ཨན་ཧུའེ་ཞིང་ཆེན་ཅེ་ཧྲོ་གྲོང་ཁྱེར་གྱི་དགེ་རྒན ༦༤༡ གིས་ཟླ ༧ པའི་ཚེས ༦ ཉིན། སྲིད་གཞུང་དང་། སློབ་གསོ་ཅུའུ་སོགས་ཀྱི་སྒོ་ཁར་འཕྲེད་འགེལ་བཀལ་ཏེ། སྲིད་གཞུང་ལ་ལོ་བཅུའི་སྔོན་གྱི་གན་རྒྱ་ལག་བསྟར་དང་། ལས་བསྟུན་གླ་ཕོགས་དགོས་པ་རེ་ཞུ་བྱས། ལོ་ངོ་བཅུའི་ཡར་སྔོན་དུ། དགེ་རྒན་འདི་དག་ཅེ་ཧྲོ་གྲོང་ཁྱེར་གྱི་སྒྱུ་རྩལ་རྩལ་སྦྱོང་འཛིན་གྲྭར་ཞུགས་ལ། དེ་དུས་སྲིད་གཞུང་གིས་ཁོ་ཚོ་མཐར་ཕྱིན་རྗེས་སྤྱིར་བཏང་དགེ་ཐོན་སློབ་གླིང་གི་སློབ་མ་དང་འདྲ་བར་སྒྲིག་ཁོངས་སུ་འགོད་པར་ཁས་བླངས་ཡོད། ཡིན་ཡང་ཁོ་ཚོ་ནི་ལོ་ངོ་བཅུ་ལྷག་གི་རིང་ཚབ་ཁྲིད་དགེ་རྒན་བྱས་པ་དང་། ཟླ་རེར་སྒོར་མོ་བརྒྱ་ཕྲག་འགའི་གླ་ཕོགས་མ་གཏོགས་མི་འདུག
གཞུང་ཕྱོགས་ཀྱིས་བསྒྲགས་པ་ལྟར་ན། འདི་ནི་ལོ་རྒྱུས་ཀྱི་ཤུལ་བཞག་གནད་དོན་ཤིག་ཡིན། ལོ་བཅུའི་ཡར་སྔོན་དུ་རྒྱལ་ཁབ་ཀྱི་སྲིད་ཇུས་ལ་འགྱུར་ལྡོག་བྱུང་བ་དང་། ལས་བགོས་བྱས་ཆོག་པའི་སྒྱུ་རྩལ་རྩལ་སྦྱོང་འཛིན་གྲྭའི་མཐར་ཕྱིན་སློབ་མ་རྣམས་སྒྲིག་ཁོངས་སུ་འགོད་མ་ཐུབ་པར། ཞིང་སྡེའི་སློབ་ཆུང་གང་མང་དུ་ཚབ་ཁྲིད་དུ་མངགས་ཤིང་། ཟླ་རེ་རེར་ཅེ་ཧྲོ་གྲོང་ཁྱེར་གྱི་ནོར་སྲིད་སྡེ་ཁག་གིས་ཆེས་དམའ་བའི་འཚོ་བའི་འགན་སྲུང་གི་ཚད་གཞི་ལྟར་ཁོ་ཚོར་འཚོ་བའི་ཁ་གསབ་སྟེར་བཞིན་ཡོད། མིག་སྔར་ཅེ་ཧྲོ་གྲོང་ཁྱེར་གྱི་སྲིད་གཞུང་གིས་ཆེད་གཉེར་ཚན་ཆུང་བཙུགས་ཏེ་གནད་དོན་འདི་ཐག་གཅོད་བྱེད་བཞིན་འདུག
གཅིག ལོ་བཅོ་ལྔའི་ཡར་སྔོན་དུ་ཁས་བླངས་པའི་ལས་གནས་སྒྲིག་ཁོངས་དོན་འཁྱོལ་བྱེད་མ་ཐུབ་པ།
