ཧྥ་རན་སེའི་ཙུང་ཐུང་མཱ་ཁེ་ལུང་གིས་དེ་རིང་ནས་བཟུང་རང་རྒྱལ་ལ་རྒྱལ་དོན་འཚམས་འདྲི་བྱེད་པ། ཚོགས་ཆེན་བཅུ་དགུ་པའི་དགོངས་དོན་བགྲོ་གླེང་འཛིན་གྲྭ་སློབ་འགོ་ཚུགས་པ། བོད་སྐྱོད་འབུམ་རམས་པའི་ཞབས་ཞུ་ཚོགས་པས་མུ་མཐུད་རིག་སྟོབས་རོགས་སྐྱོར་བྱས་པ། བོད་ལྗོངས་ཀྱི་གཞོན་ནུ་ལོ་ཆུང་གི་ཚན་རིག་ལས་དོན་ཁང་ཐོག་མ་ལྷ་སར་བཙུགས་པ། བོད་ཀྱིས་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་རྣམ་གྲངས་བརྒྱ་ལྷག་ཙམ་གསར་དུ་བསྣན་པ། ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གིས“ངོ་རིས་བཤེར་ནས་དངུལ་ལེན་པའི”བྱེད་ནུས་བཏོན་པ། ཀྲུང་དབྱང་གི་ཁོར་ཡུག་སྲུང་སྐྱོབ་སྐོར་ཞིབ་རུ་ཁག་ཨང་དྲུག་པས་བོད་ལྗོངས་ལ་གྱོད་དོན་༡༧བརྒྱུད་སྤྱོད་བྱས། བོད་ལྗོངས་ཀྱི་གྲོང་གསེབ་ཀྱི་མི་སྡོད་ཁོར་ཡུག་བཅོས་སྒྲིག་ལ་གྲུབ་འབྲས་མངོན་གསལ་དོད་པོ་ཐོབ་པ། བོད་ཡིག་དཔེ་མཛོད་ཀྱི་གཞི་གྲངས་ལྟེ་གནས་དབུ་བརྙེས་པའི་མཛད་སྒོ་ཀྲུང་གོའི་བོད་རིག་པ་ཞིབ་འཇུག་ལྟེ་གནས་སུ་སྤེལ།
ཀྲུང་གོའི་བོད་ལྗོངས་དྲ་བ། > དམངས་སྲོལ། > ཚ་ཤོས།

བོད་ཁ་བ་ཅན་གྱི་མེ་ཏོག་པད་མའི་རིག་གནས་ཀྱི་ཁྱད་ཆོས་མདོར་བསྡུས་གླེང་བ།

སྤེལ་དུས 2012-07-19 ཡོང་ཁུངས། རྩོམ་པ་པོ།

        དེ་ཡང་རྣམ་བཅུ་དབང་ལྡན་གྱི་གདན་ལ་པད་མ་བྱེད་པ་ནི་བོད་ཀྱི་རིག་གནས་ཀྱི་ཐུན་མོང་མ་ཡིན་པའི་ཁྱད་ཆོས་ཤིག་ཡིན་པར་སེམས་ཏེ།   སྤྱིར་པདྨ་ཞེས་པ་ནི་མེ་ཏོག་གི་རིགས་ཤིག་སྟེ་མེ་ཏོག་པདྨའམ་ཆུ་སྐྱེས་པདྨ་ཞེས་པ་ལྟ་བུ་འཛམ་གླིང་གི་ས་ཆ་སྤྱི་དང་བྱེ་བྲག་གང་ལའང་ཡོད་པའི་མེ་ཏོག་ཅིག་ཡིན་མོད།   འོན་ཀྱང་རང་ཅག་ཁ་བ་ཅན་གྱི་ལྗོངས་ལྟ་བུའི་ཆོས་དང་རིག་གནས།  དམངས་སྲོལ་གོམས་གཤིས་གང་ལའང་མེ་ཏོག་པདྨའི་མཚོན་དོན་དང་མཛེས་སྡུག་གི་རིག་གནས་ཐུན་མོང་མ་ཡིན་པའི་ཁྱད་ཆོས་དར་བ་ནི་བོད་མ་གཏོགས་གཞན་ལ་དེ་འདྲའི་རིག་གནས་ཀྱི་ཁྱད་ཆོས་ཕུན་སུམ་ཚོགས་པ་ཞིག་ཤིན་ཏུ་དཀོན་པར་སེམས་སོ།།

