ཧྥ་རན་སེའི་ཙུང་ཐུང་མཱ་ཁེ་ལུང་གིས་དེ་རིང་ནས་བཟུང་རང་རྒྱལ་ལ་རྒྱལ་དོན་འཚམས་འདྲི་བྱེད་པ། ཚོགས་ཆེན་བཅུ་དགུ་པའི་དགོངས་དོན་བགྲོ་གླེང་འཛིན་གྲྭ་སློབ་འགོ་ཚུགས་པ། བོད་སྐྱོད་འབུམ་རམས་པའི་ཞབས་ཞུ་ཚོགས་པས་མུ་མཐུད་རིག་སྟོབས་རོགས་སྐྱོར་བྱས་པ། བོད་ལྗོངས་ཀྱི་གཞོན་ནུ་ལོ་ཆུང་གི་ཚན་རིག་ལས་དོན་ཁང་ཐོག་མ་ལྷ་སར་བཙུགས་པ། བོད་ཀྱིས་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་རྣམ་གྲངས་བརྒྱ་ལྷག་ཙམ་གསར་དུ་བསྣན་པ། ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གིས“ངོ་རིས་བཤེར་ནས་དངུལ་ལེན་པའི”བྱེད་ནུས་བཏོན་པ། ཀྲུང་དབྱང་གི་ཁོར་ཡུག་སྲུང་སྐྱོབ་སྐོར་ཞིབ་རུ་ཁག་ཨང་དྲུག་པས་བོད་ལྗོངས་ལ་གྱོད་དོན་༡༧བརྒྱུད་སྤྱོད་བྱས། བོད་ལྗོངས་ཀྱི་གྲོང་གསེབ་ཀྱི་མི་སྡོད་ཁོར་ཡུག་བཅོས་སྒྲིག་ལ་གྲུབ་འབྲས་མངོན་གསལ་དོད་པོ་ཐོབ་པ། བོད་ཡིག་དཔེ་མཛོད་ཀྱི་གཞི་གྲངས་ལྟེ་གནས་དབུ་བརྙེས་པའི་མཛད་སྒོ་ཀྲུང་གོའི་བོད་རིག་པ་ཞིབ་འཇུག་ལྟེ་གནས་སུ་སྤེལ།
ཀྲུང་གོའི་བོད་ལྗོངས་དྲ་བ། > དམངས་སྲོལ། > ཆོ་ག

སྐུ་གདུང་ཞུགས་འབུལ་ཞུ་སྟངས་ངོ་སྤྲོད་ཉུང་བསྡུས།

སྤེལ་དུས 2017-08-24 ཡོང་ཁུངས། ཞིན་ཧྭའི་དྲ་བ། རྩོམ་པ་པོ། བསྟན་འཛིན་གྱིས་བསྒྲིགས།
        སྤྱིར་ཕུང་པོ་ཞུགས་འབུལ་ཞུ་ཟེར་བ་ནི་ཚེ་ལས་འདས་པའི་གང་ཟག་གང་ཞིག་གི་ཕུང་བོ་ས་འོག་ཏུ་མ་སྦས་པ་དང༌། ཆུ་ལ་མ་བསྐྱུར། བྱ་ལ་མ་གཏོར་བར་མེ་ལ་བསྲེག་སྟེ་དུར་ལས་བྱེད་སྟངས་ལ་ཟེར་གྱི་ཡོད། ཞུགས་འབུལ་ཞུ་བ་ལ་ཆོས་ཀྱི་བསླབ་པ་མཐོ་དམན་དང༌། དབང་ཐང་ཆེ་ཆུང་སོགས་ཀྱི་བར་ཁྱད་ཀྱིས་སྐྱེས་བུ་དམ་དག་གི་སྐུ་ཕུང་ཞུགས་འབུལ་ཞུ་སྟངས་དང༌། དེ་ལས་སོ་སྐྱེས་ཐ་མལ་བའི་ཕུང་པོ་ཞུགས་འབུལ་ཞུ་སྟངས་གཉིས་ཆོ་ག་ཕྱག་ལེན་རྒྱས་བསྡུས་ཀྱིས་མི་འདྲ་བའི་ཚུལ་དུ་ཡོད། 
