བཅར་འདྲི་ཚོགས་པ་ཐེམ་ཆེན་རྫོང་དུ་ཐོན་མ་ཐག པུ་ཧ་ཆུ་བོའི་རྒྱལ་ཁབ་བརླན་སའི་སྤྱི་གླིང་དང་། མེ་ལོང་སྐྱེ་ཁམས་ཕྱུགས་ལས་ཆེད་ལས་མཉམ་ལས་ཁང་སོགས་སུ་ཕྱིན་ནས། འབྲེལ་ཡོད་འགན་ཁུར་མི་སྣ་དང་སྐྱེ་ཁམས་དོ་དམ་མི་སྣར་ཕན་ཚུན་བགྲོ་གླེང་བྱས་ལ། ཐེམ་ཆེན་རྫོང་གི་སྐྱེ་ཁམས་ཁོར་ཡུག་དང་། ཕྱུགས་ལས་ཐོན་སྐྱེད་བདག་གཉེར་དོ་དམ་གྱི་ཕྱོགས་ནས་གཏིང་ཟབ་པའི་སྒོ་ནས་རྒྱུས་ལོན་བྱས། དུས་མཚུངས་སུ། བཅར་འདྲི་ཚོགས་པ་ཐེམ་ཆེན་རྫོང་གི་སྐྱེ་ཁམས་ཚན་རྩལ་གླིང་དང་གློག་རྡུལ་ཚོང་དོན་སྟེགས་བུའི་ཞབས་ཞུ་ལྟེ་གནས་སོགས་སུ་ཕྱིན་ལ། ནན་ཏན་གྱི་སྒོ་ནས་ཐེམ་ཆེན་རྫོང་གི་ཕྱུགས་ལས་ཐོན་རྫས་ལས་སྣོན་དང་། ཀུང་ཟིའི་འཁོར་རྒྱུག རིག་གནས་གསར་སྤེལ་ཐོན་སྐྱེད། ཐེམ་ཆེན་རྫོང་གི་བོད་ཀྱི་རིག་གནས་རྒྱུད་འཛིན་དང་། ཐོན་སྐྱེད་འཕེལ་རྒྱས། ཕྱིར་འཚོང་བཅས་ཀྱི་གནས་ཚུལ་ལ་རྒྱུས་ལོན་བྱས།
གཏེར་ལེན་ཁ་གྲོང་ཁྱེར་ནས་བཅར་འདྲི་ཚོགས་པ་སྔ་གཞུག་ཏུ། ཀྲུང་ཁུང་ཉི་འོད་ནུས་པའི་ཀུང་ཟི་དང་། དབུལ་ཐར་ཁྱིམ་ཚང་། ཐོར་ཀུན་གཞིས་ཁུལ་བཅས་སུ་ཕྱིན་ནས། ཞིབ་ཚགས་ཀྱི་སྒོ་ནས་མཚོ་ནུབ་ས་ཁུལ་གྱི་མིག་སྔར་གྱི་ནུས་ཁུངས་གསར་བའི་འཕེལ་རྒྱས་དང་དབུལ་ཐར་འཕེལ་རྒྱས་ཐོན་ལས་ཀྱི་བརྒྱུད་རིམ་ལ་རྒྱུས་ལོན་བྱས།
ཀྲུང་གོའི་བོད་ལྗོངས་དྲ་བ་རྩོམ་སྒྲིག་ཁང་གི་ཀྲུའུ་རིན་ལིའུ་ལི་ཡིས་བཤད་དོན། ཐེངས་འདིར་མཚོ་ནུབ་ལ་ཡོང་ཐུབ་པར་དགའ་སྤྲོ་ཆེན་པོ་སྐྱེས་ཡོད་ལ། གཏིང་ཟབ་པའི་སྒོ་ནས་བཅར་འདྲི་ཐེངས་ཤིག་བྱེད་ཐུབ་སོང་། ཐེངས་འདིར་ཆེས་བག་ཆགས་ཟབ་མོ་ཞིག་བཞག་པ་ནི། མཚོ་ནུབ་ཁུལ་གྱིས་སྐྱེ་ཁམས་ཁོར་ཡུག་དང་། དབུལ་ཐར་མཁྲེགས་གཏོར་འདིའི་སྟེང་ནས་བསྒྲུབ་པ་ཧ་ཅང་བཟང་ལ། དེ་མིན་ཐོན་ལས་མང་པོ་ཞིག་སྟེ། གསོལ་ཁང་དང་། མགྲོན་ཁང་། སྡོད་ཁང་སོགས་ཀྱི་ཐོན་ལས་ལེགས་པོ་ འདི་ཡིས་ཏང་གི་སྲིད་ཇུས་བཟང་བོ་མཚོན་ལ། མང་ཚོགས་ཀྱི་སེམས་ཤུགས་འདི་དག་ལ་བརྟེན་ནས། ང་ཚོ་ལ་བྱ་བ་བསྒྲུབ་པའི་སྟོབས་ཤུགས་གང་མང་ཞིག་བསྩལ་བྱུང་ཟེར།
