ཐེམ་ཁོངས་བོད་ལྗོངས་ཡིན་པའི་སློབ་ཆེན་སློབ་མ་ནང་ལོག་ས་ཁུལ་དུ་ལས་ཞུགས་བྱེད་ཚད་ཇེ་མང་དུ་ཕྱིན།
སྤེལ་དུས 2020-05-07
ཡོང་ཁུངས། བོད་ལྗོངས་འཕྲིན་དྲ།
རྩོམ་པ་པོ།
ཉེ་བའི་ལོའི་ནང་། ཕྱོགས་ཡོངས་ནས་སློབ་ཆེན་སློབ་ཐོན་པའི་ལས་ཞུགས་ལས་དོན་ཡག་པོ་སྒྲུབ་ཆེད། བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བོད་སྐྱོར་གྱི་སྦྲེལ་ཐག་ནུས་པ་འདོན་སྤེལ་ཏན་ཏིག་བྱས་ནས། ལྗོངས་ཕྱི་རོལ་དུ་སློབ་ཆེན་སློབ་ཐོན་པ་ལས་ཞུགས་ཐུབ་རྒྱུར་ཁྲིད་སྟོན་དང་ཞབས་ཞུ་བྱེད་ཤུགས་རྒྱུན་མཐུད་ཆེ་རུ་དང་ལས་ཞུགས་ཐབས་ལམ་རྒྱ་སྐྱེད་ནུས་ལྡན་བཏང་ཐོག བོད་དང་རྒྱ་ནག་དབར་གྱི་སྤེལ་རེས་དང་འགྲོ་འོང༌། མཉམ་འདྲེས་བཅས་བྱེད་ཤུགས་རྒྱུན་མཐུད་ཆེ་རུ་བཏང་བས། ལྗོངས་ཕྱི་རོལ་དུ་ལས་ཞུགས་ཐུབ་མཁན་སློབ་ཆེན་སློབ་ཐོན་པ་ཇེ་མང་དུ་འགྲོ་བཞིན་ཡོད།
2019ལོའི་ཟླ་བཅུ་གཉིས་པར་ཅི་ལིང་ཞིང་ཆེན་དང་གཞིས་རྩེ་གྲོང་ཁྱེར་གྱིས་མཉམ་འབྲེལ་ཐོག ཐེམ་ཁོངས་གཞིས་རྩེ་ནས་ཡིན་པའི་སློབ་ཆེན་སློབ་ཐོན་པར་ཁ་ཕྱོགས་པའི་བོད་སྐྱོར་ལས་ཞུགས་ཀྱི་ཆེད་དོན་གདན་ཞུའི་ཡིག་རྒྱུགས་བཏང་བ་བརྒྱུད། ཐེམ་ཁོངས་གཞིས་རྩེ་ནས་ཡིན་པའི་སློབ་ཆེན་སློབ་ཐོན་པ106ཅི་ལིང་དུ་ལས་ཞུགས་ཐུབ་ཡོད།
ཤེས་རྟོགས་བྱས་པར་གཞིགས་ན། ཐེམ་ཁོངས་གཞིས་རྩེ་ནས་ཡིན་པའི་སློབ་ཆེན་སློབ་ཐོན་པའི་ལས་ཞུགས་གནད་དོན་ཐག་གཅོད་ཡག་པོ་བྱ་ཆེད། ན་ནིང་ཅི་ལིང་ཞིང་ཆེན་དང་གཞིས་རྩེ་གྲོང་ཁྱེར་གྱིས་མཉམ་ལས་གྲོས་མཐུན་བཞག་ཡོད་པ་དང་། གྲོས་མཐུན་ལ་གཞིགས་ན་ཅི་ལིང་ཞིང་ཆེན་གྱིས་ལོ་ལྟར་ཐེམ་ཁོངས་གཞིས་རྩེ་ནས་ཡིན་པའི་སློབ་ཆེན་སློབ་ཐོན་པར་བྱ་གཞག་ལས་རིགས་ཀྱི་སྒྲིག་ཁོངས་ལས་གནས 200མཁོ་འདོན་བྱེད་རྒྱུ་ཡིན་ཞིང་གྲོས་མཐུན་བཞག་ཡུན་ལོ་བདུན་རེད།