སྒྱུ་རྩལ་རྩལ་སྦྱོང་འཛིན་གྲྭའི་སློབ་མ་ཞེས་པ་ནི་ཀྲང་ལིས་མེན་སོགས་དེ་སྔོན་ཅེ་ཧྲོ་གྲོང་ཁྱེར་གྱིས་གསོ་སྐྱོང་བྱས་པའི་སྐབས་གསུམ་པོའི་སློབ་མ་ཡོངས་ཀྱི་འབོད་སྟངས་ཡིན། ཀྲང་ལིས་མེན་གྱིས་བཤད་རྒྱུར། ༡༩༩༦ ལོའི་སྔ་གཞུག་ཏུ། ཅེ་ཧྲོ་གྲོང་ཁྱེར་གྱི་ཨུ་ཡོན་ལྷན་ཚོགས་དང་། སྲིད་གཞུང་གིས་ཞིང་སྡེའི་ས་ཁུལ་གྱི་རོལ་དབྱངས་དང་། ལུས་རྩལ་སོགས་སྒྱུ་རྩལ་ཚན་ཁག་གི་དགེ་རྒན་མི་འདང་བའི་རྣམ་པ་ལེགས་བཅོས་བྱེད་ཆེད། ༡༩༩༦ ལོ་ནས་བཟུང་། ཅེ་ཧྲོ་གྲོང་ཁྱེར་ལ་ཁ་གཏད་དེ་གཅིག་གྱུར་གྱི་འབྲིང་རིམ་ཆེད་ལས་སློབ་གྲྭའི་རྒྱུགས་གཞི་བརྒྱུད། སྒྱུ་རྩལ་རྩལ་སྦྱོང་རིགས་ཀྱི་སློབ་མ་བསྡུས་ལ། འཛིན་གྲྭ་བཅུ་ལྷག་བཙུགས་པ་དང་། བསྡོམས་པས་སྐབས་གསུམ་ལ་སྤེལ། སྐབས་དང་པོ་དང་སྐབས་གསུམ་པའི་མཐར་ཕྱིན་སློབ་མ་ཚང་མ་ཅེ་ཧྲོ་གྲོང་ཁྱེར་གྱི་ལས་རིགས་འབྲིང་རིམ་ཆེད་ལས་སློབ་གྲྭ་དང་སློབ་འབྲིང་དུ་བཀོད་སྒྲིག་བྱས་པ་དང་། སྐབས་གཉིས་པའི་ཁྲོད། སློབ་མ་ཉུང་ཤས་ཤིག་ཧི་ནན་ཧྲིན་ཆོ་དགེ་ཐོན་དུ་བཀོད་སྒྲིག་བྱས་འདུག སྐབས་དེར། སྒྱུ་རྩལ་རྩལ་སྦྱོང་འཛིན་གྲྭའི་སློབ་ཡོན་ནི་ཧ་ཅང་མཐོ་ལ། ལོ་རེར་དངུལ་སྒོར ༥༠༠༠ ཡིན། འོན་ཀྱང་མཐར་ཕྱིན་རྗེས། སྒྲིག་ཁུངས་ཡོད་པའི་དགེ་རྒན་གྱི་ལས་གནས་གྲས་སུ་ཞུགས་ཐུབ་པར་རློམ་ནས། མི་མང་པོས་དཔལ་འབྱོར་ཐད་ཀྱི་དཀའ་ཁག་འབད་ཀྱིས་སེལ་བཞིན་འདུག
ཀྲང་ལིས་མེན་སོགས་དགེ་རྒན་གྱིས་ཕིང་ཕེ་གསར་འགྱུར(www.thepaper.cn)ལ་ཅེ་ཧྲོ་གྲོང་ཁྱེར་མི་དམངས་སྲིད་གཞུང་གཞུང་སྒྲུབ་ཁང་གི་ཡིག་ཆ(སྲིད་གཞུང་གཞུང་སྒྲུབ་ཁང[༡༩༩༧]ཨང ༡༣༦ པ)མཁོ་སྤྲོད་བྱས་ལ། མིང་དུ་ཧི་ནན་ཞིང་ཆེན་ཧྲིན་ཆོ་དགེ་ཐོན་ལ་མངགས་བཅོལ་བྱས་ཏེ་རང་གྲོང་ཁྱེར་ལ་དགེ་འོས་སློབ་མ ༥༠ གསོ་སྐྱོང་བྱེད་པའི་ཚོགས་འདུའི་ཟིན་བྲིས་གནད་བསྡུས་ཞེས་པའི་ཡིག་ཆར་བྲིས་པ་ལྟར་ན། རང་གྲོང་ཁྱེར་གྱི"རྨང་གཉིས"སློབ་གསོའི་དགོས་མཁོ་དང་བསྟུན་ཏེ། ས་མཐའི་གྲོང་རྡལ་གྱི་དགེ་རྒན་མི་མའདང་བའི་གནད་དོན་ཐག་གཅོད་བྱེད་ཆེད། གྲོང་ཁྱེར་ཨུ་ཡོན་ལྷན་ཚོགས་ཀྱི་ཧྲུའུ་ཅི་གཞོན་པ་དང་། གྲོང་ཁྱེར་གྱི་འགོ་འཛིན་ཝང་ཅན་ཧྭ་ཡིས ༡༩༩༧ ལོའི་ཟླ ༡༠ བའི་ཚེས ༢༢ ཉིན་གྱི་ཕྱི་དྲོར། སྲིད་གཞུང་གི་བཞི་ཐོག་གི་ཚོགས་འདུ་ཁང་དུ་གྲོས་ཚོགས་བསྡུས་ལ། ཧི་ནན་ཞིང་ཆེན་ཧྲིན་ཆོ་དགེ་ཐོན་སློབ་གྲྭར་མངགས་བཅོལ་བྱས་ཏེ་རང་གྲོང་ཁྱེར་ལ་དགེ་ཐོན་སློབ་མ ༥༠ གསོ་སྐྱོང་བྱེད་པའི་འབྲེལ་ཡོད་གནད་དོན་ཐད་ཞིབ་འཇུག་བྱས། ཡིག་ཆར་སྤྱི་བསྡོམས་པས་ཚན་པ་ལྔ་བཏོན་པ་དང་། ཚན་པ་བཞི་བར། ༡༩༩༧ ལོར། གཅིག་གྱུར་གྱི་འབྲིང་རིམ་ཆེད་ལས་སློབ་གྲྭའི་རྒྱུགས་གཞིར་ཞུགས་པའི་སློབ་མས་བྲིས་པའི་རེ་འདུན་ཡི་གེ་ལྟར། སྐར་གྲངས་མཐོ་བ་ནས་དམའ་བའི་བར་བསྡུ་ལེན་བྱེད་པ་དང་། སློབ་གསོ་ཨུ་ཡོན་ལྷན་ཚོགས་ཀྱིས་འབྲེལ་ཡོད་ཀྱི་ཡིག་རིགས་སྤེལ་བ། མཐར་ཕྱིན་རྗེས་སློབ་གསོ་ཨུ་ཡོན་ལྷན་ཚོགས་གྱིས་དགེ་ཐོན་རིགས་ཀྱི་སློབ་མར་ལས་གནས་འོས་འཚམ་བགོས་ཏེ། གཅིག་གྱུར་སྒོས་ས་མཐའི་གྲོང་རྡལ་དུ་སློབ་ཁྲིད་ལ་མངགས་པ་དང་། ལས་དོན་སྒྲིག་ཁུངས་སུ་འགོད་པ་ཞེས་བཀོད་ཡོད། མིང་ཐོ་འགོད་མཁན་ནི་ཅེ་ཧྲོ་གྲོང་ཁྱེར་མི་དམངས་སྲིད་གཞུང་གཞུང་སྒྲུབ་ཁང་དང་། སྲིད་གཞུང་གི་ཐམ་ག་བརྒྱབ་འདུག