སློབ་ཆུང་སློབ་མས་སློབ་ཚན་ལ་སྔོན་སྦྱོང་བྱེད་དགོས་དོན།
སྤེལ་དུས 2020-03-23
ཡོང་ཁུངས། གངས་རྒྱན་ན་ཆུང་ཚགས་པར།
རྩོམ་པ་པོ། བ་ཐར་འབུམ།
སློབ་ཁྲིད་མ་བྱས་གོང་གི་སྔོན་སྦྱོང་ནི་སློབ་ཆུང་སློབ་མ་དང་ཁ་འབྲལ་ཐབས་མེད་པའི་སློབ་སྦྱོང་གི་རྣམ་པ་ཞིག་རེད། དེ་ཡང་དགེ་རྒན་གྱི་མཛུབ་སྟོན་གཞིར་བཟུང་སྟེ་འཚོལ་ཞིབ་དང་། ཐག་གཅོད། བསམ་གཞིག་བཅས་ལ་བརྟེན་ནས་སྐབས་སུ་བབ་པའི་ཤེས་བྱ་ལ་རྒྱུས་ལོན་དང་དཀའ་གནད་ཀྱི་སྐོར་བདེ་བླག་ངང་རྟོགས་པའི་ཆེད་དུ་སློབ་ཁྲིད་མ་བྱས་པའི་སྔོན་ལ་སྔོན་སྦྱོང་ཡག་པོ་ཞིག་བྱེད་དུ་འཇུག་རྒྱུ་ནི་ཧ་ཅང་གལ་ཆེ།
དེས་ན་སློབ་ཆུང་སློབ་མས་སྐད་ཡིག་གི་སློབ་ཚན་ལ་སྔོན་སྦྱོང་བྱེད་དགོས་ན། ཐོག་མར་དགེ་རྒན་གྱིས་སྔོན་སྦྱོང་བྱེད་པའི་ཐབས་ཤེས་དང་ནང་དོན་དམིགས་སུ་བཀར་ནས་སྟོན་དགོས། དེ་ལྟར་བྱས་ན་ད་གཟོད་སློབ་ཁྲིད་ལ་ཉན་པའི་སྤུས་ཀ་ཇེ་མཐོར་ཡོང་བ་མ་ཟད། ད་དུང་དགེ་རྒན་གྱི་སློབ་ཁྲིད་ཀྱི་སྤུས་ཀ་ཡང་ཁག་ཐེག་བྱེད་ནུས། འོན་ཀྱང་། གཞི་རིམ་གྱི་སློབ་མ་མང་ཆེ་བར་སྔོན་སྦྱོང་གི་འདུ་ཤེས་ཞན་པས། དགེ་རྒན་གྱི་སློབ་ཁྲིད་ལ་དཀའ་ཁག་ཆེན་པོ་འབྱུང་བཞིན་ཡོད།
དེ་བས་བསླབ་ཚན་བཅོས་སྒྱུར་གྱི་དམིགས་ཚད་ལྟར། རང་རྟོགས་སྒོས་སློབ་སྦྱོང་བྱེད་པའི་ནུས་པ་སྐྱེད་སྲིང་བྱས་ན། མ་གོ་བའམ་མི་ཤེས་པ། ཡིད་ལ་འཛིན་དཀའ་བ། ཡང་ན་དོན་ཆུང་དུ་བཟུང་ནས་རེ་ཞིག་བསྐྱུར་པ་སོགས་སློབ་ཁྲིད་ལ་ཉན་པའི་སྐྱོན་སྣ་ཚོགས་སྤངས་ཏེ། སློབ་ཁྲིད་ཀྱི་ནང་དོན་བདེ་བླག་ཏུ་རྟོགས་ཐུབ་པར་སྙམ།
ལྷག་ཏུ་སྐད་ཡིག་གི་སློབ་ཚན་གསར་བར་སྔོན་སྦྱོང་བྱེད་དགོས་ན། ཀློག་པ་དང་འབྲི་བ། རྟགས་འགོད་པ། མཆན་རྒྱག་པ། བསམ་བློ་གཏོང་བ། འདྲི་བ་དང་རྩད་བསྡུར་བྱེད་པ་སོགས་ཀྱི་ཐབས་སྣ་མང་སྤྱད་དེ། རྒྱུས་ལོན་དང་། མཉམ་འཇོག དོགས་གནད་སེལ་བ་སོགས་ས་ས་མལ་དང་རྡོ་རྡོ་མལ་བྱས་ན། ཐུན་རྗེས་མའི་སློབ་ཁྲིད་ཀྱི་ནང་དོན་ལ་སྟབས་བདེ་དང་། དགེ་རྒན་གྱི་འགན་ཁུར་ཇེ་ཡང་། སློབ་མ་རང་ཉིད་ཀྱི་རང་སྦྱོང་གི་ནུས་པ་ཇེ་མཐོར་གཏོང་ཐུབ་པ་ལས། ད་དུང་འཛིན་གྲྭའི་སློབ་སྦྱོང་གི་མཁའ་དབུགས་ཇེ་ལེགས་སུ་འགྲོ་བ་ལའང་ཕན་ཡོན་ཆེན་པོ་ལྡན་པས། ང་ཚོས་སློབ་སྦྱོང་བྱེད་པར་མི་སྤྲོ་བ་རྣམས་སྤྲོ་རུ་འཇུག་པ་དང་། བྱེད་མི་ཤེས་པ་རྣམས་ལ་བྱེད་ཤེས་སུ་འཇུག་པ། སྔོན་སྦྱོང་བྱེད་པའི་གོམས་སྲོལ་མེད་པ་རྣམས་ལ་ཡོད་དུ་བཅུག་སྟེ། སྐད་ཡིག་སྦྱང་ཤེས་པ་དང་སྤྱོད་ཤེས་པ་བཅས་ལ་དམིགས་དགོས།
རྒྱུ་མཚན་ནི། གལ་ཏེ་སློབ་མས་སྔོན་སྦྱོང་བྱས་པ་མ་འདང་བའམ་ཡང་ན་སྔོན་སྦྱོང་གི་གོམས་སྲོལ་ཆགས་མེད་ཚེ། སློབ་ཁྲིད་ལ་ཉན་པའི་རྒྱུ་སྤུས་ཞན་པ་དང་ལས་བྱ་བསྒྲུབ་དཀའ་བར་འགྱུར་བའོ།།
མདོར་ན། སློབ་མས་སྔོན་ལ་སྦྱོང་བ་དང་དགེ་རྒན་གྱིས་རྗེས་ནས་འཁྲིད་པའི་ཁ་ཕྱོགས་རྒྱུན་འཁྱོངས་བྱས་ཏེ། སློབ་ཁྲིད་ཀྱི་བྱ་འགུལ་ཧྲིལ་བོའི་ནང་དུ་སློབ་མ་གཙོ་བོ་རུ་འཛིན་པར་བྱེད་པ་དེའོ།།
མཚོ་སྔོན་ཞིང་ཆེན་ཀོས་ནན་རྫོང་བྱ་མདོ་བཅའ་སྡོད་སློབ་ཆུང་།
རྩོམ་སྒྲིག་པ།སྣང་རྡོར།
