2018ལོར་གཞིས་རྩེའི་བོད་སྐྱོར་སྟོབས་ཤུགས་ཀྱིས་དམངས་འཚོའི་རྣམ་གྲངས་178ལག་བསྟར་བྱས་ཏེ་མ་དངུལ་སྒོར་དུང་ཕྱུར་7.34བཏང་།
སྤེལ་དུས 2019-02-20
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། བྱམས་པས་བསྒྱུར།
2018ལོར། གཞིས་རྩེ་གྲོང་ཁྱེར་གྱིས་ཕྱོགས་ཁག་གི་ཐོན་ཁུངས་སྤྱི་འདོམས་བྱས་ཏེ་རྒྱུ་ཤུགས་དང་དངོས་ཤུགས། མི་ཤུགས་གཅིག་ཏུ་བསྡུས་ནས་དབུལ་སྒྲོལ་ལས་དོན་ཁྲོད་ཞུགས་པས། གྲོང་ཁྱེར་ཡོངས་ཀྱི་དབུལ་སྒྲོལ་འགག་སྒྲོལ་ལས་དོན་གྱི་རྣམ་པ་བཟང་པོ་བཏོད་པ་རེད།
རྒྱུས་ལོན་བྱུང་བ་ལྟར་ན། གཞིས་རྩེ་གྲོང་ཁྱེར་གྱིས་རང་སྐྱོང་ལྗོངས་ཀྱི་ཤིན་ཏུ་དབུལ་བའི་ས་ཁུལ་གྱི་དབུལ་སྒྲོལ་འགག་སྒྲོལ་ཡུལ་དངོས་སུ་སྐུལ་འདེད་གཏོང་བ་དང་ཁ་གཏད་བོད་སྐྱོར་གཏིང་ཟབ་གཏོང་བའི་དབུལ་སྐྱོར་ལས་དོན་ཚོགས་འདུའི་དགོངས་དོན་ནན་ཏན་གྱིས་ལག་བསྟར་དོན་འཁྱོལ་བྱས་ཏེ། བོད་སྐྱོར་དབུལ་སྐྱོར་ལས་དོན་དེ་ཤར་ནུབ་ཀྱི་དབུལ་སྐྱོར་རོགས་ལས་ཁྲོད་བཅུག་ནས། ཧུར་ཐག་གིས་ཁ་གཏད་རོགས་སྐྱོར་ཞིང་ཆེན་དང་གྲོང་ཁྱེར་བཞི་དང་། ཁེ་ལས་གཉིས་ལ་འབྲེལ་བ་བྱས་ཏེ་བོད་སྐྱོར་ལས་འགན་དོན་འཁྱོལ་བྱས། ཁ་གཏད་རོགས་སྐྱོར་ཞིང་ཆེན་དང་གྲོང་ཁྱེར་བཞི་དང་། ཁེ་ལས་གཉིས་ཀྱིས་“80%གཉིས་”ཀྱི་བླང་བྱ་ལྟར་ཁྱད་ལྡན་ཐོན་ལས་ཀྱི་རྣམ་གྲངས་34ལག་བསྟར་བྱས་པར་མ་དངུལ་སྒོར་དུང་ཕྱུར་1.99བཏང་ཞིང་། དམངས་འཚོ་འགན་སྲུང་དང་ལེགས་བཅོས་ཁྱབ་ཁོངས་ཀྱི་རྣམ་གྲངས་178ལག་བསྟར་བྱས་པར་མ་དངུལ་སྒོར་དུང་ཕྱུར་7.34བཏང་།
དུས་མཚུངས་སུ། གཞིས་རྩེ་གྲོང་ཁྱེར་གྱིས་བསྟུད་མུར་གནས་གཏན་འཁེལ་གྱི་དབུལ་སྐྱོར་དང་། “ཁེ་ལས་བརྒྱ་ཡིས་གྲོང་ཚོ་བརྒྱར་རོགས་རམ་བྱེད་པ་”དང་“4321”ལས་བྱེད་པས་ཆ་སྒྲིག་རོགས་སྐྱོར་ལས་དོན་སྤེལ་ཤུགས་ཆེ་རུ་བཏང་ནས། གྲོང་ཁྱེར་ཡོངས་ཀྱི་གནས་གཏན་འཁེལ་གྱི་དབུལ་སྐྱོར་ཚན་པ་112ཀྱིས་དབུལ་ཕོངས་ཤང་(གྲོང་རྡལ་)གོང་སྤེལ་གྱི་འཆར་གཞི་（འབབ་འཕར་འཆར་གཞི）337བཟོས། དབུལ་སྐྱོར་གྱི་ཐོན་ལས་48དང་ཐུན་མོང་དཔལ་འབྱོར་54འཕེལ་རྒྱས་བཏང་བས་ཡོང་འབབ་སྒོར་ཁྲི་576.6འཕར། ཁེ་ལས་350ཡིས་རོགས་སྐྱོར་མ་དངུལ་སྒོར་ཁྲི་2181.25བཏང་། མང་ཚོགས་དབུལ་པོ་118ཡི་ལས་ཞུགས་བརྟན་པོ་བྱུང་། ཡོང་འབབ་སྒོར་ཁྲི་74.04འཕར། སློབ་སྐྱོར་སྨན་བཅོས་ཞལ་འདེབས་སྒོར་ཁྲི་2107.21ཟིན། ཆ་སྒྲིག་རོགས་སྐྱོར་ལས་བྱེད་པ་ཁྲི་3.4ཡིས་ཞིང་འབྲོག་མང་ཚོགས་ལ་དྲིལ་བསྒྲགས་ཡིག་ཆ་ཁྲི་2.4ལྷག་ཙམ་བཀྲམས། ཕྱུག་འགྱུར་གྱི་འཕེལ་རྒྱས་ལམ་བུ་5000ལྷག་ཙམ་འདེམས་པར་རོགས་སྐྱོར་བྱས། ངལ་རྩོལ་ནུས་ཤུགས་ཕྱིར་གཏོང་མི་ཐེངས་ཁྲི་1.48དང་དངོས་གནས་ཀྱི་དཀའ་ངལ་7400སེལ་རོགས་བྱས། རོགས་སྐྱོར་མ་དངུལ་མི་དམངས་ཤོག་སྒོར་ལ་ཕབ་ན་སྒོར་ཁྲི་2959.16ཟིན།