ཡང་འགྱུར་ལྡོག་ནི ༢༠༠༠ ལོ་བྱུང་བ་ཡིན་ལ། མཐར་ཕྱིན་རྗེས་ཀྱི་ཀྲང་ལིས་མེན་ནི་རང་གི་རེ་མོས་ལྟར་སྒྲིག་ཁུངས་སུ་འགོད་མ་ཐུབ། ལོ་གཅིག་རྗེས་སུ། སྲིད་གཞུང་གིས་ཁོ་ཅེ་ཧྲོ་གྲོང་ཁྱེར་ཏེ་ཆོ་གྲོང་རྡལ་ཀྲང་ལའོ་ཀྲུང་སློབ་ཆུང་དུ་ཚབ་ཁྲིད་དུ་མངགས།
གཉིས། ༢༠༠༨ ལོའི་ཡར་སྔོན་དུ་ཚབ་ཁྲིད་བྱས་པའི་ཟླ་ཕོགས་ནི་དངུལ་སྒོར ༢༢༠ རེད།
ལོ་ངོ་བཅུའི་རིང་། དགེ་རྒན་ངོ་མ་ཞིག་བྱེད་རྒྱུ་ནི་ཀྲང་ལིས་མེན་གྱི་རེ་འདུན་ཡིན། ཁོས་སྔ་གཞུག་ཏུ་ཏེ་ཆོ་གྲོང་རྡལ་གྱི་སློབ་ཆུང་གསུམ་དུ་སློབ་ཁྲིབ་བྱས་ལ། སྐད་ཡིག་དང་རྩིས་རིག་བཅས་ཀྱི་སློབ་ཁག་གཙོ་བོ་དང་། གླུ་དབྱངས་བཅས་ཀྱི་སྒྱུ་རྩལ་སློབ་ཁག་ཀྱང་ཁྲིད་མྱོང་། ཐོག་མར་ཟླ་རེའི་གླ་ཕོགས་ནི་དངུལ་སྒོར ༢༢༠ དང་། ༢༠༠༨ ལོར་༤༢༠ རུ་འཕར། ཁོ་དང་ལས་ཁུངས་བར་ངལ་རྩོལ་གན་རྒྱ་བཞག་མེད་ལ། འགན་སྲུང་རིགས་གཅིག་ཀྱང་མི་འདུག ༢༠༡༣ ལོར། ཁོས་ཡུན་རིང་བོར་ཚབ་ཁྲིད་བྱས་པས། ཟླ་ཕོགས་དངུལ་སྒོར ༨༦༠ རུ་འཕར་ལ། གཞན་ལན་རེར་སློབ་མཚམས་བཞག་ནས་ཞོར་ལས་བྱེད་བཞིན་པའི་དགེ་རྒན་དེ་དག་ལ་ཟླ་རེར་དངུལ་སྒོར ༢༢༠ དང་ཡང་ན ༤༢༠ མ་གཏོགས་མི་འདུག ཀྲང་ལིས་མེན་གྱིས་བཤད་རྒྱུར། མི་སྣ་དོ་དམ་ཡང་རྙོག་འཛིང་རང་བཞིན་དང་ལྡན། དགེ་རྒན་ཁ་ཤས་ལས་གནས་ལས་བྲལ་ཡོད་ཀྱང་། སྔར་བཞིན་གླ་ཕོགས་ལེན་བཞིན་འདུག་ཟེར།
གསུམ། གཞུང་ཕྱོགས་ཀྱིས་བྱེད་ཐབས་གང་མང་སྤྱད་དེ་རྣམ་པ་ལེགས་སུ་བསྒྱུར་མྱོང་།