ལོ་གཅིག་རིང་ཕྱོགས་ཁག་གིས་གཞོགས་འདེགས་ཧུར་ཐག་བྱས་པ་བརྒྱུད། ཐེམ་ཁོངས་གཞིས་རྩེ་ཡིན་པའི་སློབ་ཆེན་སློབ་ཐོན་པའི་ལས་ཞུགས་ལས་དོན་ལ་གྲུབ་འབྲས་མངོན་གསལ་དོད་པོ་ཐོབ་པ་དང་། སྐབས་ཐོན་སློབ་ཆེན་སློབ་ཐོན་པ་ལས་ཞུགས་ཐུབ་ཚད་བརྒྱ་ཆ99.01ཟིན་ཡོད།
ངོ་སྤྲོད་བྱས་པར་གཞིགས་ན། ན་ནིང་ཐེམ་ཁོངས་གཞིས་རྩེ་ནས་ཡིན་པའི་སློབ་ཆེན་སློབ་ཐོན་པ182ཅི་ལིང་དང་ཧེ་ལུང་ཅང་གི་བྱ་གཞག་ལས་གནས་ཀྱི་ཆེན་དོན་གདན་ཞུ་བརྒྱུད་ལས་ཞུགས་ཐུབ་ཡོད།
སྲིད་ཇུས་འགན་སྲུང་གི་རྨང་གཞིའི་ཐོག་གཞིས་རྩེ་གྲོང་ཁྱེར་གྱིས་ད་དུང་ཧྲང་ཧེ་དང་ཧྲན་ཏུང༌། ཅི་ལིང༌། ཧེ་ལུང་ཅང་བཅས་བོད་སྐྱོར་ཞིང་ཆེན་དང་གྲོང་ཁྱེར་བཞིར་བོད་སྐྱོར་འབྲེལ་གཏུག་ཞབས་ཞུ་ལྟེ་གནས་བཙུགས་ཏེ། སློབ་ཆེན་སློབ་ཐོན་པ་ལྗོངས་ཕྱི་རོལ་དུ་ལས་ཞུགས་ཐུབ་རྒྱུར་དམ་འཛིན་བྱས་ནས། ཐེམ་ཁོངས་གཞིས་རྩེ་ནས་ཡིན་པའི་སློབ་ཆེན་སློབ་ཐོན་པར་ལས་ཞུགས་ཀྱི་ཁྲིད་སྟོན་ཞབས་ཞུ་སྒྲུབ་སྟེ་ཁོང་ཚོ་ལས་ཞུགས་བདེ་བླག་དང་བརྟན་པོ། བློ་བདེ་བཅས་ཡོང་བ་བྱས་ཡོད།
ཉེ་བའི་ལོའི་ནང་། བོད་རང་སྐྱོང་ལྗོངས་ཀྱིས་རྒྱུན་ཆད་མེད་པར་སློབ་ཆེན་སློབ་ཐོན་པ་ལྗོངས་ཕྱི་རོལ་དུ་ལས་ཞུགས་བྱེད་པའི་ལས་དོན་སྤེལ་ཤུགས་ཆེ་རུ་བཏང་སྟེ། བོད་སྐྱོར་ཞིང་ཆེན་དང་གྲོང་ཁྱེར17དང་། བོད་སྐྱོར་ཀྲུང་དབྱང་ཁེ་ལས16གིས་བོད་ལྗོངས་ལ་ལས་ཞུགས་ལས་གནས་ཁྲི8ལྷག་ཙམ་མཁོ་འདོན་བྱས་པ་དང་། བོད་ལྗོངས་ཀྱི་འབྲེལ་ཡོད་ཚན་པས་སྣེ་ཁྲིད་དེ་བོད་སྐྱོར་ལས་ཞུགས་གྱི་ཆེད་དོན་གདན་ཞུའི་བྱེད་སྒོ་ཐེངས 100ལྷག་ཙམ་སྤེལ་ཡོད་པས། བོད་སྐྱོར་ལས་ཞུགས་བརྒྱུད་ལྗོངས་ཕྱི་རོལ་དུ་ལས་ཞུགས་ཐུབ་མཁན་ཐེམ་ཁོངས་བོད་ནས་ཡིན་པའི་སློབ་ཆེན་སློབ་ཐོན་པ་ཇེ་མང་དུ་ཕྱིན་ནས། བོད་ལྗོངས་དང་རྒྱ་ནག་བོད་སྐྱོར་ཞིང་ཆེན་དང་གྲོང་ཁྱེར་དབར་གྱི་སྤེལ་རེས་དང་འགྲོ་འོང༌། མཉམ་འདྲེས་བཅས་ཉིན་རེ་བཞིན་ཇེ་ཟབ་ཏུ་འགྲོ་བཞིན་ཡོད། །
