ཞོགས་པ་སྨན་གཏོང་བ་དང་། ཁོག་སྟོང་ལ་སྨན་གཏོང་བ་སོགས་ཡང་དག་པའི་སྨན་གཏོང་སྟངས་ཤེས་འདོད་དམ།
དུས་ཚོད་འོས་འཚམ་ཞིག་བདམས་ནས་སྨན་བཏང་བ་ཡིན་ན་སྨན་གྱི་ཕན་ནུས་མི་ཤོར་ཞིང་ཞོར་སྐྱོན་ཆུང་དུ་གཏོང་ཐུབ་པ་ཡིན། འོན་ཀྱང་ཁྱེད་ཀྱིས་གསལ་བཤད་ཡི་གེའི་ཐོག་གི་ཞོགས་པ་སྨན་གཏོང་བ་དང་། ཁོག་སྟོང་ལ་སྨན་གཏོང་བ་སོགས་ལ་གོ་བ་ཡག་པོ་ལེན་ཐུབ་ཀྱི་ཡོད་དམ།
རྒྱུན་མཐོང་གི་སྨན་བསྟེན་པའི་དུས་ཚོད་གཤམ་གསལ།
ཞོགས་པ་སྨན་གཏོང་བ། ཞོགས་པ་མལ་ལས་ལངས་རྗེས་དང་ཞོགས་ཟས་མ་ཟས་བའི་གོང་གི་ཆུ་ཚོད་གཅིག་ཚུན་ཏེ། དཔེར་ན། འདུས་འདྲིལ་འགོག་པའི་སྨན་རྫས་ལི་ཧྥུ་ཕིང་(利福平)དང་དབྱི་ཡན་ཅིང་(异烟肼)གཉིས་ཞོགས་པ་བཏང་བ་ཡིན་ན་སྲིན་འབུ་གསོད་པའི་ནུས་པ་ཆེན་པོ་ལྡན།
ཁོག་སྟོང་ལ་སྨན་གཏོང་བ། མི་མང་པོ་ཞིག་གིས་སྨན་འཐུང་སྐབས་ཁོག་སྟོང་ཡིན་ཚེ་བཏུང་ཚར་རྗེས་མྱུར་དུ་ཟ་མ་ཟས་ཆོག་པར་འདོད་ཀྱི་ཡོད་མོད། དོན་དངོས་སུ་དེ་ནི་ནོར་འཁྲུལ་ཡིན།
ཁོག་སྟོང་ལ་སྨན་གཏོང་བ་ཞེས་པ་ནི་སྨན་མ་བཏང་གོང་གི་ཆུ་ཚོད་2ཡས་མས་དང་སྨན་བཏུང་རྗེས་ཀྱི་ཆུ་ཚོད་1ནས་2བར་ཟ་མ་ཟ་མི་རུང་བའི་དོན་ཡིན། དཔེར་ན། རྒྱུ་ཞུའི་སྨན་རྫས་ལ་མཚོན་ན་རྒྱུ་མའི་ནང་འཇུ་སླ་བ་མ་གཏོགས་ཕོ་བའི་གཤེར་ཁུའི་ནང་འཇུ་སླ་པོ་མེད་པས། སྤྱིར་བཏང་དུ་ཁོག་སྟོང་ལ་གཏོང་དགོས་པའི་བླང་བྱ་འདོན་གྱི་ཡོད།
ཟ་མ་མ་ཟས་པའི་གོང་ལ་སྨན་གཏོང་བ། ཟ་མ་མ་ཟས་གོང་གི་སྐར་མ་30ནས་60བར་གཏོང་དགོས། ཁོག་སྟོང་ལ་སྨན་བཏང་ན་འཇུ་སླ། སྤྱིར་བཏང་དུ་ཕོ་བར་གནོད་འཚེ་མེད་པའམ་གནོད་འཚེ་ཆུང་བའི་རིགས་དང་། ཕོ་བའི་ནང་ནུས་པ་ཐོན་པའི་སྨན་རྫས་དག་ཟ་མ་མ་ཟས་སྔོན་ལ་འཐུང་དགོས། དཔེར་ན་ཕོ་བའི་འབྱར་སྐྱི་སྲུང་སྨན་དང་ཕོ་རྒྱུ་སྐུལ་སྨན། སྐྱུར་འགོག་སྨན། མགོ་ཐུམ་རིགས་དང་བཤལ་སྨན་ལྟ་བུ།
ཟ་མ་བཟས་རྗེས་སྨན་གཏོང་བ། ཟ་མ་བཟས་ནས་ཆུ་ཚོད་ཕྱེད་དམ་གཅིག་ཙམ་འགོར་རྗེས་གཏོང་དགོས།
ཉལ་ཁར་སྨན་གཏོང་བ། ཉལ་ཁའི་སྐར་མ་15ནས་30བར་གཏོང་དགོས།
དགོས་མཁོ་ཡོད་དུས་གཏོང་བ། ན་ཟུག་ལངས་པ་དང་གློ་བུར་དུ་བྱུང་བའི་གནས་ཚུལ་འོག་གཏོང་དགོས།
ཉིན་རེར་ཐེངས་རེ་གཏོང་བ། ཉིན་རེའི་ཞོགས་པའམ་དགོང་མོ་ཐེངས་རེ་གཏོང་བ་མ་ཟད། ཉིན་སོ་སོའི་སྨན་གཏོང་བའི་དུས་ཚོད་གཅིག་པ་ཡོང་ཐབས་བྱེད་དགོས།
ཉིན་གཅིག་ལ་ཐེངས་གཉིས་གཏོང་བ། སྤྱིར་བཏང་དུ་ཞོགས་ཟས་དང་དགོང་ཟས་སྐབས་གཏོང་དགོས་ཤིང་ཐེངས་གཉིས་བར་ཆུ་ཚོད་12འགོར་དགོས།
ཉིན་གཅིག་ལ་ཐེངས་གསུམ་གཏོང་བ། ཉིན་རེའི་ཆུ་ཚོད་24དུས་ཚོད་གསུམ་ལ་བགོས་ནས་སྨན་གཏོང་དགོས་པ་སྟེ། གཏོང་ཐེངས་རེའི་བར་མ་མཐར་ཡང་ཆུ་ཚོད་8རེ་ཡོད་དགོས།
ཉིན་རེར་ཐེངས་མང་པོ་གཏོང་བ། ཉིན་རེའི་དུས་ཚོད་24ཆ་སྙོམས་ཡོང་ཐབས་བྱེད་དགོས་པ་མ་ཟད། དུས་ལྟར་ངལ་གསོ་རྒྱག་དགོས།
འཚོ་བའི་ཁྲོད་ཀྲུང་ལུགས་དང་ཕྱི་ལུགས་སྨན་རྫས་མཉམ་དུ་སྤྱོད་པའི་གནས་ཚུལ་ཡང་རྒྱུན་དུ་མཐོང་རྒྱུ་ཡོད་མོད། ཀྲུང་ལུགས་དང་ཕྱི་ལུགས་ཀྱི་སྨན་མཉམ་གཏོང་བྱས་ན་སྨན་རྫས་ཕན་ཚུན་ཤུགས་རྐྱེན་འབྱུང་སླ་བས། སྤྱིར་བཏང་དུ་ཆུ་ཚོད་ཕྱེད་ལྷག་འགོར་རྗེས་གཏོང་དགོས་པ་ཡིན།
རྩོམ་སྒྲིག་པ། སྣང་རྡོར།