ནི་པཎ་ཆེན་སྐུ་ཕྲེང་དགུ་པ་ཆོས་ཀྱི་ཉི་མས་རབ་བྱུང་བཅོ་ལྔ་པའི་ཤིང་སྟག་སྤྱི་ལོ1914ལོར་བཞེངས་མཛད་ཅིང་། བཞེངས་ཡུན་ལོ་བཞི་འགོར་བ་དང་སྐུ་རྒྱུར་ཟངས་དམར་འདེགས་རྒྱ་སུམ་འབུམ་ཉིས་ཁྲི་ལྷག་ཙམ་སྤྱད་པ་སོགས་གསེར་ཐང་ལ་ཕབ་ན་རྒྱུ་གྲོན་གསེར་རྒྱ་མ་ལྔ་བརྒྱ་ལྔ་བཅུ་ལྷག་ཙམ་དུས་ཡུན་ལོ་གསུམ་ལ་ལེགས་གྲུབ་བྱུང་བ་རེད།
5 མཆོད་ཁང་སྲིད་གསུམ་རྣམ་རྒྱལ།
མཆོད་ཁང་སྲིད་གསུམ་རྣམ་རྒྱལ་དེ་ཉིད་གསར་བཞེངས་བྱ་ཆེད་རྒྱལ་སྲིད་སྤྱི་ཁྱབ་ཁང་གིས་ཆེད་དངུལ་སྒོར་ཁྲི་ཚོ་དྲུག་སྟོང་བཞི་བརྒྱ་བཅུ་མེད་དྲུག་དང་། གསེར་སྤྱི་རྒྱ་དྲུག་བརྒྱ་བཅུ་བཞི་དང་། དངུལ་སྤྱི་རྒྱ་ཉིས་བརྒྱ་བདུན་ཅུ་དོན་ལྔ། དེ་བཞིན་རང་སྐྱོང་ལྗོངས་སྲིད་གཞུང་དང་། འབྲེལ་ཡོད་ཚན་པས་མ་དངུལ་དང་དངོས་ཟོག་འཛུགས་སྐྲུན་རྒྱུ་ཆ་སོགས་འགྲོ་གྲོན་འབོར་ཆེན་བཏང་ཡོད་ལ་རྒྱ་ཆེའི་ཆོས་དད་སེར་སྐྱ་མང་ཚོགས་ཀྱིས་ཀྱང་རང་མོས་ངང་ཞལ་འདེབས་འབུལ་བ་བསམ་གྱིས་མི་ཁྱབ་པ་ཕུལ་ཡོད་པ་ལས་གསར་བཞེངས་བྱས་པ་ཡིན་ཞིང་རྒྱལ་ཁབ་བཙུགས་པ་ནས་ཆོས་ལུགས་ཀྱི་གཙོ་འཛིན་ལ་བཟོ་སྐྲུན་བྱེད་པའི་གསེར་གྱི་མཆོད་སྡོང་ཨང་དང་པོ་ཡིན་པ་དང་། བཟོ་སྐྲུན་ལས་དོན་ལ་ཏང་དང་མི་དམངས་སྲིད་གཞུང་གིས་མཐོང་ཆེན་དང་དོ་འཁུར་ཧ་ཅང་ཆེན་པོ་གནང་ཐོག་འབྲེལ་ཡོད་འགོ་ཁྲིད་ཚོགས་ཆུང་དང་ལས་བཟོ་རྣམས་ཀྱིས་ཀྱང་འབད་པ་ལྷོད་མེད་བྱས་པ་བརྒྱུད་བརྗིད་ཉམས་ལྡན་པའི་གདུང་རྟེན་མཆོད་ཁང་དེ་ལྟ་བུ་བཞེངས་ཐུབ་པ་བྱུང་བ་རེད། མཆོད་ཁང་སྲིད་གསུམ་རྣམ་རྒྱལ་གྱི་སྐུ་ཕྲེང་བཅུ་པའི་གདུང་རྟེན་གྱི་གཟུངས་གཞུག་ཏུ་ཆོས་ལུགས་ཀྱི་སྲོལ་རྒྱུན་གཞིར་བཟུང་གྲོ་དང་འབྲས་ཚྭ་ཇ་ཤིང་འབྲས་སོགས་ཟས་སྣ་རིགས་དང་། ཙནྡན་དཀར་པོ་དང་། རྩ་ཆེའི་སྨན་རྒྱུ། གཞན་དག་གོས་ཆེན་གྱི་རིགས་དང་། དར་ལྕོག་ཚོས་སྣ་ལྔ་ལྡན། གྲུ་རྩི་སོགས་དང་། གསེར་ཚགས་བརྒྱབ་པའི་ཆིབས་སྒ་ཆ་ཚང་། ཤྭ་རྭ་དང་། བསེ་རུའི་རྭ་ཅོ། རྒྱ་དངུལ་རྟ་རྨིག་མ། རིན་པོ་ཆེ་སྐུ་འཚོ་བཞུགས་སྐབས་ཀྱི་ན་བཟའ་དང་། མཆོད་ཆས་ཆ་ཚང་། རྒྱལ་བའི་བཀའ་བསྟན་འགྱུར་བསྡོམས་པོ་ཏི་ཆིག་སྟོང་བརྒྱད་བརྒྱ་ལྷག་ཙམ། པཎ་ཆེན་སྐུ་ཕྲེང་རིམ་བྱོན་གྱི་གསུང་འབུམ་པོ་ཏི་ཆིག་སྟོང་ལྷག་ཙམ་སོགས་ཕུལ་ཡོད་པ་རེད།
རླབས་ཆེན་གྱི་རྒྱལ་གཅེས་རིང་ལུགས་དང་། སྐད་གྲགས་ལྡན་པའི་རྒྱལ་དོན་གནང་སྒོ་མཁས་ཅན། ཀྲུང་གོ་གུང་ཁྲན་ཏང་གི་ལྷག་བསམ་ཟོལ་མེད་ཀྱི་གྲོགས་པོ། ཀྲུང་གོའི་བོད་བརྒྱུད་ནང་བསྟན་ཆོས་ལུགས་ཀྱི་ཕུལ་བྱུང་གཙོ་འཛིན་སྐབས་བདུན་པའི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་སྐུ་གཞོན། ཀྲུང་གོ་ནང་བསྟན་མཐུན་ཚོགས་ཀྱི་མཚན་འཛིན་ཀྲུའུ་ཞི་ཀུན་གཟིགས་པཎ་ཆེན་ཨེར་ཏི་ནི་ཆོས་ཀྱི་རྒྱལ་མཚན་མཆོག་གཟུགས་སྐུའི་བཀོད་པ་རེ་ཞིག་ཆོས་དབྱིངས་སུ་ཐིམ་ཚུལ་བསྟན་པས་དད་ལྡན་སེར་སྐྱ་མང་ཚོགས་ལ་བཟོད་དཀའི་གདུང་བ་བྱུང་མོད། འོན་ཀྱང་ད་ཆ་སྐུ་གདུང་རིན་པོ་ཆེར་རིན་ཆེན་ས་ལེ་སྦྲམ་གྱིས་བརྒྱན་པའི་མཆོད་སྡོང་ཆེན་པོ་བཞེངས་པ་དེས་དད་ལྡན་མང་ཚོགས་རྣམས་ལ་ཚེ་ཚེ་རབས་རབས་སུ་དད་རྟེན་བསམ་གྱིས་མི་ཁྱབ་པ་དང་། རྒྱ་བོད་མི་རིགས་དབར་མཐུན་སྒྲིལ་གྱི་དཔང་རྟགས་ཤིག་ཏུ་གྱུར་ཟིན།བཀྲ་ཤིས་ལྷུན་དགོན་པའི་ནང་དུ་སངས་རྒྱས་ཤཱཀྱ་ཐུབ་པའི་མཛད་པ་དང་། རྗེ་ཙོང་ཁ་པ་ཆེན་པོའི་རྣམ་ཐར་གྱིས་མཚོན་པའི་ལྡེབས་བྲིས་མང་པོ་ཡོད་པ་དེ་དག་བྲིས་ཆ་ལེགས་ཤིང་ཚོན་རིས་བཀྲག་མདངས་ཆེ་བ། ཉམས་འགྱུར་སྣ་ཚོགས་དང་ལྡན་པ་བཅས་ཀྱི་ཁྱད་ཆོས་ལྡན། ལྷག་པར་དུ་དགོན་ནང་གི་སྐོར་ལམ་དུ་བསྒྲིགས་པའི་རྡོ་གཡམ་ཐོག་གི་རྣམ་འདྲེན་སྟོང་སྐུའི་འབུར་བརྐོས་རྣམས་དེ་བས་གསོན་ཉམས་བྱོན་གཙང་ལེགས་པར་སྣང་། ངག་སྒྲོས་སུ་རྡོ་གཡམ་དེ་རྣམས་རྗེ་དགེ་འདུན་གྲུབ་པས་དགོན་པའི་ནུབ་ངོས་ཁ་ལུང་སྦུག་ནས་གཏེར་ལས་བཞེས་ཏེ་ལག་རྩལ་ཕུལ་དུ་བྱུང་བའི་རྡོ་བཟོ་བས་བརྐོས་པར་གྲགས་ཤིང་། ཕྱིས་སུ་པཎ་ཆེན་སྐུ་ཕྲེང་བཞི་པ་བློ་བཟང་ཆོས་ཀྱི་རྒྱལ་མཚན་གྱིས་རྡོ་གཅལ་གྱི་རྒྱ་ཁྱོན་རྒྱ་ཆེར་སྐྱེད་པ་དང་ཆབས་ཅིག་སྔར་གྱི་རྡོ་གཡམ་རྣམས་ཀྱང་གསར་བརྗེས་མཛད། བཀྲ་ཤིས་ལྷུན་དགོན་འདི་ཡང་ལྷ་སའི་སེ་འབྲས་དགེ་གསུམ་དང་ར་ས་གཙུག་ལག་ཁང་བཅས་དང་འདྲ་བར་མཆོད་ཁང་ནང་དུ་གོང་མ་བདག་པོ་ཆེན་པོ་སྐུ་ཚེ་ཁྲི་ཕྲག་ཏུ་བརྟན་པར་གྱུར་ཅིག་ཅེས་པའི་འཇའ་ས་ཡོད་པ་མ་ཟད། འཇའ་སར་བཀུར་བསྟོད་མཆོད་འབུལ་བྱེད་པའི་མཆོད་ཁང་ཆེད་དུ་བཙུགས་ཡོད་ལ་ལོ་ལྟར་མཇལ་ཞུའི་མཛད་སྒོ་གཉེར་ནས་མེས་རྒྱལ་ཁྱིམ་ཚང་གཅིག་ཏུ་མཚོན་པར་བྱས་སོ། དགོན་པའི་ནང་ལོ་རྒྱུས་ཐོག་གི་རྩ་ཆེའི་རིག་དངོས་ཇི་སྙེད་ཅིག་ཡོད་པ་སྟེ། ཤིང་ཏ་ལའི་ལོ་མའི་ཐོག་ཏུ་བྲིས་པའི་དཔེ་ཆ་དང་། བཀའ་བསྟན་གསེར་ཆོས་མ། དེ་བཞིན་མན་ཆིང་གོང་མས་པཎ་ཆེན་རིན་པོ་ཆེར་ཕུལ་བའི་གསེར་གྱི་འཇའ་ས་དང་། ཐམ་ག གཞན་ཡང་མིང་རྒྱལ་རབས་དང་ཆིང་རྒྱལ་རབས་དུས་ཀྱི་དཀར་ཡོལ་དང་ཤེལ་གྱི་ཡོ་བྱད་ཁག སྐུ་ཐང་འཚེམ་དྲུབ་མ་སོགས་གནའ་བོའི་དངོས་རྫས་ཤིན་ཏུ་ཕུན་སུམ་ཚོགས་པོ་ཡོད། འདི་དག་ཐམས་ཅད་བོད་ཀྱི་ལོ་རྒྱུས་ཀྱི་དུས་རིམ་སོ་སོའི་ནང་གི་ཆོས་སྲིད་དང་སྤྱི་ཚོགས་ཀྱི་འཕེལ་རྒྱས་འགྲོ་ལུགས་བཅས་ལ་ཞིབ་འཇུག་བྱེད་རྒྱུར་མཁོ་བའི་དངོས་རྫས་རིན་ཐང་བྲལ་བ་ཤ་སྟག་ཡིན།
