ལམ་ཟུར་དུ་མོ་ཊ་འཁྱུག་ཙམ་ལས་བཞག་མེད་ནའང་པར་ལ་ཐེབས་དོན་ཅི་ཡིན་ནམ།
སྤེལ་དུས 2020-01-16
ཡོང་ཁུངས། ཁྲིམས་གསལ་མེ་ལོང་།
རྩོམ་པ་པོ།
ལོ་གསར་འཆར་ལ་ཉེ་བས། ལྷ་སའི་ཁྲོམ་གཞུང་གང་སར་ལོ་གསར་གྱི་མཁོ་ཆས་ཉོ་བའི་རྣམ་པས་ཁེངས་པ་མ་ཟད། མོ་ཊ་གང་སར་འཇོག་པའི་སྣང་ཚུལ་ཡང་མང་པོ་ཐོན་དང་ཐོན་མུས་རེད། འོན་ཏེ། མི་ལ་ལས་མོ་ཊ་བཞག་ནས་ཡུན་རིང་མ་སོང་ནའང་། མོ་ཊར་ཆད་གཅོད་ཤོག་བྱང་སྦྱར་འདུག ད་དཔེ་བསགས་སོང་། ཡང་སྒོར་ཉིས་བརྒྱ་སྐྱེལ་དགོས་འཁེལ་སོང་ཞེས་འཁང་ར་བྱེད་ཀྱི་ཡོད།
ད་འོ་ན། མོ་ཊ་ཁག་གཅིག་ཁ་བཀག་གྲབས་ཡིན་ནའང་པར་ལ་ཐེབས་དོན་ཅི་ཡིན་ཞེ་ན།
◆ སྤྱིར་ན་མོ་ཊ་འཇོག་ས་མིན་པར་མོ་ཊ་བཞག་ན། སྐར་མ་3མ་བརྒལ་ཚེ། ཆད་གཅོད་ཤོག་བྱང་སྦྱོར་གྱི་མེད་ལ་པར་ཡང་རྒྱག་གི་མེད།
◆ རིག་ནུས་གློག་མིག་གིས་སྐར་མ་རེར་པར་རེ་ལས་རྒྱག་གི་མེད། གལ་ཏེ་བསྟུད་མར་པར་ཐེངས་བཞི་ཐེབས་ཚེ། རིག་ནུས་མ་ལག་གི་ཐོར་འཁོད་པ་དང་། ཉེན་རྟོག་པས་ཞིབ་དཔྱད་བྱས་རྗེས་སྒྲིག་འགལ་གྱི་ཁོངས་སུ་འཇུག་གི་ཡོད་པས། ཁ་ལོ་བར་དེ་མཚུངས་ཀྱི་སྒྲིག་འགལ་བརྡ་ལན་འབྱོར་གྱི་ཡོད།
◆ སྤྱི་སྤྱོད་རླངས་འཁོར་འབབ་ཚུགས་དང་། སྣུམ་སྣོན་ས་ཚིགས། མྱུར་སྐྱོབ་ལྟེ་གནས་ཀྱི་སྒོ་འགྲམ། མེ་ཟོན་སྒྲིག་ཆས་འཇོག་ཡུལ། དེ་བཞིན་ལམ་མདོ་ཁ་སོགས་སུ་མོ་ཊ་གཏན་ནས་འཇོག་མི་རུང་།
◆ དྲ་མིག་སེར་པོ་འཐེན་པའི་ལམ་ངོས་སུ་མོ་ཊ་འཇོག་མི་ཆོག གལ་ཏེ་ཁྱེད་ཀྱིས་ཡིད་གཟབ་མ་བྱས་པར་མོ་ཊ་བཞག་ཚེ། པར་ལ་ཐེབས་རྒྱུ་མ་ཟད། ཆད་པའང་ཕོག་རྒྱུ་ཉག་གཅིག་རེད།
སྒོར་ཐིག་དམར་པོའི་ནང་དུ་ནོར་རྟགས་བྲིས་པའི་བྱང་བུ་འདིའང་མོ་ཊ་སྐབས་འཕྲལ་ལམ་ཡུན་རིང་འཇོག་མི་ཆོག་པའི་མཚོན་རྟགས་རེད། མཚོན་རྟགས་འདི་ལྟ་བུ་ཡོད་སར་དུས་ཚོད་གང་རུང་ཡིན་ནའང་མོ་ཊ་གཏན་ནས་འཇོག་མི་ཆོག
གལ་ཏེ་བཞག་ཚེ། སྐར་མ་འཐེན་པ་དང་ཆད་གཅོད་ཤོག་བྱང་འཐོབ་རྒྱུ་ལས་མ་འདས་སོ།།
རྩོམ་སྒྲིག་པ། བདེ་སྒྲོལ།