ཟླ ༧ པའི་ཚེས ༡༤ ཉིན། ཅེ་ཧྲོ་གྲོང་ཁྱེར་སློབ་གསོ་ཅུའི་ཅུའུ་ཀྲང་ཡུའེ་ལེ་དང་། གྲོང་ཁྱེར་ཨུ་ཡོན་ལྷན་ཚོགས་དྲིལ་བསྒྲགས་པུའི་པུའུ་ཀྲང་གཞོན་པ་ཞའོ་ཏེན་ཀྲུང་གཉིས་ཀྱིས་མཉམ་པོར་ཕིང་ཕེ་གསར་འགྱུར་ལ་དོན་དག་དེར་དམིགས་ནས་ལན་སློག ཡུའེ་ལེ་ཡིས་བཤད་རྒྱུར། དགེ་རྒན་ཐད་གྱི་དོན་འདི་ནི་ལོ་རྒྱུས་ཀྱི་ཤུལ་བཞག་གནད་དོན་ཤིག་ཡིན་ལ། ༡༩༩༦ ལོར། རྒྱལ་ཁབ་ཀྱིས་བཏོན་པའི་རྨང་གཉིས་མངོན་འགྱུར་དང་། ཅེ་ཧྲོ་གྲོང་ཁྱེར་ཞིང་སྡེའི་སློབ་གྲྭའི་རོལ་དབྱངས་དང་། རྩལ་སྦྱོང་། མཛེས་རྩལ་སོགས་སློབ་ཁག་གི་དགེ་རྒན་མི་འདང་བའི་གནད་དོན་ལ་དམིགས་ནས། ཅེ་ཧྲོ་གྲོང་ཁྱེར་གྱི་ཨུ་ཡོན་ལྷན་ཚོགས་དང་། སྲིད་གཞུང་གིས་གྲོས་མོལ་བྱས་མཐར། སློབ་གསོ་དང་། སྤྱི་བདེ། ནོར་སྲིད། མི་དོན་སོགས་སྡེ་ཁག་གང་མང་གིས་མཉམ་འབྲེལ་གྱིས་གཞུང་ཡིག་བཏང་ལ། ༡༩༩༦ ལོ་ནས་བཟུང་། སྤྱི་བསྡོམས་པས་སྐབས་གསུམ་གྱི་སྒྱུ་རྩལ་རྩལ་སྦྱོང་ཐད་ཀྱི་ འབྲིང་རིམ་ཆེད་ལས་སློབ་མ ༦༤༡ བསྡུ་བ་དང་། རང་གིས་སློབ་ཡོན་སྤྲོད་པ། མཐར་ཕྱིན་རྗེས་ལས་བགོ་བ། སློབ་ཡུན་ནི་ལོ་གསུམ་དང་། ལོ་རེའེ་སློབ་ཡོན་ལ ༣༥༠༠ ཅན་དང་། ༥༠༠༠ ཅན། ༦༠༠༠ ཅན་བཅས་རིགས་གསུམ་ཡོད་ཟེར། ཡུའེ་ལེ་དང་ཞའོ་ཏེན་ཀྲུང་གཉིས་ཀྱིས་བཤད་རྒྱུར། དེའི་སྐབས་ཀྱི་ཡིག་ཆ་ལྟར་ན། ཁོ་ཚོ་ལས་དོན་སྒྲིག་ཁུངས་སུ་འགོད་དགོས། འོན་ཀྱང་དེ་དུས་རྒྱལ་ཁབ་ཀྱི་བྱ་བ་བགོད་ལུགས་འགྱུར་བའི་སྐབས་ལ་འཁེལ་བས་འགོད་མ་ཐུབ། མཐར་ཅེ་ཧྲོ་གྲོང་ཁྱེར་སྲིད་གཞུང་གིས་ཚབ་ཁྲིད་དགེ་རྒན་བྱེད་པར་འཐད་པའི་མཐར་ཕྱིན་སློབ་མ ༥༥༢ ཞིང་སྡེའི་སློབ་ཆུང་ཁག་ཏུ་སློབ་ཁྲིད་དུ་མངགས་ཤིང་། ངལ་རྩོལ་གན་རྒྱ་མི་འཇོག་པ་དང་། ཟླ་རེར་ཆེས་དམའ་བའི་འཚོ་བའི་གྲོན་དངུལ་གྱི་ཚད་གཞི་ལྟར་འཚོ་བའི་ཁ་གསབ་སྟེར་རྒྱུའི་ཁས་བླངས་ཡོད། ཡང་སློབ་མ ༨༩ བཀོད་སྒྲིག་དེར་མ་ཞུགས།