         འདི་ནས་བོད་ཁ་བ་ཅན་དང་མེ་ཏོག་པདྨ་ཞེས་པའི་སྐོར་ཅུང་ཙམ་ཞུ་ན།  མེ་ཏོག་པདྨའི་མིང་གི་རྣམ་གྲངས་ལ་ཆུ་སྐྱེས་སམ་མཚོ་སྐྱེས།   ཆུ་རྒྱན།  ཟླ་བའི་དགྲ།   ཉི་མའི་གཉེན་སོགས་མེ་ཏོག་པདྨའི་མིང་གི་རྣམ་གྲངས་བརྒྱར་ཉེ་བ་ཞིག་ཡོད་པམངོན་བརྗོདལས་གསལ་ཞིང་དེ་ནི་བོད་ཀྱི་ཆོས་དང་རིག་གནས་ཀྱི་ཐུན་མོང་མ་ཡིན་པའི་ཁྱད་ཆོས་དང་པོར་གྲུབ་ཅིང་།   ཁྱད་ཆོས་དེ་ལས་ཁ་བ་ཅན་གྱི་འགྲོ་བ་མིའི་མིང་ལའང་པདྨ་གཡང་འཛོམས་དང་པདྨ་དབྱངས་ཅན།   པདྨ་སྒྲོལ་དཀར་སོགས་མོ་རྒྱུད་ཀྱི་མིང་།   པདྨ་ཚེ་རིང་དང་པདྨ་རྡོ་རྗེ།   པདྨ་ཤེས་རབ་སོགས་ཕོ་རྒྱུད་ཀྱི་མིང་སོགས་པདྨའི་མིང་གིས་ཟིན་པའི་མིང་ཅན་ནི་བོད་ལས་མི་རིགས་གཞན་པ་ལ་དེ་འདྲའི་མང་བ་ནི་ཤིན་ཏུ་དཀོན་པ་དང་།  ཡང་སྒོས་བོད་ཁ་བ་ཅན་གྱི་ལྷ་སྐལ་དུ་གྱུར་པའི་འཕགས་པ་སྤྱན་རས་གཟིགས་ཀྱི་མཚན་གྱི་རྣམ་གྲངས་འའངཕྱག་ན་པདྨོདང་པད་དཀར་ཅན”“པད་དཀར་འཛིན་པཞེས་པ་སོགས་ཀྱི་མཚན་ཕུན་སུམ་ཚོགས་པ་དང་།   སློབ་དཔོན་གུ་རུ་རིན་པོ་ཆེ་ལཔདྨ་འབྱུང་གནསདང་མཚོ་སྐྱེས་རྡོ་རྗེཞེས་པས་མཚོན་པ་སོགས་ནི་དེ་བས་ཀྱང་བོད་ཀྱི་ཆོས་དང་རིག་གནས་ཀྱི་ཐུན་མོང་མ་ཡིན་པའི་ཁྱད་ཆོས་གཉིས་པར་གྲུབ་བོ།།

བོད་ཀྱི་དམངས་ཁྲོད་ཡུལ་སྲོལ་གྱི་རི་མོར་མཚོན་ན།   ཁང་བའི་གྱང་།ཀ་གདུང་།  སྒོ་དང་སྒེའུ་ཁུང་གི་རུ་བཞི་སོགས་ཀྱི་ངོར་ཚོན་མདོག་འདྲ་མིན་སྣ་ཚོགས་ཀྱིས་མེ་ཏོག་པདྨ་བྲིས་པ་ལ་པདྨ་ཡོངས་སུ་བཞད་པ་དང་།   ལ་ལ་ཁ་འབྱེད་ལ་ཁད་པ།  མ་སྨིན་པའི་པདྨ་རྣམས་མྱུ་གུ་བཀྲ་བ།   ཟུམ་པའི་པདྨ་རྣམས་ཐལ་མོ་སྦྱར་བ།   དགོད་པའི་པདྨ་རྣམས་གེ་སར་ངོམ་པ།   སྤས་པའི་མདྨ་རྣམས་སྦུགས་སུ་གནས་པ་ལ་སོགས་ཀྱི་མཛེས་ཤིང་ལྟ་ན་སྡུག་པའི་མེ་ཏོག་པདྨའི་རི་མོའི་སྒྱུ་རྩལ་མངོན་པ་ནིའང་བོད་ཀྱི་ཆོས་དང་རིག་གནས་ཀྱི་ཐུན་མོང་མ་ཡིན་པའི་ཁྱད་ཆོས་གསུམ་པར་གྲུབ་པོ།།

འཚོ་བའི་ཡོ་བྱད་ལ་ཅོག་ཙེ་དང་།   མཆོད་བཤམས།    ཆ་སྒམ་སོགས་ཀྱི་ངོར་མེ་ཏོག་པདྨ་དང་པདྨའི་སྡོང་བོ་འབྲི་བ་དང་བརྐོ་བ་ལ་རིགས་གསུམ་མགོན་པོ་མཚོན་བྱེད་དུ་ཚོན་མདོག་དཀར་དམར་སྔོ་གསུམ་གྱིས་བརྒྱན་པ་སྟེ།  དཀར་པོས་སྤྱན་རས་གཟིགས་ཀྱི་ངོ་སྟེསྙིང་རྗེམཚོན་པ་དང་།དམར་པོས་འཇམ་པའི་དབྱངས་ཀྱི་ངོ་བོ་སྟེམཐུ་སྟོབསམཚོན་པ་སོགས་ཀྱི་ངོ་བོ་གཅིག་ཏུ་བསྡུས་ནས་པདྨའི་སྡོང་པོ་བྲིས་པ་དང་།   གཞན་པདྨའི་ཞྭ་དང་པདྨའི་ལྷམ།  པདྨའི་རི་དང་པདྨའི་ཐང་སོགས་བགྲང་གིས་མི་ལངས་པ་བྱུང་དང་འབྱུང་བཞིན་ཡོད་པ་ནིའང་བོད་ཀྱི་ཆོས་དང་རིག་གནས་ཀྱི་ཐུན་མོང་མ་ཡིན་པའི་ཁྱད་ཆོས་བཞི་པར་གྲུབ་པོ།།