        དེ་ལ་སྐྱེས་བུ་དམ་པའི་སྐུ་ཕུང་ཞུགས་འབུལ་ཞུ་སྟངས་དེ་ཐོག་མར་ཇི་ལྟར་བྱུང་ཚུལ་ནི། སྟོན་པ་ཐུབ་པའི་དབང་པོ་དེ་ཉིད་ཀྱིས་ཆོས་ཀྱི་འཁོར་ལོ་རྒྱ་ཆེར་སྐོར་ཏེ། འགྲོ་བའི་དོན་བསམ་གྱིས་མི་ཁྱབ་པ་མཛད་མཐར་འཕགས་ཡུལ་རྩྭ་མཆོག་གྲོང་དུ་གཟུགས་སྐུའི་བཀོད་པ་བསྡུས་པའི་ཚུལ་བསྟན་པ་ན། རྗེས་འཇུག་དགྲ་བཅོམ་སོགས་ཀྱིས་མྱ་ངན་དང་བཅས་སངས་རྒྱས་ཀྱི་སྐུ་གདུང་ཞུགས་འབུལ་ཞུས་སྐབས་རིང་བསྲེལ་རིགས་ལྔ་བྱུང་ཞིང༌། སྐབས་དེར་སངས་རྒྱས་ལ་མོས་པའི་འཕགས་ཡུལ་གྱི་རྒྱལ་ཆེན་བརྒྱད་བར་རིང་བསྲེལ་ཐོབ་སླད་རྩོད་པ་བྱུངཞིང༌། མཐར་གྲོས་མོལ་མོས་མཐུན་གྱིས་སྐུ་གདུང་རིང་བསྲེལ་མ་ག་ངྷའི་ཁལ་རེའི་ཚུལ་དུ་ཁག་བགོས་ཀྱིས་འཁྱེར་ཏེ། སོ་སོའི་གནས་སུ་རིང་བསྲེལ་བཞུགས་པའི་མཆོད་རྟེན་ཆེན་པོ་རེ་བཞེངས་སུ་གསོལ་བར་གྲགས། སྐབས་དེ་ནས་བཟུང་རྒྱ་གར་ནང་སྐྱེས་བུ་དམ་པ་རྣམས་ཀྱི་སྐུ་གདུང་ཞུགས་འབུལ་དང་གདུང་རྟེན་བཞེངས་སྲོལ་རྒྱུན་མར་བྱུང་ཞིང༌། རང་རེ་བོད་དུའང་དེ་འབྲེལ་གྱིས་ཕྱག་སྲོལ་དེ་དར་ཁྱབ་བྱུང་བ་ཡིན་པར་སྙམ། 
        དེ་ལ་སྐུ་གདུང་ཞུགས་འབུལ་ནི་རང་གི་རྩ་བའི་བླ་མ་དང༌། དགེ་རྒན། ཕ་མ་སོགས་བཀའ་དྲིན་ཆེ་ཞིང་རང་ལས་ཁྱད་འཕགས་ཀྱི་གང་ཟག་རྣམས་སྐུ་གཤེགས་དུས། སྐུ་ཕུང་ རས་དཀར་པོས་ཡོངས་སུ་དཀྲིས་ཏེ་དུར་ཁྲོད་དང་ས་ཕྱོགས་གཙང་མར་གདན་དྲངས་ཐོག ཙན་དན་དང༌། ཨ་དཀར། ཤུག་པ་སོགས་དྲི་ཞིམ་གྱི་ཤིང་སྣ་ཞུགས་ཐབ་སྒང་སྤུངས་པའི་དབུས་སུ་བཞག་སྟེ། མར་སྣུམ་སོགས་བླུགས་ནས་མེར་བསྲེགས་བཏང་པ་ལ་ཟེར། 
        སྤྱིར་སྐུ་ཕུང་ཞུགས་འབུལ་བྱེད་སྟངས་སྐོར་མདོ་སྔགས་ཀྱི་གཞུང་ལས་བྱུང་བའི་ཕྱག་ལེན་ཆོ་ག་དང་བསྟུན་གྲུབ་མཐའ་སོ་སོའི་སྐྱེས་ཆེན་དམ་པ་མང་པོས་ཕྱག་ལེན་ཉམས་མྱོང་ཕྱོགས་སྡོམ་གྱིས་མཛད་པ་མང་དུ་སྣང༌། དགེ་ལུགས་པར་མཚོན་ན་རྡོ་རྗེ་གུར་དང་ངན་སོང་སྦྱོང་རྒྱུད་སོགས་ལས་གསུངས་པ་དེ་བཞིན་བུ་སྟོན་རིན་པོ་