བཞི། ཆེད་གཉེར་ཚན་ཆུང་བཙུགས་ཏེ་གནད་དོན་ཐག་གཅོད་བྱེད་པ།
ཀྲང་ལིས་མེན་སོགས་ཀྱིས་ལོ་གང་མང་དུ་ཁེ་དབང་བརྩོན་ལེན་བྱས་ཏེ། སྒྲིག་ཁུངས་སུ་འགོད་པར་བརྩོན་ལེན་བྱེད་བཞིན་ཡོད། ཡུའེ་ལེ་ཡིས་ཕིང་ཕེ་གསར་འགྱུར་བརྒྱུད་བཤད་རྒྱུར། ཟླ ༧ པའི་ཚེས ༦ ཉིན། ཚབ་ཁྲིད་དགེ་རྒན ༢༠༠ ཡིས་ཅེ་ཧྲོ་གྲོ་ཁྱེར་དུ་འཕྲེད་འགེལ་བཀལ་ཏེ་ཁེ་དབང་སྲུང་སྐྱོབ་བྱས་པ་དང་། ཁོས་ཚབ་བྱེད་མི་སྣ་འགའ་དང་ཁ་བརྡ་བྱས་ལ། ཁྲིམས་མཐུན་གྱིས་ཁེ་དབང་འགན་སྲུང་བྱེད་དགོས་པའི་སྐོར་བཤད། གཞན་ད་དུང་མིག་སྔར་གྲོང་ཁྱེར་ཨུ་ཡོན་ལྷན་ཚོགས་དང་། སྲིད་གཞུང་གིས་སློབ་གསོ་ཅུའུ་བཅས་སྡེ་ཁག་མང་པོའི་ལས་བྱེད་མི་སྣ་རྩ་འཛུགས་བྱས་ཏེ་ཆེད་གཉེར་ཚན་ཆུང་བཙུགས་ཡོད་པ་དང་། ལོ་རྒྱུས་ཀྱི་ཤུལ་བཞག་གནད་དོན་འདི་ངེས་པར་ཐག་གཅོད་བྱེད་དགོས་པ། སྒྱུ་རྩལ་རྩལ་སྦྱོང་འཛིན་གྲྭ་ལས་མཐར་ཕྱིན་པའི་སློབ་མར་རེ་འདུན་རེའུ་མིག་སྐོང་དུ་བཅུག་ནས། མི་དོན་སྡེ་ཁག་གིས་ཞིབ་བཤེར་དང་བསམ་འཆར་འདོན་པ་དང་། སླར་བསམ་འཆར་ཁོ་ཚོར་བཤད་དེ། གཅིག་གྱུར་གྱི་བསམ་བློ་ཆགས་རྗེས་ཐག་གཅོད་ཀྱི་ཇུས་གཞི་ཞིག་འགོད་རྒྱུ་ཡིན་པ། བྱ་བ་འདི་ཉེ་ལམ་འགོ་རྩོམ་པ་དང་། ཐག་གཅོད་ཀྱི་ཇུས་གཞི་གཏན་ཕབ་བྱས་རྗེས། དོ་དམ་ལེགས་པོ་བྱེད་པ། ལས་གནས་ལས་བྲལ་བའི་ཚབ་ཁྲིད་དགེ་རྒན་ལ་ཁ་གསབ་མི་སྟེར་བ་དང་། ལས་གནས་གཏན་སྲུང་བྱེད་པ་དག་དང་ངལ་རྩོལ་གན་རྒྱ་བཞག་ནས། ཁོ་ཚོས་ཁེ་དབང་ལ་སྲུང་སྐྱོབ་བྱེད་རྒྱུ་ཡིན་པ་བཅས་བཤད།