  དེ་ལྟར་གོང་དུ་ཞུས་པ་ནི་བོད་ཀྱི་དམངས་སྲོལ་གྱི་ཆ་ནས་མེ་ཏོག་པདྨའི་སྐོར་བཤད་ཅིང་།   གཤམ་ནས་བོད་ཀྱི་རིག་གཞུང་དང་བསམ་བློའི་ལྟ་གྲུབ་གྱི་ཆ་ནས་མེ་ཏོག་པདྨའི་སྐོར་ཅུང་ཙམ་ཞུ་ན།   རྗེ་དགེ་འདུན་ཆོས་འཕེལ་གྱིས།ཤིང་དང་མེ་ཏོག་སོགས་ཀྱི་ངོས་འཛིན་དང་ངོས་ཇི་ལྟར་འཕྲོད་ཚུལཞེས་པའི་ནང་དུ་མེ་ཏོག་པདྨའི་ངོ་བོ་དང་།  ཁ་དོག  ཡོན་ཏན།  རིགས་སོགས་བྲིསཔ་ནི་མེ་ཏོག་པདྨ་ཞེས་པ་རི་མོར་འབྲི་བའི་གཟུགས་བརྙན་གྱི་སྒྱུ་རྩལ་ཁོ་ན་ཙམ་མིན་པར་བོད་ཀྱི་སྐྱེ་དངོས་རིགས་ཀྱི་རིག་པའི་རྩ་ལག་ཏུ་ངོས་འཛིན་བྱས་ནས་གཞུང་བརྩམས་པ་དང་པོ་ཡོན་ཞིང་།   དེ་འདྲའི་ཐུན་མོང་མ་ཡིན་པའི་མེ་ཏོག་པདྨའི་རིག་གནས་དང་སྒྱུ་རྩལ་ལས་བོད་ཀྱི་རྩོམ་རིག་ཏུ་མེ་ཏོག་པདྨ་དཔེ་དང་དཔེ་ཅན་དུ་འགོད་པའི་རྩོམ་རིག་གི་སྒྱུ་རྩལ་ཐུན་མོང་པ་ཡིན་པ་བྱུང་སྟེ།  ཤར་རྒྱལ་བ་ཙོང་ཁ་པ་ཆེན་པོས།པད་ཚལ་གྱིས་ནི་བུང་བ་དང་།།  འོད་དཀར་གྱིས་ནི་རི་བོང་དང་།  །སྨིན་ལེགས་གཟུགས་ལ་ཡིད་སྲུབས་བཞིན།  །འདིས་ནི་འགྲོ་བའི་ཡིད་རྣམས་འཛིན།།ཞེས་པ་དང་།   རྫ་དཔལ་སྤྲུལ་འཛིགས་མེད་ཆོས་ཀྱི་དབང་པོས་བརྩམས་པའིགཏམ་པདྨའི་ཚལ་གྱི་ཟློས་གརཞེས་པ་ལས།  ངག་སྙན་རྩི་སྦྲང་ཁྱོ་ཤུག་གཉིས་ལས་ཤུགས་ཀྱིས་མེ་ཏོག་གི་ཟིལ་མངར་འཐུང་ཞིང་འདབ་ཡངས་ཀྱིས་ནམ་མཁའ་ལ་འཕུར་ལྡིང་གཡོ་བའི་སྐབས་ཤིག་ཉི་མའི་མདངས་གློ་བུར་དུ་ཉམས་ནས།   སྤྲིན་ནག་གི་གྲིབ་མ་ས་ལ་ལྷུང་སྟེ་པདྨ་རྣམས་ཅིག་ཅར་དུ་ཁ་ཟུམ་པས་ངག་སྙན་པདྨའི་སྦུགས་སུ་འཐུམས་ནས་དབུགས་འཐུམས་ཏེ་འཇིགས་སྐྲག་དངངས་ཤིང་གཏམ་བརྗོད་མ་ནུས་པར་བུབ་བུབ་བུབ་ཟེར་ཞིང་འདུག་པ་ན།   འདབ་ཡངས་ཀྱི་འཇིགས་ཤིང་སྐྲག་སྟེ་ཅི་བྱ་གཏོལ་མེད་པར་གྱུར་ནས་པད་ལྗོན་གྱི་དྲུང་དུ་ས་ལ་བབས་ནས་མྱ་ངན་གྱི་གདུང་བས་སྙིང་ལ་གནོན་ཏེ་ས་ལ་འགྲེ་ལྡོག་བྱེད་ཅིང་འདི་སྐད་དུ།ཞེས་པ་དང་།  རྗེ་བཙུན་ཏཱ་ར་ནཱ་ཐས།   མཁའ་ལ་རང་བྱུང་འཁོར་ལོ་རྩིབས་བརྒྱད་དབྱིབས།།   མི་རྣམས་པདྨ་འདབ་རབ་རྒྱས་པ་འདྲ།།ཞེས་བོད་ཁ་བ་ཅན་གྱི་ཞིང་ཁམས་ཀྱི་བཀོད་པ་གསུངས་པ་དང་།   ཤར་སྐལ་ལྡན་རྒྱ་མཚོས་རང་གི་བླ་མའི་ཡོན་ཏན་བརྗོད་པ་ལ།  འཇམ་དབྱངས་ཉིན་བྱེད་མཁྱེན་བརྩེའི་འོད་སྟོང་ནི།   །གང་ཐུགས་པདྨའི་ཚལ་དུ་ཕོག་པ་ན།།  ངོ་མཚར་ཡོན་ཏན་འདབ་བརྒྱ་བཞད་པ་ལས།།  སྙན་གྲགས་དྲི་བསུང་འཕྲོ་ལ་གསོལ་བ་འདེབས། །ཞེས་པ་དང་།  པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་ས་པཎ་ཀུན་དགའ་རྒྱལ་མཚན་ཇི་ལྟར་འཁྲུངས་པའི་སྐོར་ལ།  ཡོན་ཏན་འདབ་མ་སྟོང་ལྡན་པའི།།  རྒྱས་སྲས་པདྨ་དཀར་པོ་འཁྲུངས།   །དེའི་ཚེ་བྱིས་པ་ཐ་མལ་བའི།   སྤྱོད་ཡུལ་མངལ་གྱི་འདབ་མ་ཡི།   ། འཆིང་བའི་རྒྱ་དང་ལྷན་ཅིག་གྲོལ།།ཞེས་གསུངས་པ་སོགས་མང་ཞིང་།  ཁྱད་པར་དུ་ལྟ་གྲུབ་ཀྱི་འཆིང་གྲོལ་གྱི་གནད་ཆེན་པོའང་པདྨ་ལ་སྦྱར་ནས་གསུངས་པ་ནི།  ཇི་ལྟར་འདམ་ལས་སྐྱེས་པའི་ཀ་མ་ལ།   །མི་གཙང་འདམ་གྱི་གྲི་མ་སྤངས་པ་བཞིན་།  །མངལ་གྱི་ཆུ་འཛིན་ལྟོ་བ་ལས་འོངས་ཀྱང་།།

