མངའ་རིས་ཀྱི་ཡུལ་སྐོར་སྔར་ལས་དར་ཞིང་རྒྱས་པ་ཡོང་ས་རེད་འདུག
སྤེལ་དུས 2024-06-12
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
རྩྭ་མདའི་བྲུ་རོང་གི་ངོ་མཚར་མཛེས་ལྗོངས།
—— ཧོ་པེ་ཞིང་ཆེན་གྱི་ཡུལ་སྐོར་བོད་སྐྱོར་ལས་དོན་སྐོར་གྱི་མཐོང་ཐོས།
རྩྭ་མདའ་རྫོང་ཞ་ཡེ་གྲོག་རོང་གི་བྲུ་རོང་མཛེས་ལྗོངས་ཁུལ་དུ་སྐྱོད་སྐབས་ཞ་ཡེ་གྲོག་རོང་མཛེས་ལྗོངས་ཁུལ་དང་བར་ཐག་སྤྱི་ལེ8ཡོད་པའི་བྱང་རྩེ་ཤང་སྲིད་གཞུང་གནས་ཡུལ་དུ་གང་སར་ཚ་ཚ་འུར་འུར་ངང་འཛུགས་སྐྲུན་བྱེད་པའི་རྣམ་པས་ཁེངས་ཤིང་། དེ་ལས་མངའ་རིས་ཀྱི་གྲགས་ཅན་ཡུལ་སྐོར་ཤང་དང་གྲོང་རྡལ་གྱི་མདུན་ལམ་དེ་བས་ཡངས་པ་མངོན་གྱི་ཡོད།
མིག་སྔར། བྱང་རྩེ་ཤང་ཡུལ་སྐོར་གྲོང་རྡལ་ཆུང་ངུའི་རྣམ་གྲངས་གྲས་ཀྱི་ཞ་ཡེ་གྲོག་རོང་མཛེས་ལྗོངས་ཁུལ་གྱི་ཡུལ་སྐོར་དོ་དམ་ལྟེ་གནས་དང་། ཁྱད་ལྡན་ལྗོངས་གཟིགས་རྒྱལ་སྒོ “འབྲོག་ཁྱིམ་སྤྲོ་སྐྱིད་ཁང” དམངས་སྲོལ་གནས་ཚང་ཞབས་ཞུའི་ས་ཚིགས། རྒྱང་ལྟའི་སྟེགས་བུ་དང་དེ་བཞིན་བདེ་འཇགས་སོགས་ཀྱི་རྨང་གཞིའི་སྒྲིག་བཀོད་འཛུགས་སྐྲུན་སྤྱིར་ན་ལེགས་གྲུབ་ཟིན་ཞིང་། ད་ལོའི་ཟླ4པའི་ཚེས30ཉིན་ནས་བཟུང་ཧོ་པེ་བོད་སྐྱོར་གྱིས་གདན་དྲངས་པའི་རྩྭ་མདའ་རྫོང་ཡིའུ་ལན་ཡུལ་སྐོར་དོ་དམ་ཚད་ཡོད་ཀུང་སིས་འགན་ཁུར་ནས་ཚོད་ལྟ་དང་བཅས་གཉེར་སྐྱོང་བྱེད་ཀྱི་ཡོད། རྣམ་གྲངས་སྤྱོད་འགོ་ཚུགས་པ་དང་བསྟུན་ནས་ས་གནས་དེ་གའི་ཞིང་འབྲོག་པའི་འཚོ་བའི་སྤུས་ཚད་ལེགས་སུ་ཕྱིན་པ་མ་ཟད། ཡུལ་སྐོར་བར་དེ་བས་ཕུན་སུམ་ཚོགས་པའི་ཡུལ་སྐོར་གྱི་ཉམས་ལེན་བྱ་ཡུལ་མཁོ་འདོན་ཐུབ་ཡོད།
“རྩྭ་མདའ་རྫོང་ལ་གུ་གེའི་གནའ་ཤུལ་དང་། ཕྱི་གཡང་དུང་དཀར་ཕུག་པ། ཁྱུང་ལུང་དངུལ་མཁར་སོགས་གྲགས་ཅན་མཛེས་ལྗོངས་ཁུལ15ཡོད་པས་ཡུལ་སྐོར་ཐོན་ཁུངས་ཧ་ཅང་ཕུན་སུམ་ཚོགས་པོ་ཡོད”ཅེས་རྩྭ་མདའ་རྫོང་ཨུད་ཀྱི་རྒྱུན་ཨུ་དང་། རྫོང་དཔོན་གཞོན་པ། ཧོ་པེ་ཞིང་ཆེན་གྱི་བོད་སྐྱོར་ལས་བྱེད་པ་བཅས་ཡིན་པའི་ཝང་ལེས་བཤད་ཅིང་། ཁོང་གིས། ང་ཚོས་བོད་སྐྱོར་ལས་དོན་སྒྲུབ་རིང་རྩྭ་མདའི་ཕུན་སུམ་ཚོགས་པའི་ཐོན་ཁུངས་དང་ཟུང་འབྲེལ་བྱས་ནས་ཡུལ་སྐོར་ཐོན་ལས་ཀྱི་བོད་སྐྱོར་འདི་ཉིད་གནས་བབ་གལ་ཆེ་སར་བཞག་པ་མ་ཟད། “ཡུལ་སྐོར་ལ་བརྟེན་ནས་རྫོང་དར་རྒྱས་དང་སྒོ་དབྱེ་དམངས་ཕྱུག”གི་བསམ་བློར་དམིགས་ཏེ། “གུ་གེའི་གནའ་ཤུལ་གྱི་ཡུལ་སྐོར་ལས་དོན་ཡག་པོ་སྒྲུབ་པ་དང་བྲུ་རོང་གི་སྙན་གྲགས་ལེགས་པར་སྤྱོད་པ”ལས་ཀའི་དམིགས་ཚད་དུ་བྱས་ནས། བྱང་རྩེ་ཤང་ཡུལ་སྐོར་གྲོང་རྡལ་ཆུང་ངུའི་རྣམ་གྲངས་སོགས་གཙོ་གནད་བོད་སྐྱོར་ལས་གྲྭ་ལག་ལེན་བསྟར་བ་བརྒྱུད། རྩྭ་མདའ་རྫོང་གི་ཡུལ་སྐོར་ཐོན་ལས་འཕེལ་རྒྱས་ཀྱི་རྨང་གཞི་བརྟན་དུ་ཕྱིན་པ་དང་རང་རྟེན་ནུས་པ་ཆེ་རུ་སོང་སྟེ་ཡུལ་སྐོར་འཕེལ་རྒྱས་ཆེན་པོར་བརྟེན་ནས་རྩྭ་མདའི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་མ་ཐེབས་ཡོད་ཅེས་བཤད།
ཞ་ཡེ་གྲོག་རོང་མཛེས་ལྗོངས་ཁུལ་གྱི་རྨང་གཞིའི་སྒྲིག་བཀོད་རྒྱུན་ཆད་མེད་པར་འཐུས་སྒོ་ཚང་དུ་བཏང་བ་དེས་མང་ཚོགས་ཀྱི་ཐོབ་སྣང་དང་སྐྱིད་སྣང་སྔར་བས་ཆེ་རུ་ཕྱིན་ཡོད། རྩྭ་མདའ་རྫོང་ཡིའུ་ལན་ཡུལ་སྐོར་དོ་དམ་ཚད་ཡོད་ཀུང་སིའི་འགན་འཁུར་བ་ཝང་ཉིང་གིས“གོམ་སྟབས་རྗེས་མར་ཀུང་སིས་ཞ་ཡེ་གྲོག་རོང་མཛེས་ལྗོངས་ཁུལ་གྱི་ཡུལ་སྐོར་དོ་དམ་ལྟེ་གནས་སུ་ཟ་ཁང་དང་། སྒོ་རྩིས་ཚོང་ཁང་། ཀོག་ཧྥེ་ཁང་སོགས་བཙུགས་ནས་ཡུལ་སྐོར་བར་དེ་བས་སྟབས་བདེ་དང་དེ་བས་ཕུན་སུམ་ཚོགས་པའི་ཡུལ་སྐོར་གྱི་ཉམས་ལེན་བྱ་ཡུལ་མཁོ་འདོན་བྱེད་ཀྱི་ཡིན། རྣམ་གྲངས་དེས་རྩྭ་མདའ་རྫོང་གི་ཞིང་འབྲོག་པ123ལས་ཞུགས་གཞན་སྒྱུར་ཐུབ་པ་དང་འབབ་འཕར་སྒོར་ཁྲི120ཡོང་གི་ཡོད། རྣམ་གྲངས་ཚང་མ་བསྐྲུན་ཟིན་རྗེས་བྱང་རྩེ་ཤང་གི་རྨང་གཞིའི་ལེ་ལག་ཚང་བའི་སྒྲིག་བཀོད་ལེགས་སུ་གཏོང་བ་དང་། ས་གནས་དེ་གའི་ཡུལ་སྐོར་ཐོན་ལས་ཁྲོམ་ར་ཅན་གྱི་དོ་དམ་ཆུ་ཚད་མཐོ་རུ་འགྲོ་བ། ཡུལ་སྐོར་ལས་རིགས་སྤུས་ཚད་མཐོ་བའི་འཕེལ་རྒྱས་དང་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་མ་ཐེབས་པ་བཅས་བྱས་ནས། ས་གནས་དེ་གའི་ཞིང་འབྲོག་མང་ཚོགས་འབབ་འཕར་ཕྱུག་འགྱུར་ལ་སྐུལ་ཁྲིད་ནུས་ལྡན་ཐུབ་རྒྱུ་རེད”ཅེས་བཤད།
རྩོམ་སྒྲིག་པ། དཔལ་གཡང་།
