ཉེ་ཆར། མཚོ་ཤར་གྲོང་ཁྱེར་ཧུའུ་ཀྲུའུ་རྫོང་སྤྱི་བདེ་ཅུའུ་ནགས་ཚལ་ཉེན་རྟོག་རུ་ཆེན་གྱིས་ཁྲིམས་འགལ་ངང་གཏེར་ཁ་བསྔོགས་པའི་གྱོད་གཞི་ཞིག་གྲུབ་འབྲས་ཐོབ་པའི་ངང་རྩད་ཆོད་པ་དང་། ཉེས་བསགས་དོགས་ཡོད་ཉེས་ཅན་གསུམ་པོས་ཁྲིམས་འགལ་ངང་གཏེར་ཁ་བསྔོགས་པའི་གྱོད་དོན་མཚོ་སྔོན་ཞིང་ཆེན་གཙང་གསུམ་ཆུ་མགོའི་མི་དམངས་ཞིབ་དཔྱོད་ཁང་ལ་ཞུ་གཏུག་བྱེད་པར་བསྐྱལ་ནས་རྒྱལ་ཁབ་ཀྱི་གཏེར་ཁའི་ཐོན་ཁུངས་ལ་སྲུང་སྐྱོང་ནུས་ལྡན་བྱས་པ་དང་། སྐྱེ་ཁམས་ཁོར་ཡུག་ལ་མུ་མཐུད་དུ་གཏོར་བཤིག་མི་ཕོག་པ་བྱས་པ་རེད།
བརྟག་དཔྱད་བྱས་པ་བརྒྱུད། 2023ལོའི་ཟླ10པ་ནས་བཟུང་། ཙོན་ཆེ་གེ་མོ་དང་ཀྲང་ཆེ་གེ་མོ། ཅིན་ཆེ་གེ་མོ་བཅས་ཀྱིས་གཏེར་ཁ་སྔོག་འདོན་བྱས་འཐུས་ཀྱི་ལག་ཁྱེར་མེད་པའི་གནས་ཚུལ་འོག རྐོ་འདྲུད་འཕྲུལ་འཁོར་དང་རང་འབེབས་ལྕགས་གཞོང་རླངས་འཁོར་སོགས་འཕྲུལ་ཆས་ཡོ་བྱད་གླས་ནས་ཧུའུ་ཀྲུའུ་རྫོང་ཏུང་ཧོ་ཤང་མ་ཅི་སྡེ་བའི་ཞིང་ནང་དུ་བྱེ་རྡོ་བརྐུས་ནས་བཙོངས་པའི་ཁྲོད། ཁྲིམས་འགལ་ངང་བྱེ་རྡོ་རླངས་འཁོར170ལྷག་སྔོག་འདོན་བྱས་པར་ཁེ་བཟང་སྒོར་ཁྲི14ལྷག་བླངས།2024ལོའི་ཟླ3པར། ཁེ་བཟང་རེག་པའི་ཙོན་ཆེ་གེ་མོས་རང་དགར་རྐོ་འདྲུད་འཕྲུལ་འཁོར་གླས་ནས་ས་ཆ་དེ་རུ་སླར་ཡང་བྱེ་རྡོ་རླངས་འཁོར30ལྷག་སྔོག་འདོན་བྱས་པར་ཁྲིམས་འགལ་ངང་ཁེ་བཟང་སྒོར་ཁྲི3ལྷག་ཐོབ་པ་རེད།
ཉེན་རྟོག་ཕྱོགས་ཀྱི་དྲན་སྐུལ།
གཏེར་རྫས་ཐོན་ཁུངས་ནི་རྒྱལ་ཁབ་ཀྱི་ཐོན་ཁུངས་རྩ་ཆེན་ཞིག་ཡིན་པས། རྒྱལ་ཁབ་ཀྱིས་ཁྲིམས་འགལ་སྒོས་སྔོག་འདོན་བྱེད་པའི་བྱ་སྤྱོད་ཡོད་ཚད་ལ་གཏན་འགོག་བྱས་ཡོད། སྤྱི་བདེ་ལས་ཁུངས་ཀྱིས་ཁྲིམས་ལྟར་ཁྲིམས་འགལ་ངང་སྔོག་འདོན་བྱེད་པའི་ནག་ཉེས་ལ་རྡུང་རྡེག་ནན་མོ་གཏོང་བ་དང་། རྒྱལ་ཁབ་ཀྱི་ཁོར་ཡུག་ཐོན་ཁུངས་ཀྱི་བདེ་འཇགས་ལ་སྲུང་སྐྱོང་བྱ་དགོས།
