ཕ་སྐད་བརྗེད་མི་རུང་།
སྤེལ་དུས 2011-08-24
ཡོང་ཁུངས། གངས་རྒྱན་ན་ཆུང་ཚགས་པར།
རྩོམ་པ་པོ། སྒོལ་མས་བསྒྲིགས།
མི་རིགས་ཤིག་གི་སྐད་ཆ་ནི་དུས་ཡུན་རིང་བོའི་ལོ་རྒྱུས་ཁྲོད་འཕེལ་འགྱུར་རབ་དང་རིམ་པ་བྱུང་སྟེ་གྲུབ་པ་ཡིན་ལ། ང་ཚོའི་བོད་མི་རིགས་ཀྱི་སྐད་ཆ་འདིའང་ཆོས་ཉིད་དེ་ལས་མ་འདས། ང་ཚོ་བོད་མི་སུ་ཞིག་ཡིན་རུང་ཕ་སྐད་ལྷད་མེད་པ་འདི་རང་གི་མིག་འབྲས་ལྟར་གཅེས་ཤིང་། རང་ནུས་ཅི་ཡོད་ཀྱིས་སྔར་ལས་ཕུན་སུམ་ཚོགས་པ་ཞིག་ཏུ་གཏོང་བར་འབད་པ་བྱ་དགོས་པ་ནི་ང་ཚོའི་ཕྲག་ཏུ་བབས་པའི་འོས་འགན་ཞིག་ཡིན། སྐད་རིགས་གཞན་ཅི་ཙམ་ཤེས་ན་དེ་ཙམ་གྱིས་བཟང་མོད།
འོན་ཀྱང་ང་ཚོས་མི་རིགས་རང་གི་སྐད་ཆ་སྣང་མེད་དུ་བཞག་ན། ཡབ་མེས་དག་གི་རེ་བའང་སྟོང་ཟད་དུ་བཏང་བར་མ་ཟད། ང་ཚོས་རང་མི་རིགས་འདིའང་ཡལ་དུ་འཇུག་སྲིད། དེ་བས་ང་ཚོ་རང་ཉིད་ཀྱི་ལྟེ་ཁྲག་འཕོ་སའི་ཕ་ཡུལ་དང་ཁ་བྲལ་ཡོད་ནའང་། རང་ཉིད་བོད་པ་དངོས་མ་ཞིག་ཡིན་མིན་ཤན་འབྱེད་ཐུབ་པའི་ཕ་སྐད་འདི་བརྗེད་མི་རུང་ངོ།