ཆེ་དང༌། འབྲོང་རྩེ་ལྷ་བཙུན་རིན་ཆེན་རྒྱ་མཚོ། པཎ་ཆེན་ཡེ་ཤེས་རྩེ་མོ་སོགས་དམ་པ་མང་པོས་གསུངས་གནང་ཡོད་པ་དང༌། ཁྱད་པར་ཐུའུ་བཀྭན་རིན་པོ་ཆེ་བློ་བཟང་ཆོས་ཀྱི་ཉི་མས་དོན་གསལ་ཞིང་འཇུག་བདེ་བའི་ཞལ་གསུངས། རྡོ་རྗེ་སེམས་དཔའི་སྒོ་ནས་ཡུལ་ཁྱད་པར་ཅན་གྱི་སྐུ་གདུང་མཆོད་ཅིང་བྱང་བའི་ཆོ་ག་རིན་ཆེན་སྒྲོན་མེ་ཞེས་པ་ཞིག་མཛད་ཡོད་པ་དེའི་ནང་སྐྱེས་ཆེན་དམ་པ་གང་ཞིག་སྐུ་མྱ་ངན་ལས་འདའ་ཁར་ཐུགས་དམ་གསལ་འདེབས་ཇི་ལྟར་ཞུ་བའི་ཚུལ་དང༌། སྐུ་ཕུང་ཞུགས་འབུལ་ཞུ་སྟངས། སྐུ་གདུང་མཆོད་རྟེན་བཞེངས་ཚུལ་སོགས་ཞིབ་གསལ་དུ་གསུངས་གནང་བ་ཁོང་གི་གསུང་འབུམ་ལྷ་ས་ཞོལ་དཔར་མའི་པོད་ང་བའི་ནང་འཁོད་འདུག་པར་དུང་དཀར་ཚིག་མཛོད་དུ་གསུངས་འདུག་པས་ཞིབ་རྒྱས་སུ་གསུང་འབུམ་དེ་རུ་གཟིགས་པར་འཚལ།         དེ་ལ་བརྗོད་ཟིན་པ་མང་པོ་ཞིག་གོང་འོག་བསྒྲིགས་ཏེ་བསྐྱར་བཟློས་ཡང་བཟློས་ཀྱི་ཚུལ་དུ་གླེང་བར་དགོས་པ་མ་མཐོང་བས། དུང་དཀར་ཚིག་མཛོད་ཆེན་མོའི་ནང་དམ་པ་ཁོང་གིས་མཐོང་ཐོས་ཕྱག་ལེན་མྱོང་བ་གནད་བསྡུས་སུ་གསུངས་གནང་བ་ཞིག་འདུག་པ་དེ་རང་ཅག་གིས་གོ་སླ་ཞིང་རྒྱས་བསྡུར་རན་པར་མཐོང་སྟེ་འདིར་ཇི་བཞིན་བཀོད་ན། རང་ལ་ཆོས་འབྲེལ་ཐོབ་པའི་བླ་མ་དང༌། དགེ་རྒན་སོགས་དགོངས་པ་རྫོགས་རྗེས་སྐུ་གདུང་ལ་ཕྱག་གསུམ་ཕུལ་ཏེ། རས་དཀར་པོ་གཙང་མ་ཞིག་གིས་ཞལ་གྱི་ཨོལ་སྐོའི་འོག་ནས་སྐུའི་ཐུགས་ཀ་བར་བཀབ་སྟེ་བཞག་ཐོག ཐུགས་དམ་གྲོལ་བའི་རྟགས་མ་བྱུང་བར་སྐུ་གདུང་ལ་སྒུལ་བསྐྱོད་སོགས་མི་གཏོང༌། ཐུགས་དམ་གྲོལ་བའི་རྟགས་ཤངས་བུག་གཉིས་ནས་བྱང་སེམས་དཀར་དམར་ཕེབས་མཚམས་སྐུ་གདུང་ལ་དར་གོས་དཀར་པོའམ་དམར་པོ་གང་རིགས་ཀྱིས་དྲུག་ཆིངས་ཕུལ་ཏེ། ཆེད་གཉེར་གྱིས་བཟོས་པའི་གདུང་སྒྲོམ་ནང་དུ་བཞག་ནས་དེ་ལ་ན་བཟའ་ཆོས་གོས་སྣམ་སྦྱར་སོགས་རབ་བྱུང་གི་ཆས་དང༌། དེའི་སྟེང་དུ་ལྷའི་ཆས་འཇུག་བསྒྲོན་ཏེ་དགུང་ཞག་ཇི་ཙམ་འོས་པའི་རིང་གདུང་ཁྲུས་དང༌། གདུང་སྒྲུབ། དད་ལྡན་ཁག་གི་དགོངས་རྫོགས་མཆོད་འབུལ་བཅས་གྲུབ་མཚམས། ས་ཕྱོགས་གཙང་ས་ཞིག་ཏུ་སོ་ཕག་སོགས་ཀྱིས་སྐུ་གདུང་སྲེག་ཐབ་བརྩིགས་ཏེ། དེའི་སྟེང་དུ་ཟླུམ་པོ་མདུན་དུ་མེ་སྒོ་ཡོད་པ་ཞིག་གི་ནང་དུ་སྟོད་ཀྱི་ཆར་ལྕགས་དྲས་བཀབ་པའི་སྟེང་དུ་སྐུ་གདུང་བཞག་སྟེ། ཤུག་པ་དང་ཙན་དན་སོགས་དྲི་བཟང་པོའི་ཤིང་ཕྱོགས་བཞི་ནས་བརྩིགས་པ་ལ། ཏིལ་སྣུམ་དང༌། མར་ཁུ་བསྲེས་པ་བླུགས་ནས་སྐུ་རུས་རྣམས་གཙང་མར་མ་འཚིགས་བར་དུ་ཆོ་གའི་ནང་དུ་གསལ་བ་ལྟར་ཞུགས་འབུལ་ཞུས། ཉིན་ཤས་སོང་རྗེས་སྤུར་ཁང་ཞལ་ཕྱེ་ནས་སྐུ་གདུང་གི་ཆ་ཤས་འགའ་ཞིག་དད་ལྡན་སློབ་མ་དང་ཡོན་བདག་རྣམས་ལ་བགོས་འགྲེམས་ཐོག མང་ཆེ་བ་སྐུ་གདུང་གི་མཆོད་རྟེན་དང་འདྲ་སྐུ་བཞེངས་པའི་ནང་གཟུངས་སུ་ཕུལ་དགོས་པ་ཡིན་ཞེས་གསུངས་འདུག 
        དེ་ལ་དྲུག་ཆིངས་ནི་སྐུ་གདུང་རས་དར་སོགས་ཀྱིས་བསྡམ་བཀྱིགས་ལྟ་བུའི་མདུད་པ་རྒྱག་སྲོལ་ཏེ། དེའི་སྐོར་མཁས་དབང་ཚེ་ཏན་ཞབས་དྲུང་ཚང་གི་གསུང་འབུམ་པོད་དང་པོའི་ནང་ཇི་ལྟར་འཁོད་པ་ནི། དྲུག་ཆིངས་ཞེས་པ་ཐོག་མར་རྡོ་རྗེ་སྐྱིལ་ཀྲུང་མཛད་པའི་ཞབས་གཉིས་ཀྱི་བསྣོལ་མཚམས་སུ་མདུད་པ་གཅིག དེ་ནས་ཕྱག་གཉིས་མཉམ་བཞག་མཛད་པའི་ཕྱག་ངར་ལ་དཀྲིས་བརྒྱབ་ནས་སྐུ་རྒྱབ་ཏུ་མདུད་པ་གཅིག དེ་ནས་ཐུགས་ཀའི་ཐད་དུ་མདུད་པ་གཅིག དེ་ནས་སྐུ་དཔུང་ལ་དཀྲིས་བརྒྱབ་ནས་གཉའ་ལྟག་ཏུ་མདུད་པ་གཅིག དེ་ནས་དཔྲལ་བའི་ཐད་དུ་མདུད་པ་གཅིག དེ་ནས་དབུ་ཐོད་ཀྱི་རྒྱབ་ཏུ་མདུད་པ་གཅིག དེ་ནས་དར་གཉིས་ཀྱི་སྣེ་མོ་དཔྲལ་བ་གཡས་གཡོན་ནས་ཁུགས་ལོ་བྱས་ཏེ་མར་ལ་དཔྱངས་པར་བྱས་པ་ནི་དྲུག་ཆིངས་ཀྱི་ཕྱག་ལེན་ཏེ། འདི་སྐྱེ་བོ་ཐ་མལ་པ་རོ་སྲེག་བྱེད་པ་ལ་ཡང་ལག་ལེན་དུ་འདེབས་རུང་བར་གསུངས་སོ་ཞེས་འཁོད་འདུག་པས་ཕྱག་སྲོལ་འདི་རིགས་ཀྱང་སྣང་མེད་དུ་མི་འཇོག་པར་དོ་སྣང་དང་ངེས་ཤེས་དགོས་པར་མཐོང་ངོ་།།