སི་ཕེན་སྨྱན་ལམ་དུ་བརྗོད་དོན། སི་ཕེན་ཁ་དྷི་ལོ་ཉི་ཡའི(Catalunya)དེབ་བླུའི་མཐུན་ཚོགས་ཀྱིས་བསྟན་པ་ལྟར་ན། མི་འགྱངས་པའི་ཕྱི་ཟླ ༩ པར་མགོ་འཛུགས་པའི་སློབ་སྐབས་འདིར་སློབ་མ་རྣམས་ཀྱི་སློབ་དེབ་ཁྲོད་དུ་ཁ་དྷི་ལོ་ཉི་ཡའི་སྐད་གཙོར་བཟུང་ནས་དབྱིན་ཡིག ཧྥ་ཡིག འཇར་ཡིག་སོགས་ཀྱི་ཟུར་བཀོད་རེ་ཡོད་པ་ཙམ་ལས། སི་ཕེན་གྱི་ཡི་གེ་བཀག་སྡོམ་བྱས་འདུག་པ་དང་། པཱ་ས་གནས་ཡུལ་གྱི་ཁ་དྷི་ལོ་ཉི་ཡ་ས་ཁུལ་སྲིད་གཞུང་འདིས་སི་ཕེན་དང་སྒེར་ཚུགས་སུ་གནས་པའི་འཚོལ་སྙེག་བྱས་ཏེ་ཡུན་རིང་འདས་སྐད།
ཕྱི་ཟླ ༧ པའི་ཚེས ༢༨ ཉིན། སི་ཕེན་གྱི《ཨ་པེ་སེ་ཚགས》སུ་བཀོད་པ་ལྟར་ན། ཟླ ༣ གྱི་ཡར་སྔོན་དུ་ཁ་དྷི་ལོ་ཉི་ཡ་ས་ཁུལ་གྱི་སློབ་གསོ་སྡེ་ཁག་གི་འགན་འཛིན་པ་དབྱི་ལི་ནུས•ལི་ཀོ་ཡིས་བཅར་འདྲི་ཞིག་ཏུ། སློབ་སྐབས་རྗེས་མའི་སློབ་དེབ་ཁྲོད་སི་ཕེན་གྱི་ཐ་སྙད་ཕྱོགས་བསྡུས་ཤིག་འཇོག་རྩིས་ཡོད་ཅེས་བསྟན་ལ། སྐབས་དེར་མོས་ཁ་དྷི་ལོ་ཉི་ཡའི་སློབ་གསོ་སྡེ་ཁག་དང་ཁ་དྷི་ལོ་ཉི་ཡའི་དེབ་བླུ་ཐུན་ཚོགས་བར་གྲོས་ཆིངས་འཇོག་རྩིས་ཡོད་ཚུལ་དང་། ལྷག་པར་གནས་འདིའི་སློབ་མ་ཚོ་སྐད་རིགས་སྣ་མང་འཇོན་པའི་ཤེས་ལྡན་པར་སྐྱོང་ཕྱིར་གྲོས་ཆིངས་སུ་སློབ་དེབ་དུ་སི་ཕེན་དང་ཧྥ་རན་སི། དབྱིན་ཇི་སོགས་ཀྱི་ཡི་གེའི་ཟུར་བཀོད་ཡོད་ཅེས་བརྗོད་འདུག
འོན་ཀྱང་། སློབ་མགོ་ཚུགས་པར་ཟླ་གཉིས་ལྷག་ལས་མེད་པའི་ད་ལྟ། གནས་འདིའི་དེབ་ཚོང་བ་མང་པོས་ཁ་དྷི་ལོ་ཉི་ཡ་ས་ཁུལ་གྱི་སློབ་གསོ་སྡེ་ཁག་དང་བཞག་པའི་གྲོས་ཆོད་ལྟར་སློབ་དེབ་ཁྲོད་ཀྱི་ཟུར་བཀོད་ལ་ཕྱི་རྒྱལ་གྱི་ཡི་གེ་ལས་སི་ཕེན་གྱི་ཡི་གེའི་ཤུལ་ཙམ་ཡང་ལུས་མེད་པར་བརྗོད།
བརྒྱུད་ལམ་ཁག་ཏུ། དེབ་བླུ་ཐུན་ཚོགས་ཀྱིས་ཁ་དྷི་ལོ་ཉི་ཡ་ས་ཁུལ་གྱི་སློབ་གསོ་སྡེ་ཁག་གིས་ཡང་བསྐྱར་སྐད་ཡིག་ནི་ཆབ་སྲིད་ཀྱི་ལག་ཆར་བཟུང་བ་ལས། འདི་ལས་སློབ་གསོའི་བྱ་བཞག་ལ་སྐྱེལ་འོང་བའི་ཤུགས་རྐྱེན་ངན་པར་བསམ་བློ་བཏང་མི་འདུག་ཅེས་བརྗོད་འདུག
ཕྱི་ཟླ ༧ པའི་ཚེས ༢༨ ཉིན་ལི་ཀོ་ནས་ཀྱང་མོར་སྲིད་འཛིན་ཁྱབ་ཁོངས་ནས་ཆབ་སྲིད་ཀྱི་གནོན་ཤུགས་ཆེ་བར་འདུག་མོད། འོན་ཀྱང་ཁ་དྷི་ལོ་ཉི་ཡའི་སྐད་མང་སློབ་གསོའི་རྣམ་པ་མུ་མཐུད་སྲུང་སྐྱོབ་བྱ་ངེས་ཡིན་ཟེར།
སྨྱན་ལམ་དུ་གཟའ་འཁོར་སྔོན་མར་སི་ཕེན་གྱི་སློབ་གསོའི་སྡེ་ཁག་གི་བློན་ཆེན་ཡུ་ནུས་ཀི•མིན་དྷི་སི•དྷི་པུས་ཀི་དང་ལི་ཀོ་གྲོས་འཛོམས་བྱུང་བ་དང་། གྲོས་འཛོམས་ཐོག་དྷི་པུས་ཀི་ཡིས་ལི་ཀོའི་གསལ་བཤད་སོགས་ལ་ཉན། དེ་རྗེས་ཁོས་ཁ་དྷི་ལོ་ཉི་ཡ་སྲིད་གཞུང་གིས་ཁྲིམས་ལྟར་ཐག་གཅོད་བྱ་རྒྱུའི་རེ་བཏོན་ལ། སྐབས་དེར་ལི་ཀོ་ཡིས་ཀྲུང་དབྱང་སྲིད་གཞུང་གི་ཁྲིམས་ཁ་ཤས་ས་གནས་སུ་ཏིལ་ལ་ཏིལ་མར་གྱིས་མི་འོང་ལ། ས་གནས་སྲིད་གཞུང་གི་གྲོས་ཆིངས་ཁ་ཤས་ལས་ཀྱང་ཁྲིམས་འཛུགས་དང་ལག་ལེན་བྱེད་པར་ཤུགས་རྐྱེན་ཐེབས་སྲིད་པས་དྷི་པུས་ཀི་རང་ནས་བསམ་ཤེས་བྱ་དགོས་ཞེས་བསྟན་འདུག