ཚྭ་མཚོའི་གྲོང་ཁྱེར་ཏེ་ན་གོར་མོ་ནས་བཅར་འདྲི་ཚོགས་པ་ཚྭ་འར་ཧན་ཚྭ་མཚོའི་འགྲེམ་སྟོན་ཁང་དུ་ཕྱིན་ནས་ལོ་རྒྱུས་ཀྱི་འགྲེམ་སྟོན་མང་པོ་ཞིག་མཐོང་ལ། དུས་མཚུངས་སུ། རྒྱལ་ཡོངས་ཀྱི་རྒྱལ་གཅེས་རིང་ལུགས་པའི་སློབ་གསོའི་རྟེན་གཞི་སྟེ་དམག་སྤྱིའི་རྗེས་དྲན་ཁང་དུ་ཕྱིན་ནས་ཏང་གི་སློབ་གསོའི་བྱ་འགུལ་སྤེལ།
གཏེར་ལམ་རྫོང་དང་དབུས་ལམ་རྫོང་དུ་ཕྱིན་ནས། སྔ་གཞུག་ཏུ། ཞང་ཀྱ་ཤང་གི་གནས་སྤོར་འདུས་སྡོད་གཅིག་གྱུར་བཀོད་སྒྲིག་ལས་གཞི་དང་དབུལ་ཐར་ཁྱིམ་ཚང་གི་འཐུས་ཚབ་པ། དེ་མིན་ཡུལ་སྐོར་ནུས་ཁུངས་གསར་སྤེལ་བཅས་ཀྱི་གནས་བབས་ལ་བཅར་འདྲི་བྱས།
ཀྲུང་གོའི་བོད་ལྗོངས་དྲ་བའི་གསར་འགོད་པ། ལི་ཡོན་མེ་ཡིས་བཤད་དོན། ཐེངས་འདིར་ཀྲུང་གོའི་བོད་ལྗོངས་དུས་དེབ་ཁང་གིས་བསྒྲུབ་པའི་འཕྲིན་གཏོང་བའི་བཞུགས་མོལ་ཚོགས་འདུ་དང་མཚོ་སྔོན་དུ་བཅར་འདྲིའི་བྱ་འགུལ་ལ་ཞུགས་ཐུབ་ པར་ནང་དོན་ཧ་ཅང་ཆེན་པོ་ལྡན། ཐོག་མར་ཐེངས་འདིའི་བཅར་འདྲིའི་བཀོད་སྒྲིག་ཧ་ཅང་ཕུན་སུམ་ཚོགས་ལ། དབུལ་ཐར་མཁྲེགས་གཏོར་གྱི་མིག་དཔེའི་མི་སྣ་དང་། དེ་མིན། ཚྭ་ཁའི་ལས་རིགས་དང་། རྡོ་སྣུམ་ལས་རིགས། འཕང་འབྲས་སོགས་ས་གནས་ཐོན་ལས་ཀྱི་མིག་དཔེ་མང་པོ་ཞིག་མཐོང་ལ། མཚོ་ནུབ་ཁུལ་ནི་སོག་རིགས་དང་བོད་རིགས་གཙོ་བྱས་ཏེ། རྒྱ་རིགས་དང་། ཧེ་རིགས། ཧོར་རིགས་སོགས་མི་རིགས་མང་པོ་ཞིག་ཡོད་ལ། ང་ཚོའི་བཅར་འདྲིའི་གོ་རིམ་ཁྲོད་ནས་མི་རིགས་མང་པོའི་འཆམ་མཐུན་དང་འཕེལ་རྒྱས་ཡང་མཐོང་སོང་ཟེར།
