རྩོམ་པ་པོ། བསྟན་པ་ཡར་རྒྱས།
བྱང་འབྲོག་རྔོན་པའི་གོམས་སྲོལ་རིག་གནས་ཞེས་པའི་དེབ་ཆུང་འདིར་རྔོན་རྒྱག་གོམས་སྲོལ་བརྒྱུད་ནས་མི་རྣམས་ཀྱིས་གོ་ཐོས་བྱུང་མྱོང་མེད་པའི་གོམས་སྲོལ་མང་པོ་ཞིག་ངོ་སྤྲོད་གནང་ཡོད་པ་དཔེར་ན། རྔོན་རྒྱག་གི་སྒྲིག་སྲོལ་དང“འཛམ་པ”ཞེས་པའི་དམིགས་བསལ་གྱི་རྔོན་པའི་སྐོར་དང་། “ཨབ་ལག”སོགས་ཀྱི་སྐོར་ལྟ་བུའོ། །འདི་དག་ལ་ས་རྔོན་རྒྱག་གི་གོམས་སྲོལ་དེ་དུས་ཡུན་རིང་པོའི་ལོ་རྒྱུས་འཕེལ་རིམ་བརྒྱུད་རང་བྱུང་ཁོར་ཡུག་གི་གནས་ཚུལ་དང་འཚམ་པའི་ཉམས་མྱོང་མང་པོ་བསགས་པ་ལས་མ་ལག་ལྡན་པ་དང་། སྒྲོག་སྲོལ་ངེས་ཅན་ཡོད་པའི་ཐོན་སྐྱེད་ཀྱི་བྱེད་སྒོ་ཞིག་གྲུབ་པ་ལས། རང་མོས་གང་འདོད་ཀྱིས་རི་དྭགས་རྔོན་རྒྱག་བྱེད་སྲོལ་མེད་པ་མངོན་ཐུབ། ལྷག་པར་དུ་དེབ་ཆུང་འདི་ལས་ཀློག་པ་པོས་རྔོན་རྒྱག་གོམས་སྲོལ་དར་རྒྱས་ཆེ་བའི་དུས་ཀྱི་འབྲོག་པའི་འཚོ་བ་གསོན་ཉམས་དོད་པོའི་སྒོ་ནས་མྱངས་ཐུབ་ལ། ལོ་རྒྱུས་འཕེལ་རིམ་ཁྲོད་དུ་དར་བའི་རྔོན་རྒྱག་གོམས་སྲོལ་དང་འབྲེལ་བའི་རིག་གནས་ལྟ་བ་ཡང་ཤེས་རྟོགས་བྱ་ཐུབ་པར་མ་ཟད། དེང་དུས་རི་སྐྱེས་སྲོག་ཆགས་སྲུང་སྐྱོབ་དེ་ཡུལ་སུས་གོམས་གཤིས་ལ་བསྟུན་ནས་སྲུང་སྐྱོབ་རྣམ་གྲངས་འཆར་འགོད་དང་ལག་བསྟར་བྱེད་པ་ལ་དཔྱད་གཞིའི་རིན་ཐང་ངེས་ཅན་མཁོ་སྤྲོད་ཐུབ་པ་དང་། འབྲོག་པའི་རིག་གནས་ལ་དོ་སྣང་དང་ཐུགས་ཁུར་གནང་མཁན་གྱི་ན་གཞོན་ཤེས་ལྡན་མི་སྣའི་བློ་སྒོ་འབྱེད་རྒྱུ་དང་། སྐུལ་ལྕག་ཐེབས་རྒྱུར་ཕན་ནུས་ངེས་ཅན་ཐོན་ངེས་རེད།
དཀར་ཆག
དང་པོ། རྔོན་རྒྱག་གི་དར་ཁུངས།（1）
གཉིས་པ། བྱང་འབྲོག་རྔོན་པའི་རྒྱུན་ཤེས་དང་ཚང་དགོས་པའི་ཆ་རྐྱེན།（18）
གསུམ་པ། རྔོན་པའི་མཚོན་ཆ་དང་དཔུང་རོགས་ཀྱི་སྐོར།（29）
བཞི་པ། རྔོན་པས་ངེས་པར་སྲུང་དགོས་པའི་སྒྲིག་ལམ་གྱི་སྐོར།（44）
ལྔ་པ། བྱང་འབྲོག་རྔོན་པའི་རྔོན་རྒྱག་གི་བྱ་ཐབས།（56）
དྲུག་པ། བྱང་འབྲོག་རྔོན་པའི་ཐུན་མོང་མ་ཡིན་པའི་རྔོན་རྒྱག་གོམས་སྲོལ་ཐོར་བུ།（73）
བདུན་པ། བྱང་འབྲོག་གིས་ཐ་ཤལ་དུ་བརྩི་བའི་རྔོན་པ————འཛམ་པ།（96）
བརྒྱད་པ། གདོད་མའི་གུང་ཁྲན་རིང་ལུགས་ཀྱི་ཤུལ་ལྷག་གོམས་སྲོལ————ཨབ་ལག（102）
དགུ་པ། རི་དྭགས་དང་སྒོ་ཕྱུགས་བར་གྱི་འབྲེལ་བ།（111）
བཅུ་པ། རི་དྭགས་ཀྱི་རྭ་ཅོ་དང་ཀོ་ལྤགས་སྤུ་རྩིད་སོགས་ཀྱི་ཕན་ནུས།（130）
བཅུ་གཅིག་པ། དམངས་ཁྲོད་རྩོམ་རིག་དང་གནའ་བོའི་མགུར་ལས་བྱུང་བའི་རི་དྭགས་དང་རྔོན་རྒྱག་གི་སྐོར།（138）
རི་སྐྱེས་སྲོག་ཆགས་ཀྱི་དགའ་འབོད།————མཇུག་བྱང་གི་ཚབ་ཏུ།（164）
