བོད་ལྗོངས་ཀྱི་ལུས་རྩལ་པ་ཚོར་ཨང་དང་པོ་ཐོབ་འདུག

          འགྲན་བསྡུར་བྱ་ཡུལ་ཡིན་པའི་ངོས་ནས།  དགུན་དུས་ཀྱི་ཉི་འོད་གླིང་ཕྲན་གངས་ཤུད་འགྲེམས་ཚོགས་སུ་གངས་འཁྱགས་ཀྱི་ཐོན་ཁུངས་ཧ་ཅང་ཕུན་སུམ་ཚོགས་པོ་ཡོད་པ་དང་།  འགྲན་ལམ་གྱི་ཆ་རྐྱེན་དང་གངས་འཁྱགས་ཀྱི་རིག་གནས་སོགས་ཀྱི་ཐད་དམིགས་བསལ་ལེགས་ཆ་ལྡན་ལ།  འགྲན་བསྡུར་ཁྲོད་ཉི་འོད་གླིང་ཕྲན་མཛེས་ལྗོངས་ཁུལ་གྱི་ས་གཤིས་ཀྱི་རྣམ་པ་དངོས་ལ་བརྟེན་ཏེ་ཡུལ་བབ་དང་བསྟུན་ནས་འགྲན་ལམ་འཆར་འགོད་བྱས་པས“མཛེས་ལྗོངས་ཁྲོད་འགྲན་བསྡུར་བྱེད་པ་དང་འགྲན་བསྡུར་ཁྲོད་མཛེས་ལྗོངས་ལ་མྱོང་རོལ”ཐུབ་པ་དངོས་འབྲེལ་བྱུང་ཡོད།

          ཛ་དྲག་གི་འགྲན་བསྡུར་བྱས་པ་བརྒྱུད་ཧེ་ལུང་ཅང་དང་བོད་ལྗོངས་ཀྱིས་མཉམ་དུ་གསོ་སྐྱོང་བྱས་པའི་རྒྱལ་ཁབ་ཀྱི་དགུན་དུས་ལྕགས་མིའི་རྣམ་གྲངས་གསུམ་གྱི་ལུས་རྩལ་པ་བྱམས་པ་ཆོས་རྒྱལ་ལ་སྐྱེས་པའི་ལོ16ནས29བར་གྱི་ཚོགས་ཆུང་གི་ཨང་དང་པོ་དང་།  ལི་ཁྲའོ་ལ་ཨང་གཉིས་པ།  མིག་དམར་དོན་གྲུབ་ལ་ཨང་གསུམ་པ་བཅས་ཐོབ་ཡོད།  འགྲན་བསྡུར་མཇུག་འགྲིལ་རྗེས་བྱམས་པ་ཆོས་རྒྱལ་གྱིས“དེ་རིང་གནམ་གཤིས་ཧ་ཅང་ཡག་པོ་འདུག་ལ།  འགྲན་ལམ་ཡང་ཧ་ཅང་བདེ་པོ་འདུག  ཐེངས་འདིའི་གངས་ཤུད་འགྲེམས་ཚོགས་ནང་ཞུགས་ཐུབ་པར་བྱུང་ལ་ཨང་དང་པོ་ཡང་ཐོབ་བྱུང་བས་དགའ་ཚོར་ཧ་ཅང་ཆེན་པོ་བྱུང་། སང་ལོ་ད་དུང་ཧར་པིན་དུ་འགྲན་བསྡུར་ནང་ཞུགས་རྒྱུའི་རེ་བ་ཡོད”ཅེས་བཤད།

          བུད་མེད་ཀྱི་ལོ16ནས29བར་གྱི་ཚོགས་ཆུང་ནང་ཝང་ཏན་ཏན་ལ་ཨང་དང་པོ་དང་།  ལུའུ་སེན་ཡའོ་ལ་ཨང་གཉིས་པ།  པེ་ཡན་ཁུན་ལ་ཨང་གསུམ་པ་བཅས་ཐོབ་པ་དང་།  སྐྱེས་པ་དང་བུད་མེད་ཀྱི་ལོ30ནས44བར་གྱི་ཚོགས་ཆུང་ནང་ལི་ཆང་དང་མ་ཆིའུ་ཤང་ལ་ཨང་དང་པོ་ཐོབ་པ།  སྐྱེས་པ་དང་བུད་མེད་ཀྱི་ལོ45ཡན་གྱི་ཚོགས་ཆུང་ནང་སུན་ཁྲེང་དབྱི་དང་རེན་ཧྲུའུ་ཧྥང་ལ་ཨང་དང་པོ་ཐོབ་པ།  སྐྱེས་པའི་རྐང་འཁོར་དང་རྒྱུག་ཤར་རྣམ་གྲངས་གཉིས་ཀྱི་ཚོགས་ཆུང་ནང་ལི་ཏ་ལིན་ལ་ཨང་དང་པོ་ཐོབ་པ།  ལྷག་པ་ཆོས་གྲུབ་དང་བསྟན་འཛིན་གཡུ་ལགས་ལ་སྐྱེས་པ་དང་བུད་མེད་ཀྱི་རྒྱུག་ཤར་དང་གངས་ཤུད་རྣམ་གྲངས་གཉིས་ཀྱི་ཨང་དང་པོ་ཐོབ་པ་དང་ཆབས་ཅིག   ཐེངས་འདིར་ད་དུང་ལུས་རྩལ་པ3171དྲ་ཐོག་འགྲན་བསྡུར་ནང་ཞུགས་ཡོད།

རྩོམ་སྒྲིག་པ།  བསྟན་ཆོས།