དེ་ཡིས་འཆིང་བའི་རྒྱ་ལས་རྣམ་པར་གྲོལ།  །ཞེས་པཎ་ཆེན་ཆོས་ཀྱི་རྒྱལ་མཚན་གྱིས་གསུངས་ཤིང་རྒྱས་པ་ནི་ཁོ་བོས་རྩོམ་སྒྲིག་བྱས་པའིབོད་ཀྱི་སྒྲུབ་བརྒྱུད་འཛིན་པ་རྣམས་ཀྱི་ལྟ་གྲུབ་ཀྱི་ལེགས་བཤད་མཐོང་བ་ཀུན་གྲོལ་ཞེས་བྱ་བ་བཞུགས་སོཞེས་པ་དང་།  བློ་བཟང་ཆོས་གྲགས་དང་བསོད་ནམས་རྩེ་མོས་བསྒྲིགས་པའིགངས་ལྗོངས་མཁས་དབང་རིམ་བྱོན་གྱི་རྩོམ་ཡིག་གསེར་གྱི་སྦྲམ་བུཞེས་པ་སོགས་ལ་གཟིགས་པར་བྱའོ།།

  སྨྲས་པ།།

རྒྱལ་ཀུན་སྙིང་རྗེའི་ངོ་བོ་གཅིག་འདུས་ཀྱི།།

གངས་ཅན་ལྷ་གཅིག་འཕགས་པ་སྤྱན་རས་གཟིགས།།

ཕྱག་ན་པདྨོའི་ཐུགས་རྗེའི་བསིལ་ཟེར་གྱིས།།

འགྲོ་ཀུན་ཚ་གདུང་དྲུངས་ནས་འབྱིན་གྱུར་ཅིག།།